ଯୋହନ 14
14
ଯୀଶୁ ନେ ଆବା ଈଶ୍ୱରତାକେ ହାନି ହାଜି
1ଆରେରଗ ଯୀଶୁ ୱେଚ୍ଚାନ୍, “ମି ଗରବ୍ ଚିନ୍ତା ଆମେତ୍। ଈଶ୍ୱରତାକେ ପାର୍ତି କିଜି ମାନାଟ୍। ନାବେ ପା ପାର୍ତିକିୟାଟ୍। 2ନା ଆବା ଈଶ୍ୱର ଇଞ୍ଜ ବେସି ବାକ୍ରାଙ୍ଗ୍ ମାନିକ୍। ହେଦାଙ୍ଗ୍ ଆୱିତିସ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ୱାତାଙ୍ଗ୍ମା। ଆନେଙ୍ଗ୍ ମି କାଜିଙ୍ଗ୍ ର ବାହା ରସ୍ତେଙ୍ଗ୍ ଆନେଙ୍ଗ୍ ହେବେ ହାନାଙ୍ଗା। 3ଆନେଙ୍ଗ୍ ହାଲ୍ଜି ମି କାଜିଙ୍ଗ୍ ବାହା ରସ୍ତି ପାଚେ ଆରେ ୱାନାଙ୍ଗ୍। ତାପାଚେ ମିଙ୍ଗେଙ୍ଗ୍ ନା ହୁଦାଙ୍ଗ୍ ଅସାହାଞ୍ଜ୍ନାଙ୍ଗ୍। ଆନେଙ୍ଗ୍ ଇମେତାକେ ମାନ୍ଗାନାଙ୍ଗ୍ ଏପେଙ୍ଗ୍ ପା ହେବେ ନା ହୁଦାଙ୍ଗ୍ ମାଞ୍ଜେଙ୍ଗ୍ ଆଡ୍ନାଦେର୍। 4ଆନେଙ୍ଗ୍ ଇମେତାକେ ହାନାଙ୍ଗା, ଏପେଙ୍ଗ୍ ହେବେ ହାନି ହାଜି ପୁନାଦେର୍।”
5ଥୋମା ୱେଚ୍ଚାନ୍, “ମାପୃ, ଏନେଙ୍ଗ୍ ଇମେନିପଣ୍ ହାନାୟା, ଆପେଙ୍ଗ୍ ପୁନୁପ୍। ଲାଗିଙ୍ଗ୍ ହେବେ ହାନି ହାଜି ଆପେଙ୍ଗ୍ ଇନେସ୍କିଜି ପୁନାପ୍?”
6ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ହାଜି। ଆନେଙ୍ଗ୍ ସତ୍। ଆରେ ଆନେଙ୍ଗ୍ ଜିବୁନ୍। ଆବା ଈଶ୍ୱରତାକେ ହାଞ୍ଜେଙ୍ଗ୍ ଆନେଙ୍ଗ୍ ନେ ରୱାଙ୍ଗ୍ ହାଜି। 7ଏପେଙ୍ଗ୍ ଯଦି ହାତ୍ପା ନାଙ୍ଗେଙ୍ଗ୍ ପୁନ୍ଞ୍ଜି ମାଚିସ୍, ଲାଗିଙ୍ଗ୍ ଆବା ଈଶ୍ୱରତିଙ୍ଗ୍ ପା ପୁଚାଦେର୍ମା। ନଙ୍ଗୟ୍ ଏପେଙ୍ଗ୍ ହେୱାନିଙ୍ଗ୍ ପୁଚାଦେର୍ନା ଆରେ ହେୱାନିଙ୍ଗ୍ ହୁଡ଼୍ତାଦେର୍ନା।”
8ପିଲିପ ଯୀଶୁଙ୍ଗ୍ ୱେଚ୍ଚାନ୍, “ମାପୃ, ମାଙ୍ଗେଙ୍ଗ୍ ଆବା ଈଶ୍ୱରତିଙ୍ଗ୍ ଚଚ୍ଚା। ମାଙ୍ଗେଙ୍ଗ୍ ହେ ଏଚେକ୍ ଦର୍କାର୍।”
9ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ପିଲିପ, ମିହୁଦାଙ୍ଗ୍ ବେସି ଦିନ୍ତାଙ୍ଗ୍ ମାନାଙ୍ଗା। ହେଦାଙ୍ଗ୍ କାଜିଙ୍ଗ୍ ନାଙ୍ଗେଙ୍ଗ୍ ପୁଞ୍ଜ୍ନି କାତା। ନାଙ୍ଗେଙ୍ଗ୍ ଇନେର୍ ହୁଡ଼୍ଦାତାର୍ନା, ହେୱାନ୍ ଆବା ଈଶ୍ୱରତିଙ୍ଗ୍ ପା ହୁଡ଼୍ତାନ୍ନା। ଲାଗିଙ୍ଗ୍ ଏପେଙ୍ଗ୍ ନାଙ୍ଗେଙ୍ଗ୍ ଇନା କିଦେଙ୍ଗ୍ ଇଞ୍ଜ୍ନାଦେରା, ‘ମାଙ୍ଗେଙ୍ଗ୍ ଆବା ଈଶ୍ୱରତିଙ୍ଗ୍ ଚଚ୍ଚା ଇଞ୍ଜି?’ 10ଆନେଙ୍ଗ୍ ଆବା ଈଶ୍ୱରତାକେ ଆରେ ଆବା ଈଶ୍ୱର ନାବେ ମାନାନ୍? ଏପେଙ୍ଗ୍ ଇନାକା ପାର୍ତି କିନାଦେର୍, ଆନେଙ୍ଗ୍ ଇନା ଇନାକା ୱେଚ୍ନାଙ୍ଗା ହେଦାଙ୍ଗ୍ ନାବେତାଙ୍ଗ୍ ୱାୱାତାତ୍ନା। ମାତର୍ ଆବା ଈଶ୍ୱର ନା ବିତ୍ରେ ମାନ୍ଞ୍ଜି ଇୱିଜୁ କାମାୟ୍ କିନାନା। 11ଆନେଙ୍ଗ୍ ଆବା ଈଶ୍ୱରତାକେ ଆରେ ଆବା ଈଶ୍ୱର ନାବେ ମାନାନ୍। ଏପେଙ୍ଗ୍ ନା ଇ କାତା ପାର୍ତିକିୟାଟ୍। ନଇଲେ ଆନେଙ୍ଗ୍ ଇମ୍ଣିୱିଜୁ ଚାନିଆଆନି କାମାୟ୍ କିତାଙ୍ଗ୍ନା ହେଦାଙ୍ଗ୍ ହୁଡ଼୍ଜି ପାର୍ତିକିୟାଟ୍।
12ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା। ନାବେ ପାର୍ତି କିନାକାର୍, ଆନେଙ୍ଗ୍ ଇନାକା କିତାଙ୍ଗ୍ନା, ହେଦାଙ୍ଗ୍ କିନାଦେର୍। ହେୱାନ୍ ଆନେଙ୍ଗ୍ କିନି କାମାୟ୍ତାଙ୍ଗ୍ ପା ଗାଜା କାମାୟ୍ କିନାନ୍, ଇନେସ୍କି ଆନେଙ୍ଗ୍ ଆବା ଈଶ୍ୱରତାକେ ହାନାଙ୍ଗା। 13ଏପେଙ୍ଗ୍ ନା ତର୍ଦାଙ୍ଗ୍ ଇନାକା ଏନ୍ନାଦେର୍, ଆନେଙ୍ଗ୍ ହେଦାଙ୍ଗ୍ ମି କାଜିଙ୍ଗ୍ ହିଦ୍ନାଙ୍ଗ୍। ଇଦାଙ୍ଗ୍ କାଜିଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତାଙ୍ଗ୍ ଆବା ଈଶ୍ୱର ଜୟ୍-ଜୟ୍ ପାୟା ଆନାନ୍। 14ନା ତର୍ଦାଙ୍ଗ୍ ଏପେଙ୍ଗ୍ ଇନାକା ଆବା ଈଶ୍ୱରତିଙ୍ଗ୍ ଏନ୍ନାଦେର୍, ଆନେଙ୍ଗ୍ ହେଦାଙ୍ଗ୍ କିନାଙ୍ଗ୍।
ଯୀଶୁ ପବିତ୍ର ଆତ୍ମା ହିନି ବିଷୟରେ ୱେଚ୍ଚାନ୍
15ନାଙ୍ଗେଙ୍ଗ୍ ଯଦି ଏପେଙ୍ଗ୍ ଲାଡ୍ କିଦ୍ନାଦେର୍, ଲାଗିଙ୍ଗ୍ ନା ଆଦେସ୍ତାଙ୍ଗ୍ ଏପେଙ୍ଗ୍ କାମାୟ୍ କିନାଦେର୍। 16ଆନେଙ୍ଗ୍ ଆବା ଈଶ୍ୱରତିଙ୍ଗ୍ ପାର୍ତାନା କିଜି ଏନ୍ନାଙ୍ଗ୍, ଆରେ ହେୱାନ୍ ମିଙ୍ଗେଙ୍ଗ୍ ଆରେ ରକାନ୍ କାମାୟ୍ତିଙ୍ଗ୍ ସାଇଜ କିଦ୍ଦେଙ୍ଗ୍ ପକ୍ତାନାନ୍। ଆରେ ହେୱାନ୍ କାମାୟ୍ କିନାକାନିଙ୍ଗ୍ ମି ଲାଗାୟ୍ ୱିଜୁଦିନ୍ ମାନ୍ଗେଦେଙ୍ଗ୍ ୱେଚ୍ନାନ୍। 17ହେ କାମାୟ୍ କିନାକାନ୍ ରକାନ୍ ପବିତ୍ର ଆତ୍ମା, ହେୱାନ୍ ୱିଜୁ ସତ୍ ହାଜି ଚଚ୍ଚାନାନ୍। ଇ ପୁର୍ତି ହେୱାନିଙ୍ଗ୍ ଆସ୍ତେଙ୍ଗ୍ ଆଡୁତ୍। ଇନେସ୍କି ପୁର୍ତି ହେୱାନିଙ୍ଗ୍ ପୁନ୍ୱାତାତ୍ନା। ମାତର୍ ଏପେଙ୍ଗ୍ ହେୱାନିଙ୍ଗ୍ ପୁଚାଦେର୍ନା। ହେୱାନ୍ ମିହୁଦାଙ୍ଗ୍ ମାନ୍ଗାନାନ୍, ଆରେ ମି ଗରବ୍ତାକେ ବାହା କିଦ୍ନାନ୍। 18ଆନେଙ୍ଗ୍ ମିଙ୍ଗେଙ୍ଗ୍ ଟୁରା ହିମ୍ଣା ଲେକେକିଜି ପିସ୍ତି ହାଞ୍ଜୁଙ୍ଗା। ଆନେଙ୍ଗ୍ ଆରେରଗ ମି ଲାଗାୟ୍ ଲେଉଟା ଆଜି ୱାନାଙ୍ଗ୍। 19କେତ୍ଦିନ୍ ପାଚେ ଇ ପୁର୍ତିନି ମାନାୟାର୍ ନାଙ୍ଗେଙ୍ଗ୍ ଆରେ ହୁଡ଼୍ଦେଦେଙ୍ଗ୍ ଆଡ଼୍ଦୁର୍। ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ହୁଡ଼୍ଦାନାଦେର୍। ଇନେସ୍କି ଆନେଙ୍ଗ୍ ଜିବୁନ୍ ମାନାଙ୍ଗ୍, ଏପେଙ୍ଗ୍ ପା ଜିବୁନ୍ ମାନ୍ଗାନାଦେର୍। 20ଏପେଙ୍ଗ୍ ହେ ଦିନ୍ ପୁନାଦେର୍ ଯେ, ଆନେଙ୍ଗ୍ ଆବା ଈଶ୍ୱରତାକେ ମାନାଙ୍ଗା। ଆରେ ଏପେଙ୍ଗ୍ ନାବେ ଆରେ ଆନେଙ୍ଗ୍ ମିବେ ମାନାଙ୍ଗ୍। 21ଇମ୍ଣାକାନ୍ ନା ଆଦେସ୍ତିଙ୍ଗ୍ ପୁନାନ୍ ଆରେ ମାନି କିନାନ୍, ହେୱାନ୍ ହାତ୍ପା ନାଙ୍ଗେଙ୍ଗ୍ ଲାଡ୍ କିଦ୍ନାନା। ଆରେ ନାଙ୍ଗେଙ୍ଗ୍ ଲାଡ୍ କିଦ୍ନାକାର୍ ନା ଆବା ଈଶ୍ୱରତିଙ୍ଗ୍ ଲାଡ୍ କିନାନ୍। ଆନେଙ୍ଗ୍ ହେୱାନିଙ୍ଗ୍ ଲାଡ୍ କିନାଙ୍ଗ୍ ଆରେ ଜାର୍ତିଙ୍ଗ୍ ହେୱାନ୍ତାକେ ଚଚ୍ନାଙ୍ଗ୍।”
22ତାପାଚେ ଯିହୁଦା ଇୱାନ୍ ଇଷ୍କାରିତିୟ ଯିହୁଦା ଆକାୟ୍, ହେୱାନିଙ୍ଗ୍ ୱେନ୍ବାତାନ୍, “ଏ ମାପୃ, ପୁର୍ତିତିଙ୍ଗ୍ ଇନା କିଦେଙ୍ଗ୍ ଚଞ୍ଜିଆନାୟା? ମାତର୍ ଏନେଙ୍ଗ୍ ଇନା କିଦେଙ୍ଗ୍ ମାଙ୍ଗେଙ୍ଗ୍ ଚଚିୟାଆନି କାଜିଙ୍ଗ୍ ଜଜ୍ନା କିନାୟା?”
23ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଇନେର୍ ଯଦି ନାଙ୍ଗେଙ୍ଗ୍ ଲାଡ୍ କିଦ୍ନାନ୍, ଲାଗିଙ୍ଗ୍ ହେୱାନ୍ ନା ଆଦେସ୍ତିଙ୍ଗ୍ ମାନି କିନାନ୍। ଆରେ ନା ଆବା ଈଶ୍ୱର ହେୱାନିଙ୍ଗ୍ ଲାଡ୍ କିନାନ୍। ନା ଆବା ଈଶ୍ୱର ଆରେ ଆନେଙ୍ଗ୍ ହେ ମାନାୟ୍ତାକେ ୱାନାପ୍ ଆରେ ତା ହୁଦାଙ୍ଗ୍ ମାନ୍ଗାନାପ୍। 24ମାତର୍ ଇମ୍ଣାକାନ୍ ନାଙ୍ଗେଙ୍ଗ୍ ଲାଡ୍ କିଦୁନ୍, ହେୱାନ୍ ନା କାତା ମାନିକିଉନ୍। ନାବେତାଙ୍ଗ୍ ଇମ୍ଣି କାତା ଏପେଙ୍ଗ୍ ୱେଚାଦେର୍ନା, ହେଦାଙ୍ଗ୍ ନାଦି ଆକାୟ୍। ମାତର୍ ଇଦାଙ୍ଗ୍ ନାଙ୍ଗେଙ୍ଗ୍ ପକ୍ତିତି ଆବା ଈଶ୍ୱରତି। 25ଆନେଙ୍ଗ୍ ମିହୁଦାଙ୍ଗ୍ ମାନିହିଙ୍ଗ୍ ଇୱିଜୁ କାତା ମିଙ୍ଗେଙ୍ଗ୍ ୱେଚ୍ଚାତାଙ୍ଗ୍ନା। 26ମାତର୍ ମିଙ୍ଗେଙ୍ଗ୍ ସାଇଜ କିଦ୍ନାକାର୍, ପବିତ୍ର ଆତ୍ମାତିଙ୍ଗ୍ ଆବା ଈଶ୍ୱର ନା ତର୍ଦାଙ୍ଗ୍ ପକ୍ତାନାନ୍, ହେୱାନ୍ ମିଙ୍ଗେଙ୍ଗ୍ ୱିଜୁ ହିକ୍ଷା ହିଦ୍ନାନ୍। ଆରେ ଆନେଙ୍ଗ୍ ଇମ୍ଣି-ଇମ୍ଣି କାତା ୱେଚ୍ଚାତାଙ୍ଗ୍ନା, ହେୱାନ୍ ହେ ୱିଜୁ କାତା ମିଙ୍ଗେଙ୍ଗ୍ ମାନ୍ତ ଏତୁ କି କିଦ୍ନାନ୍।
27ଆନେଙ୍ଗ୍ ମିଙ୍ଗେଙ୍ଗ୍ ଶାନ୍ତି ହିଜି ହାନାଙ୍ଗା। ଇ ଶାନ୍ତି ନାଦି, ଇନାକା ମିଙ୍ଗେଙ୍ଗ୍ ହିଦ୍ନାଙ୍ଗା। ପୁର୍ତିନି ଇଲେକେ ଶାନ୍ତି ଆନେଙ୍ଗ୍ ମିଙ୍ଗେଙ୍ଗ୍ ହିଦୁଙ୍ଗା। ଲାଗିଙ୍ଗ୍ ଏପେଙ୍ଗ୍ ମି ମାନ୍ତ ଦୁକ୍ କିଜି ପାଣ୍ଡ୍ରା ଆମାଟ୍। 28ଏପେଙ୍ଗ୍ ନା କାତା ୱେଚାଦେର୍ନା, ‘ଆନେଙ୍ଗ୍ ହାନାଙ୍ଗା, ମାତର୍ ଆରେ ମି ଲାଗାୟ୍ ୱାନାଙ୍ଗ୍।’ ଏପେଙ୍ଗ୍ ଯଦି ନାଙ୍ଗେଙ୍ଗ୍ ହାତ୍ପା ଲାଡ୍କିଜି ମାନ୍ଗାନାଦେର୍, ଲାଗିଙ୍ଗ୍ ଏପେଙ୍ଗ୍ ୱାରି ଆନାଦେର୍, ଆନେଙ୍ଗ୍ ଆବା ଈଶ୍ୱରତାକେ ହାନାଙ୍ଗା ଇଞ୍ଜି। ଇନେସ୍କି ନା ଆବା ଈଶ୍ୱର ନାବେତାଙ୍ଗ୍ ଗାଜାକାନ୍। 29ହେଲେକେ ଗଟାଆନିହିଙ୍ଗ୍, ଏପେଙ୍ଗ୍ ନାଙ୍ଗେଙ୍ଗ୍ ପାର୍ତି କିଦ୍ନାଦେର୍। ହେଦାଙ୍ଗ୍ କାଜିଙ୍ଗ୍ ଇ ୱିଜୁଗଟ୍ନା ଗଟାଆୱି ଆଗେ ଆନେଙ୍ଗ୍ ମିଙ୍ଗେଙ୍ଗ୍ ୱିଜୁ ବିଷୟରେ ପାର୍ତି କିଦେଙ୍ଗ୍ ୱେଚ୍ଚାନାଙ୍ଗା।
30ଆନେଙ୍ଗ୍ ମିହୁଦାଙ୍ଗ୍ ଆରେ ବେସି ବେଣ୍ କିଦ୍ଦେଙ୍ଗ୍ ଆଡ଼୍ଦୁଙ୍ଗ୍। ଇ ପୁର୍ତିନି ସାସନ୍ କିନାକାନ୍ ୱାନାନା, ଆରେ ନାବେ ହେୱାନ୍ତି ଇନାକାପା ଆଦିକାର୍ ହିଲୁତ୍। 31ମାତର୍ ଇ ପୁର୍ତି ପୁନି ଦର୍କାର୍ ଯେ, ଆନେଙ୍ଗ୍ ଆବା ଈଶ୍ୱରତିଙ୍ଗ୍ ଲାଡ୍ କିନାଙ୍ଗ୍। ଲାଗିଙ୍ଗ୍ ଆବା ଈଶ୍ୱର ନାଙ୍ଗେଙ୍ଗ୍ ଇନେସ୍ ଲେକେ ୱେଚ୍ଚାତାନ୍ନା, ଆନେଙ୍ଗ୍ ଟିକ୍ ହେଲେକେ କିନାଙ୍ଗ୍। ଜାଡ ଆସେଙ୍ଗ୍ ଇ ବାହାତାଙ୍ଗ୍ ହାନାସ୍।”
Currently Selected:
ଯୋହନ 14: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
