ଯୋହନ 4
4
ର ଶମିରଣିୟ କଗ୍ଲେ ହୁଦାଙ୍ଗ୍ ଯୀଶୁ ବେଣ୍ବାଟ୍ ଆତି ବିଷୟ
1ଯୀଶୁ ଡୁବନ୍ହିନି ଯୋହନତାଙ୍ଗ୍ ଆଦିକ୍ ଚେଲା ରହ୍ନାନା ଆରେ ଡୁବନ୍ ହିନାନା, ଇ କାବୁର୍ ପାରୁସିଦଳ୍ ୱେଚାର୍। 2ମାତର୍ ଯୀଶୁ ମାନାୟାରିଙ୍ଗ୍ ଡୁବନ୍ ହିୱାଦାଙ୍ଗ୍ ମାଚାନ୍। ତା ଚେଲାହିର୍ ମାନାୟାରିଙ୍ଗ୍ ଡୁବନ୍ହିଜି ମାଚାର୍। ପାରୁସିଦଳ୍ ୱେଚାର୍ନା ଇଞ୍ଜି ଯୀଶୁ ପୁଚାନ୍। 3ଲାଗିଙ୍ଗ୍ ଯୀଶୁ ହେପାଦ୍ନା ଯିହୁଦା ଜିଲ୍ଲା ପିସ୍ତି ଆରେରଗ ଗାଲିଲୀ ଜିଲ୍ଲାତ ହାଚାନ୍।
4ଯୀଶୁ ଗାଲିଲୀ ଜିଲ୍ଲାତ ହାଚିହିଙ୍ଗ୍ ହେୱାନିଙ୍ଗ୍ ଶମିରଣିୟ ଜିଲ୍ଲା ନିପଣ୍ଡାଙ୍ଗ୍ ଆଜି ହାଚାନ୍। 5ଯୀଶୁ ସୁଖାର ତର୍ଦି ଶମିରଣନି ର ନାସ୍ ଏକାତାନ୍। ଇ ଜିଲ୍ଲା ଯାକୁବ ତା ମେହି ଯୋଷେପ୍ତିଙ୍ଗ୍ ହିତି ଜମି ହିଜିମାଚାନ୍। 6ଯାକୁବତି ର କୁଁକଡ଼ି ହେବେ ମାଚାତ୍। ଯୀଶୁ ତାଙ୍ଗ୍ଜି-ତାଙ୍ଗ୍ଜି ୱାସ୍ତି ମାଚାନ୍। ଲାଗିଙ୍ଗ୍ ହେ କୁଁକଡ଼ି ଲାଗାୟ୍ ହାଲ୍ଜି କୁଚ୍ଚାନ୍। ହେପାଦ୍ନା ମୁଣ୍ଡିମେଦାଣ୍ ଆଜି ମାଚାତ୍। 7ହେପାଦ୍ନା ଶମିରଣିୟ କଗ୍ଲେ ହେ କୁଁକଡ଼ିନି ଏଜୁଙ୍ଗ୍ ଜେଲ୍ଦେଙ୍ଗ୍ ୱାତାତ୍। ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ନାଙ୍ଗେଙ୍ଗ୍ ଦୟାକିଜି ଉଣ୍ଡେଙ୍ଗ୍ ଇଚୁଡ଼ିଙ୍ଗ୍ ଏଜୁଙ୍ଗ୍ ହିଦା।” 8ହେପାଦ୍ନା ତା ଚେଲାହିର୍ କାଦି କଡ଼୍ଦେଙ୍ଗ୍ ସହର୍ତାକେ ହାଲ୍ଜି ମାଚାର୍।
9ହେ ଶମିରଣିୟ କଗ୍ଲେ ଯୀଶୁଙ୍ଗ୍ ୱେଚ୍ଚାତ୍, “ଏନେଙ୍ଗ୍ ରକାଇ ଯିହୁଦି ଆରେ ଆନେଙ୍ଗ୍ ରଞ୍ଜେଲ୍ ଶମିରଣିୟ କଗ୍ଲେତଙ୍ଗ୍। ଆରେ ଏନେଙ୍ଗ୍ ନା କେଇନି ଏଜୁଙ୍ଗ୍ ଉଣାଇ କି? ଇନେସ୍କି ଯିହୁଦିର୍ ଶମିରଣିୟ ହୁଦାଙ୍ଗ୍ ମିତ୍ର କିଉର୍।”
10ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ଈଶ୍ୱର ହିତି ଜିନିଷ୍ ବିଷୟରେ ପୁନ୍ୱାତାଇନା। ନିଙ୍ଗେଙ୍ଗ୍ ଏଜୁଙ୍ଗ୍ ଏନ୍ତିନି ମାନାୟ୍ତିଙ୍ଗ୍ ଏନେଙ୍ଗ୍ ପୁନୁୟେ। ଏନେଙ୍ଗ୍ ଯଦି ଇ ୱିଜୁବେଣ୍ ପୁଚାଇମା, ଲାଗିଙ୍ଗ୍ ଏନେଙ୍ଗ୍ ନାଙ୍ଗେଙ୍ଗ୍ ଏନ୍ତାତାଇମା। ଆରେ ଆନେଙ୍ଗ୍ ନିଙ୍ଗେଙ୍ଗ୍ ଜିବୁନ୍ ଏଜୁଙ୍ଗ୍ ହିତ୍ତାଙ୍ଗ୍ମା।”
11ହେ କଗ୍ଲେ ୱେଚ୍ଚାତ୍, “ଆଜ୍ଞା, ଏନେଙ୍ଗ୍ ଇମେତାଙ୍ଗ୍ ହେ ଜିବୁନ୍ ଏଜୁଙ୍ଗ୍ ଗାଟାଆନାୟ୍? କୁଁତ ବେସି ଡେଙ୍ଗା ଆରେ ଏଜୁଙ୍ଗ୍ ଜେଲ୍ଦେଙ୍ଗ୍ ନିବେ ଇନାକା ହିଲୁତ୍। 12ଏନେଙ୍ଗ୍ ଇନାକା ମା ଆକଦାଦି ଯାକୁବତାଙ୍ଗ୍ ଗାଜାକାୟ୍? ଯାକୁବ ନେ ମାଙ୍ଗେଙ୍ଗ୍ ଇ କୁଁ ହିଜିମାନ୍ଞ୍ଚାନ୍। ହେୱାନ୍ ନିଜେ ଇ କୁଁନି ଏଜୁଙ୍ଗ୍ ଉଣ୍ଜି ମାଚାନ୍। ତା ମେହିର୍ ଆରେ ୱିଜୁ ପଶୁଙ୍ଗ୍ ପା ଇ କୁଁନି ଏଜୁଙ୍ଗ୍ ଉଣ୍ଜି ମାଚିକ୍।”
13ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ଇମ୍ଣି ମାନାୟ୍ ପା ଇ ଏଜୁଙ୍ଗ୍ ଉଟିସ୍ ଆରେରଗ ଏସ୍କି ଆନାର୍। 14ମାତର୍ ଆନେଙ୍ଗ୍ ଇମ୍ଣି ଏଜୁଙ୍ଗ୍ ଉଣ୍ଡେଙ୍ଗ୍ ହିଦ୍ନାଙ୍ଗ୍, ହେଦାଙ୍ଗ୍ ଇମ୍ଣାକାନ୍ ଉଣାନ୍, ହେୱାନ୍ ଇନାୱେଡ଼ାଙ୍ଗ୍ ପା ଏସ୍କି ଆଉନ୍। ଆନେଙ୍ଗ୍ ହିଦ୍ନି ଏଜୁଙ୍ଗ୍ ୱିଜ୍ୱି ଜିବୁନ୍ ପାତେକ୍ ଜାରିଆ ଲେକେ ୱିଜୁଦିନ୍ ହତ୍ନାତ୍।”
15ହେ କଗ୍ଲେ ଯୀଶୁଙ୍ଗ୍ ୱେଚ୍ଚାତ୍, “ଆଜ୍ଞା, ନାଙ୍ଗେଙ୍ଗ୍ ହେ ଏଜୁଙ୍ଗ୍ ହିଦା। ଆନେଙ୍ଗ୍ ଆରେ ଇନାୱେଡ଼ାଙ୍ଗ୍ ପା ଏସ୍କି ଆଉଙ୍ଗ୍। ଆରେ ଆନେଙ୍ଗ୍ ଇବେ ଏଚେକ୍ ଦେହା ଇନାୱେଡ଼ାଙ୍ଗ୍ ପା ଏଜୁଙ୍ଗ୍ ତାକା ୱାଉଙ୍ଗ୍।”
16ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ହାଲା, ନି ଡକ୍ରାଦିଙ୍ଗ୍ କୁକ୍ଚି ଇବେ ତାସିୱା।”
17ହେ କଗ୍ଲେ ୱେଚ୍ଚାତ୍, “ନାଙ୍ଗେଙ୍ଗ୍ ଆଣ୍ଡ୍ରା ହିଲୁନ୍।”
ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ଟିକ୍ କାତା ୱେଚ୍ନାୟା ନି ଡକ୍ରାଦି ହିଲୁନ୍। 18ମାତର୍ ନିଙ୍ଗେଙ୍ଗ୍ ପାଞ୍ଚ୍ଜାଣ୍ ଡକ୍ରାଦିର୍ ମାଚାର୍। ଏନେଙ୍ଗ୍ ନଙ୍ଗୟ୍ ଇମ୍ଣି ମାନାୟ୍ ହୁଦାଙ୍ଗ୍ ମାନାଇ, ହେୱାନ୍ ନି ଡକ୍ରାଦି ଆକାୟ୍। ଏନେଙ୍ଗ୍ ନାଙ୍ଗେଙ୍ଗ୍ ସତ୍ ୱେଚ୍ଚାତାଇ।”
19ହେ କଗ୍ଲେ ୱେଚ୍ଚାତ୍, “ଆଜ୍ଞା, ଆନେଙ୍ଗ୍ ପୁନାଙ୍ଗ୍ ଏନେଙ୍ଗ୍ ରକାଇ ଭବିଷ୍ଯତବକ୍ତା।” 20ଲାଗିଙ୍ଗ୍ ଏନେଙ୍ଗ୍ ନାଙ୍ଗେଙ୍ଗ୍ ନଙ୍ଗୟ୍ ୱେଚ୍ଚା, “ମା ଆକଦାଦିର୍ ଇ ମାଡ଼ିତାକେ ପୁଜାକିଜି ମାଚାର୍। ମାତର୍ ଯିହୁଦି ନେତାର୍ ୱେଚ୍ନାରା ଈଶ୍ୱରତିଙ୍ଗ୍ ପୁଜାକିନି ବାହା ଯିରୁଶାଲାମ ସହର୍ତାକେ ମାନାତ୍।”
21ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ଏ ଗାଡ଼୍ଚେ, ନାଙ୍ଗେଙ୍ଗ୍ ପାର୍ତି କିଦା। ଇଲେଗ୍ଦି ସମୟ୍ ୱାନାତା ଏଚେପାଦ୍ନା ଏପେଙ୍ଗ୍ ସରଗ୍ନି ଆବାଙ୍ଗ୍ ଇ ମାଡ଼ିତାକେ କି ଯିରୁଶାଲାମ ସହର୍ତାକେ ପୁଜା କିଉଦେର୍। 22ଏପେଙ୍ଗ୍ ଶମିରଣିୟ କାଦେର୍ ଇନାକା ପୁନ୍ୱାଦାଙ୍ଗ୍ କି ବୁଜାଆୱାଦାଙ୍ଗ୍ ପୁଜା କିନାଦେର୍। ମାତର୍ ଆପେଙ୍ଗ୍ ଯିହୁଦିକାପ୍ ଇନେରିଙ୍ଗ୍ ୱିଜୁ ପୁନାପ୍ ହେୱାନିଙ୍ଗ୍ ପୁଜା କିନାପ୍। ଯିହୁଦିର୍ ମାନାୟ୍ତାଙ୍ଗ୍ ଉଦାର୍ କିଦ୍ନାକାନ୍ ପୁର୍ତିତାକେ ୱାନାନ୍। 23ମାତର୍ ଇଲେଗ୍ଦି ସମୟ୍ ୱାନାତା, ସତ୍ତାଙ୍ଗ୍ ହେବାକିନି ମାନାୟାର୍ ଆବା ଈଶ୍ୱରତିଙ୍ଗ୍ ଆରେ ଆତ୍ମାତିଙ୍ଗ୍ ସତ୍ତାଙ୍ଗ୍ ପୁଜା କିନାର୍। ହେ ସମୟ୍ ନଙ୍ଗୟ୍ ୱାତାତ୍ନା। ଇନେସ୍କି ଆବା ଈଶ୍ୱରତିଙ୍ଗ୍ ପୁଜା କିନାକାରିଙ୍ଗ୍ ଇଚାକିନାନ୍। 24ଈଶ୍ୱର ନେ ଆତ୍ମା। ଲାଗିଙ୍ଗ୍ ଈଶ୍ୱରତିଙ୍ଗ୍ ପୁଜା କିନାକାର୍ ଆତ୍ମା ଆରେ ସତ୍ତାଙ୍ଗ୍ ହେୱାନିଙ୍ଗ୍ ପୁଜାକିନି ଦର୍କାର୍।”
25ହେ କଗ୍ଲେ ହେୱାନିଙ୍ଗ୍ ୱେଚ୍ଚାତ୍, “ଆନେଙ୍ଗ୍ ପୁନାଙ୍ଗ୍ ଯେ ଖ୍ରୀଷ୍ଟ ୱାନାନା। ଏଚେପାଦ୍ନା ହେୱାନ୍ ୱାଜି ମାଙ୍ଗେଙ୍ଗ୍ ଇ ୱିଜୁବେଣ୍ ବୁଜାଇ କିଦ୍ନାନ୍।”
26ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ଇମ୍ଣି ମାନାୟ୍ ନଙ୍ଗୟ୍ ନି ହୁଦାଙ୍ଗ୍ ବେଣ୍ କିଦ୍ନାନା। ହେୱାନ୍ ନିଜେ ରକ୍ଷାକିଦ୍ନାକାନ୍।”
27ହେପାଦ୍ନା ଯୀଶୁ ଚେଲାହିର୍ ସହର୍ତାଙ୍ଗ୍ ୱାତାର୍। ହେୱାର୍ ଯୀଶୁଙ୍ଗ୍ ର କଗ୍ଲେ ହୁଦାଙ୍ଗ୍ ବେଣ୍ବାଟ୍ କିବା ଆନାକା ହୁଡ଼୍ଜି ଚାନିଆଆତାର୍। ମାତର୍ ଇନେର୍ ପା ହେୱାନିଙ୍ଗ୍ ୱେନ୍ବେଦେଙ୍ଗ୍ ଶାସ୍ କିୱାତାର୍, “ନିଙ୍ଗେଙ୍ଗ୍ ଇନାକା ଦର୍କାର୍,” ଆରେ “ଏନେଙ୍ଗ୍ ଇନା କିଦେଙ୍ଗ୍ ହେୱାନ୍ ହୁଦାଙ୍ଗ୍ ବେଣ୍ କିନାୟା?” 28ତାପାଚେ ହେ କଗ୍ଲେ ତା ଏଜ୍ଟାଙ୍ଗା ପିସ୍ତି ସହର୍ତ ହାଚାତ୍। ହେବେ ଏକିସ୍ ହେ କଗ୍ଲେ ମାନାୟାରିଙ୍ଗ୍ ୱେଚ୍ଚାତ୍, 29“ୱାଡ! ରକାନିଙ୍ଗ୍ ହୁଡ଼୍ନାଦେର୍। ଆନେଙ୍ଗ୍ ଇନା ଇନାକା କିତାଙ୍ଗ୍ନା, ହେ ୱିଜୁବେଣ୍ ହେୱାନ୍ ନାଙ୍ଗେଙ୍ଗ୍ ୱେଚ୍ଚାତାନ୍। ହେୱାନ୍ନେ ଖ୍ରୀଷ୍ଟ ଆଜି ମାନ୍ଗାନାନ୍?” 30ଲାଗିଙ୍ଗ୍ ମାନାୟାର୍ ସହର୍ ପିସ୍ତି ଯୀଶୁଙ୍ଗ୍ ହୁଡ଼୍ଦେଙ୍ଗ୍ ହାଚାର୍।
31ହେପାଦ୍ନା ଯୀଶୁ ଚେଲାହିର୍ ହେୱାନିଙ୍ଗ୍ ଗୁୱାରି କିଜି ୱେଚ୍ଚାର୍, “ଗୁରୁ ଇନାକାପା ଇଚ୍କେ ତିନା।” 32ମାତର୍ ଯୀଶୁ ୱେଚ୍ଚାନ୍, “ନା ଲାଗାୟ୍ ଇମ୍ଣି କାଦି ମାନାତ୍, ତା ବିଷୟରେ ଏପେଙ୍ଗ୍ ପୁନୁଦେରେ।”
33ଲାଗିଙ୍ଗ୍ ଚେଲାହିର୍ ଜାର୍-ଜାର୍ବିତ୍ରେ ବେଣ୍କିବାଆତାର୍, “ହେୱାନ୍ କାଜିଙ୍ଗ୍ ଇନେର୍ କାଦି ଇଚ୍କେ ତାସିହିତାର୍ କି?”
34ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆବା ଈଶ୍ୱର ନାଙ୍ଗେଙ୍ଗ୍ ପକ୍ତାତାନ୍ନା, ତା ଇଚା ମାନିକିଜି ଆରେ ତା କାମାୟ୍ ପୁରା କିନାକା ନେ ନା କାଦି। 35ଏପେଙ୍ଗ୍ ଏଚେପାଦ୍ନା ଇନାକା ୱିତ୍ନାଦେର୍, ହେପାଦ୍ନା ଏପେଙ୍ଗ୍ ଇଞ୍ଜିମାନାଦେର୍, ତାସ୍ କାଟାବେଟା କିଦେଙ୍ଗ୍ ଆରେ ଚାରି ମାସ୍ ବାକି ମାନାତ୍। ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ‘ଏପେଙ୍ଗ୍ ମାନାୟାରିଙ୍ଗ୍ ଇଟ୍କାଡ଼୍ କିଜି ହୁଡ଼ାଟ୍। ହେୱାର୍ ତାସ୍ ହେନ୍ତି ଜମି ଲେକେ, ମାନାୟାର୍ ନା କାତା ୱେଞ୍ଜେଙ୍ଗ୍ ଇଚା କିନାରା। 36ନଙ୍ଗୟ୍ ପା ଇମ୍ଣାକାର୍ କାମାୟ୍ କିନାକାନ୍ ହାଜ୍ରି ପାୟାଆନାର୍। ହେୱାନ୍ ୱିଜ୍ୱି ଜିବୁନ୍ କାଜିଙ୍ଗ୍ ତାସ୍ ରୁଣ୍ଡାଇ କିନାନା। ଲାଗିଙ୍ଗ୍ ୱିତ୍ନାକାନ୍ ଆରେ ତେଜ୍ନାକାନ୍ ରିକାର୍ ମେହାଆଜି ୱାରି କିନାର୍। 37ଇନେସ୍କି ରକାନ୍ ୱିତ୍ନାନ୍ ଆରେ ରକାନ୍ ତାସ୍ ତେଜ୍ନାନ୍, ଇ କାତା ସତ୍।’ 38ଏପେଙ୍ଗ୍ ଇମ୍ଣି ଜମିତ ୱିତ୍ୱାଦାଙ୍ଗ୍ ମାଚାଦେର୍, ହେଦାଙ୍ଗ୍ ତେଜ୍ଦେଙ୍ଗ୍ ପକ୍ତାନାଙ୍ଗା। ଜେକନିକାର୍ କାମାୟ୍ କିତାର୍ନା, ଏପେଙ୍ଗ୍ ହେୱାର୍ କାମାୟ୍ତାଙ୍ଗ୍ ଲାବ୍ ପାୟାଆତାଦେର୍।”
39ଶମିରଣିୟ ସହର୍ନି କେତେକ୍ ମାନାୟ୍ ହେ କଗ୍ଲେ କାତା ୱେନ୍ଞ୍ଜି ଯୀଶୁଙ୍ଗ୍ ପାର୍ତି କିତାର୍। ହେଦେଲ୍ ହେୱାରିଙ୍ଗ୍ ୱେଚ୍ଚାତ୍, “ଯୀଶୁ ଆନେଙ୍ଗ୍ ଆଗେ କିତି ୱିଜୁଗଟ୍ନା ୱିଜୁ ୱେଚ୍ଚାତାନ୍।” 40ହେ ଶମିରଣିୟ୍ନି ମାନାୟାର୍ ଯୀଶୁ ଲାଗାୟ୍ ହାଚାର୍। ହେୱାର୍ ହେୱାନିଙ୍ଗ୍ ତା ହୁଦାଙ୍ଗ୍ କେତ୍ଦିନ୍ ମାଞ୍ଜେଙ୍ଗ୍ ଗୁୱାରି କିତାର୍। ଲାଗିଙ୍ଗ୍ ଯୀଶୁ ହେବେ ରିଦିନ୍ ମାଚାନ୍। 41ଯୀଶୁତାଙ୍ଗ୍ ବେଣ୍ ୱେନ୍ଞ୍ଜି ବେସିହେନି ମାନାୟାର୍ ହେୱାନିଙ୍ଗ୍ ପାର୍ତି କିତାର୍। 42ମାନାୟାର୍ ହେ କଗ୍ଲେଙ୍ଗ୍ ୱେଚ୍ଚାର୍, “ପାର୍ତୁମ୍ ଆପେଙ୍ଗ୍ ନି ବେଣ୍ ୱେନ୍ଞ୍ଜି ଯୀଶୁଙ୍ଗ୍ ପାର୍ତି କିୱାଦାଙ୍ଗ୍ ମାଚାପ୍। ମାତର୍ ନଙ୍ଗୟ୍ ଆପେଙ୍ଗ୍ ନିଜେ ତା ବେଣ୍ ୱେଚାପ୍ ଆରେ ପୁଚାପ୍, ଲାଗିଙ୍ଗ୍ ପାର୍ତି କିତାପ୍ନା। ଆପେଙ୍ଗ୍ ନଙ୍ଗୟ୍ ପୁନାପା ଯେ, ଇୱାନ୍ନେ ପୁର୍ତିନି ଉଦାର୍ କିଦ୍ନାକାନ୍।”
ରାଜା କାମାୟ୍ କିନି ମେହିଙ୍ଗ୍ ଯୀଶୁ ହାର୍କିତାନ୍
43ହେବେ ରିଦିନ୍ ମାନ୍ଞ୍ଜି ଯୀଶୁ ଗାଲିଲୀ ଜିଲ୍ଲାତାକେ ହାଚାନ୍। 44ଯୀଶୁ ଆଗେ ୱେଚ୍ଚି ମାଚାନ୍ ରକାନ୍ ଭବିଷ୍ଯତବକ୍ତା ଜାର୍ ସହର୍ତାକେ ସନ୍ମାନ୍ ପାୟା ଆଉନ୍। 45ଯୀଶୁ ଗାଲିଲୀ ଜିଲ୍ଲାତାକେ ଇକାତାନ୍, ହେବେ ମାନାୟାର୍ ହେୱାନିଙ୍ଗ୍ କୁକ୍ତାର୍। ଆଗେ ଯିରୁଶାଲାମ ସହର୍ତାକେ ନିସ୍ତାର୍ ପାର୍ବୁ ତିନିହିଙ୍ଗ୍ ହେୱାର୍ ହେୱାନ୍ କିତି କାମାୟ୍ ୱିଜୁ ହୁଡ଼୍ଜି ମାଚାର୍। ହେ ମାନାୟାର୍ ପାର୍ବୁ ତିନିହିଙ୍ଗ୍ ପା ମାଚାର୍।
46ଯୀଶୁ ଗାଲିଲୀ ଜିଲ୍ଲାନି କାନ୍ନା ସହର୍ତାକେ ଆରେରଗ ହାଚାନ୍। କାନ୍ନା ସହର୍ତାକେ ହେୱାନ୍ ଏଜୁକାଙ୍ଗ୍ ଅଙ୍ଗୁର୍ ରାସ୍ କିଜି ମାଚାନ୍। ହେବେ ରାଜା ଇଞ୍ଜ କାମାୟ୍ କିନାକାନ୍ ମାଚାନ୍, ତା ମେହି କପୁର୍ନାହୁମ୍ ସହର୍ତାକେ ନଚ୍ଚି ମାଚାନ୍। 47ରାଜା ଇଞ୍ଜ କାମାୟ୍ କିନି ମାନାୟ୍ ୱେଚାନ୍ ଯେ, ଯୀଶୁ ଯିହୁଦା ଜିଲ୍ଲାତାଙ୍ଗ୍ ୱାଜି ଗାଲିଲୀ ଜିଲ୍ଲାତାକେ ମାନାନ୍, ଲାଗିଙ୍ଗ୍ ହେୱାନ୍ ଯୀଶୁ ଲାଗାୟ୍ ହାଚାନ୍। ଆରେ କପୁର୍ନାହୁମ୍ ସହର୍ତାକେ ୱାଜି ତା ମେହିଙ୍ଗ୍ ହାର୍କିନି କାଜିଙ୍ଗ୍ ହେୱାନ୍ ଯୀଶୁଙ୍ଗ୍ ଗୁୱାରି କିତାନ୍। ଇନେସ୍କି ହେୱାନ୍ ମେହି ହାଃନିଲେକେ ଆଜି ନଚ୍ଚି ମାଚାନ୍।
48ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଚାନିଆଆନି କାମାୟ୍ ହୁଡ଼୍ୱିତିସ୍, ଏପେଙ୍ଗ୍ ଇନାୱେଡ଼ାଙ୍ଗ୍ ନାଙ୍ଗେଙ୍ଗ୍ ପାର୍ତି କିଦୁଦେର୍।”
49ରାଜା ଇଞ୍ଜ କାମାୟ୍ କିନାକାନ୍ ୱେଚ୍ଚାନ୍, “ଏ ଆଜ୍ଞା, ନା ମାଜି ହାଃୱିଆଗେ ଏନେଙ୍ଗ୍ ମାଞ୍ଜ ୱା।”
50ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ହାଲା, ନି ମାଜି ଜିନାନ୍।” ହେୱାନ୍ ଯୀଶୁ ବେଣ୍ ୱେନ୍ଞ୍ଜି ପାର୍ତି କିତାନ୍ ଆରେ ଇଞ୍ଜ ହାଚାନ୍।
51ଆରେ ହେୱାନ୍ ଇଞ୍ଜ ହାନି ହାଜ୍ଦ ତା କେତ୍ଜାଣ୍ ହଲିଆହିର୍ ୱାଜି ହେୱାନିଙ୍ଗ୍ ଗିଟାଆତାର୍। ହେୱାର୍ ହେୱାନିଙ୍ଗ୍ ୱେଚ୍ଚାର୍, “ନି ମାଜି ହାର୍ ଆତାନେ।” 52ହେପାଦ୍ନା ହେୱାନ୍ ହଲିଆହିରିଙ୍ଗ୍ ୱେନ୍ବାତାନ୍ କାଡ଼୍ଦେ ଏଚେପାଦ୍ନା ହାର୍ ଆତାନ୍? ହଲିଆହିର୍ ୱେଚ୍ଚାର୍, “ନିହିଙ୍ଗ୍ ୱେଡ଼ା ଗଣ୍ଟେ ୱେଡ଼ାଙ୍ଗ୍ ତା ନମେର୍ ପିସ୍ତାତ୍।” 53ଯୀଶୁ ୱେଚ୍ଚି କାତାତିଙ୍ଗ୍ ରାଜା ଇଞ୍ଜ କାମାୟ୍ କିନାକାନ୍ ମାନ୍ତ ଏତୁ କିତାନ୍, “ନି ମାଜି ଜିନାନ୍।” ଟିକ୍ ହେପାଦ୍ନା ନେ ତା ମେହି ହାର୍ ଆଜି ମାଚାନ୍। ଲାଗିଙ୍ଗ୍ ହେୱାନ୍ ଆରେ ତା ୱିଜୁ ପରିବାର୍ ଯୀଶୁଙ୍ଗ୍ ପାର୍ତି କିତାର୍। 54ଯିହୁଦା ଜିଲ୍ଲାତାଙ୍ଗ୍ ଗାଲିଲୀ ଜିଲ୍ଲାତାକେ ୱାତି ପାଚେ, ଯୀଶୁ ଇ ଚାନିଆଆନି କାମାୟ୍ ହୁଦାଙ୍ଗ୍ ରିହା ଚାନିଆଆନି କାମାୟ୍ କିଜି ମାଚାନ୍।
Currently Selected:
ଯୋହନ 4: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
