ଯୋହନ 6
6
ପାଞ୍ଚ୍ଗଟା ରୁଟିଙ୍ଗ୍ ଆରେ ରିଣ୍ଡାଙ୍ଗ୍ ମିନ୍କୁ
(ମାଥି. ୧୪:୩-୨୧; ମାର୍କ. ୬:୩୦-୪୪; ଲୁକ. ୯:୧୦-୧୭)
1ତାପାଚେ ଯୀଶୁ ଗାଲିଲୀନି ହାମ୍ଦୁର୍ ଆନ୍ଟିପାଡ଼୍କା ହାଚାନ୍, ଇନେରିଙ୍ଗ୍ ତିବିରିଆ ହାମ୍ଦୁର୍ ପା ଇନାର୍। 2ଆରେ ହେୱାନ୍ ରଗ୍ଦାକାରିଙ୍ଗ୍ ଚାନିଆଆନି କାମାୟ୍ ହୁଡ଼୍ଜି ମାନାୟାର୍ ତାପାଚେ-ପାଚେ ବେସିହେନି ମାନାୟ୍ ହାଚାର୍। 3ହେବେତାଙ୍ଗ୍ ଯୀଶୁ ମାଡ଼ିଜପି ଦୁମ୍ତାନ୍। ଆରେ ହେବେ ତା ଚେଲାହିର୍ ହୁଦାଙ୍ଗ୍ କୁଚ୍ଚାନ୍। 4ହେପାଦ୍ନା ଯିହୁଦି ଜାତିର୍ ନିସ୍ତାର୍ ପାର୍ବୁ ଲାଗେ ଆଜି ମାଚାତ୍। 5ଯୀଶୁ ହୁଡ଼୍ତାନ୍ ବେସିହେନି ମାନାୟାର୍ ତା ଲାଗାୟ୍ ୱାନାରା। ହେୱାନ୍ ପିଲିପତିଙ୍ଗ୍ ୱେଚ୍ଚାନ୍, “ପିଲିପ, ଇୱାରିଙ୍ଗ୍ ଚିଚ୍ପେଦେଙ୍ଗ୍ ଆସେଙ୍ଗ୍ ଇମେତାଙ୍ଗ୍ କାଦି କଡ଼୍ଜି ତାସିୱାନାସ୍?” 6ହେୱାନ୍ ପିଲିପତିଙ୍ଗ୍ ପରିକ୍ଷା କିଦେଙ୍ଗ୍ ୱେନ୍ବାତାନ୍, ଇନେସ୍କି ହେୱାନ୍ ନିଜେ ଇନାକା କିନାନ୍ ହେଦାଙ୍ଗ୍ ପୁନ୍ଞ୍ଜି ମାଚାନ୍।
7ପିଲିପ ହେୱାନିଙ୍ଗ୍ ୱେଚ୍ଚାନ୍, “ଇବେ ମାନି ମାନାୟାରିଙ୍ଗ୍ ରଞ୍ଜାଙ୍ଗ୍-ରଞ୍ଜାଙ୍ଗ୍ ରୁଟିକଡ଼୍ଜି ହିଦେଙ୍ଗ୍ ୱିଜାକାସ୍ ମାଙ୍ଗେଙ୍ଗ୍ ଦୁଇଶ ଦିନ୍ତି ହାଜ୍ରି ଡାବୁଙ୍ଗ୍ ୱିଜ୍ଦିନିକ୍!”
8ହେବେ ଆରେ ର ଚେଲାହି ଆନ୍ଦ୍ରିୟ ମାଚାନ୍, ହେୱାନ୍ ଶିମୋନ ପିତର ଟଣ୍ଡାହି। 9ଆନ୍ଦ୍ରିୟ ୱେଚ୍ଚାନ୍, “ଇବେ ରକାନ୍ ହିମ୍ଣା ମାନାନ୍। ହେୱାନ୍ତାକେ ପାଞ୍ଚ୍ଗଟା ରୁଟିଙ୍ଗ୍ ଆରେ ରିଣ୍ଡାଙ୍ଗ୍ ହିରୁ ୱାନ୍ଞ୍ଚି ମିନ୍କୁ ମାନିକ୍। ମାତର୍ ଏଚେକ୍ ହେନି ମାନାୟାରିଙ୍ଗ୍ ହାମାନ୍ ଆଉତ୍।”
10ଯୀଶୁ ୱେଚ୍ଚାନ୍, “ୱିଜାକାରିଙ୍ଗ୍ କୁଚିକିୟାଟ୍।” ହେବେ ବେସି କାଚ୍ରା ମାଚାତ୍। ହେବେ ପୁରା ପାଞ୍ଚ୍ ହାଜାର୍ ଆଣ୍ଡ୍ରା ହିମ୍ଣାଙ୍ଗ୍ କୁଚ୍ଚି ମାଚାର୍। 11ହେବେତାଙ୍ଗ୍ ଯୀଶୁ ରୁଟିଙ୍ଗ୍ ଆସ୍ତି ଈଶ୍ୱରତିଙ୍ଗ୍ ପାର୍ତାନା କିତାନ୍ ଆରେ ହେବେ କୁଚ୍ଚି ମାନାୟାରିଙ୍ଗ୍ ବାଟାକିଜି ହିଦେଙ୍ଗ୍ ହିତାନ୍। ହେ ମିନ୍କୁକାଙ୍ଗ୍ ପା ହେଲେକେ ବାଟାକିଜି ହିତାନ୍। ହେୱାନ୍ ମାନାୟାରିଙ୍ଗ୍ ମାନ୍କେ ଇଚା ଚିଞ୍ଜେଙ୍ଗ୍ ହିତାନ୍। 12ୱିଜାକାର୍ ପଟ ପାଞ୍ଜୁ-ପାଞ୍ଜୁ ଚିଚାର୍। ହେୱାର୍ ତିନ୍ଞ୍ଜି ୱିସ୍ତି ପାଚେ ଯୀଶୁ ଚେଲାହିରିଙ୍ଗ୍ ୱେଚ୍ଚାନ୍, “ଉବ୍ରାଆତି ରୁଟି ଆରେ ମିନ୍କୁ ରବେ କିୟାଟ୍, ଇଚ୍କେ ପା ବାନ୍ୟା କିମାଟ୍।” 13ମାନାୟାର୍ ପାଞ୍ଚ୍ଗଟା ରୁଟିଙ୍ଗ୍ ତିନ୍ଞ୍ଜି ଉବ୍ରାଆତି କାଦିତିଙ୍ଗ୍ ଚେଲାହିର୍ ରବେ ରୁଣ୍ଡାଇ କିତାର୍, ଆରେ ବାରଗଟା ଟପାକାଙ୍ଗ୍ ବାର୍ତିକିତାର୍।
14ମାନାୟାର୍ ଯୀଶୁ ଚାନିଆଆନି କାମାୟ୍ ହୁଡ଼୍ଜି ୱେଚ୍ଚାର୍, “ହେୱାନ୍ ହାତ୍ପା ଭବିଷ୍ଯତବକ୍ତା, ଇନେର୍କି ଇ ପୁର୍ତିତାକେ ୱାନାକା ମାଚାତ୍।” 15ଯୀଶୁ ପୁଚାନ୍ ଯେ ମାନାୟାର୍ ହେୱାନିଙ୍ଗ୍ ରାଜା କିଦେଙ୍ଗ୍ ଇଚାକିଜି ମାଚାର୍। ହେପାଦ୍ନା ହେୱାନ୍ ହେ ବାହା ପିସ୍ତି ରକାନ୍ ମାଡ଼ିଜପି ହାଚାନ୍।
ଯୀଶୁ ଏଜୁଙ୍ଗ୍ ଜପି ତାଙ୍ଗ୍ତାନ୍
16ଯୀଶୁ ଚେଲାହିର୍ ହେନାଞ୍ଜ୍ ମିକାହାରେସ୍ ଗାଲିଲୀ ଜିଲ୍ଲାନି ହାମ୍ଦୁର୍ କାଣ୍ଡିତ ହାଚାର୍। 17ୱେଡ଼ା ହାଲ୍ଜି ମାଜ୍ଗା ଆଜି ମାଚାତ୍, ହେପାଦ୍ନା ପାତେକ୍ ପା ଯୀଶୁ ହେୱାର୍ ଲାଗାୟ୍ ୱାୱାଦାଙ୍ଗ୍ ମାଚାନ୍। ଲାଗିଙ୍ଗ୍ ହେୱାର୍ ଡଙ୍ଗାତ କୁଚ୍ଚି ହାମ୍ଦୁର୍ ଆଣ୍ଟିପାଡ଼୍କା ମାନି କପୁର୍ନାହୁମ୍ ସହର୍ ନିପଣ୍ ହାଚାର୍। 18ହେପାଦ୍ନା ଅପ୍ରାବଲ୍ ଡ଼ୁଇ ଆତାତ୍, ଆରେ ହାମ୍ଦୁର୍ତାକେ ଗାଜା-ଗାଜା ଲଉଡ଼ି ନିଙ୍ଗ୍ଞ୍ଜି ମାଚାତ୍। 19ହେୱାର୍ ଡଙ୍ଗାତାକେ ପାକାପାକି ପାଞ୍ଚ୍ କି ଚଅ କିଲମିଟର୍ ପାତେକ୍ ହାଚାର୍। ତାପାଚେ ହେୱାର୍ ଯୀଶୁଙ୍ଗ୍ ଏଜୁଙ୍ଗ୍ ଜପି ତାଙ୍ଗ୍ଜି-ତାଙ୍ଗ୍ଜି ୱାନାକା ହୁଡ଼୍ତାର୍। ଲାଗିଙ୍ଗ୍ ଚେଲାହିର୍ ପାଣ୍ଡ୍ରା ଆତାର୍। 20ମାତର୍ ଯୀଶୁ ଚେଲାହିରିଙ୍ଗ୍ ୱେଚ୍ଚାନ୍, “ଏହେଁ ତ ଆନେଙ୍ଗ୍ ଏପେଙ୍ଗ୍ ପାଣ୍ଡ୍ରା ଆମାଟ୍।” 21ଯୀଶୁ ଇ କାତା ୱେଚ୍ଚି ପାଚେ ଚେଲାହିର୍ ହେୱାନିଙ୍ଗ୍ ଡଙ୍ଗାବିତ୍ରେ ଅସାହାଚାର୍, ଆରେ ହେୱାର୍ ଇମ୍ଣି ବାହାତାକେ ହାଲ୍ଜି ମାଚାର୍, ଡଙ୍ଗା ହାମାନ୍ ବାହାତାକେ ଇକାତାତ୍।
ମାନାୟାର୍ ଯୀଶୁଙ୍ଗ୍ ଦାସ୍ତାର୍
22ତା ଆର୍କାତ୍ ନାଞ୍ଜିଙ୍ଗ୍ ହାମ୍ଦୁର୍ ଆଣ୍ଟିପାଡ଼୍କା କେତ୍ଜାଣ୍ ମାନାୟାର୍ ମାଚାର୍। ହେୱାର୍ ହେବେ ରଞ୍ଜାଙ୍ଗ୍ ନେ ଡଙ୍ଗା ମାଚାକା ହୁଡ଼୍ଜି ମାଚାର୍, ଆରେ ଯୀଶୁ ତା ଚେଲାହିର୍ ହୁଦାଙ୍ଗ୍ ଡଙ୍ଗାତାକେ ହାଲ୍ୱିତି ବିଷୟତିଙ୍ଗ୍ ପୁନ୍ୱାଦାଙ୍ଗ୍ ମାଚାର୍। 23ଯୀଶୁ ଈଶ୍ୱରତିଙ୍ଗ୍ ପାର୍ତାନା କିଜି ମାନାୟାରିଙ୍ଗ୍ ରୁଟିଙ୍ଗ୍ ଚିଞ୍ଜେଙ୍ଗ୍ ହିଜିମାଚାନ୍, ହେ ବାହାତାକେ ତିବିରିଆ ଜିଲ୍ଲାତାଙ୍ଗ୍ କେତେକ୍ ଡଙ୍ଗାଙ୍ଗ୍ ୱାତିକ୍। 24ମାନାୟାର୍ ହେବେ ଯୀଶୁ ଆରେ ତା ଚେଲାହିରିଙ୍ଗ୍ ହୁଡ଼୍ୱିତିଲେ, ହେୱାର୍ ଡଙ୍ଗାକାଙ୍ଗ୍ ଦୁମ୍ଜି ଯୀଶୁଙ୍ଗ୍ ଦାସ୍ତେଙ୍ଗ୍ କପୁର୍ନାହୁମ୍ ସହର୍ତାକେ ହାଚାର୍।
ଯୀଶୁ ନେ ଜିବୁନ୍ହିନି କାଦି
25ମାନାୟାର୍ ହାମ୍ଦୁର୍ ଆଣ୍ଟିପାଡ଼୍କା ଯୀଶୁଙ୍ଗ୍ ହୁଡ଼୍ତାର୍। ଆରେ ହେୱାର୍ ହେୱାନିଙ୍ଗ୍ ୱେନ୍ବାତାର୍, “ଗୁରୁ, ଏନେଙ୍ଗ୍ ଇବେ ଏଚେପାଦ୍ନା ୱାତାଇ?”
26ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ନାଙ୍ଗେଙ୍ଗ୍ ଇନା କିଦେଙ୍ଗ୍ ଦାସ୍ତାନାଦେରା? ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଆନେଙ୍ଗ୍ ଚାନିଆଆନି କାମାୟ୍ କିତାକା ହୁଡ଼୍ଜି ଏପେଙ୍ଗ୍ ନାଙ୍ଗେଙ୍ଗ୍ ଦାସ୍ତୁଦେରା। ମାତର୍ ରୁଟି ତିନ୍ଞ୍ଜି ପାନ୍ଞ୍ଚିଲେ ଏପେଙ୍ଗ୍ ନାଙ୍ଗେଙ୍ଗ୍ ଦାସ୍ତାନାଦେରା। 27ନଷ୍ଟ ଆନି କାଦିତିଙ୍ଗ୍ ଏପେଙ୍ଗ୍ କଷ୍ଟ କିମାଟ୍। ମାତର୍ ଇମ୍ଣି କାଦି ନଷ୍ଟ ଆୱାଦାଙ୍ଗ୍ ୱିଜ୍ୱି ଜିବୁନ୍ କାଜିଙ୍ଗ୍ ମାନ୍ଗାନାତ୍, ହେ କାଦି କାଜିଙ୍ଗ୍ କଷ୍ଟ କିୟାଟ୍। ହେ କାଦି ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ହିଦ୍ନାନ୍। ଇନେସ୍କି ଆବା ଈଶ୍ୱର ନାଙ୍ଗେଙ୍ଗ୍ ହେ ଆଦିକାର୍ ହିତ୍ତାନ୍ନା।”
28ମାନାୟାର୍ ଯୀଶୁଙ୍ଗ୍ ୱେନ୍ବାତାର୍, “ଈଶ୍ୱର ଇଚାତାଙ୍ଗ୍ କାମାୟ୍ କିଦେଙ୍ଗ୍ ଆପେଙ୍ଗ୍ ଇନାକା କିନାପ୍?”
29ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଈଶ୍ୱର ଇନେରିଙ୍ଗ୍ ପକ୍ତାନ୍ନା ହେୱାନିଙ୍ଗ୍ ଏପେଙ୍ଗ୍ ପାର୍ତିକିୟାଟ୍। ଇଦାଙ୍ଗ୍ ନେ ଈଶ୍ୱର ଇଚା।”
30ଲାଗିଙ୍ଗ୍ ମାନାୟାର୍ ହେୱାନିଙ୍ଗ୍ ୱେନ୍ବାତାର୍, “ନିଙ୍ଗେଙ୍ଗ୍ ଈଶ୍ୱର ପକ୍ତାତାନ୍ନା, ହେଦାଙ୍ଗ୍ ପୁନି କାଜିଙ୍ଗ୍ ଏନେଙ୍ଗ୍ ଇନା ଚାନିଆଆନି କାମାୟ୍ କିନାଇ, ଇମ୍ଣାକା କି ହୁଡ଼୍ଜି ଆପେଙ୍ଗ୍ ନିଙ୍ଗେଙ୍ଗ୍ ପାର୍ତିକିଦ୍ନାପ୍। 31ମା ଆକଦାଦିର୍ ଟାଙ୍ଗ୍ରାବାହାତାକେ ମାନ୍ନା ତିନ୍ଞ୍ଜି ମାଚାର୍, ହେଦାଙ୍ଗ୍ ଈଶ୍ୱର ହେୱାରିଙ୍ଗ୍ ହିଜିମାଚାନ୍। ଦରମ୍ ସାସ୍ତର୍ତାକେ ଲେକା ମାନାତ୍, ‘ଈଶ୍ୱର ହେୱାରିଙ୍ଗ୍ ସରଗ୍ ଜପିତାଙ୍ଗ୍ କାଦି ଚିଞ୍ଜେଙ୍ଗ୍ ହିଜିମାଚାନ୍।’ ”
32ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ମୋଶା ସରଗ୍ନି କାଦି ମିଙ୍ଗେଙ୍ଗ୍ ହିଦ୍ୱାତାନ୍ନା। ମାତର୍ ନା ଆବା ଈଶ୍ୱର ମିଙ୍ଗେଙ୍ଗ୍ ସରଗ୍ତାଙ୍ଗ୍ କାଦି ଚିଞ୍ଜେଙ୍ଗ୍ ହିଦ୍ନାନ୍। 33ଇନେସ୍କି ଇମ୍ଣି କାଦି ସରଗ୍ ଜପିତାଙ୍ଗ୍ ୱାଜି ପୁର୍ତିନି ମାନାୟାରିଙ୍ଗ୍ ଜିବୁନ୍ ହିନାତ୍, ହେଦାଙ୍ଗ୍ନେ ଈଶ୍ୱର ହିତ୍ତି କାଦି।”
34ମାନାୟାର୍ ହେୱାନିଙ୍ଗ୍ ୱେଚ୍ଚାର୍, “ଆଜ୍ଞା, ମାଙ୍ଗେଙ୍ଗ୍ ୱିଜୁଦିନ୍ ଇ କାଦି ଚିଞ୍ଜେଙ୍ଗ୍ ହିଦା।”
35ତାପାଚେ ଯୀଶୁ ୱେଚ୍ଚାନ୍, ଆନେଙ୍ଗ୍ ନିଜେ ଜିବୁନ୍ହିନି କାଦି। ନା ଲାଗାୟ୍ ଇନେର୍ ୱାନାର୍, ହେୱାନ୍ ଇନାୱେଡ଼ାଙ୍ଗ୍ ପା ନାସ୍କି ଆଉନ୍। ଆରେ ନାଙ୍ଗେଙ୍ଗ୍ ଇନେର୍ ପାର୍ତି କିଦ୍ନାର୍, ହେୱାନ୍ ଇନାୱେଡ଼ାଙ୍ଗ୍ ପା ଏସ୍କି ଆଉନ୍। 36ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, “ଏପେଙ୍ଗ୍ ନାଙ୍ଗେଙ୍ଗ୍ ହୁଡ଼୍ଦିତିସ୍ ପା ପାର୍ତି କିଦୁଦେରା। 37ନା ଆବା ଈଶ୍ୱର ନାଙ୍ଗେଙ୍ଗ୍ ଇମ୍ଣାକା ହିତ୍ତାନ୍ନା, ହେୱାର୍ ନା ଲାଗାୟ୍ ୱାନାର୍। ଆରେ ଆନେଙ୍ଗ୍ ହେୱାରିଙ୍ଗ୍ ଇନାୱେଡ଼ାଙ୍ଗ୍ ପା ହପୁଙ୍ଗ୍। 38ଆନେଙ୍ଗ୍ ନା ଇଚାତାଙ୍ଗ୍ କାମାୟ୍ କିଦେଙ୍ଗ୍ ୱାୱାତାଙ୍ଗ୍ନା। ମାତର୍ ଆନେଙ୍ଗ୍ ଈଶ୍ୱର ଇଚାତାଙ୍ଗ୍ କାମାୟ୍ କିଦେଙ୍ଗ୍ ସରଗ୍ତାଙ୍ଗ୍ ୱାତାଙ୍ଗ୍ନା। 39ଈଶ୍ୱର ଇମ୍ଣାକାରିଙ୍ଗ୍ ନାଙ୍ଗେଙ୍ଗ୍ ହିତ୍ତାନ୍ନା, ଆନେଙ୍ଗ୍ ହେୱାର୍ ବିତ୍ରେତାଙ୍ଗ୍ ରକାନିଙ୍ଗ୍ ପା ଆରାଇ କିଉଙ୍ଗ୍। ଆନେଙ୍ଗ୍ ହେୱାରିଙ୍ଗ୍ ସେସ୍ଦିନ୍ତ ଆରେରଗ ଜିବୁନ୍ କିନାଙ୍ଗ୍। ଇଦାଙ୍ଗ୍ ନେ ନାଙ୍ଗେଙ୍ଗ୍ ପକ୍ତିତି ଆବା ଈଶ୍ୱରତି ଇଚା। 40ୱିଜାକାର୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତିଙ୍ଗ୍ ହୁଡ଼୍ନାର୍, ଆରେ ହେୱାନ୍ତାକେ ପାର୍ତିକିନାର୍। ଆରେ ହେୱାର୍ ଇନେସ୍କି ୱିଜ୍ୱି ଜିବୁନ୍ ପାୟାଆନାର୍। ଆନେଙ୍ଗ୍ ହେୱାନିଙ୍ଗ୍ ସେସ୍ଦିନ୍ତ ଆରେରଗ ଜିବୁନ୍ କିନାଙ୍ଗ୍। ଇଦାଙ୍ଗ୍ ନେ ନାଙ୍ଗେଙ୍ଗ୍ ପକ୍ତିତି ଆବା ଈଶ୍ୱରତି ଇଚା।”
41ଆନେଙ୍ଗ୍ ନେ ସରଗ୍ ଜପିତାଙ୍ଗ୍ ଜୁତ୍ତି କାଦି ଇଞ୍ଜି ଯୀଶୁ ୱେଚ୍ଚିଲେ ଯିହୁଦିର୍ ଯୀଶୁଙ୍ଗ୍ ଇନସ୍ତାକିଜି ୱେଚ୍ଚାର୍, 42“ଇୱାନ୍ତ ଯୋଷେପ୍ ମେହି ଯୀଶୁ! ଲାତ୍ରାହି ଆରେ ତାଞ୍ଜିୟାଙ୍ଗ୍ ତ ଆପେଙ୍ଗ୍ ପୁଚାପ୍ନା। ଲାଗିଙ୍ଗ୍ ଇୱାନ୍ ଇନେସ୍ କିଜି ସରଗ୍ତାଙ୍ଗ୍ ୱାତାଙ୍ଗ୍ନା ଇଞ୍ଜି ୱେଚ୍ଚାନାନା?”
43ମାତର୍ ଯୀଶୁ ୱେଚ୍ଚାନ୍, “ଏପେଙ୍ଗ୍ ୱେଚ୍ପା ଆନାକା ବନ୍ଦ୍ କିୟାଟ୍। 44ନା ଆବା ଈଶ୍ୱର ଇନେରିଙ୍ଗ୍ ନା ଲାଗାୟ୍ ପକ୍ତାନାନ୍। ହେୱାନ୍ନେ ନା ଲାଗାୟ୍ ୱାନାନ୍। ଆରେ ଆନେଙ୍ଗ୍ ହେୱାରିଙ୍ଗ୍ ସେସ୍ଦିନ୍ତ ଆରେରଗ ଜିବୁନ୍ କିନାଙ୍ଗ୍। 45ଭବିଷ୍ଯତବକ୍ତାର୍ ସାସ୍ତର୍ତାକେ ଲେକାଆତାତ୍ନା, ‘ଈଶ୍ୱର ମାନାୟାରିଙ୍ଗ୍ ହିକ୍ଷା ହିନାନ୍।’ ଇମ୍ଣାକାର୍ ନା ଆବା ଈଶ୍ୱର କାତା ୱେନାର୍, ଆରେ ହିକ୍ଷା ପାୟାଆନାର୍। ହେୱାର୍ ନା ଲାଗାୟ୍ ୱାନାର୍। 46ଇନେର୍ ପା ଆବା ଈଶ୍ୱରତିଙ୍ଗ୍ ହୁଡ଼୍ୱାତାର୍ନା। ମାତର୍ ଆନେଙ୍ଗ୍ ଈଶ୍ୱରତାଙ୍ଗ୍ ୱାଜିମାଚି ମାନାୟ୍ ହିମ୍ଣା ନେ ଆବାଙ୍ଗ୍ ହୁଡ଼୍ତାଙ୍ଗ୍ନା।
47ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ‘ଇମ୍ଣାକାନ୍ ପାର୍ତିକିନାନ୍ ହେୱାନ୍ ୱିଜ୍ୱି ଜିବୁନ୍ ପାୟା ଆନାନ୍। 48ଆନେଙ୍ଗ୍ ନିଜେ ଜିବୁନ୍ହିନି କାଦି।’ 49ମି ଆକଦାଦିର୍ ଟାଙ୍ଗ୍ରାବାହାତାକେ ଈଶ୍ୱର ହିତି ମାନ୍ନା କାଦି ତିନ୍ଞ୍ଜି ମାଚାର୍। ମାତର୍ ହେୱାର୍ ୱିଜାକାର୍ ହାଃତାରେ। 50ଆନେଙ୍ଗ୍ ସରଗ୍ ଜପିତାଙ୍ଗ୍ ଜୁତ୍ତି ହେ କାଦି। ଯଦି ଇମ୍ଣାକାନ୍ ଇ କାଦି ଚିଚିସ୍ ହେୱାନ୍ ଇନାୱେଡ଼ାଙ୍ଗ୍ ପା ହାଃଉନ୍। 51ଆନେଙ୍ଗ୍ ସରଗ୍ ଜପିତାଙ୍ଗ୍ ଜୁତ୍ତି ହେ ଜିବୁନ୍ହିନି କାଦି। ଇମ୍ଣାକାନ୍ ଇ କାଦିତିଙ୍ଗ୍ ତିନାନ୍ ହେୱାନ୍ ୱିଜୁଦିନ୍ ପାତେକ୍ ଜିବୁନ୍ ମାନ୍ଗାନାନ୍। ଇ କାଦି ଆନାତା ନା ଗାଗାଡ଼୍। ଆନେଙ୍ଗ୍ ନା ଗାଗାଡ଼୍ ହିଦ୍ନାଙ୍ଗ୍, ହେଦାଙ୍ଗ୍ କାଜିଙ୍ଗ୍ ପୁର୍ତିନି ମାନାୟାର୍ ଜିବୁନ୍ ପାୟାଆନାର୍।”
52ତାପାଚେ ଯିହୁଦି ନେତାର୍ ତା-ତା ବିତ୍ରେ ଯୁକ୍ତିକିବାଆତାର୍। ଆରେ ହେୱାର୍ ୱେଚ୍ଚାର୍, “ଇୱାନ୍ ଇନେସ୍କିଜି ମାଙ୍ଗେଙ୍ଗ୍ ତା ଗାଗାଡ଼୍ନି ଜେଇ ଚିଞ୍ଜେଙ୍ଗ୍ ହିଦ୍ଦେଙ୍ଗ୍ ଆଡ଼୍ଦାନାନ୍?”
53ହେବେତାଙ୍ଗ୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଏପେଙ୍ଗ୍ ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଜେଇ ତିନାକା ମାନାତ୍, ଆରେ ନେତେର୍ ଉଣାକା ମାନାତ୍। ଏପେଙ୍ଗ୍ ଯଦି ଏଲେଙ୍ଗ୍ କିୱିତିସ୍, ମି ବିତ୍ରେ ଜିବୁନ୍ ହିଲୁତ୍। 54ଯଦି ଇମ୍ଣାକାନ୍ ନା ଗାଗାଡ଼୍ନି ଜେଇ ତିନାନ୍ ଆରେ ନା ନେତେର୍ ଉଣାନ୍, ହେୱାନ୍ ୱିଜ୍ୱି ଜିବୁନ୍ ପାୟା ଆନାନ୍। ଆନେଙ୍ଗ୍ ହେୱାନିଙ୍ଗ୍ ସେସ୍ଦିନ୍ତ ହାଃତିତାଙ୍ଗ୍ ଜିବୁନ୍ କିନାଙ୍ଗ୍। 55ନା ଗାଗାଡ଼୍ନି ଜେଇ ନେ ସତ୍ କାଦି, ଆରେ ନା ନେତେର୍ ସତ୍ ଉଣି ଜିନିଷ୍। 56ଇମ୍ଣାକାନ୍ ଯଦି ନା ଗାଗାଡ଼୍ନି ଜେଇ ତିନାନ୍ ଆରେ ନା ନେତେର୍ ଉଣାନ୍, ଲାଗିଙ୍ଗ୍ ହେୱାନ୍ ନା ବିତ୍ରେ ମାନ୍ଗାନାନ୍ ଆରେ ଆନେଙ୍ଗ୍ ତା ବିତ୍ରେ ମାନ୍ଗାନାଙ୍ଗ୍। 57ନାଙ୍ଗେଙ୍ଗ୍ ପକ୍ତିତି ଆବା ଈଶ୍ୱର ଜିବୁନ୍ ହିଦ୍ନାନ୍। ଇନେସ୍ ଲେକେ ହେୱାନ୍ ନାଙ୍ଗେଙ୍ଗ୍ ଜିବୁନ୍ ହିଦ୍ନାନ୍, ହେଲେକେ ଆନେଙ୍ଗ୍ ପା ନା ଗାଗାଡ଼୍ନି ଜେଇ ତିନି ମାନାୟାରିଙ୍ଗ୍ ଜିବୁନ୍ ହିନାଙ୍ଗ୍। 58ମା ଆକଦାଦିର୍ ଟାଙ୍ଗ୍ରାବାହାତାକେ ତିନ୍ଞ୍ଜି ହାଃତି ଲେକେ କାଦି ଇଦାଙ୍ଗ୍ ଆକାୟ୍। ମାତର୍ ଆନେଙ୍ଗ୍ ସରଗ୍ତାଙ୍ଗ୍ ୱାତି କାଦି, ଇମ୍ଣାକାନ୍ ଇ କାଦି ତିନାନ୍ ହେୱାନ୍ ୱିଜ୍ୱିଦିନ୍ ପାତେକ୍ ଜିବୁନ୍ ମାନ୍ଗାନାନ୍।”
59ଯୀଶୁ କପୁର୍ନାହୁମ୍ ସହର୍ନି ଯିହୁଦିର୍ ପାର୍ତାନା ଇଞ୍ଜ ଇୱିଜୁ କାତା ହିକ୍ଷାହିଜି ମାଚାନ୍।
ୱିଜ୍ୱି ଜିବୁନ୍ନି କାତା
60ଯୀଶୁ ଚେଲାହିର୍ ଇ ୱିଜୁବେଣ୍ ୱେନ୍ଞ୍ଜି କେତେକ୍ ହେନି ୱେଚ୍ଚାର୍, “ଇ ହିକ୍ଷା ବୁଜା ଆଦେଙ୍ଗ୍ ବେସି କଷ୍ଟ, ଇ ହିକ୍ଷା ଇନେର୍ ୱେନାର୍?”
61ଚେଲାହିର୍ ଇ ହିକ୍ଷା ବିଷୟତିଙ୍ଗ୍ ୱେଚ୍ପାଆନାରା, ଇଦାଙ୍ଗ୍ ପୁନ୍ଞ୍ଜି ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇ ହିକ୍ଷା ମିଙ୍ଗେଙ୍ଗ୍ ଇନାକା ଅସୁବିଦା କିଦ୍ନାତା? 62ଲାଗିଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଇମେତାଙ୍ଗ୍ ୱାଜିମାଚାନ୍। ଆରେରଗ ହେ ବାହାତାକେ ହେୱାନ୍ ହାନାନ୍, ଇ ବିଷୟରେ ଏପେଙ୍ଗ୍ ଇନାକା ବାବିକିନାଦେରା? 63ଗାଗାଡ଼୍ ମାନାୟ୍ତିଙ୍ଗ୍ ଜିବୁନ୍ କିଦୁତ୍। ମାତର୍ ଈଶ୍ୱରଆତ୍ମା ଜିବୁନ୍ ହିଦ୍ନାତ୍। ଆନେଙ୍ଗ୍ ମିଙ୍ଗେଙ୍ଗ୍ ଇନାକା ୱେଚ୍ଚାତାଙ୍ଗ୍ ହେଦାଙ୍ଗ୍ ଆତ୍ମା, ଲାଗିଙ୍ଗ୍ ଇୱିଜୁ ବିଷୟ ଜିବୁନ୍ ହିଦ୍ନାତ୍। 64ମାତର୍ ମି ବିତ୍ରେତାଙ୍ଗ୍ କେତେକ୍ ହେନି ପାର୍ତି କିଉଦେରା। ହେୱାନିଙ୍ଗ୍ ପାର୍ତିକିୱି କାତା ଆରେ ଇନେର୍ ହେୱାନିଙ୍ଗ୍ ଶାତ୍ରୁ କେଇଦ ଆହିକିନାନ୍, ହେ କାତା ପା ଯୀଶୁ ଆଗେତାଙ୍ଗ୍ ପୁନ୍ଞ୍ଜି ମାଚାନ୍।” 65ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଆଗେ ମିଙ୍ଗେଙ୍ଗ୍ ୱେଚ୍ଚି ମାନ୍ଞ୍ଚାଙ୍ଗ୍, ‘ନା ଆବା ଈଶ୍ୱର ଯଦି ଇନେରିଙ୍ଗ୍ ନା ଲାଗାୟ୍ ୱାଦେଙ୍ଗ୍ ସାଇଜ କିୱିତିସ୍, ହେୱାନ୍ ନା ଲାଗାୟ୍ ୱାଦେଙ୍ଗ୍ ଆଡୁନ୍।’ ”
66ଯୀଶୁତି ଇ ହିକ୍ଷାତିଙ୍ଗ୍ ୱେନ୍ଞ୍ଜି ହେୱାନିଙ୍ଗ୍ ପିସ୍ତାର୍, ଆରେ ଚେଲାହିର୍ ତାପାଚେ ହାଲ୍ୱାତାର୍। 67ଯୀଶୁ ତା ବାଚିକିତି ବାରଜାଣ୍ ଚେଲାହିରିଙ୍ଗ୍ ପା ୱେନ୍ବାତାନ୍, “ଏପେଙ୍ଗ୍ ପା ନାଙ୍ଗେଙ୍ଗ୍ ପିସ୍ତି ହାଞ୍ଜେଙ୍ଗ୍ ଇଚାକି?”
68ଶିମୋନ ପିତର ହେୱାନିଙ୍ଗ୍ ୱେଚ୍ଚାନ୍, “ମାପୃ, ଆପେଙ୍ଗ୍ ଇନେର୍ତାକେ ହାନାପ୍? ନିବେ ତ ୱିଜ୍ୱି ଜିବୁନ୍ ମାନାତ୍। 69ଆପେଙ୍ଗ୍ ନିବେ ପାର୍ତି କିଜି ପୁନାପା, ଏନେଙ୍ଗ୍ନେ ଈଶ୍ୱରତାଙ୍ଗ୍ ୱାଜିମାଚି ପବିତ୍ର ମାନାୟ୍।”
70ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ବାରଜାଣ୍ତିଙ୍ଗ୍ ଇଚାକିଜି ବାଚି କିତ୍ତାଙ୍ଗ୍ନା। ମାତର୍ ମି ବିତ୍ରେତାଙ୍ଗ୍ ରକାନ୍ ଶୟତାନ୍ ମାନାନ୍।” 71ଯୀଶୁ ଶିମୋନ ମେହି ଇଷ୍କାରିତିୟ ଯିହୁଦାଙ୍ଗ୍ ହୁଡ଼୍ଜି ଇ କାତା ୱେଚ୍ଚି ମାନ୍ଞ୍ଚାନ୍। ଇନେସ୍କି ବାରଜାଣ୍ ଚେଲାହିର୍ ବିତ୍ରେତାଙ୍ଗ୍ ରକାନ୍ ମାଚାନ୍। ହେୱାନ୍ ଯୀଶୁଙ୍ଗ୍ ଶତ୍ରୁ କେଇଦ ଆହିକିଦେଙ୍ଗ୍ ଉପାୟ୍ କିଜି ମାଚାନ୍।
Currently Selected:
ଯୋହନ 6: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
