ଲୁକ 3
3
ଡୁବନ୍ହିନି ଯୋହନତି ହାର୍ଦିକାବୁର୍ ଶୁଣାୟ୍ କିନି ବିଷୟ
(ମାଥି. ୩:୧-୧୨; ମାର୍କ. ୧:୧-୮; ଯୋହନ. ୧:୧୯-୨୮)
1ରମ୍ ଦେସ୍ତିଙ୍ଗ୍ କାଇସର୍ ତିବିରିଆ ମହା ରାଜା ଚଉଦ ବାର୍ହୁ ସାସନ୍ କିତାନ୍। ଆରେ ତା ପନ୍ଦ୍ର ବାର୍ହୁ ଆନିହିଙ୍ଗ୍, ପନ୍ତିୟ ପିଲାତ ରାଜା ଯିହୁଦା ଜିଲ୍ଲାତିଙ୍ଗ୍ ସାସନ୍ କିଜି ମାଚାନ୍। ହେରୋଦ ରାଜା ଗାଲିଲୀ ଜିଲ୍ଲାତିଙ୍ଗ୍ ସାସନ୍ କିଜି ମାଚାନ୍। ଆରେ ହେରୋଦ ରାଜା ଟଣ୍ଡାହି ପିଲିପ ରାଜା ଇତୁରିଆ ଆରେ ତ୍ରାକନିତିସ୍ ଜିଲ୍ଲାତାକେ ସାସନ୍ କିଜି ମାଚାନ୍। ଲୁସିନିୟା ରାଜା ଆବିଲିନି ଜିଲ୍ଲାତାକେ ସାସନ୍ କିଜି ମାଚାନ୍। 2ହାନାନ ଆରେ କୟାପା ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ମାଚାର୍। ହେପାଦ୍ନା ଡୁବନ୍ହିନି ଯୋହନ ଟାଙ୍ଗ୍ରାବାହାତାକେ ବାହାକିଜି ମାଚାନ୍। ଈଶ୍ୱର ଜିକରିୟନି ହିମ୍ଣା ଯୋହନତିଙ୍ଗ୍ ମାନାୟାରିଙ୍ଗ୍ ଶୁଣାୟ୍ କିଦେଙ୍ଗ୍ ଆଦେସ୍ ହିତାନ୍।
3ହେଦାଙ୍ଗ୍ କାଜିଙ୍ଗ୍ ଡୁବନ୍ହିନି ଯୋହନ ଯର୍ଦ୍ଦନ ନାଗୁଡ଼୍ କଚଣ୍ନି ୱିଜୁ ନାସ୍କୁକାଙ୍ଗ୍ ହାଚାନ୍। ଆରେ ମାନାୟାରିଙ୍ଗ୍ ୱେଚ୍ଚେଙ୍ଗ୍ ଲାଗାତାନ୍, “ପାପ୍ କାମାୟ୍ ପିସ୍ତି ମାପୃତାକେ ୱାଡ, ଆରେ ଡୁବନ୍ ଅୱାଟ୍। ଏଲେଙ୍ଗ୍ କିତିସ୍ ଈଶ୍ୱର ମିଙ୍ଗେଙ୍ଗ୍ ପାପ୍ କେମା କିଦ୍ନାନ୍।”
4ଭବିଷ୍ଯତବକ୍ତା ଯିଶାୟ ତା ସାସ୍ତର୍ତାକେ ଲେକିକିତି କାତା ପୁରା ଆଦେଙ୍ଗ୍ ଇଲେକେ ଆତାତ୍,
“ଟାଙ୍ଗ୍ରାବାହାତାକେ ରକାନ୍ ମାନାୟ୍ ଗାଜାକାଟ୍ କିଜି ୱେଚ୍ଚାନାନା, ‘ମାପୃ କାଜିଙ୍ଗ୍ ହାଜି ରହାଟ୍। ଆରେ ତା ହାନି ହାଜି ହାଣ୍କୁ କିୟାଟ୍।
5ୱିଜୁ ଉଚ୍ କଡ଼ି ବାଲିଆ ବାଟାତିଙ୍ଗ୍ ହାମାନ୍ କିୟାଟ୍। ୱିଜୁ ମାଡ଼ି ଗିଡ଼୍ଗିତିଙ୍ଗ୍ ହାମାନ୍ କିୟାଟ୍। ବାଙ୍ଗ୍ଟା ହାଜି ହାଣ୍କୁ କିୟାଟ୍ ଆରେ ଉଚ୍ କଡ଼ି ହାଜି ୱିଜୁ ହାମାନ୍ କିୟାଟ୍।
6ଈଶ୍ୱର ଇମ୍ଣି ଉଦାର୍ କିଦ୍ନାକାନିଙ୍ଗ୍ ପକ୍ତାନାଙ୍ଗ୍ ଇଞ୍ଜି ମାଚାନ୍ ହେୱାନିଙ୍ଗ୍ ୱିଜାକାର୍ ହୁଡ଼୍ନାର୍।’ ”
7ଡୁବନ୍ହିନି ଯୋହନ ଲାଗାୟ୍ ଡୁବନ୍ ଅନି କାଜିଙ୍ଗ୍ ମାନାୟାର୍ ୱାତାର୍। ଡୁବନ୍ହିନି ଯୋହନ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ବିସ୍ମାନି ରାଚ୍ ଲେକେ ବାନ୍ୟା ମାନାଦେର୍! ଏପେଙ୍ଗ୍ ଡୁବନ୍ ଅଜି ଈଶ୍ୱର ଦଣ୍ଡ୍ତାଙ୍ଗ୍ ଉଦାର୍ ପାୟାଆନାପ୍ ଇଞ୍ଜି ଏପେଙ୍ଗ୍ ମାନ୍ତ ବାବିକିମାଟ୍।
8ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ପାପ୍ କାମାୟ୍ ପିସ୍ତି ମାପୃତାକେ ୱାଡ ଆରେ ହାର୍ଦି କାମାୟ୍ କିୟାଟ୍। ଏପେଙ୍ଗ୍ ଏଲେଙ୍ଗ୍ ମାନ୍ତ ବାବିକିମାଟ୍, ଆପେଙ୍ଗ୍ ତ ଅବ୍ରାହାମ୍ ମେହି ଈଶ୍ୱର ମାଙ୍ଗେଙ୍ଗ୍ ଦଣ୍ଡ୍ ହିଦୁନ୍ ଇଞ୍ଜି। ଇନେସ୍କି ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ‘ଈଶ୍ୱର ଅବ୍ରାହାମ୍ କାଜିଙ୍ଗ୍ ଇ କାଲ୍କୁକାଙ୍ଗ୍ ପା ତା ହିମ୍ଣାୱାକ୍ଡ଼ା ଉବ୍ଜାଇ କିଦେଙ୍ଗ୍ ଆଡ୍ନାନ୍।’
9ଟେଙ୍ଗିଆ ଆସ୍ତି ମାର୍ କାଦ୍ଦେଙ୍ଗ୍ ଜାଗ୍ରତ୍ ଆଜି ମାଚିଲେକେ ଈଶ୍ୱର ପା ପାପ୍ କାମାୟ୍ ପିସ୍ତି ମାପୃତାକେ ୱାୱିତି ମାନାୟାରିଙ୍ଗ୍ ଦଣ୍ଡ୍ ହିଦେଙ୍ଗ୍ ଜାଗ୍ରତ୍ ଆତାନ୍ନା। ର ପାଡ଼୍ ଆହ୍ୱି ମାର୍ତିଙ୍ଗ୍ ଇନେସ୍ ମାର୍ କାତ୍ନି ମାନାୟ୍ ଇନେସ୍ଲେକେ କାଦ୍ଦି ନାଣିତାକେ ତୁସିହିନାନ୍, ହେଲେକେ ଇମ୍ଣାକାନ୍ ହାର୍ଦି କାମାୟ୍ କିଉନ୍ ହେୱାନିଙ୍ଗ୍ ଈଶ୍ୱର ଦଣ୍ଡ୍ହିଜି କାଚାଆନି ନାଣିତାକେ ତୁହିହିଦ୍ନାନ୍।”
10ହେଦାଙ୍ଗ୍ କାଜିଙ୍ଗ୍ ମାନାୟାର୍ ହେୱାନିଙ୍ଗ୍ ୱେନ୍ବାତାର୍, “ଲାଗିଙ୍ଗ୍ ଆପେଙ୍ଗ୍ ଈଶ୍ୱର ଡଣ୍ଡ୍ତାଙ୍ଗ୍ ରକ୍ଷା ପାୟା ଆଦେଙ୍ଗ୍ ଇନାକା କିନାପ୍?” 11ଡୁବନ୍ହିନି ଯୋହନ ହେୱାରିଙ୍ଗ୍ ୱେଚ୍ଚାନ୍, “ଯଦି ମି ଲାଗାୟ୍ ରିଣ୍ଡି ହେନ୍ଦ୍ରା ମାନାତ୍, ଲାଗିଙ୍ଗ୍ ହେବେତାଙ୍ଗ୍ ର ହେନ୍ଦ୍ରା ଇନେରିଙ୍ଗ୍ ହିଲେତ୍ ହେୱାନିଙ୍ଗ୍ ହିୟାଟ୍। ଆରେ ଯଦି ମିଙ୍ଗେଙ୍ଗ୍ କାଦି ମାନାତ୍ ଇନେରିଙ୍ଗ୍ କାଦି ହିଲେତ୍ ହେୱାନିଙ୍ଗ୍ ବାଟାକିଜି ହିୟାଟ୍।”
12କେତେକ୍ ସିସ୍ତୁଏନ୍ନାକାର୍ ଡୁବନ୍ ଅନି କାଜିଙ୍ଗ୍ ତା ଲାଗାୟ୍ ୱାତାର୍। ହେୱାର୍ ଯୋହନତିଙ୍ଗ୍ ୱେନ୍ବାତାର୍, “ଏ ଗୁରୁ! ଆପେଙ୍ଗ୍ ଇନାକା କିନାପ୍?” 13ଡୁବନ୍ହିନି ଯୋହନ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ରମିୟ ସରକାର୍ ଏଚେକ୍ ସିସ୍ତୁ ଅଦେଙ୍ଗ୍ ଆଦେସ୍ ହିତ୍ତାନ୍ନା ହେ ଏଚେକ୍ ଅୱାଟ୍।”
14ରମିୟ ସରକାର୍ ସେନାହିର୍ ହେୱାନିଙ୍ଗ୍ ୱେନ୍ବାତାର୍, “ମାଙ୍ଗେଙ୍ଗ୍ ଇନାକା କିଦେଙ୍ଗ୍ ଆନାତ୍?” ଡୁବନ୍ହିନି ଯୋହନ ହେୱାରିଙ୍ଗ୍ ୱେଚ୍ଚାନ୍, “ଜବର୍ ଦସ୍ତ୍ ଇନେର୍ତାଙ୍ଗ୍ ଡାବୁଙ୍ଗ୍ ଅମାଟ୍। ଇନେର୍ ବିରୁଦ୍ତାକେ ମିଚ୍ ୱେଚ୍ମାଟ୍। ଏଚେକ୍ ଗାଟାଆତ୍ତିସ୍ ହେ ଏଚେକ୍ ଶାନ୍ତିଆଜି ମାନାଟ୍।”
15ଖ୍ରୀଷ୍ଟ ୱାନାନ୍ ଇଞ୍ଜି ୱିଜାକାର୍ କାସି ମାଚାର୍। ହେଦାଙ୍ଗ୍ କାଜିଙ୍ଗ୍ ହେୱାର୍ ମାନ୍ତ-ମାନ୍ତ ବାବିକିଜି ମାଚାର୍, “ଡୁବନ୍ହିନି ଯୋହନ ନେ ଖ୍ରୀଷ୍ଟ ଆଜି ମାନ୍ଗାନାନ୍ କି?” 16ହେପାଦ୍ନା ଡୁବନ୍ହିନି ଯୋହନ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ତ ମିଙ୍ଗେଙ୍ଗ୍ ଏଜୁକାଙ୍ଗ୍ ଡୁବନ୍ ହିଦ୍ନାଙ୍ଗା, ନା ପାଚେ ଇନେର୍ ୱାନାନ୍, ହେୱାନ୍ ବେସି ସାକ୍ତିକାଟାକାନ୍ ହେୱାନିଙ୍ଗ୍ ଆନେଙ୍ଗ୍ ଚାକର୍ ଲେକେ ଆଜି ତା କାଲ୍ନି ପାଣ୍ଡାୟ୍ ଗାଟି ରିକ୍ତେଙ୍ଗ୍ ସାମାନ୍ ଆକାୟ୍। ଆନେଙ୍ଗ୍ ମିଙ୍ଗେଙ୍ଗ୍ ଏଜୁକାଙ୍ଗ୍ ଡୁବନ୍ ହିଦ୍ନାଙ୍ଗା, ମାତର୍ ହେୱାନ୍ ମିଙ୍ଗେଙ୍ଗ୍ ପବିତ୍ର ଆତ୍ମା ଆରେ ନାଣିତାଙ୍ଗ୍ ଡୁବନ୍ ହିଦ୍ନାନ୍।
17ହେୱାନ୍ କେଇଦ ଗହମ୍ନି ପଲ ଏଡ଼ାଇ କିଦେଙ୍ଗ୍ ତା କେଇଦ ହେଚି ମାନାତ୍। ହେୱାନ୍ ହାର୍ଦି ଗହମ୍ ରୁଣ୍ଡାଇକିଜି ଟୁଣ୍ଡିତାକେ ଅଜି ଇଟ୍ନାନ୍। ତାପାଚେ ପଲ ଆରେ ଦର୍କାର୍ଆୱି ବାରବିନି ଜିନିଷ୍ତିଙ୍ଗ୍ ୱିଜୁଦିନ୍ କାଚାଆନି ନାଣିତାକେ ଅଜି ତୁସିହିନାନ୍।”
18ଇଲେକେ ଡୁବନ୍ହିନି ଯୋହନ ମାନାୟାରିଙ୍ଗ୍ ପାପ୍ କାମାୟ୍ ପିସ୍ତି ମାପୃତାକେ ୱାଦେଙ୍ଗ୍ ଇଲେକେ କେତେକ୍ ଆଦେସ୍ ହିତାନ୍। ଆରେ ହେୱାରିଙ୍ଗ୍ ହାର୍ଦିକାବୁର୍ ଶୁଣାୟ୍ କିଜି ମାଚାନ୍। 19ହେରୋଦ ରାଜା ତା ଟଣ୍ଡାହି ପିଲିପ ଡକ୍ରୁହିଙ୍ଗ୍ ରାଣି ହେରଦିୟାଙ୍ଗ୍ ବିବାଆଜି ମାଚାନ୍। ଆରେ ଜେକନି ପାପ୍ କାମାୟ୍ କିଜି ମାଚିଲେ ଡୁବନ୍ହିନି ଯୋହନ ହେରୋଦ ରାଜାଙ୍ଗ୍ ବିରଦ୍ କାତା ଇଞ୍ଜି ମାଚାନ୍। 20ହେଦାଙ୍ଗ୍ କାଜିଙ୍ଗ୍ ହେରୋଦ ରାଜା ଯୋହନତିଙ୍ଗ୍ ଆସ୍ତି ଜଇଲ୍ ଇଞ୍ଜ ଇଡ଼୍ତାନ୍। ହେଲେକେ ହେରୋଦ ରାଜା ଆରେରଗ ପାପ୍ କାମାୟ୍ କିତାନ୍।
ଯୀଶୁ ଡୁବନ୍ ବିଷୟ
(ମାଥି. ୩:୧୩-୧୭; ମାର୍କ. ୧:୯-୧୧)
21ଡୁବନ୍ହିନି ଯୋହନ ଜଇଲ୍ ଇଞ୍ଜ ବନ୍ଦିଆୱି ଆଗେ ୱିଜାକାର୍ ଯୋହନତାଙ୍ଗ୍ ଡୁବନ୍ ଅଜିମାଚାର୍। ହେପାଦ୍ନା ଯୀଶୁ ପା ୱାତାନ୍ ଆରେ ଯୋହନତାଙ୍ଗ୍ ଡୁବନ୍ ଅତାନ୍। ଯୀଶୁ ପାର୍ତାନା କିନିହିଙ୍ଗ୍ ସରଗ୍ ଜେୟା ଆତାତ୍। 22ପବିତ୍ର ଆତ୍ମା ସରଗ୍ତାଙ୍ଗ୍ ପାର୍ୱା ଲେକେ ତା ଜପି ୱାତାତ୍। ଆରେ ଈଶ୍ୱର ସରଗ୍ତାଙ୍ଗ୍ ଯୀଶୁଙ୍ଗ୍ ୱେଚ୍ଚାନ୍, “ଏନେଙ୍ଗ୍ ନା ଲାଡ୍ ମାଜି, ଆନେଙ୍ଗ୍ ନିତାକେ ବେସି ୱାରି।”
ଯୀଶୁ ଖ୍ରୀଷ୍ଟ ଲାତ୍ରାନି ଲିଷ୍ଟ୍
(ମାଥି. ୧:୧-୧୭)
23ଯୀଶୁ ତା ହାର୍ଦିକାବୁର୍ ଶୁଣାୟ୍ କିନି କାମାୟ୍ ଆରମ୍ କିନି ୱେଡ଼ାଲିଙ୍ଗ୍ ତାଙ୍ଗେଙ୍ଗ୍ ତିରିଶ୍ ବାର୍ହୁ ଆଜି ମାଚାତ୍। ଯୀଶୁ ଯୋଷେପ୍ ମେହି ଇଞ୍ଜି ମାନାୟାର୍ ପୁନ୍ଞ୍ଜି ମାଚାର୍। ଯୋଷେପ୍ ଏଲି ମେହି ମାଚାନ୍। 24ଏଲି ମତ୍ଥାତ ମେହି, ମତ୍ଥାତ ଲେବି ମେହି, ଲେବି ମଲ୍ଖୀ ମେହି, ମଲ୍ଖୀ ଜନ୍ନୟ ମେହି, ଜନ୍ନୟ ଯୋଷେପ ମେହି,
25ଯୋଷେପ ମତ୍ତିଥ୍ୟା ମେହି। ମତ୍ତିଥ୍ୟା ଆମୋସ ମେହି। ଆମୋସ ନାହୁମ ମେହି। ନାହୁମ ହେସ୍ଲୀ ମେହି। ହେସ୍ଲୀ ନଗୟ ମେହି। 26ନଗୟ ମହଥ ମେହି। ମହଥ ମତ୍ତିଥ୍ୟା ମେହି। ମତ୍ତିଥ୍ୟା ଶିମୟି ମେହି। ଶିମୟି ଯୋସେଖ ମେହି। ଯୋସେଖ ଯୋଦା ମେହି।
27ଯୋଦା ଯୋହନ ମେହି। ଯୋହନ ରେଷା ମେହି। ରେଷା ଜିରୁବାବିଲ ମେହି। ଜିରୁବାବିଲ ଶଲ୍ଟିୟେଲ ମେହି। ଶଲ୍ଟିୟେଲ୍ ନେରୀ ମେହି। 28ନେରୀ ମଲୀଖ ମେହି। ମଲୀଖ ଅଦ୍ଦୀ ମେହି। ଅଦ୍ଦୀ କୋସାମ ମେହି। କୋସାମ ଏଲ୍ଲଦାନ ମେହି। ଏଲ୍ଲଦାନ ଏର ମେହି। 29ଏର ଯିହସିୟ ମେହି। ଯିହସିୟ ଏଲୀୟେଜର ମେହି। ଏଲୀୟେଜର ଯୋରୀମ ମେହି। ଯୋରୀମ ମତ୍ଥାତ ମେହି। ମତ୍ଥାତ ଲେବି ମେହି।
30ଲେବି ଶିମିୟନ ମେହି। ଶିମିୟନ ଯିହୁଦା ମେହି। ଯିହୁଦା ଯୋଷେପ ମେହି। ଯୋଷେପ ଯୋନାମ ମେହି। ଯୋନାମ ଏଲିୟାକିମ ମେହି। 31ଏଲିୟାକିମ ମେଲିଆ ମେହି। ମେଲିଆ ମନ୍ନା ମେହି। ମନ୍ନା ମତ୍ତଥା ମେହି। ମତ୍ତଥା ନାଥନ ମେହି। ନାଥନ ଦାଉଦ ମେହି। 32ଦାଉଦ ଯିଶି ମେହି। ଯିଶି ଓବେଦ ମେହି। ଓବେଦ ବୟାଜ ମେହି। ବୟାଜ ଶେଲହ ମେହି। ଶେଲହ ନହଶୋନ ମେହି।
33ନହଶୋନ ଅମ୍ମିନାଦାବ ମେହି। ଅମ୍ମିନାଦାବ ଅଦ୍ମିନ ମେହି। ଅଦ୍ମିନ ଅର୍ଣ୍ଣୀ ମେହି। ଅର୍ଣ୍ଣୀ ହିଷ୍ରୋଣ ମେହି। ହିଷ୍ରୋଣ ପେରସ ମେହି। ପେରସ ଯିହୁଦା ମେହି। 34ଯିହୁଦା ଯାକୁବ ମେହି। ଯାକୁବ ଇସାକ ମେହି। ଇଶାକ୍ ଅବ୍ରାହାମ୍ ମେହି। ଅବ୍ରାହାମ୍ ଥେରହ ମେହି। ଥେରହ ନାହୋର ମେହି। 35ନାହୋର ସେରଗ୍ ମେହି। ସେରଗ୍ ରଗୁ ମେହି। ରଗୁ ଫେଲଗ ମେହି। ଫେଲଗ ଏବର ମେହି। ଏବର ଶେଲହ ମେହି।
36ଶେଲହ କେନାନ ମେହି। କେନାନ ଅର୍ଫକ୍ଷଦ ମେହି। ଅର୍ଫକ୍ଷଦ ଶେମ ମେହି। ଶେମ ନୋହ ମେହି। ନୋହ ଲେମଖ ମେହି। 37ଲେମଖ ମଥୁଶେଲହ ମେହି। ମଥୁଶେଲହ ହନୋକ ମେହି। ହନୋକ ଯେରଦ ମେହି। ଯେରଦ ମହାଲାଲ୍ ମେହି। ମହାଲାଲ୍ କେନାନ ମେହି। 38କେନାନ ଏନୋଶ ମେହି, ଏନୋଶ ଶେଥ ମେହି। ଶେଥ ଆଦମ ମେହି। ଆଦମ ଈଶ୍ୱର ମେହି।
Currently Selected:
ଲୁକ 3: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
