ଲୁକ 12
12
ଯୀଶୁ ପାରୁସିଦଳ୍ନି ମାନାୟାର୍ତାକେ ଆୱି ହିକ୍ଷା ହିତାନ୍
(ମାଥି. ୧୦:୨୬-୨୭)
1ହେପାଦ୍ନା ବେସିହେନି ମାନାୟ୍ ରବେଆଜି ଜାର୍-ଜାର୍ ଜପି ଟେଲାହେମ୍ଲା ଆଜି ମାଚାର୍। ହେପାଦ୍ନା ଯୀଶୁ ପାର୍ତୁମ୍ ଚେଲାହିରିଙ୍ଗ୍ ୱେଚ୍ଚେଙ୍ଗ୍ ଲାଗାତାନ୍, “ପାରୁସିଦଳ୍ ସଡ଼ାକାର୍ ଲେକେ ବାଟ୍ପାଣ୍ ଆନି ବିଷୟତାଙ୍ଗ୍ ସାବ୍ଦାନ୍ ଆଜି ମାନାଟ୍।
2ମାତର୍ ମାନାୟାର୍ ନଙ୍ଗୟ୍ ପାତେକ୍ ଇମ୍ଣି ବିଷୟ ଡ଼ୁକ୍ତାର୍ନା ଈଶ୍ୱର ହେ ୱିଜୁ ଚଚ୍ଚାନାନ୍। ଆରେ ଇମ୍ଣି କାତା ପୁନ୍ୱାଦାଙ୍ଗ୍ ମାନାଦେର୍ ହେ କାତା ଈଶ୍ୱର ମିଙ୍ଗେଙ୍ଗ୍ ପୁନିକିଦ୍ନାନ୍। 3ଏପେଙ୍ଗ୍ ଇନାକା ମାଜ୍ଗାତ ୱେଚ୍ନି କାତା ଅଜଡ଼୍ତାକେ ୱେଚ୍ଚିୟା ଆନାତ୍। ଏପେଙ୍ଗ୍ କାପାଟ୍ ଗେହିଆଜି ବେଣ୍ କିନାକା ପା ହେଦାଙ୍ଗ୍ ଇଲ୍ନି ଚାତ୍ ଜପି ଗାଜା କାଟ୍ତାଙ୍ଗ୍ ୱେନିୟା ଆନାତ୍।
ଈଶ୍ୱରତିଙ୍ଗ୍ ପାଣ୍ଡ୍ରାଆଡ
(ମାର୍କ. ୧୦:୨୮-୩୧)
4ହେ ନା ସାଙ୍ଗ କାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଏପେଙ୍ଗ୍ ଗାଗାଡ଼୍ତିଙ୍ଗ୍ ଅସ୍ତାନାର୍ ହେୱାରିଙ୍ଗ୍ ପାଣ୍ଡ୍ରା ଆମାଟ୍। ଇନେସ୍କି ହେୱାର୍ ଆରେ ଇନାକାପା କିଦେଙ୍ଗ୍ ଆଡୁର୍। 5ଏପେଙ୍ଗ୍ ଇନେରିଙ୍ଗ୍ ପାଣ୍ଡ୍ରା ଆନାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା। ମିଙ୍ଗେଙ୍ଗ୍ ମାର୍ନେ ଅସ୍ତିପାଚେ ନରକ୍ତାକେ ତୁହିହିଦ୍ନି ସାକ୍ତି ଇନେର୍ତାକେ ମାନାତ୍, ଏପେଙ୍ଗ୍ ହେ ଈଶ୍ୱରତିଙ୍ଗ୍ ପାଣ୍ଡ୍ରାଆଡ।
6ରିଣ୍ଡି ହିରୁ ରୁପା ଡାବୁଙ୍ଗ୍ତାଙ୍ଗ୍ ପାଞ୍ଚ୍ଗଟା କଡିହାଡ଼ା ପଟିଙ୍ଗ୍ କଡ଼ିଆ ଆନାତ୍। ଈଶ୍ୱର ହେ କଡିହାଡ଼ା ପଟିଙ୍ଗ୍ ବିତ୍ରେତାଙ୍ଗ୍ ରଞ୍ଜାଙ୍ଗ୍ ପା ବାଣାଆଉନ୍। 7ମି କାପ୍ଡ଼ାତାକେ ଏଚେଗଟା ତେମୁଲ୍ ମାନାତ୍, ହେଦାଙ୍ଗ୍ ପା ଈଶ୍ୱର ପୁନାନ୍। ପାଣ୍ଡ୍ରା ଆମାଟ୍। ବେସି ପଟିଙ୍ଗ୍ ଦାମ୍ତାଙ୍ଗ୍ ପା ଏପେଙ୍ଗ୍ ବେସି ଆଦିକ୍।
ଯୀଶୁ କାଜିଙ୍ଗ୍ ଲାଜୁ ଆମାଟ୍
(ମାଥି. ୧୦:୩୨-୩୩; ୧୨:୩୨; ୧୦:୧୯-୨୦)
8ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଇମ୍ଣି ମାନାୟ୍ ୱିଜାକାର୍ ଆଗେ ନିଲ୍ଚି ୱେଚ୍ନାନ୍ ଯେ ହେୱାନ୍ ନାବେ ପାର୍ତି କିଦ୍ନାନା। ଏଲେଙ୍ଗ୍ଇଚି ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା, ଈଶ୍ୱର ଦୁତ୍କୁ ଆଗେ ୱେଚ୍ନାଙ୍ଗ୍ ଯେ, ହେ ମାନାୟ୍ ନା ଜାର୍ ଲକ୍। 9ମାତର୍ ଇମ୍ଣି ମାନାୟାର୍ ମୁମ୍ଦ ଆଗେ ନିଲ୍ଚି ୱେଚ୍ନାନ୍ ଯେ, ହେୱାନ୍ ନାବେ ପାର୍ତି କିଦୁନ୍, ଲାଗିଙ୍ଗ୍ ଆନେଙ୍ଗ୍ ପା ଈଶ୍ୱର ଦୁତ୍କୁ ଆଗେ ୱେଚ୍ନାଙ୍ଗ୍ ଯେ ହେ ମାନାୟ୍ ନା ଜାର୍ ଲକ୍ ଆକାୟ୍। 10ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ବିରଦ୍ତାକେ ଇନାକା ନିନ୍ଦା ମାନାୟ୍ତିଙ୍ଗ୍ କେମା ହିଇଆନାତ୍। ମାତର୍ ଇନେର୍ ପବିତ୍ର ଆତ୍ମାତିଙ୍ଗ୍ ନିନ୍ଦାକିଜି ଇନାନ୍, ହେ ମାନାୟ୍ତିଙ୍ଗ୍ କେମା ହିଇୟାଉତ୍।
11ମାନାୟାର୍ ମିଙ୍ଗେଙ୍ଗ୍ ଯଦି ବିରଦ୍ କିଜି ଯିହୁଦିର୍ ପାର୍ତାନା ଇଞ୍ଜ, ସାସନ୍ କିନି ମାନାୟାର୍ତାକେ, ଆରେ ଆଦିକାର୍ ପାୟାଆତି ମାନାୟାର୍ ଆଗେ ନିଲି କିଦ୍ନାର୍, ହେପାଦ୍ନା ଏପେଙ୍ଗ୍ ଇନେସ୍ ୱେଚ୍ନାଦେର୍, ଆରେ ମିଙ୍ଗେଙ୍ଗ୍ ୱେନ୍ବାଆତ୍ତିସ୍ ଏପେଙ୍ଗ୍ ଇନାକା ୱେଚ୍ନାଙ୍ଗ୍ ଇଞ୍ଜି ଚିନ୍ତା କିମାଟ୍। 12ଇନେସ୍କି ଏପେଙ୍ଗ୍ ଇନାକା ୱେଚ୍ଚେଙ୍ଗ୍ ଆନାତ୍, ହେପାଦ୍ନା ମିଙ୍ଗେଙ୍ଗ୍ ପବିତ୍ର ଆତ୍ମା ହିକାଇକିଜି ହିଦ୍ନାତ୍।”
ଯୀଶୁ ଲବ୍ରା ବିଷୟରେ ହିକ୍ଷା ହିତାନ୍
13ମାନାୟ୍ ଗଉଲି ବିତ୍ରେତାଙ୍ଗ୍ ରକାନ୍ ଯୀଶୁଙ୍ଗ୍ ୱେଚ୍ଚାନ୍, “ଗୁରୁ! ନା ଟଣ୍ଡେନିଙ୍ଗ୍ ୱେଚା ଯେ, ମାଞ୍ଜ୍ବା ଦନ୍ସମ୍ଫତି ମା ବିତ୍ରେ ବାଗ୍ କିନାପ୍।” 14ଇଦାଙ୍ଗ୍ ୱେନ୍ଞ୍ଜି ଯୀଶୁ ୱେଚ୍ଚାନ୍, “ନାଙ୍ଗେଙ୍ଗ୍ ମି ବିଚାର୍ କିଦେଙ୍ଗ୍ କି ମିଞ୍ଜ୍ବା ଦନ୍ସମ୍ଫତି ଟଣ୍ଡ୍ରିୟାରିଙ୍ଗ୍ ବାଟାକିଜି ହିଦେଙ୍ଗ୍ ଇନେର୍ ଇଞ୍ଜ୍ନାରା?” 15ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ୱିଜୁ ପର୍କାର୍ ଲବ୍ରା ଆମାଟ୍, ସାବ୍ଦାନ୍ ଆଜି ମାନାଟ୍। ଇନେସ୍କି ତା ଦନ୍ସମ୍ଫତି ତା ଜିବୁନ୍ତିଙ୍ଗ୍ ରକ୍ଷା କିଦେଙ୍ଗ୍ ଆଡୁତ୍।”
16ତାପାଚେ ଯୀଶୁ ହେୱାରିଙ୍ଗ୍ ର କାତା ୱେଚ୍ନିଲେକେ କିଜି ୱେଚ୍ଚାନ୍, “ରକାନ୍ତାକେ ବେସି ଜମି ମାଚାତ୍, ହେ ଜମିତ ବେସି ତାସ୍ ଆତାତ୍। 17ହେ ମାନାୟ୍ ମାନେ-ମାନେ ବାବିକିତାନ୍, ଆନେଙ୍ଗ୍ ନଙ୍ଗୟ୍ ଇନାକା କିନାଙ୍ଗ୍? ନାବେ ନଙ୍ଗୟ୍ ତାସ୍ବାସ୍ ଇଡ଼୍ଦେଙ୍ଗ୍ ବାହା ହିଲେତ୍। 18ତାପାଚେ ହେୱାନ୍ନେ ୱେଚିଆତାନ୍, ‘ଟିକ୍ ମାନାତ୍। ନଙ୍ଗୟ୍ ଇନାକା କିଦେଙ୍ଗ୍ ଆନାତ୍ ହେଦାଙ୍ଗ୍ ଆନେଙ୍ଗ୍ ହାର୍ଦାଙ୍ଗ୍ ପୁଚାଙ୍ଗ୍ନା। ଆନେଙ୍ଗ୍ ଆଗେ ପାଲ୍କୁ ରିପ୍ନାଙ୍ଗ୍ ଆରେ ଗାଜା-ଗାଜା ପାଲ୍କୁ ରହ୍ନାଙ୍ଗ୍, ଆରେ ୱିଜୁ ଗହମ୍ ହାର୍ଦି ଜିନିଷ୍ ରବେକିଜି ପୁନି ପାଲ୍ତାକେ ଇଟ୍ନାଙ୍ଗ୍। 19ତାପାଚେ ଆନେଙ୍ଗ୍ ଜାର୍ତିଙ୍ଗ୍ ୱେଚ୍ଚେଙ୍ଗ୍ ଆଡ୍ନାଙ୍ଗ୍, ଆନେଙ୍ଗ୍ କେତେକ୍ ହାର୍ଦି ଜିନିଷ୍ କେତେକ୍ ବାର୍ହୁ କାଜିଙ୍ଗ୍ ରୁଣ୍ଡାୟ୍ କିଜି ଇଡ଼୍ତାଙ୍ଗ୍ନା। ଆରାମ୍ସେ ମାନ୍ଞ୍ଜି, ତିନ୍ଞ୍ଜି ଉଣ୍ଜି ମଜାକିୟାଟ୍।’
20ମାତର୍ ଈଶ୍ୱର ହେୱାନିଙ୍ଗ୍ ୱେଚ୍ଚାନ୍, ‘ଏଡ଼େ ବକୁୱା ମାନାୟ୍! ନେଞ୍ଜେଙ୍ଗ୍ ମିକା ଏନେଙ୍ଗ୍ ହାଃତିସ୍। ଏନେଙ୍ଗ୍ ଇମ୍ଣି ଜିନିଷ୍ ହାର୍ଦାଙ୍ଗ୍ ଇଡ଼୍ତାୟ୍ନା, ହେଦାଙ୍ଗ୍ ଇନେସ୍ ଆନାତ୍? ଆରେ ହେଦାଙ୍ଗ୍ ଇନେର୍ ତିନାର୍?’ 21ଇମ୍ଣାକାନ୍ ଜାର୍ କାଜିଙ୍ଗ୍ ୱିଜୁ ଜିନିଷ୍ ରୁଣ୍ଡାୟ୍ କିଜି ଇଡ଼୍ଜି ମାଚିସ୍, ହେଦାଙ୍ଗ୍ ତାଦି ଇନା ଲାବ୍। ଯଦି ଈଶ୍ୱରତିଙ୍ଗ୍ ହେବା କିଦେଙ୍ଗ୍ ହେ ୱିଜୁ ଜିନିଷ୍ତିଙ୍ଗ୍ ବାଉରା ଆୱିତିସ୍, ହେୱାନ୍ ଈଶ୍ୱର କାଣ୍କୁକାଙ୍ଗ୍ ଦନି ଆକାୟ୍।”
ଈଶ୍ୱରତିଙ୍ଗ୍ ପାର୍ତି କିନାସ୍
(ମାଥି. ୬:୨୫-୩୪)
22ଯୀଶୁ ଆରେରଗ ତା ଚେଲାହିରିଙ୍ଗ୍ ୱେଚ୍ଚାନ୍, “ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା ଯେ, ଏପେଙ୍ଗ୍ ଇନାକା ତିନ୍ଞ୍ଜି ଜିନାଦେର୍, ହେଦାଙ୍ଗ୍ କାଜିଙ୍ଗ୍ ଚିନ୍ତା କିମାଟ୍। ଗାଗାଡ଼୍ତିଙ୍ଗ୍ ଡ଼ୁକ୍ତେଙ୍ଗ୍ ଇନାକା ଉସ୍ପାନାଙ୍ଗ୍ ଇଞ୍ଜି ହେ ବିଷୟରେ ଚିନ୍ତା କିମାଟ୍। 23ଇନେସ୍କି ଜିବୁନ୍ କାଦିତାଙ୍ଗ୍ ଗାଜା ଆରେ ଗାଗାଡ଼୍ ହେନ୍ଦ୍ରାତାଙ୍ଗ୍ ଗାଜା।
24ବାଦାଡ଼୍ନି ପଟିକାଙ୍ଗ୍ ବାବିକିଜି ହୁଡ଼ାଟ୍, ‘ହେୱେକ୍ ବିୟାନ୍ ୱିତୁକ୍ କି ତେଜୁକ୍। ହେୱେକ୍ ରୁଣ୍ଡାଇ କିଦେଙ୍ଗ୍ ଇଲ୍ କି ପାଲ୍ ହିଲେତ୍। ମାତର୍ ଈଶ୍ୱର ପଟିକାଙ୍ଗ୍ ଚିଞ୍ଜେଙ୍ଗ୍ ହିନାନା।’ ଏପେଙ୍ଗ୍ ତ ପଟିଙ୍ଗ୍ତାଙ୍ଗ୍ ବେସି ଗାଜା। 25ମି ବିତ୍ରେ ଇନେର୍ ଇଲେକେ ମାନାର୍, ଇନେର୍ ଇଦାଙ୍ଗ୍ କାଜିଙ୍ଗ୍ ଚିନ୍ତା କିଜି-କିଜି ଜାର୍ ବରସ୍ ବାଡାଇ କିଦେଙ୍ଗ୍ ଆଡ୍ନାଦେର୍? 26ଲାଗିଙ୍ଗ୍ ଏପେଙ୍ଗ୍ ଯଦି ଇ ହିରୁ କାମାୟ୍ କିଦେଙ୍ଗ୍ ଆଡୁଦେରା, ଲାଗିଙ୍ଗ୍ ଜେକନି ଗାଜା କାମାୟ୍ତିଙ୍ଗ୍ ଇନେକିଦେଙ୍ଗ୍ ଚିନ୍ତା କିନାଦେରା?
27ରାନ୍ତି ପୁଇକୁକାଙ୍ଗ୍ ବାବିକିଜି ହୁଡ଼ାଟ୍, ‘ହେୱେକ୍ ଇନେସ୍ ଡିନିକ୍? ହେୱେକ୍ କାମାୟ୍ କିଉକ୍ କି ହେଦ୍ରା ଡ଼ଚୁକ୍ କି ବିୟାନ୍ ୱିତୁକ୍।’ ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ରାଜା ଶଲମନ ବେସି ହଲ୍ନାକା ଆରେ ୱାରି ଆନି ହେନ୍ଦ୍ରା ଉସ୍ପିସ୍ ମାଚାନ୍, ମାତର୍ ତା ହେନ୍ଦ୍ରା ଇ ରଞ୍ଜାଙ୍ଗ୍ ପୁଇ ଲେକେପା ହାର୍ ଆୱାଦାଙ୍ଗ୍ ମାଚାତ୍। 28ଈଶ୍ୱର ବାଟାନି କାଚ୍ରାତିଙ୍ଗ୍ ହଲ୍ନି ରୁପ୍ ହିତାନ୍ନା। ହେ କାଚ୍ରା ନେଞ୍ଜେଙ୍ଗ୍ ଜିତାତ୍ନା ଆରେ ୱିଗାଲିଙ୍ଗ୍ ହେ କାଚ୍ରାତିଙ୍ଗ୍ ନାଣିତାକେ ତୁହିହିନାର୍। ଈଶ୍ୱର ହାତ୍ପା ହେ କାଚ୍ରାତାଙ୍ଗ୍ ମିଙ୍ଗେଙ୍ଗ୍ ଆଦିକ୍ ହଲ୍ନି ରୁପ୍ ହିଦ୍ନାନ୍। ଈଶ୍ୱରତିଙ୍ଗ୍ ଅଲପ୍ ପାର୍ତି କିନାକାଦେର୍।
29ଲାଗିଙ୍ଗ୍ ଏପେଙ୍ଗ୍ ଇନାକା ତିନାସ୍ କି ଇନାକା ଉଣାସ୍ ହେ ବିଷୟ ଅଲପ୍ପା ଚିନ୍ତା କିମାଟ୍। 30ଈଶ୍ୱରତିଙ୍ଗ୍ ପୁନ୍ୱିତି ପୁର୍ତିନି ମାନାୟାର୍ ଇୱିଜୁ ବିଷୟତିଙ୍ଗ୍ ଡେକ୍ଚି ବୁଲାଆନାର୍। ମାତର୍ ଇୱିଜୁ ବିଷୟ ମିଙ୍ଗେଙ୍ଗ୍ ଦର୍କାର୍ ଇଞ୍ଜି ମି ସରଗ୍ନି ଆବା ଈଶ୍ୱର ପୁଚାନ୍ନା।
31ମାତର୍ ଏପେଙ୍ଗ୍ ଈଶ୍ୱର ସାସନ୍ କିନି ରାଜିତିଙ୍ଗ୍ ଡେକାଟ୍, ହେଦାଙ୍ଗ୍ କାଜିଙ୍ଗ୍ ମିଙ୍ଗେଙ୍ଗ୍ ଦର୍କାର୍ଆନି ଇୱିଜୁ ବିଷୟ ହିଦ୍ନାନ୍।
ସରଗ୍ନି ଦନ୍
(ମାଥି. ୬:୧୯-୨୧)
32ଏପେଙ୍ଗ୍ ରଞ୍ଜାଙ୍ଗ୍ ହିରୁ ମାନ୍ଦାନି ମେଣ୍ଢାଦଳ୍ ଲେକେ, ଲାଗିଙ୍ଗ୍ ପାଣ୍ଡ୍ରା ଆମାଟ୍। ମି ସରଗ୍ନି ଆବା ହେ ସରଗ୍ ରାଜି ହିତ୍ଦେଙ୍ଗ୍ ମାନ୍କିନାନା।
33ଲାଗିଙ୍ଗ୍ ଏପେଙ୍ଗ୍ ଜାର୍ ଦନ୍ସମ୍ଫତି ୱିଜୁ ପସି ହେ ଡାବୁଙ୍ଗ୍ ଗରିବ୍ ଲାଗାରିଙ୍ଗ୍ ବାଟାକିଜି ହିୟାଟ୍। ଇ ଜଗତ୍ନି ଦନ୍ସମ୍ଫତି ୱିଜୁଦିନ୍ ମାନ୍ଗୁତ୍। ଲାଗିଙ୍ଗ୍ ୱିଜୁଦିନ୍ ମାନି ଦନ୍ସମ୍ଫତି ଏପେଙ୍ଗ୍ ଆହାଟ୍। ଜାର୍ କାଜିଙ୍ଗ୍ ଈଶ୍ୱର ସାସନ୍ କିନି ରାଜିତାକେ ଦନ୍ସମ୍ଫତି ରୁଣ୍ଡାଇ କିୟାଟ୍। ଇଦାଙ୍ଗ୍ ୱିଜୁଦିନ୍ ମାନ୍ଗାନାତ୍ ସରଗ୍ତାକେ ମି ଦନ୍ସମ୍ଫତି ଇନେର୍ ପା ଚର୍କିଦେଙ୍ଗ୍ ଆଡୁର୍। ଆରେ ପ୍ରାଲ୍ ପା ଚିଞ୍ଜେଙ୍ଗ୍ ଆଡୁତ୍। 34ଦନ୍ସମ୍ଫତି ଇମେତାକେ ମାନ୍ଗାନାତ୍, ଇନେସ୍କି ମି ମାନ୍ ପା ହେବେ ନେ ମାନ୍ଗାନାତ୍।”
ୱିଜୁଦିନ୍ ଜାଗ୍ରତ୍ ମାନାଟ୍
35ଆରେ ଯୀଶୁ ୱେଚ୍ଚାନ୍, “ଆନେଙ୍ଗ୍ ୱାନିହିଙ୍ଗ୍ ମି ବଇଟା ଆହିକିଜି ଏପେଙ୍ଗ୍ ଜାଗ୍ରତ୍ ଆଜି କାସିମାନାଟ୍। 36ଏପେଙ୍ଗ୍ ହେ ହଲିଆ ଲେକେ ଆନାକା ମାନାତ୍, ଇନେର୍କି ତା ମାଲିକ୍ତିଙ୍ଗ୍ ବିବା ବଜି ତାକେତାଙ୍ଗ୍ ଲେଉଟା ଆଜି ୱାନି ପାତେକ୍ କାସିମାନାର୍। ମାଲିକ୍ ୱାଜି କାପାଟ୍ ଇସ୍ତି ଦାପ୍ରେ ସାଙ୍ଗେ-ସାଙ୍ଗେ ୱାଜି ହଲିଆହି ମାଲିକ୍ତିଙ୍ଗ୍ ଦୁୱେର୍ ଜେସି ହିନାନ୍।
37ହେ ହଲିଆହିର୍ ବାଗ୍ଯ, ଇମ୍ଣାକାରିଙ୍ଗ୍ ମାଲିକ୍ ୱାଜି ହୁଡ଼୍ତାନ୍ ଯେ ହେୱାର୍ ଜାଗ୍ରତ୍ ଆଜି ହେୱାନିଙ୍ଗ୍ କାତାର୍ନା। ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗ୍। ମାଲିକ୍ ପା ହଲିଆ ଲେକେ ଆଜି ହେୱାରିଙ୍ଗ୍ ହେବା କିଦେଙ୍ଗ୍ ଇଚାକିନାନ୍। ଆରେ ନିଜେ କାଦି ବାଟାକିଜି ହିନାନ୍। 38ହେ ହଲିଆହିରିଙ୍ଗ୍ ମାଲିକ୍ କାଜିଙ୍ଗ୍ ମାଦିମାଦାନାଣା କି ନାଣାଙ୍ଗେ ୱାତିସ୍ ପା ହେୱାର୍ କାସି ମାନାକା ହୁଡ଼୍ତାନ୍, ହେପାଦ୍ନା ହେୱାନ୍ ୱାରି ଆନାର୍।
39ମାତର୍ ଇଦାଙ୍ଗ୍ ଏପେଙ୍ଗ୍ ପୁନ୍ଞ୍ଜି ମାନାଟ୍, ଯଦି ଇଲ୍ନି ମାଲିକ୍ ଆଗେତାଙ୍ଗ୍ ଚର୍କୁ ୱାନାକା ପୁନ୍ଞ୍ଜି ମାଚିସ୍। ହେୱାନ୍ ତାଞ୍ଜ ଚର୍କୁକାଙ୍ଗ୍ ହଟ୍ପି କିୱାତାନ୍ମା। 40ଏପେଙ୍ଗ୍ ପା ଜାଗ୍ରତ୍ ଆଜି କାସିମାନାଟ୍, ଇନେସ୍କି ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଇନାୱେଡ଼ାଙ୍ଗ୍ ୱାନାନ୍, ଇନାୱେଡ଼ାଙ୍ଗ୍ ଏପେଙ୍ଗ୍ ୱାନାନ୍ ଇଞ୍ଜି ପା ବାବି କିୱାଦାଙ୍ଗ୍ ମାନ୍ଗାନାଦେର୍।”
ହାର୍ଦି ଆରେ ବାନ୍ଯା ହଲିଆ
(ମାଥି. ୨୪:୪୫-୫୧)
41ହେବେତାଙ୍ଗ୍ ପିତର ୱେନ୍ବାତାନ୍, “ମାଲିକ୍! ଇ କାତା ମା କାଜିଙ୍ଗ୍ କି ୱିଜାର୍ କାଜିଙ୍ଗ୍ ୱେଚ୍ନାୟା?” 42ଇଦାଙ୍ଗ୍ ୱେନ୍ଞ୍ଜି ଯୀଶୁ ୱେଚ୍ଚାନ୍, “ରକାନ୍ ସାତ୍ଦାରୁମ୍ ଆରେ ବୁଦିକାଟି ହଲିଆ ଇଲେକେ, ଇନେର୍ ଜେକନି ହଲିଆକାଙ୍ଗ୍ ତିନିହିଙ୍ଗ୍ କାଦି ତାସିହିତାନ୍, ମାଲିକ୍ ହେଲେକେ ହଲିଆହିଙ୍ଗ୍ ପାର୍ତି କିଜି ମାନାନ୍। ଇନେର୍ ହେ ହଲିଆ, ହେ କାମାୟ୍ କିଦେଙ୍ଗ୍ ଇମ୍ଣି ହଲିଆତିଙ୍ଗ୍ ପାର୍ତିକିନାନ୍? 43ଏଚେପାଦ୍ନା ମାଲିକ୍ ୱାଜି ହୁଡ଼୍ତାନ୍ ଯେ, ହେ ହଲିଆତିଙ୍ଗ୍ ଇମ୍ଣି କାମାୟ୍ ହିଜିମାଚାନ୍, ହେ ହଲିଆ ହେ କାମାୟ୍ ହାର୍ଦାଙ୍ଗ୍ କିତାନ୍ନା। ହେପାଦ୍ନା ମାପୃ ହେ ହଲିଆତିଙ୍ଗ୍ ବେସି ୱାରିୟା ଆନାନ୍। 44ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା। ହେୱାନିଙ୍ଗ୍ ତା ୱିଜୁ ଦନ୍ସମ୍ଫତିନି ଦାୟିତ୍ପ ଅଦେଙ୍ଗ୍ ବାଚିକିନାନ୍।
45ମାତର୍ ହେ ହଲିଆ ମାଲିକ୍ ୱାନାକା ବିଲମ୍ ଆନାତ୍ ଇଞ୍ଜି ମାନେ-ମାନେ ଇନାନା, ହଲିଆ ଆରେ ଚାକ୍ରାଣିଙ୍ଗ୍ ମାଡ୍ ଇଡ଼୍ନାନ୍। ଆରେ ଜାର୍ ତିନି ଉଣିତାକେ ନେ ମାନ୍ଗାନାନ୍। ଆରେ କାଲିଙ୍ଗ୍ ଉଣ୍ଜି ମାତ୍ଲି ଆନାନ୍। 46ତାପାଚେ ହେ ହଲିଆହି ଜାଗ୍ରତ୍ ଆଜି କାସି ମାନ୍ଗୁନ୍, ହେପାଦ୍ନା ତା ମାଲିକ୍ ୱାନାକା ପୁନ୍ୱାଦାଙ୍ଗ୍ ମାନ୍ଗାନାନ୍, ହେ ଦିନ୍ ଆରେ ହେଦାପ୍ରେ ତା ମାଲିକ୍ ଏକି ୱାନାନ୍, ହେ ହଲିଆହିଙ୍ଗ୍ ବେସି ଦଣ୍ଡ୍ ହିନାନ୍ ଆରେ ପାଟ୍କାର୍ ମାନାୟାର୍ତାକେ ପିସ୍ତିହିନାନ୍।
47ଇମ୍ଣି ହଲିଆ ଜାର୍ ମାଲିକ୍ ଇଚାତାଙ୍ଗ୍ ଜାଗ୍ରତ୍ ଆଜି କାସି ମାନ୍ଗୁନ୍। ଆରେ ତା ଇଚାକିଜି କାମାୟ୍ କିଉନ୍, ଲାଗିଙ୍ଗ୍ ହେ ହଲିଆ ବେସି ମାଡ୍ ତିନାନ୍। 48ମାତର୍ ୱିଜୁ ହଲିଆହିର୍ ତା ମାଲିକ୍ ଇଚାତାଙ୍ଗ୍ ପୁନ୍ୱାଦାଙ୍ଗ୍ ମାଡ୍ ତିନି ଲେକେ କାମାୟ୍ କିନାନ୍, ହେୱାନ୍ ଅଲପ୍ ଦଣ୍ଡ୍ ପାୟା ଆନାନ୍। ଇନେରିଙ୍ଗ୍ ବେସି ହିତାନ୍ନା, ତାବେତାଙ୍ଗ୍ ବେସି ଗାଟାଆଦେଙ୍ଗ୍ ଆହା କିନାନ୍। ଇନେରିଙ୍ଗ୍ ଆରେ ଆଦିକ୍ ହିତାନ୍ନା, ତାବେତାଙ୍ଗ୍ ଆରେ ଆଦିକ୍ ଗାଟାଆଦେଙ୍ଗ୍ ଆହା କିନାନ୍।”
ଯୀଶୁ ମାନାୟାରିଙ୍ଗ୍ ମାହାୟ୍ କିଦେଙ୍ଗ୍ ଆକାୟ୍ ମାତର୍ ଅଲ୍ଗା କିନାନ୍
(ମାଥି. ୧୦:୩୪-୩୬)
49ଯୀଶୁ ୱେଚ୍ଚି ଲାଗାତାନ୍, “ଆନେଙ୍ଗ୍ ଇ ପୁର୍ତିତାକେ ନାଣି କାଚାୟ୍ କିଦେଙ୍ଗ୍ ୱାତାଙ୍ଗ୍ନା। ଆନେଙ୍ଗ୍ ମାନ୍ କିନାଙ୍ଗା ଇଦାଙ୍ଗ୍ ଆଗେତାଙ୍ଗ୍ କାଚାଆଜି ମାନ୍ଗେତ୍। 50ଆନେଙ୍ଗ୍ ବେସି ଗାଜା କଷ୍ଟ ବେଗି ପାୟାଆନାଙ୍ଗ୍ଦେ। ହେଦାଙ୍ଗ୍ ଆୱି ପାତେକ୍ ଆନେଙ୍ଗ୍ ବେସି ଦୁଃକ୍ତ ମାନାଙ୍ଗ୍।
51ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ପୁର୍ତିତାକେ ଶାନ୍ତି ହିଦେଙ୍ଗ୍ ୱାୱାତାଙ୍ଗ୍ନା। ମାତର୍ ପୁର୍ତିନି ମାନାୟାରିଙ୍ଗ୍ ବାଗ୍-ବାଗ୍କିଦେଙ୍ଗ୍ ୱାତାଙ୍ଗ୍ନା। 52ଲାଗିଙ୍ଗ୍ ନଙ୍ଗୟତାଙ୍ଗ୍ ଯଦି ରଞ୍ଜ ପାଞ୍ଚ୍ଜାଣ୍ ମାନାୟ୍ ମାନ୍ଗାନାର୍, ହେୱାର୍ ବାଗ୍ ଆନାର୍। ତିନ୍ଜାଣ୍ ଇନେର୍ ନାଙ୍ଗେଙ୍ଗ୍ ପାର୍ତି କିଦୁର୍ ହେୱାର୍ ନାଙ୍ଗେଙ୍ଗ୍ ପାର୍ତିକିନି ରିକାରିଙ୍ଗ୍ ବିରୁଦ୍ କିନାର୍। 53ଆବା ମେହିଙ୍ଗ୍ ବିରୁଦ୍ କିନାନ୍, ମେହି ତାଞ୍ଜିବାଙ୍ଗ୍ ବିରୁଦ୍ କିନାନ୍, ଆୟା ଗାଡ଼୍ଚେଙ୍ଗ୍ ବିରୁଦ୍ କିନାତ୍, ଗାଡ଼୍ଚେ ତେହିଙ୍ଗ୍ ବିରୁଦ୍ କିନାତ୍, ପଦାହି କଡ଼ିଆତିଙ୍ଗ୍ ବିରୁଦ୍ କିନାତ୍ ଆରେ କଡ଼ିଆ ପଦାହିଙ୍ଗ୍ ବିରୁଦ୍ କିନାତ୍।”
ଯୁଗ୍ସେସ୍ ଆନି ଚିନା
(ମାଥି. ୧୬:୨-୩)
54ଯୀଶୁ ହେବେ ମାଚି ମାନାୟାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ପଶ୍ଚିମ ନିପଣ୍ତାଙ୍ଗ୍ ଇଚ୍କେ ବାଦାଡ଼୍ ନିଙ୍ଗ୍ନାକା ହୁଡ଼୍ତିସ୍ ୱେଚ୍ନାଦେର୍, ବାର୍ହା ଆନାତ୍ଦେ, ତାପାଚେ ହେଦାଙ୍ଗ୍ନେ ଆନାତ୍। 55ଦକ୍ଷିଣ ଦିଗ୍ ନିପଣ୍ଡାଙ୍ଗ୍ ଡ଼ୁଇ ୱାତିସ୍ ଏପେଙ୍ଗ୍ ୱେଚାଟ୍, ‘ରୁଚିଆ ଆନାତ୍।’ ତାପାଚେ ହେଲେକେନେ ଆନାତ୍। 56ଏ ପାଟ୍କାର୍ କାଦେର୍, ଏପେଙ୍ଗ୍ ବାଦାଡ଼୍ନି ପାଗ୍ ହୁଡ଼୍ଜି ତା ବିଷୟରେ ପୁନାଦେରା। ଲାଗିଙ୍ଗ୍ ଇ ଜୁଗ୍ଦ ମାପୃ ଇନାକା କିନାନା ହେଦାଙ୍ଗ୍ ବୁଜା ଆଦେଙ୍ଗ୍ ଆଡୁଦେରା।
ମି ବିରଦ୍ ନିକାର୍ ହୁଦାଙ୍ଗ୍ ମାହାଆଡ
(ମାଥି. ୫:୨୫-୨୬)
57ମି କାଜିଙ୍ଗ୍ ଇନାକା କିନାକା ଟିକ୍ ବିଷୟରେ ଏପେଙ୍ଗ୍ ହେଦାଙ୍ଗ୍ ନିଜେ ବାଚି କିୟାଟ୍। 58ଯଦି ଏପେଙ୍ଗ୍ ମି ବିରୁଦ୍ ମାନାୟ୍ ଲାହାଙ୍ଗ୍ ବିଚାର୍କିନି ବାହାତାକେ ହାନାଦେରା, ଲାଗିଙ୍ଗ୍ ହେୱାନ୍ ଲାହାଙ୍ଗ୍ ହାଜ୍ଦ ହାନିହିଙ୍ଗ୍ ବୁଜାମାନା କିଜି ହୁଡ଼ାଟ୍। ହେଦାଙ୍ଗ୍ ଆୱିତିସ୍ ହେୱାନ୍ ମୁଡ଼୍ଦି ମାନାୟ୍ କେଇଦ ହେଲାଇ କିଦ୍ନାନ୍। ବିଚାର୍ କିନାକାନ୍ ନିଙ୍ଗେଙ୍ଗ୍ ସାସନ୍ କିନାକାର୍ କେଇଦ ହିଦ୍ନାନ୍, ହେୱାର୍ ଜଇଲ୍ ଇଞ୍ଜ ଗେସ୍ତାନାର୍। 59ଏଚେପାଦ୍ନା ପାତେକ୍ ଏପେଙ୍ଗ୍ ୱିଜୁ ରୁଣ୍ ଏନ୍ତି ଡାବୁଙ୍ଗ୍ ହୁଜା ଆୱାଦାଙ୍ଗ୍ ମାନ୍ଗାନାଦେର୍, ହେ ଦିନ୍ ପାତେକ୍ ଏପେଙ୍ଗ୍ ହେବେତାଙ୍ଗ୍ ୱାଦେଙ୍ଗ୍ ଆଡୁଦେର୍।”
Currently Selected:
ଲୁକ 12: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
