ଲୁକ 18
18
ଯୀଶୁ ରଞ୍ଜେଲ୍ ରାଣ୍ଡି କଗ୍ଲେଙ୍ଗ୍ ଆରେ ବିଚାର୍ କିନାକାର୍ତି କାତା
1ଯୀଶୁ ତା ଚେଲାହିରିଙ୍ଗ୍ ହିକ୍ଷାହିଜି ମାଚାନ୍ ଯେ, ହେୱାର୍ ୱିଜୁଦିନ୍ ଆହା ଆରାଇ କିୱିଲେକେ ପାର୍ତାନା କିନି ଦର୍କାର୍। ଯୀଶୁ ହେୱାରିଙ୍ଗ୍ ହିକାଇ କିଦେଙ୍ଗ୍ ଇ କାତା ୱେଚ୍ଚାନ୍, 2“ଦିନେକ୍ ର ସହର୍ତାକେ ରକାନ୍ ବିଚାର୍ କିନାକାନ୍ ମାଚାନ୍। ହେୱାନ୍ ଈଶ୍ୱରତିଙ୍ଗ୍ ପାଣ୍ଡ୍ରା ଆୱାଦାଙ୍ଗ୍ ମାଚାନ୍ କି ମାନାୟାରିଙ୍ଗ୍ ମାନିକିୱାଦାଙ୍ଗ୍ ମାଚାନ୍।
3ହେ ସହର୍ତ ର କଗ୍ଲେ ମାଚାତ୍। ତା ଡକ୍ରାହି ହାଃଜି ମାଚାନ୍। ହେ କଗ୍ଲେ ଇ ବିଚାର୍ କିନାକାନ୍ତାକେ ବେସିହଟ୍ ୱାଜି ମାଚାତ୍। ହେଦେଲ୍ ବିଚାର୍ କିନାକାନିଙ୍ଗ୍ ୱେଚ୍ଚି ମାଚାତ୍, ‘ରକାନ୍ ନାଙ୍ଗେଙ୍ଗ୍ ଅନ୍ୟାୟ୍ କିତ୍ତାନ୍ନା। ଏନେଙ୍ଗ୍ ନାଙ୍ଗେଙ୍ଗ୍ ନା ନ୍ୟାୟ୍ କିଜି ହିଦା।’ 4ମାତର୍ ବିଚାର୍ କିନାକାନ୍ ହେ କଗ୍ଲେଙ୍ଗ୍ ସାଇଜ କିଦେଙ୍ଗ୍ ଇଚା କିୱାଦାଙ୍ଗ୍ ମାଚାନ୍। କେତ୍ଦିନ୍ ପାଚେ ବିଚାର୍ କିନାକାନ୍ ତା ମାନେ-ମାନେ ବାବିକିତାନ୍, ‘ଆନେଙ୍ଗ୍ ଈଶ୍ୱରତିଙ୍ଗ୍ ପାଣ୍ଡ୍ରା ଆଉଙ୍ଗା କି ମାନାୟାରିଙ୍ଗ୍ ମାନି କିଉଙ୍ଗା। 5ମାତର୍ ଇ କଗ୍ଲେ ନାଙ୍ଗେଙ୍ଗ୍ ସବୁଦିନ୍ ବିଜାର୍ କିଦ୍ନାତା। ଆନେଙ୍ଗ୍ ହେଦେଲିଙ୍ଗ୍ ନ୍ୟାୟ୍ କିଜି ହିତିସ୍ ହେଦେଲ୍ ନା ଲାଗାୟ୍ ୱାଦେଙ୍ଗ୍ ପିହ୍ନାତ୍। ନଇଲେ ଇ କଗ୍ଲେ ନାଙ୍ଗେଙ୍ଗ୍ ହଇରାଣ୍ କିଜି ଲାଗ୍ଦାନାତ୍।’ ”
6ମାପୃ! ଯୀଶୁ ୱେଚ୍ଚାନ୍, “ୱେନାଟ୍ ହେ ବାନ୍ଯା ବିଚାର୍ କିନାକାଇ ଇନାକା ୱେଚ୍ଚାତାନ୍, ହେ କାତାତିଙ୍ଗ୍ ମାନ୍ଦିୟାନ୍ କିଜି ବୁଜାଆଡ। 7ଈଶ୍ୱର ଇନେରିଙ୍ଗ୍ ମାନ୍ କିଜି ବାଚିକିତାନ୍ ହେୱାର୍ ୱେଡ଼ା ନାଣା ଈଶ୍ୱରତାକେ ନ୍ୟାୟ୍ କାଜିଙ୍ଗ୍ ପାର୍ତାନା କିତିସ୍। ଈଶ୍ୱର ହେୱାରିଙ୍ଗ୍ ଡେରି କିଉନ୍। 8ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା। ବେଗି ଈଶ୍ୱର ତା ଲକ୍ତିଙ୍ଗ୍ ନ୍ୟାୟ୍ ହିନାନ୍। ମାତର୍ ଇ ପୁର୍ତିତାକେ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା (ଯୀଶୁ) ଆରେରଗ ୱାତିସ୍, ତାଙ୍ଗେଙ୍ଗ୍ ପାର୍ତି କିନାକାରିଙ୍ଗ୍ ଗାଟାଆନାନ୍ କି?”
ପାରୁସିର୍ ଆରେ ସିସ୍ତୁଏନ୍ନାକାର୍ତି କାତା
9କେତ୍ଜାଣ୍ ବାବିକିଜି ମାଚାର୍ ଯେ ହେୱାର୍ ବେସି ଦରମ୍। ହେୱାର୍ ନିଜେ ଜେକନିକାର୍ତାଙ୍ଗ୍ ବେସି ଗିଣ୍ ଆତିଲେକେ ବାଉରା ଆନାରା। ଯୀଶୁ ହେୱାରିଙ୍ଗ୍ ହିକ୍ଷାହିଦେଙ୍ଗ୍ ଇ କାତା ୱେଚ୍ଚାତାନ୍, 10“ରକାନ୍ ପାରୁସିଦଳ୍ନି ପାରୁସି ଆରେ ରକାନ୍ ସିସ୍ତୁ ଏନ୍ନାକାନ୍ ମାଚାନ୍। ଦିନେକ୍ ରିକାର୍ ପାର୍ତାନା କିଦେଙ୍ଗ୍ ଈଶ୍ୱର ମାନି ମନ୍ଦିର୍ତାକେ ହାଚାର୍।
11ପାରୁସି ଆରେ ସିସ୍ତୁଏନ୍ନାକାନ୍ତାଙ୍ଗ୍ ଜେକ ନିଲ୍ଚି ମାଚାନ୍। ପାରୁସିଦଳ୍ନିକାନ୍ ରକାନ୍ ନିଲ୍ଚି ପାର୍ତାନା କିନିହିଙ୍ଗ୍ ୱେଚ୍ଚାନ୍, ‘ଏ ଈଶ୍ୱର, ଆନେଙ୍ଗ୍ ଜେକନିକାନ୍ ଲେକେ ବାନ୍ୟା ଆୱିତିଲେ ନିଙ୍ଗେଙ୍ଗ୍ ଦନ୍ଯବାଦ୍ ହିଦ୍ନାଙ୍ଗା। ଆନେଙ୍ଗ୍ ଚର୍, ଟକୁୱା, ଦାରି ଆରେ ପାପ୍ କାମାୟ୍ କିନି ମାନାୟାର୍ଲେକେ ଆକାୟ୍। ଆନେଙ୍ଗ୍ ଇ ସିସ୍ତୁଏନ୍ନାକାନ୍ତାଙ୍ଗ୍ ହାର୍ଦାକାଙ୍ଗ୍ ଆତିଲେ ନି ଲାଗାୟ୍ ଦନ୍ଯବାଦ୍ ହିଦ୍ନାଙ୍ଗା। 12ଆନେଙ୍ଗ୍ ରକାଙ୍ଗ୍ ହାର୍ଦାକାଙ୍ଗ୍। ଆନେଙ୍ଗ୍ ଆଡ଼୍ଦିନ୍ତିଙ୍ଗ୍ ରିଦିନ୍ ଉପାସ୍ କିନାଙ୍ଗା। ଆନେଙ୍ଗ୍ ନା ୱିଜୁ ରଜ୍ଗାର୍ତାଙ୍ଗ୍ ଦସ୍ ବାଗ୍ତାଙ୍ଗ୍ ର ବାଗ୍ ଦାନ୍ ହିନାଙ୍ଗା।’
13ସିସ୍ତୁ ଏନ୍ନାକାନ୍ ପା ଜେକ ରକାନ୍ ନିଲ୍ଚି ମାଚାନ୍। ମାତର୍ ପାର୍ତାନା କିନିହିଙ୍ଗ୍ ହେୱାନ୍ ସରଗ୍ ନିପଣ୍ ହୁଡ଼୍ଦେଙ୍ଗ୍ ଶାସ୍ କିୱାତାନ୍। ସିସ୍ତୁ ଏନ୍ନାକାନ୍ ଈଶ୍ୱର ଲାଗାୟ୍ ଦୁକ୍ଆଜି ନେଞ୍ଜାଡାକିତାକେ ଇଡ଼ିଆ ଆଜି ପାର୍ତାନା କିତାନ୍, ‘ଏ ଈଶ୍ୱର, ନାଙ୍ଗେଙ୍ଗ୍ ଦୟାକିଦା। ଆନେଙ୍ଗ୍ ରକାଙ୍ଗ୍ ପାପି ମାନାୟ୍।’
14ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ‘ହେ ସିସ୍ତୁଏନ୍ନାକାନିଙ୍ଗ୍ ଈଶ୍ୱର ଦରମ୍ ଇଞ୍ଜି ଗାଣାକିତାନ୍। ମାତର୍ ହେ ପାରୁସିଙ୍ଗ୍ ଆକାୟ୍। ହେଦାଙ୍ଗ୍ କାଜିଙ୍ଗ୍ ଇମ୍ଣାକାନ୍ ଆନେଙ୍ଗ୍ ଗାଜାକାଙ୍ଗ୍ ଇନାନ୍, ଈଶ୍ୱର ହେୱାନିଙ୍ଗ୍ ୱିଜାକାର୍ତାଙ୍ଗ୍ ହିରୁ କିନାନ୍। ଇମ୍ଣାକାନ୍ ଆନେଙ୍ଗ୍ ହିରୁ ଇଞ୍ଜି ବାବିକିନାନ୍, ଈଶ୍ୱର ହେୱାନିଙ୍ଗ୍ ୱିଜାକାର୍ତାଙ୍ଗ୍ ଗାଜା କିନାନ୍।’ ”
ଯୀଶୁ ହିରୁ ହିମ୍ଣାରିଙ୍ଗ୍ ଆଶ୍ରିବାଦ୍ କିତାନ୍
(ମାଥି. ୧୯:୧୩-୧୫; ମାର୍କ. ୧୦:୧୩-୧୬)
15ଦିନେକ୍ ଯୀଶୁ ହିରୁ-ହିରୁ ଗାଡ଼୍ଚେ ହିମ୍ଣାକାଙ୍ଗ୍ କାପ୍ଡ଼ାତାକେ କେଇ ଇଡ଼୍ଜି ଆଶ୍ରିବାଦ୍ କିନାନ୍ ଇଞ୍ଜି, ତା ଲାଗାୟ୍ ତାତେଙ୍ଗ୍ ଲାଗାତାର୍, ମାତର୍ ତା ଚେଲାହିର୍ ମାନାୟାରିଙ୍ଗ୍ ତାହିୱାନାକା ହୁଡ଼୍ଜି କେତ୍ତେଙ୍ଗ୍ ଲାଗାତାର୍। 16ମାତର୍ ଯୀଶୁ ହେୱାରିଙ୍ଗ୍ ତା ଲାଗେ କୁକ୍ଚି ୱେଚ୍ଚାନ୍, “ହିରୁ-ହିରୁ ଗାଡ଼୍ଚେ ହିମ୍ଣାକାଙ୍ଗ୍ ନା ଲାଗେ ୱାଦେଙ୍ଗ୍ ହିଆଟ୍। ଆରେ ହେୱାରିଙ୍ଗ୍ ମୁନା କିମାଟ୍, ଇନେସ୍କି ଈଶ୍ୱର ସାସନ୍ କିନି ରାଜି ଇ ଗାଡ଼୍ଚେ ହିମ୍ଣାଙ୍ଗ୍ ଲେକେ। 17ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଇନେର୍ ପା ହିରୁ ହିମ୍ଣା ଲେକେ ଈଶ୍ୱର ଆଦିକାର୍ତିଙ୍ଗ୍ ମାନିକିଉନ୍, ହେୱାନ୍ ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଆଡୁନ୍।”
ହାଉକାର୍ ମାନାୟାର୍ ଦୁଃକ୍କଷ୍ଟତାଙ୍ଗ୍ ଈଶ୍ୱର ସାସନ୍ କିନି ରାଜିତାକେ ହାନାର୍
(ମାଥି. ୧୯:୧୬-୩୦; ମାର୍କ. ୧୦:୧୭-୩୧)
18ଦିନେକ୍ ରକାନ୍ ଯିହୁଦିର୍ ମୁଡ଼୍ଦାକାନ୍ ଯୀଶୁଙ୍ଗ୍ ୱେନ୍ବାତାନ୍, “ଏ ସତ୍ ଗୁରୁ! ୱିଜ୍ୱି ଜିବୁନ୍ ପାଇକିଦେଙ୍ଗ୍ ଆନେଙ୍ଗ୍ ଇନାକା କିଦେଙ୍ଗ୍ ଆନାତ୍?” 19ହେପାଦ୍ନା ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ନାଙ୍ଗେଙ୍ଗ୍ ସତ୍ ଇଞ୍ଜି ଇନା କିଦେଙ୍ଗ୍ ଇଞ୍ଜ୍ନାୟା? ଈଶ୍ୱରତିଙ୍ଗ୍ ପିସ୍ତି ଆରେ ଇନେର୍ ପା ସତ୍ନିକାନ୍ ଆକାୟ୍। 20ଈଶ୍ୱର ଆଦେସ୍ ୱିଜୁ ଏପେଙ୍ଗ୍ ପୁନାଟ୍, ମାନାୟ୍ ଅହ୍ମାଟ୍, ଦାରି କିମାଟ୍, ଚର୍ କିମାଟ୍, ମିଚ୍ ସାକି ହିମାଟ୍, ଜାର୍ ଆବାଆୟା କାତା ମାନିକିଜି ସନ୍ମାନ୍ କିୟାଟ୍।” 21ମାତର୍ ଯିହୁଦି ଦରମ୍ନି ମୁଡ଼୍ଦାକାନ୍ ୱେଚ୍ଚାନ୍, “ଇୱିଜୁ ଆଦେସ୍ତିଙ୍ଗ୍ ଆନେଙ୍ଗ୍ ବେଣ୍ଡିଆ ୱେଡ଼ାତାଙ୍ଗ୍ ମାନିକିଜି ୱାନାଙ୍ଗା।”
22ଯୀଶୁ ଇଦାଙ୍ଗ୍ ୱେନ୍ଞ୍ଜି ହେୱାନିଙ୍ଗ୍ ୱେଚ୍ଚାନ୍, “ନିଦି ର ବିଷୟ ଉଣା ମାନାତ୍, ଏନେଙ୍ଗ୍ ହାଲ୍ଜି ନି ଦନ୍ ସମ୍ପତି ୱିଜେ ପସି ଗରିବ୍ନିକାରିଙ୍ଗ୍ ଡାବୁଙ୍ଗ୍ ହିୟା, ଆରେ ନା ପାଚେ ୱା, ଆରେ ଏନେଙ୍ଗ୍ ଏଲେଙ୍ଗ୍ କିତିସ୍ ସରଗ୍ତାକେ ଦନ୍ ପାୟାଆନାୟ୍।” 23ମାତର୍ ହେୱାନ୍ ବେସି ହାଉକାର୍ ମାଚାନ୍। ହେଦାଙ୍ଗ୍ କାଜିଙ୍ଗ୍ ଯୀଶୁ ବେଣ୍ ୱେନ୍ଞ୍ଜି ହେ ମୁଡ଼୍ଦାକାନ୍ ଆଦିକ୍ ଦୁଃକ୍ ଆତାନ୍।
24ହେବେତାଙ୍ଗ୍ ଯୀଶୁ ଯିହୁଦି ଦରମ୍ନି ମୁଡ଼୍ଦାକାନିଙ୍ଗ୍ ହୁଡ଼୍ଜି ୱେଚ୍ଚାନ୍, “ଈଶ୍ୱର ସାସନ୍ କିନି ରାଜିତାକେ ହାଉକାର୍ ମାନାୟ୍ ହାଞ୍ଜେଙ୍ଗ୍ ବେସି କଷ୍ଟ! 25ଇନେସ୍କି ଉଟ୍ ପଶୁ ହୁଜାକାଣା ତ ହାଞ୍ଜେଙ୍ଗ୍ କଷ୍ଟ ଆନାତ୍, ହେଲେକେ ନେ ର ହାଉକାର୍ ମାନାୟ୍ ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଆଦିକ୍ କଷ୍ଟ ଆନାର୍।”
26ଇମ୍ଣାକାର୍ ଇବେଣ୍ ୱେଚାକାର୍, ହେୱାର୍ ୱେଚ୍ଚାର୍, “ଇନେର୍ ରକ୍ଷା ପାୟାଆନାର୍?” 27ମାତର୍ ଯୀଶୁ ୱେଚ୍ଚାନ୍, “ଇନାକା ମାନାୟାର୍ କିଦେଙ୍ଗ୍ ଆଡୁର୍, ହେଦାଙ୍ଗ୍ ଈଶ୍ୱର କିଦେଙ୍ଗ୍ ଆଡ୍ନାନ୍।”
28ହେବେତାଙ୍ଗ୍ ପିତର ଯୀଶୁଙ୍ଗ୍ ୱେଚ୍ଚାନ୍, “ହୁଡ଼ାଟ୍, ଆପେଙ୍ଗ୍ ଜାର୍-ଜାର୍ ୱିଜୁ ପିସ୍ତି ନି ପାଚେ-ପାଚେ ୱାତାପ୍ ଆରେ ନି ଚେଲା ଆତାପ୍ନା।” 29ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଇମ୍ଣି ମାନାୟ୍ ଈଶ୍ୱର ସାସନ୍ କିନି ରାଜି କାଜିଙ୍ଗ୍ ଇଲ୍ଗାଣ୍ କି କଗ୍ଲେ କି ଟଣ୍ଡେନ୍ କି ଆବାଆୟା କି ହିମ୍ଣାୱାକ୍ଡ଼ା ପିହ୍ନାନ୍, 30ହେୱାନ୍ ଇ ଯୁଗ୍ତ ବେସି ପାୟା ଆନାନ୍। ଆରେ ପାଚେନି କାଡ଼୍ଦ ହେୱାନ୍ ୱିଜ୍ୱି ଜିବୁନ୍ ପାୟା ଆନାନ୍। ଆରେ ହେୱାନ୍ ଈଶ୍ୱର ହୁଦାଙ୍ଗ୍ ୱିଜ୍ୱିଦିନ୍ ପାତେକ୍ ମାନ୍ଗାନାନ୍।”
ଯୀଶୁ ତା ହାଃନି ବିଷୟରେ ଆରେରଗ ୱେଚ୍ଚାନ୍
(ମାଥି. ୨୦:୧୭-୧୯; ମାର୍କ. ୧୦:୩୨-୩୪)
31ଯୀଶୁ ବାରଜାଣ୍ ଚେଲାହିରିଙ୍ଗ୍ ର ବାହାତାକେ କୁକ୍ଚି ହେୱାରିଙ୍ଗ୍ ୱେଚ୍ଚାନ୍, “ହୁଡ଼ାଟ୍, ଆସେଙ୍ଗ୍ ଯିରୁଶାଲାମ ସହର୍ତାକେ ହାନାସ୍। ଆରେ ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ବିଷୟରେ ଭବିଷ୍ଯତବକ୍ତାର୍ ଇମ୍ଣିୱିଜୁ ଲେକିକିତାର୍, ହେ ୱିଜୁ ବିଷୟ ହେବେ ହାଚିସ୍ ପୁରାଆନାତ୍। 32ମାତର୍ ନାଙ୍ଗେଙ୍ଗ୍ ଅସ୍ତାନାର୍, ବିନ୍ଜାତିନି କେଇଦ ହେଲାଇ କିଜି ହିଦ୍ନାର୍, ଆରେ ହେ ବିନ୍ଜାତିର୍ ମାନାୟାର୍ ନାଙ୍ଗେଙ୍ଗ୍ ଇନସ୍ତା କିଦ୍ନାର୍, ଆରେ ନା ଜପି ଏଉଡ଼ିଙ୍ଗ୍ ଚୁପ୍ଜି ଅପ୍ମାନ୍ କିଦ୍ନାର୍। 33ହେୱାର୍ ନାଙ୍ଗେଙ୍ଗ୍ କୋରଡା ହୁଦାଙ୍ଗ୍ ଇଡ଼୍ଜି ପାଗ୍ଦାନାର୍। ଆରେ ତିନ୍ଦିନ୍ ହାଚି ପାଚେ ଆନେଙ୍ଗ୍ ଆରେରଗ ଜିବୁନ୍ଆଜି ନିଙ୍ଗ୍ନାଙ୍ଗ୍।”
34ମାତର୍ ଚେଲାହିର୍ ଯୀଶୁ ୱେଚ୍ଚି ବେଣ୍ତିଙ୍ଗ୍ ଅଲପ୍ପା ବୁଜାଆୱାତାର୍, ଇନେସ୍କି ହେ କାତାନି ଅର୍ତ ଇନାକା ହେୱାର୍ ପୁନ୍ୱାଦାଙ୍ଗ୍ ମାଚାର୍। ହେଦାଙ୍ଗ୍ କାଜିଙ୍ଗ୍ ଯୀଶୁ ଇଲେକେ ଇନା କିଦେଙ୍ଗ୍ ୱେଚ୍ଚାନାନା ହେ ବିଷୟ ହେୱାର୍ ବୁଜା ଆଦେଙ୍ଗ୍ ଆଡ୍ୱାଦାଙ୍ଗ୍ ମାଚାର୍।
ଯୀଶୁ ର କାଣା ବିକାରିଙ୍ଗ୍ ହାର୍କିତାନ୍
(ମାଥି. ୨୦:୨୯-୩୪; ମାର୍କ. ୧୦:୪୬-୫୨)
35ଯୀଶୁ ଆରେ ତା ଚେଲାହିର୍ ଯିରିହୋ ସହର୍ ଲାଗେ ଆତିୱେଡ଼ାଲିଙ୍ଗ୍ ରକାନ୍ କାଣାମାନାୟ୍ ହାଜି ଲାଗାୟ୍ କୁଚ୍ଚି ବିକ୍ୟା ଏନ୍ଚିମାଚାନ୍। 36ହେୱାନ୍ ମାନାୟ୍ ଗଉଲି ୱାନି ଶବଦ୍ ୱେଚାନ୍, ଆରେ ହେୱାନ୍ ୱେଚ୍ଚାନ୍, “ନେଞ୍ଜେଙ୍ଗ୍ ଇନା କିଦେଙ୍ଗ୍ ଏଚେକ୍ ଗଉଲି?” 37ମାତର୍ ମାନାୟାର୍ ହେୱାନିଙ୍ଗ୍ ୱେଚ୍ଚାର୍, “ନାଜରିତ ସହର୍ନି ଯୀଶୁ ଇ ହାଜ୍ଦିଙ୍ଗ୍ ହାନାନା।”
38ହେବେତାଙ୍ଗ୍ ହେୱାନ୍ ଗାଜାକାଟ୍ କିଜି କୁକ୍ତାନ୍, “ଏ ଦାଉଦ ଲାତ୍ରାନି ଯୀଶୁ, ନାଙ୍ଗେଙ୍ଗ୍ ଦୟାକିଦା।” 39ମାତର୍ ଆଗେ ହାନି ମାନାୟାର୍ ତାଙ୍ଗେଙ୍ଗ୍ ଚିମ୍ରା ଆଦେଙ୍ଗ୍ ଦମ୍କାଇକିଜି ୱେଚ୍ଚାର୍। ମାତର୍ ହେୱାନ୍ ଆରେ ବାଡାଙ୍ଗ୍ ହିର୍ବାତାନ୍, “ଏ ଦାଉଦ ଲାତ୍ରାନି ଯୀଶୁ, ନାଙ୍ଗେଙ୍ଗ୍ ଦୟାକିଦା।”
40ହେବେତାଙ୍ଗ୍ ଯୀଶୁ ନିଲ୍ଚି ତା ଲାଗାୟ୍ ତାହିୱାଦେଙ୍ଗ୍ ଆଦେସ୍ ହିତାନ୍। ଆରେ ହେୱାନିଙ୍ଗ୍ ତାହିୱାତି ପାଚେ ଯୀଶୁ ୱେନ୍ବାତାନ୍, “ଆନେଙ୍ଗ୍ ନି କାଜିଙ୍ଗ୍ ଇନାକା କିନାଙ୍ଗ୍ ଇଞ୍ଜି ଏନେଙ୍ଗ୍ ଇଚା କିନାୟା?” 41ହେ କାଣାମାନାୟ୍ ଯୀଶୁଙ୍ଗ୍ ୱେଚ୍ଚାନ୍, “ଏ ମାପୃ, ଆନେଙ୍ଗ୍ କାଣ୍କୁ ହୁଡ଼୍ଦେଙ୍ଗ୍ ଇଚା କିନାଙ୍ଗା।”
42ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ନଙ୍ଗୟ୍ ହୁଡ଼ା। ଏନେଙ୍ଗ୍ ନାଙ୍ଗେଙ୍ଗ୍ ପାର୍ତି କିତ୍ତିଲେ ଈଶ୍ୱର ନିଙ୍ଗେଙ୍ଗ୍ ହାର୍ କିତ୍ତାତ୍ନା।” 43ହେଦାପ୍ରେ କାଣାମାନାୟ୍ କାଣ୍କୁ ହୁଡ଼୍ତାନ୍। ଆରେ ଈଶ୍ୱରତିଙ୍ଗ୍ ଜୟ୍-ଜୟକିଜି ଯୀଶୁ ପାଚେ-ପାଚେ ହାଚାନ୍। ଇଦାଙ୍ଗ୍ ହୁଡ଼୍ଜି ମାନାୟାର୍ ଈଶ୍ୱରତିଙ୍ଗ୍ ଜୟ୍-ଜୟ୍ କିତାର୍।
Currently Selected:
ଲୁକ 18: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
