ମାଥିଉ 13
13
ବିୟାନ୍ ୱିତ୍ନାକାନ୍ତି କାତା
(ମାର୍କ. ୪:୧-୯; ଲୁକ. ୮:୪-୮)
1ହେ ଦିନ୍ ଯୀଶୁ ଇଞ୍ଜାଙ୍ଗ୍ ହସିହାଲ୍ଜି ଗାଲିଲୀ ହାମ୍ଦୁର୍ କାଣ୍ଡିତ କୁଚ୍ଚାନ୍। 2ହେବେ ଯୀଶୁ ଚାରିବେଣ୍ତାଙ୍ଗ୍ ବେସିହେନି ମାନାୟ୍ ରୁଣ୍ଡାଆତାର୍। ଲାଗିଙ୍ଗ୍ ଯୀଶୁ ର ଡଙ୍ଗାତାକେ ହାଲ୍ଜି କୁଚ୍ଚାନ୍, ଆରେ ମାନାୟାର୍ ହାମ୍ଦୁର୍ କାଣ୍ଡିତ ନିଲ୍ଚି ମାଚାର୍।
3ଆରେ ଯୀଶୁ କାତା ୱେଚ୍ନିଲେକେ କିଜି ହେୱାରିଙ୍ଗ୍ କେତେକ୍ ହିକ୍ଷାହିଜି ମାଚାନ୍। 4“ୱେନାଟ୍, ର ଚାଷି ତା ଜମିତ ବିୟାନ୍ ୱିତ୍ଦେଙ୍ଗ୍ ହାଚାନ୍। ହେୱାନ୍ ୱିତୁ-ୱିତୁ ଏଚେକ୍ ବିୟାନ୍ ହାଜ୍ଦ ଆର୍ତାତ୍, ଆରେ ପଟିଙ୍ଗ୍ ୱାଜି ହେଦାଙ୍ଗ୍ ଚିଚିକ୍। 5ଆରେ କେତେକ୍ ବିୟାନ୍ ଅଲପ୍ ଚିକ୍ଲା ମାନି ରେଚ୍କି ବାହାତାକେ ଆର୍ତିକ୍ ମାତର୍ ହେବେ ଅଲପ୍ ଚିକ୍ଲା ମାଚାତ୍। ହେବେ ଜବର୍ ଚିକ୍ଲା ମାନ୍ୱିତିଲେ ବେଗି ଗଜା ଆତାତ୍, ମାତର୍ ଚିରାଙ୍ଗ୍ ବିତ୍ରେ ହାଞ୍ଜେଙ୍ଗ୍ ଆଡ୍ୱିତିକ୍। 6ମାତର୍ ହେ ପାଡ଼ା ଚିରାଙ୍ଗ୍ ଏଚ୍ୱିତିଲେ ୱାଚ୍ଚାତ୍, ଆରେ ଖାରାକିତିଲେ ୱିଜୁ କମ୍ଜାଆତାତ୍।
7ଆରେ କେତେକ୍ ବିୟାନ୍ ୱାଡ଼ି ମାର୍କୁ ମାଦି ଆର୍ତିକ୍, ଆରେ ୱାଡ଼ି ମାର୍କୁ ନିଙ୍ଗ୍ଞ୍ଜି ହେ ପାଡ଼ାଜପି ଡାବାଇ କିତିକ୍, ହେବେତାଙ୍ଗ୍ ଇନାକାପା ପାଡ଼୍ ଆହ୍ୱାତାତ୍। 8ମାତର୍ କେତେକ୍ ବିୟାନ୍ ହାର୍ ମେଦ୍ନିତ ଆର୍ତିକ୍, ହେ ୱିଜୁ ଗଜାଆଜି ଗାଜା ଆତିକ୍ ଆରେ ପାଡ଼୍ ଆସ୍ତିକ୍ କେତେକ୍ ତିରିଶ୍ ଗୁଣ୍, କେତେକ୍ ଶାଟେ ଗୁଣ୍ ଆରେ ଶହେ ଗୁଣ୍ ପାତେକ୍ ପାଡ଼୍ ଆସ୍ତାତ୍। 9ଇମ୍ଣାକାର୍ ଇବେଣ୍ ୱେଚାଦେର୍ ଇ ବେଣ୍ତିଙ୍ଗ୍ ମାନ୍ଦିୟାନ୍ କିଜି ବୁଜାଆଡ।”
କାତାନି ଅର୍ତ
(ମାର୍କ. ୪:୧୦-୧୨; ଲୁକ. ୮:୯-୧୦)
10ଆରେ ଯୀଶୁ ରକାନ୍ ମାନିହିଙ୍ଗ୍ ଚେଲାହିର୍ ତା କଚଣ୍ତ ୱାଜି ୱେନ୍ବାତାର୍, “ଏନେଙ୍ଗ୍ ହେୱାରିଙ୍ଗ୍ ୱିଜୁଦିନ୍ କାତା ୱେଚ୍ନିଲେକେ କିଜି ହିକ୍ଷା ହିନାୟା ହେ ଅର୍ତ ଆପେଙ୍ଗ୍ ପୁନୁପା ଆରେରଗ ମାଙ୍ଗେଙ୍ଗ୍ ୱେଚ୍ଚା।” 11ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଈଶ୍ୱର ତା ରାଜିନି ପୁନ୍ୱିତି କାତାତିଙ୍ଗ୍ ପୁଞ୍ଜେଙ୍ଗ୍ ଏପେଙ୍ଗ୍ ସୁଯଗ୍ ଗାଟାଆତାଦେର୍ନା। ମାତର୍ ଇମ୍ଣାକାର୍ ଈଶ୍ୱରତିଙ୍ଗ୍ ପୁନୁୱାତାର୍ନା ହେୱାରିଙ୍ଗ୍ ସୁଯଗ୍ ଗଟାଆୱାତାତ୍ନା। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେୱାରିଙ୍ଗ୍ କାତା ୱେଚ୍ନିଲେକେ କିଜି ୱେଚ୍ଚାନାଙ୍ଗା। 12ଇନେସ୍କି ଇମ୍ଣାକାର୍ ନା ହିକ୍ଷାତିଙ୍ଗ୍ ବୁଜା ଆଦେଙ୍ଗ୍ ଇଚାକିନାର୍, ଈଶ୍ୱର ହେୱାନିଙ୍ଗ୍ ଆଦିକ୍ ବୁଜା ଆଦେଙ୍ଗ୍ ହିନାନ୍। ମାତର୍ ଇମ୍ଣାକାର୍ ନା ହିକ୍ଷାତିଙ୍ଗ୍ ପୁଞ୍ଜେଙ୍ଗ୍ ମାନ୍କିଉର୍, ଈଶ୍ୱର ହେ ମାନାୟ୍ତି ପୁଚାକା ପା ଅନାନ୍।
13ଆନେଙ୍ଗ୍ ଇମ୍ଣି କାମାୟ୍ କିନାଙ୍ଗା ହେଦାଙ୍ଗ୍ ହୁଡ଼୍ନାର୍ ମାତର୍ ତା ଅର୍ତ ପୁନୁର୍। ଆରେ ଆନେଙ୍ଗ୍ ୱେଚ୍ଚି କାତାତିଙ୍ଗ୍ ୱେନାର୍ ମାତର୍ ବୁଜା ଆଉର୍। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେୱାରିଙ୍ଗ୍ କାତା ୱେଚ୍ନିଲେକେ କିଜି ହିକ୍ଷାହିନାଙ୍ଗା। 14ଆରେ ଭବିଷ୍ଯତବକ୍ତା ଯିଶାୟ ଆଗେ ଗଟାଆନି ବେଣ୍ ୱେଚ୍ଚାକା ପୁରା ଆନାତା, ‘ଏପେଙ୍ଗ୍ ୱେନୁ-ୱେନୁ ୱେନାଦେର୍, ମାତର୍ ବୁଜାଆଉଦେର୍, ଆରେ ହୁଡ଼ୁ-ହୁଡ଼ୁ ହୁଡ଼୍ନାଦେର୍ ମାତର୍ ହୁଡ଼୍ଦେଙ୍ଗ୍ ଆଡୁଦେରା। 15ଇନେସ୍କି ମାନାୟାର୍ ଗରବ୍ତିଙ୍ଗ୍ ଗାର୍ବିୟା କିତାର୍ନା। ହେଦାଙ୍ଗ୍ କାଜିଙ୍ଗ୍ ହେୱାରିଙ୍ଗ୍ କିତୁଲ୍ ମାଚିସ୍ ପା ଆନେଙ୍ଗ୍ ୱେଚ୍ଚି କାତାତିଙ୍ଗ୍ ୱେନୁର୍। ହେୱାର୍ ତା କାଣ୍କୁ ଜୁଚ୍ଚି ଲେକେ ହେୱାର୍ ସତ୍ ବିଷୟତିଙ୍ଗ୍ ପୁଞ୍ଜେଙ୍ଗ୍ ଇଚା କିଉରା। ହେୱାର୍ ଯଦି ସତ୍ ବିଷୟତିଙ୍ଗ୍ ୱେଞ୍ଜେଙ୍ଗ୍ ଆରେ ପୁଞ୍ଜେଙ୍ଗ୍ ଇଚା କିତିସ୍, ହେୱାର୍ ଆନେଙ୍ଗ୍ କିତି କାମାୟ୍ତିଙ୍ଗ୍ ବୁଜାଆତାର୍ମା। ଆରେ ହେୱାର୍ ପାପ୍ କାମାୟ୍ ପିସ୍ତି ମାପୃତାକେ ୱାତାର୍ମା। ଆରେ ଆନେଙ୍ଗ୍ ହେୱାରିଙ୍ଗ୍ ତା ପାପ୍ ୱିଜୁ କେମା କିତାଙ୍ଗ୍ମା।’ ”
16ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, “ଈଶ୍ୱର ମିଙ୍ଗେଙ୍ଗ୍ ଆଶ୍ରିବାଦ୍ କିତ୍ତିଲେ ଏପେଙ୍ଗ୍ ହୁଡ଼୍ଜି ବୁଜାଆନାଦେରା ଆରେ ୱେନ୍ଞ୍ଜି ପୁଞ୍ଜେଙ୍ଗ୍ ଆଡ୍ନାଦେରା।” 17ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, “ଏପେଙ୍ଗ୍ ନଙ୍ଗୟ୍ ଇନା ଇନାକା ହୁଡ଼୍ନାଦେରା, କେତେକ୍ ଭବିଷ୍ଯତବକ୍ତା ଆରେ ଦରମ୍ ମାନାୟ୍ ହୁଡ଼୍ଦେଙ୍ଗ୍ ଇଚାକିଜି ମାଚାର୍, ମାତର୍ ହେୱାର୍ ଇୱିଜୁ ହୁଡ଼୍ଦେଙ୍ଗ୍ ଆଡ୍ୱାଦାଙ୍ଗ୍ ମାଚାର୍। ଏପେଙ୍ଗ୍ ନଙ୍ଗୟ୍ ଇନା ଇନାକା ୱେନାଦେରା ହେ ୱିଜୁ ହେୱାର୍ ୱେଞ୍ଜେଙ୍ଗ୍ ଇଚାକିତାର୍, ମାତର୍ ହେୱାର୍ ଇୱିଜୁ ୱେଞ୍ଜେଙ୍ଗ୍ ଆଡ୍ୱାଦାଙ୍ଗ୍ ମାଚାର୍।”
ବିୟାନ୍ ୱିତ୍ନାକାନ୍ ବିଷୟରେ ବୁଜାଇକିଜି ୱେଚ୍ଚି କାତା
(ମାର୍କ. ୪:୧୩-୨୦; ଲୁକ. ୮:୧୧-୧୫)
18ଯୀଶୁ ତା ଚେଲାହିରିଙ୍ଗ୍ ବିୟାନ୍ ୱିତ୍ନି କାତାନି ଅର୍ତ ବୁଜାଇକିଜି ୱେଚ୍ଚାନ୍, 19“ମାନାୟାର୍ ଈଶ୍ୱର କାତାତିଙ୍ଗ୍ ୱେନାର୍ ମାତର୍ ଶୟତାନ୍ ୱାଜି ହେୱାର୍ ୱେଚି କାତାତିଙ୍ଗ୍ ବାଣାଇ କିନାତ୍। ଏଲେଙ୍ଗ୍ ଲେଗ୍ଦି ମାନାୟ୍ ହାଜ୍ଦ ଆର୍ତି ବିୟାନ୍ ଲେକେ।
20କେତେକ୍ ମାନାୟ୍ ଈଶ୍ୱର କାତାତିଙ୍ଗ୍ ୱେନ୍ଞ୍ଜି ୱାରିତାଙ୍ଗ୍ ଆହ୍ନାର୍। 21ମାତର୍ ହେୱାର୍ ଗରବ୍ ବିତ୍ରେ ଈଶ୍ୱର କାତା ହାଲ୍ୱିତିଲେ, ହେୱାର୍ ଈଶ୍ୱର କାତାତିଙ୍ଗ୍ ଅଲପ୍ଦିନ୍ ଆସ୍ତି ମାନାର୍। ଆରେ ଏଚେପାଦ୍ନା ଈଶ୍ୱରତିଙ୍ଗ୍ ପାର୍ତିକିନି କାଜିଙ୍ଗ୍ ଦୁଃକ୍ କଷ୍ଟ ୱାତିସ୍, ହେଦାପ୍ରେ ହେୱାର୍ ପାର୍ତିତାଙ୍ଗ୍ ଦେହା ହାନାର୍। ହେୱାର୍ କାଲ୍କୁ କୁଡ଼ି ମେଦ୍ନିତ ୱିତ୍ଦିମାଚି ବିୟାନ୍ ଲେକେ।
22ଆରେ କେତେକ୍ ମାନାୟ୍ ଈଶ୍ୱର କାତାତିଙ୍ଗ୍ ୱେନାର୍। ମାତର୍ ଦୁନିଆନି ଚିନ୍ତା, ହାଉକାର୍ ଆନି ଚିନ୍ତା, ଆରେ ବାରବିନି ଚିନ୍ତା ଇୱିଜୁ ଚିନ୍ତା ମାନ୍ତ ଆଜି ଈଶ୍ୱର କାତାତିଙ୍ଗ୍ ଡାବାଇ କିନାତ୍। ହେଦାଙ୍ଗ୍ କାଜିଙ୍ଗ୍ ଈଶ୍ୱର କାତାତିଙ୍ଗ୍ ମାନିକିଉର୍। ହେଲେଗ୍ଦି ମାନାୟ୍ ୱାଡ଼ି ମାର୍କୁକାଙ୍ଗ୍ ଆର୍ଜିମାଚି ବିୟାନ୍ ଲେକେ। 23ମାତର୍ ଇମ୍ଣାକାନ୍ ଈଶ୍ୱର କାତାତିଙ୍ଗ୍ ୱେନ୍ଞ୍ଜି ହାର୍ଦାଙ୍ଗ୍ ମାନ୍ତ ଆହ୍ନାନ୍ ଆରେ ମାନି କିନାନ୍ ହେୱାନ୍ ତିରିଶ୍ ଗୁଣ୍ ଇନେର୍ ଶାଟେ ଗୁଣ୍, ଇନେର୍ ଶହେ ଗୁଣ୍ ପାତେକ୍ ପାଡ଼୍ ଆହ୍ନାର୍। ହେୱାର୍ ହାର୍ଦି ମେଦ୍ନିତ ୱିତ୍ତି ବିୟାନ୍ ଲେକେ।”
କୁଲିଙ୍ଗ୍ ଆରେ କାଚ୍ରାନି କାତା
24ଯୀଶୁ ହେୱାରିଙ୍ଗ୍ ଆରେରଗ କାତା ୱେଚ୍ନିଲେକେ କିଜି ୱେଚ୍ଚାନ୍, “ରକାନ୍ ତା ଜମିତ ହାର୍ ବିୟାନ୍ ୱିତ୍ନି ଲେକେ ଈଶ୍ୱର ସାସନ୍ କିନି ରାଜି। 25ମାତର୍ ମାନାୟ୍ ହୁନ୍ଞ୍ଚିହିଙ୍ଗ୍ ତା ଶାତ୍ରୁ ୱାଜି ହେ ଗହମ୍ ୱିତ୍ତିତାକେ କାଚ୍ରା ୱିତ୍ଦି ହାଚାନ୍। 26ଏଚେକାଡ଼୍ଦ ଆକିଙ୍ଗ୍ ହସି ପାଡ଼୍ ଆସ୍ତେଙ୍ଗ୍ ଲାଗାତାତ୍, ହେପାଦ୍ନା କାଚ୍ରା ପା ଚଞ୍ଚ୍ଚାତ୍।
27ହେବେତାଙ୍ଗ୍ ଜମି ମାଲିକ୍ନି ହଲିଆହିର୍ ମାଲିକ୍ତାକେ ୱାଜି ୱେଚ୍ଚାର୍, ‘ମାଲିକ୍, ଏନେଙ୍ଗ୍ ଇନାକା ୱିତ୍ନିହିଙ୍ଗ୍ ହାର୍ଦି ବିୟାନ୍ ହିୱାଦାଙ୍ଗ୍ ମାଚାଇ କି? ଇନେସାଜି କାଚ୍ରା ନିଙ୍ଗ୍ତାତ୍?’ 28ମାଲିକ୍ ହେୱାରିଙ୍ଗ୍ ୱେଚ୍ଚାନ୍, ‘ର ଶାତ୍ରୁ ଇଦାଙ୍ଗ୍ କିତାନ୍ନା।’ ହଲିଆହିର୍ ହେୱାନିଙ୍ଗ୍ ୱେଚ୍ଚାର୍, ‘ଏନେଙ୍ଗ୍ ଇଚା କିତିସ୍ ଆପେଙ୍ଗ୍ ହାଲ୍ଜି ହେ କାଚ୍ରାତିଙ୍ଗ୍ ଜେଲ୍ଜି ତୁସି ହିନାପ୍।’
29ମାତର୍ ମାଲିକ୍ ହେୱାରିଙ୍ଗ୍ ୱେଚ୍ଚାନ୍, ‘ଆକାୟ୍! ଏପେଙ୍ଗ୍ କାଚ୍ରାତିଙ୍ଗ୍ ଜେଲୁ-ଜେଲୁ ଗହମ୍ ପା ଜେଲ୍ଜି ତୁହିନାଦେର୍। 30ହେଦାଙ୍ଗ୍ ଗହମ୍ ତେଜ୍ୱି ପାତେକ୍ ରିଣ୍ଡାଙ୍ଗ୍ ପା ରବେ ଗାଜାଆଦେଙ୍ଗ୍ ପିହାଟ୍।’ ଆରେ ଗହମ୍ ତେଜ୍ନିହିଙ୍ଗ୍ ହଲିଆରିଙ୍ଗ୍ ଆନେଙ୍ଗ୍ ୱେଚ୍ନାଙ୍ଗ୍, ‘ପାର୍ତୁମ୍ କାଡିକିଦେଙ୍ଗ୍ କାଚ୍ରାତିଙ୍ଗ୍ ରବେ କିୟାଟ୍, ତାପାଚେ ଗହମ୍ ନା କଲ୍କିତାକେ ଇସ୍ପି ଇଟାଟ୍।’ ”
ହାର୍ହୁ ମାଞ୍ଜିନି କାତା
(ମାର୍କ. ୪:୩୦-୩୨; ଲୁକ. ୧୩:୧୮-୧୯)
31ଯୀଶୁ ଆରେରଗ କାତା ୱେଚ୍ନିଲେକେ କିଜି ୱେଚ୍ଚାନ୍, “ଈଶ୍ୱର ସାସନ୍ କିନି ରାଜି ର ହାର୍ହୁ ମାଞ୍ଜି ଲେକେ, 32ଇ ମାଞ୍ଜି ୱିଜୁ ମାଞ୍ଜିଙ୍ଗ୍ତାଙ୍ଗ୍ ହିରୁ। ମାତର୍ ହେଦାଙ୍ଗ୍ ୱିତ୍ତିସ୍ ୱିଜୁ ମାର୍ତାଙ୍ଗ୍ ଗାଜାମାର୍ ଆନାତ୍। ଆରେ ତା କେନ୍ଦାଙ୍ଗ୍ ଗାଜା ଆଜି, ହେ କେନ୍ଦାକାଙ୍ଗ୍ ସରଗ୍ନି ପଟିଙ୍ଗ୍ ଗୁଡା ଗାଚ୍ଚି ବାହାକିନିକ୍।”
ଆରେ ର କାତା
(ଲୁକ. ୧୩:୨୦-୨୧)
33ଯୀଶୁ ହେୱାରିଙ୍ଗ୍ ଆରେ ର କାତା ୱେଚ୍ଚାନ୍, “ଈଶ୍ୱର ସାସନ୍ କିନି ରାଜି ଇଦାଙ୍ଗ୍ ସଡ଼ାକାର୍ ଲେକେ। ର କଗ୍ଲେ ରୁଟି ରସ୍ତେଙ୍ଗ୍ ର ଗାଜା ବାହାତାକେ ଅଟାଗୁଣ୍ଡା ହୁଦାଙ୍ଗ୍ ଇ ସଡ଼ାକାର୍ ମେହାଇକିଜି ୱିଜୁ ଚେଟ୍କାଇକିତି ଅଟାଗୁଣ୍ଡାତିଙ୍ଗ୍ ପୁଲାଇ କିତାତ୍। ହେଲେକେ ମାପୃତି ହାର୍ଦି ହିକ୍ଷା କେତେକ୍ ମାନାୟ୍ତାଙ୍ଗ୍ ପୁର୍ତିନି ଚାରିବେଣ୍ତାଙ୍ଗ୍ ବାଡାଆତାତ୍।”
ଯୀଶୁ କାତା ୱେଚ୍ନିଲେକେ ହିକ୍ଷା ହିତାନ୍
(ମାର୍କ. ୪:୩୩-୩୪)
34ଯୀଶୁ କାତା ୱେଚ୍ନିଲେକେ କିଜି ନେ ମାନାୟାରିଙ୍ଗ୍ ହିକ୍ଷାହିଜି ମାଚାନ୍। ଆରେ ହେୱାନ୍ ୱିଜୁଦିନ୍ କାତା ୱେଚ୍ନିଲେକେ କିଜି ନେ ୱେଚ୍ଚି ମାଚାନ୍। ଇନେସ୍କି ହେୱାର୍ ୱିଜୁ କାତା ବୁଜା ଆନାର୍। 35ଇନେସ୍କି ଭବିଷ୍ଯତବକ୍ତା କାଜିଙ୍ଗ୍ ୱେଚ୍ଚି କାତା ପୁରାଆନାତ୍। ଆପେଙ୍ଗ୍ ଜାର୍ ୱେଇ ଜେସି ହାର୍ଦାଙ୍ଗ୍ କାତା ୱେଚ୍ନିଲେକେ କିଜି ବେଣ୍ କିନାସ୍। ଆରେ ପୁର୍ତି ଉବ୍ଜାଆତି ଦିନ୍ତାଙ୍ଗ୍ ପୁନ୍ୱିତି କାତା ପା ୱିଜୁ ୱେଚ୍ନାସ୍।
ଯୀଶୁ କାଚ୍ରାନି କାତା ବୁଜାଇକିଜି ୱେଚ୍ଚାନ୍
36ପାଚେ ଯୀଶୁ ମାନାୟ୍ତିଙ୍ଗ୍ ପିସ୍ତି ଇଞ୍ଜ ହଟାନ୍, ଆରେ ତା ଚେଲାହିର୍ ତା ଲାଗାୟ ୱାଜି ୱେଚ୍ଚାର୍, ଜମିନି କାଚ୍ରାନି କାତା (ଉଦାହରଣ) ମିକାଲିଙ୍ଗ୍ ମାଙ୍ଗେଙ୍ଗ୍ ହାର୍ଦାଙ୍ଗ୍ ବୁଜାଇ କିଦା। 37ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇମ୍ଣି ମାନାୟ୍ ହାର୍ଦି ବିୟାନ୍ ୱିତ୍ତାନ୍, ହେୱାନ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା। 38ଏ ଜମି ଆନାତା ପୁର୍ତି, ଈଶ୍ୱର ସାସନ୍ କିନି ରାଜିନି ମାନାୟାର୍ ହାର୍ଦି ବିୟାନ୍ ଲେକେ, ଆରେ ଇମ୍ଣାକାର୍ ଶୟତାନନି ମାନାୟାର୍ ହେୱାର୍ ବାରବିନି କାଚ୍ରା ଲେକେ। 39ଇମ୍ଣି ଶାତ୍ରୁ କାଚ୍ରା ୱିତ୍ନାନ୍ ହେୱାନ୍ନେ ଶୟତାନ। ତାସ୍ ତେଜ୍ନି ଦିନ୍ନି ଅର୍ତ ଆନାତା ଯୁଗ୍ଶେସ୍। ଆରେ ତେଜ୍ନାକାର୍ ଈଶ୍ୱର ଦୁତ୍କୁ।
40ଇନେସ୍କି ଯୁଗ୍ଶେସ୍ ଆନିହିଙ୍ଗ୍ କାଚ୍ରାତିଙ୍ଗ୍ ରବେକିଜି ନାଣି ଆହିକିୟି ଆନାତ୍, ହେଲେକେ ଯୁଗ୍ଶେସ୍ ଆନାତ୍। 41ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ନା ଦୁତ୍କୁକାଙ୍ଗ୍ ପକ୍ତାନାଙ୍ଗ୍। ଆରେ ହେୱାର୍ ଈଶ୍ୱର ସାସନ୍ କିନି ରାଜିତିଙ୍ଗ୍ ୱିଜୁ ଅଦରମ୍ କିନାକାରିଙ୍ଗ୍ ଆରେ ପାପ୍ ମାନାୟାରିଙ୍ଗ୍ ରବେ ରୁଣ୍ଡା କିନାର୍, 42ଆରେ ଦୁତ୍କୁ ହେୱାରିଙ୍ଗ୍ ନରକ୍ନି ନାଣିତାକେ ତୁଇନାର୍। କାକୁଲ୍ତି ଆଜି ହେବେ ଆଡ଼୍ବାନାର୍ ଆରେ ଟାଡାଙ୍ଗ୍ କାପ୍ଚି-କାପ୍ଚି ଆର୍ଲା ଆନାର୍, 43ଈଶ୍ୱର ସାସନ୍ କିନି ରାଜିତାକେ ଦରମ୍ ମାନାୟାର୍ ୱେଡ଼ାଲେକେ ଅଜଡ଼୍ ଆନାର୍। ଇମ୍ଣାକାର୍ ଇବେଣ୍ ୱେଚାଦେର୍ ହେ ବେଣ୍ତିଙ୍ଗ୍ ମାନ୍ଦିୟାନ୍ କିଜି ବୁଜାଆଡ। ”
ମୁଚ୍ଚି ଦନ୍ନି କାତା
44ଆରେରଗ ଯୀଶୁ ୱେଚ୍ଚାନ୍, “ଈଶ୍ୱର ସାସନ୍ କିନି ରାଜି ଲେକେ, ଦିନେକ୍ ର ମାନାୟ୍ ଜମିତ କାରୁ-କାରୁ ମୁଚ୍ଚି ଦନ୍ ଗାଟାଆତାନ୍। ହେୱାନ୍ ହେ କାତାତିଙ୍ଗ୍ ଡ଼ୁକ୍ତାନ୍। ଆରେ ୱାରିତାଙ୍ଗ୍ ଜାର୍ ଦନ୍ ସମ୍ଫତିତିଙ୍ଗ୍ ପସି ହେ ଜମିତିଙ୍ଗ୍ କଡ଼୍ତାନ୍।”
ବେସି ଦାମ୍ନି ମୁକ୍ତାନି କାତା
45ଆରେରଗ ଯୀଶୁ କାତା ୱେଚ୍ନିଲେକେ କିଜି ୱେଚ୍ଚାନ୍, “ଈଶ୍ୱର ସାସନ୍ କିନି ରାଜି ଲେକେ ହାର୍ଦି-ହାର୍ଦି ମୁକ୍ତା ଇନେର୍ ଡେକ୍ନାନା ହେୱାନ୍ ରକାନ୍ କଡ଼୍ନାକାନ୍। 46ରଞ୍ଜାଙ୍ଗ୍ ବେସି ଦାମ୍ଦି ମୁକ୍ତା ହୁଡ଼୍ଜି ହେୱାନ୍ ହାଲ୍ଜି ଜାର୍ତି ୱିଜୁ ପସି ହେ ମୁକ୍ତାତିଙ୍ଗ୍ କଡ଼୍ତାନ୍।”
ମିନ୍କୁ ଆହ୍ନି ଜାଲ୍ନି କାତା
47ଆରେରଗ ଯୀଶୁ ୱେଚ୍ଚାନ୍, “ଈଶ୍ୱର ସାସନ୍ କିନି ରାଜି ଲେକେ ର ଜାଲ୍ ହାମ୍ଦୁର୍ତାକେ ତୁଇଜି ବାରବିନି ମିନ୍କୁ ଆହ୍ନି ଲେକେ। 48ଏଚେପାଦ୍ନା ହେ ଜାଲ୍ ବାର୍ତି ଆନାତ୍, ହେ ମିନ୍କୁ ଆହ୍ନାକାର୍ ହାମ୍ଦୁର୍ କାଣ୍ଡିତ ଜେଲ୍ଜି ତାହିୱାନାର୍, ଆରେ କୁଚ୍ଚି ହାର୍ଦିକିଙ୍ଗ୍ ଦାଉଡ଼ାତାକେ ଜେକ କିଜି ଇଡ଼୍ତାର୍, ତିନ୍ୱିକିଙ୍ଗ୍ ତୁସିହିତାର୍।
49ଯୁଗ୍ଶେସ୍ ଆନିହିଙ୍ଗ୍ ହେଲେକେ ଗଟାଆନାତ୍, ଦୁତ୍କୁ ୱାଜି ଦରମ୍ ମାନାୟ୍ ବିତ୍ରେତାଙ୍ଗ୍ ବାନ୍ୟାଲଗାଙ୍ଗ୍ ବିନେ କିନିକ୍, 50ଆରେ ହେୱାରିଙ୍ଗ୍ ନରକ୍ନି ନାଣିତାକେ ତୁସିହିନିକ୍। ହେବେ ହେୱାର୍ କାକୁଲ୍ତି ଆଜି ହେବେ ଆଡ଼୍ବାନାର୍ ଆରେ ଟାଡାଙ୍ଗ୍ କାପ୍ଚି ଆର୍ଲା ଆନାର୍।”
ପାନାକା ଆରେ ପୁନି ହିକ୍ଷା
51ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଇନାକା ଇ ୱିଜୁବେଣ୍ ବୁଜାଆତାଦେର୍କି? ହେୱାର୍ ହେୱାନିଙ୍ଗ୍ ୱେଚ୍ଚାର୍, ଆଁ। 52ଲାଗିଙ୍ଗ୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, ‘ଇମ୍ଣି ପଣ୍ଡିତାର୍ ଈଶ୍ୱର ସାସ୍ତର୍ନି କାତାତିଙ୍ଗ୍ ବୁଜାଆନାରା ହେୱାନ୍ ଈଶ୍ୱର ସାସନ୍ କିନି ରାଜିନି ଚେଲା ଆନାର୍। ହେୱାନ୍ ରକାର୍ ଇଲ୍ନି ମାଲିକ୍ ଲେକେ। ଇନେସ୍କି ମାଲିକ୍ ବିତ୍ରେ ଇଞ୍ଜାଙ୍ଗ୍ ପୁନାକା ଆରେ ପାନି ହାର୍ଦି ଜିନିଷ୍ ହପ୍ତାନାନ୍, ହେଲେକେ ଈଶ୍ୱର ସାସନ୍ କିନି ରାଜିନି ଚେଲାର୍ ପାନାକା ଆରେ ପୁନି ହାର୍ଦି ବିଷୟରେ ହିକ୍ଷା ହିନାନ୍।’ ”
ନାଜରିତ ସହର୍ତାକେ ଯୀଶୁ ହାଚାନ୍
(ମାର୍କ. ୬:୧-୬; ଲୁକ. ୪:୧୬-୩୦)
53ଯୀଶୁ ଇୱିଜୁ କାତା ୱେଚ୍ଚି ପାଚେ, ହେ ବାହା ପିସ୍ତି ତା ଜାର୍ ନାଜରିତ ସହର୍ତାକେ ହାଚାନ୍।
54ଆରେ ହେୱାନ୍ ଯିହୁଦିର୍ ପାର୍ତାନା ଇଞ୍ଜ ଯୀଶୁ ହାଲ୍ଜି ଈଶ୍ୱର କାତା ହିକ୍ଷାହିଜି ମାଚାନ୍। ଯୀଶୁ ଈଶ୍ୱର କାତା ହିକ୍ଷା ହିତାକା ୱେନ୍ଞ୍ଜି ହେବେ ମାନି ମାନାୟାର୍ ଚାନିଆ ଆଜି ୱେଚ୍ଚାର୍, “ଇୱାନ୍ ଇମେତାଙ୍ଗ୍ ଇୱାନ୍ ବେଣ୍ ପୁଚାନ୍? ଆରେ ଏଚେକ୍ ବୁଦି ଇମେତାଙ୍ଗ୍ ପାୟାଆତାନ୍? ଇୱିଜୁ ସାକ୍ତିନି କାମାୟ୍ ଇୱାନ୍ ଇନେସ୍ କିଜି କିନାନା? 55ଇୱାନ୍ତ ହେ ବାଡ଼ାଇ ମେହି। ତା ତେହି ତର୍ତ ମରିୟମ ଆରେ ଇୱାନ୍ ଟଣ୍ଡାହିର୍ ତର୍ ଯାକୁବ, ଯୋଷେପ୍, ଶିମୋନ ଆରେ ଯିହୁଦା। 56ଆରେ ତା ତଣ୍ଦେହିକ୍ ପା ମା ଲାହାଙ୍ଗ୍ ଇବେ ମାନିକା।”
57ଲାଗିଙ୍ଗ୍ ଇୱାନ୍ ଏଚେକ୍ ବୁଦି ଇମେତାଙ୍ଗ୍ ପାୟାଆତାନ୍? ଆରେ ଇୱିଜୁ ସାକ୍ତିନି କାମାୟ୍ ଇୱାନ୍ ଇନେସ୍ କିଜି କିନାନା? ଏନେଙ୍ଗ୍ ୱେଚ୍ଚି ଯୀଶୁଙ୍ଗ୍ ପାର୍ତି କିୱାତାର୍। ହେବେତାଙ୍ଗ୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଭବିଷ୍ଯତବକ୍ତା ଇମେତାକେ ହାଚିସ୍ ପା ସନ୍ମାନ୍ ପାୟା ଆନାନ୍, ମାତର୍ ଜାର୍ ନାଟାକାର୍ତାକେ ଜାର୍ କୁଟୁମ୍ତାକେ ସନ୍ମାନ୍ ପାୟା ଆଉନ୍।” 58ହେୱାର୍ ହେୱାନିଙ୍ଗ୍ ପାର୍ତି କିୱିତିଲେ, ଯୀଶୁ ହେବେ କେତେକ୍ ଚାନିଆଆନି କାମାୟ୍ କିୱାତାନ୍।
Currently Selected:
ମାଥିଉ 13: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
