ମାର୍କ 1
1
ହାଜି ରହ୍ନି ଡୁବନ୍ହିନି ଯୋହନ
(ମାଥି. ୩:୧-୧୨; ଲୁକ. ୩:୧-୧୮; ଯୋହନ. ୧:୧୯-୨୮)
1ଈଶ୍ୱର ମେହି ଯୀଶୁ ଖ୍ରୀଷ୍ଟତି ହାର୍ଦିକାବୁର୍ ଆରମ୍ ଆତାତ୍।
2ଭବିଷ୍ଯତବକ୍ତା ଯିଶାୟ ତା ସାସ୍ତର୍ତାକେ ଲେକା ମାନାତ୍,
ଈଶ୍ୱର ତା ମେହିଙ୍ଗ୍ ଯୀଶୁ ଖ୍ରୀଷ୍ଟଙ୍ଗ୍ ୱେଚ୍ଚାନ୍, ହୁଡ଼ା,
“ଆନେଙ୍ଗ୍ ନା ଡାଣ୍ଡାସିଙ୍ଗ୍ ନି ଆଗେ ପକ୍ତାନାଙ୍ଗ୍, ହେୱାନ୍ ନି ହାଜି ରହନାନ୍।
3ହେୱାନ୍ ର ଟାଙ୍ଗ୍ରାବାହାତାକେ ଚେରାଆଜି ୱେଚ୍ଚି ମାଚାନ୍,
ମାପୃ କାଜିଙ୍ଗ୍ ହାଜି ରହାଟ୍, ତା ହାନି ହାଜି ହାଣ୍କୁ କିୟାଟ୍।”
4ହେ ଡାଣ୍ଡାସି ଡୁବନ୍ହିନି ଯୋହନ ମାଚାନ୍ ଆରେ ହେୱାନ୍ ଟାଙ୍ଗ୍ରାବାହାତ ମାଚାନ୍। ହେୱାନ୍ ମାନାୟାରିଙ୍ଗ୍ ୱେଚ୍ଚି ମାଚାନ୍, “ପାପ୍ କାମାୟ୍ ପିସ୍ତି ମାପୃତାକେ ୱାଡ ଆରେ ଡୁବନ୍ ଅୱାଟ୍। ଏଲେଙ୍ଗ୍ କିତିସ୍ ଈଶ୍ୱର ମିଙ୍ଗେଙ୍ଗ୍ ପାପ୍ କେମା କିଦ୍ନାନ୍।” 5ହେବେତାଙ୍ଗ୍ ଯିହୁଦା ଜିଲ୍ଲା ଆରେ ଯିରୁଶାଲାମ ସହର୍ତାଙ୍ଗ୍ କେତେକ୍ ମାନାୟ୍ ତା ଲାଗେ ୱାତାର୍, ଆରେ ହେୱାର୍ ଜାର୍-ଜାର୍ ପାପ୍ତିଙ୍ଗ୍ ୱେଚ୍ଚାର୍, ହେବେ ଡୁବନ୍ହିନି ଯୋହନ ହେୱାରିଙ୍ଗ୍ ଯର୍ଦ୍ଦନ ନାଗୁଡ଼୍ତ ଡୁବନ୍ ହିତାନ୍। 6ଯୋହନ ଉଟ୍ ତେମୁଲ୍ତ ରସ୍ତି ହେନ୍ଦ୍ରା ଉସ୍ପି ମାଚାନ୍, ଆରେ ଜାର୍ ମେଙ୍ଗାକାଙ୍ଗ୍ ତଲ୍ତାଙ୍ଗ୍ ରସ୍ତି ମେଙ୍ଗାଡରି ଗାଚିଆ ଆଜି ମାଚାନ୍। ହେୱାନ୍ ତିନିଆନି ପିକୁଙ୍ଗ୍ ଆରେ ରାନ୍ପୁକି ତିନ୍ଞ୍ଜି ମାଚାନ୍। 7ଯୋହନ ଡାକ୍ରାହିଜି ୱେଚ୍ଚେଙ୍ଗ୍ ଲାଗାତାନ୍। ନା ତାକେତାଙ୍ଗ୍ ଇନେର୍ ବେସି ସାକ୍ତିକାଟାକାନ୍ ହେୱାନ୍ ନା ପାଚେ ୱାନାନା, ଆନେଙ୍ଗ୍ ଚାକର୍ ଲେକେ ଆଜି ତା କାଲ୍ନି ପାଣ୍ଡାୟ୍ ଗାଟି ରିକ୍ତେଙ୍ଗ୍ ସାମାନ୍ ଆକାୟ୍। 8ଆନେଙ୍ଗ୍ ମିଙ୍ଗେଙ୍ଗ୍ ଏଜୁକାଙ୍ଗ୍ ଡୁବନ୍ ହିଦ୍ନାଙ୍ଗା, ମାତର୍ ହେୱାନ୍ ମିଙ୍ଗେଙ୍ଗ୍ ପବିତ୍ର ଆତ୍ମାତାଙ୍ଗ୍ ଡୁବନ୍ ହିଦ୍ନାନ୍।
ଯୀଶୁ ଏଜୁକାଙ୍ଗ୍ ଡୁବନ୍ ଅଜି ପରିକ୍ଷା ଆତାନ୍
(ମାଥି. ୩:୧୩-୪:୧୧; ଲୁକ. ୩:୨୧,୨୨; ୪:୧-୧୩)
9ହେପାଦ୍ନା ଯୀଶୁ ଗାଲିଲୀ ଜିଲ୍ଲାନି ନାଜରିତ ସହର୍ ତାକେଣ୍ତାଙ୍ଗ୍ ଯର୍ଦ୍ଦନ ନାଗୁଡ଼୍ତ ୱାତାନ୍, ତାପାଚେ ଯୋହନ ଯୀଶୁଙ୍ଗ୍ ଯର୍ଦ୍ଦନ ନାଗୁଡ଼୍ତାକେ ଡୁବନ୍ ହିତାନ୍। 10ହେଦାପ୍ରେ ଯୀଶୁ ଏଜୁଙ୍ଗ୍ତାଙ୍ଗ୍ ନିଙ୍ଗ୍ଞ୍ଜି ୱାନି ୱେଡ଼ାଲିଙ୍ଗ୍ ସରଗ୍ ଜେୟାଆନାକା ହୁଡ଼ତାନ୍, ଆରେ ପବିତ୍ର ଆତ୍ମା ପାର୍ୱା ଲେକେ ଜାର୍ ଜପି ୱାନାକା ହୁଡ଼୍ତାର୍। 11ଆରେ, ଈଶ୍ୱର ସରଗ୍ତାଙ୍ଗ୍ ଯୀଶୁଙ୍ଗ୍ ୱେଚ୍ଚାନ୍, ଏନେଙ୍ଗ୍ ନା ଲାଡ୍ ମାଜି, “ଆନେଙ୍ଗ୍ ନିତାକେ ବେସି ୱାରି।”
12ତାପାଚେ ପବିତ୍ର ଆତ୍ମା ଯୀଶୁଙ୍ଗ୍ ଟାଙ୍ଗ୍ରାବାହାତ ଅଶାହାଚାତ୍। 13ଯୀଶୁ ହେ ଟାଙ୍ଗ୍ରାବାହାତ ଚାଲିଶ୍ ଦିନ୍ ମାଚାନ୍। ଶୟତାନ ତାଙ୍ଗେଙ୍ଗ୍ ପରିକ୍ଷା କିଜି ମାଚାତ୍, ହେ ବାହାତାକେ ରାନ୍ତି ପଶୁଙ୍ଗ୍ ପା ମାଚିକ୍। ଆରେ ସରଗ୍ନି ଦୁତ୍କୁ ୱାଜି ଯୀଶୁଙ୍ଗ୍ ହେବାକିଜି ମାଚିକ୍।
ପାର୍ତୁମ୍ ଚେଲାହିଙ୍ଗ୍ ହିର୍ବାତାକା
(ମାଥି. ୪:୧୨-୧୭; ଲୁକ. ୪:୧୪,୧୫; ମାଥି. ୪:୧୮-୨୨; ଲୁକ. ୫:୧-୧୧)
14କେତ୍ଦିନ୍ ହାଚି ପାଚେ ହେରୋଦ ରାଜା ଯୋହନତିଙ୍ଗ୍ ଗାଚ୍ଚି ଜଇଲ୍ ଇଞ୍ଜ ଇଡ଼୍ତାନ୍। ତାପାଚେ ଯୀଶୁ ଗାଲିଲୀ ଜିଲ୍ଲାତ ୱାଜି ଈଶ୍ୱରତି ହାର୍ଦିକାବୁର୍ ୱେଚ୍ଚେଙ୍ଗ୍ ହାଙ୍ଗ୍ତାନ୍। 15ହେୱାନ୍ ଇଦାଙ୍ଗ୍ ୱେଚ୍ଚେଙ୍ଗ୍ ହାଙ୍ଗ୍ତାନ୍, “ଈଶ୍ୱର ବାଚିକିତି ସମୟ୍ ଆତାତ୍, ଈଶ୍ୱର ସାସନ୍ କିନି ରାଜି ଲାଗେ ଇକାୱାନାତା। ହେଦାଙ୍ଗ୍ କାଜିଙ୍ଗ୍ ପାପ୍ କାମାୟ୍ ପିସ୍ତି ମାପୃତାକେ ୱାଡ ଆରେ ହାର୍ଦିକାବୁର୍ତିଙ୍ଗ୍ ପାର୍ତିକିୟାଟ୍।”
16ରଦିନ୍ ଯୀଶୁ ଗାଲିଲୀନି ହାମ୍ଦୁର୍ କାଣ୍ତିତିଙ୍ଗ୍ ହାନିହିଙ୍ଗ୍ ଶିମୋନ ଆରେ ତା ଟଣ୍ଡାହି ଆନ୍ଦ୍ରିୟଙ୍ଗ୍ ହାମ୍ଦୁର୍ତାକେ ଜାଲ୍ ଇଡ଼୍ନାକା ହୁଡ଼୍ତାନ୍। ହେୱାର୍ କେଉଟ୍ ମାଚାର୍। 17ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ନା ପାଚେ ୱାଡ।” “ନଙ୍ଗୟ୍ ପାତେକ୍ ଏପେଙ୍ଗ୍ କେଉଟ୍ ମାଚାଦେର୍, ମାତର୍ ନଙ୍ଗୟ୍ ମିଙ୍ଗେଙ୍ଗ୍ ମାନାୟାରିଙ୍ଗ୍ ତାସି ନା ଚେଲାରହ୍ନାକା ଆନେଙ୍ଗ୍ ହିକାଇ କିଦ୍ନାଙ୍ଗ୍।” 18ହେବେତାଙ୍ଗ୍ ହେୱାର୍ ହେଦାପ୍ରେ ଜାଲ୍ତିଙ୍ଗ୍ ପିସ୍ତି ତାପାଚେ ହାଚାର୍।
19ଅଲପ୍ ଦେହା ହାଚି ପାଚେ, ହେୱାନ୍ ଟଣ୍ଡ୍ରିୟାର୍ ଯାକୁବ ଆରେ ଯୋହନତିଙ୍ଗ୍ ଡଙ୍ଗାତାକେ ଜାଲ୍ ମାଡ଼୍ତାକିନାକା ହୁଡ଼୍ତାନ୍। ହେ ଟଣ୍ଡ୍ରିୟାର୍ ଜେବଦି ମେହିର୍ ମାଚାର୍। 20ହେପାଦ୍ନା ଯୀଶୁ ହେୱାରିଙ୍ଗ୍ କୁକ୍ତାନ୍, ହେୱାର୍ ତା ଲାତ୍ରାହି ଜେବଦିଙ୍ଗ୍ ଆରେ ତା କୁଲିୟାରିଙ୍ଗ୍ ଡଙ୍ଗାତାକେ ପିସ୍ତି ତାପାଚେ ପାଚେ ହାଚାର୍।
ବୁତ୍ଆତ୍ମା ଡୁୟାଆତାକାନ୍ ହାର୍ ଆନାକା
(ଲୁକ. ୪:୩୧-୩୭)
21ତାପାଚେ ଯୀଶୁ ତା ଚେଲାହିର୍ ହୁଦାଙ୍ଗ୍ କପୁର୍ନାହୁମ୍ ସହର୍ତାକେ ହାଚାର୍। ଆରେ ଯୀଶୁ ଯିହୁଦିର୍ ଜମ୍ନିଦିନ୍ ନାଞ୍ଜ୍ ଯିହୁଦିର୍ ପାର୍ତାନା ଇଞ୍ଜ ହାଲ୍ଜି ହିକ୍ଷାହିଦେଙ୍ଗ୍ ଲାଗାତାନ୍। 22ଆରେ ମାନାୟାର୍ ତା ହିକ୍ଷା ୱେନ୍ଞ୍ଜି କାବା ଆତାର୍, ଇନେସ୍କି ହେୱାନ୍ ଯିହୁଦି ଦରମ୍ନି ପଣ୍ଡିତ୍ଲେକେ ହିକ୍ଷା ହିୱାଦାଙ୍ଗ୍, ଆଦିକାର୍ ପାୟାଆତି ମାନାୟ୍ ଲେକେ ହେୱାରିଙ୍ଗ୍ ହିକ୍ଷାହିଜି ମାଚାନ୍।
23ହେପାଦ୍ନା ଯୀଶୁ ଯିହୁଦିର୍ ପାର୍ତାନା ଇଞ୍ଜ ହିକ୍ଷା ହିନିହିଙ୍ଗ୍, ତିପ୍କୁ ବୁତ୍ଆତ୍ମା ଡୁୟାଆତି ମାନାୟ୍ ଚେରାଆଜି ୱେଚ୍ଚାନ୍, 24“ଏ ନାଜରିତ ସହର୍ନି ଯୀଶୁ, ନି ଲାହାଙ୍ଗ୍ ମାବେ ଇନାକା ମାନାତ୍? ଏନେଙ୍ଗ୍ ଇନାକା ମାଙ୍ଗେଙ୍ଗ୍ ବୁଡାୟ୍ କିଦେଙ୍ଗ୍ ୱାତାୟନା? ଆନେଙ୍ଗ୍ ପୁଞ୍ଚାଙ୍ଗ୍ନା ଏନେଙ୍ଗ୍ ଇନାକାୟ୍, ‘ଏନେଙ୍ଗ୍ ଈଶ୍ୱରତାଙ୍ଗ୍ ୱାତି ପବିତ୍ର ମାନାୟ୍।’ ”
25ଯୀଶୁ ତାଙ୍ଗେଙ୍ଗ୍ ଦମ୍କାଇକିଜି ୱେଚ୍ଚାନ୍, “ଚିମ୍ରାଆ! ଇୱାନ୍ତାଙ୍ଗ୍ ହସିହାଲା!” 26ହେବେତାଙ୍ଗ୍ ହେ ବୁତ୍ଆତ୍ମା ହେୱାନିଙ୍ଗ୍ ମଡ଼ିକିଜି ଆଦିକ୍ ବେଲ୍କିଆଜି ହେୱାନ୍ତାଙ୍ଗ୍ ହସିହାଚାତ୍।
27ଆରେ ହେ ପାର୍ତାନା ଇଞ୍ଜ ମାଚି ମାନାୟାର୍ କାବା ଆତାର୍! ଆରେ ହେୱାର୍ ବେଣ୍କିଦେଙ୍ଗ୍ ଲାଗାତାର୍, “ଇଦାଙ୍ଗ୍ ଇନେସ୍ ଲେଗ୍ଦି ହିକ୍ଷା? ଆପେଙ୍ଗ୍ ଇନାୱେଡ଼ାଙ୍ଗ୍ ପା ଏଲେଙ୍ଗ୍ ଲେଗ୍ଦି ଆଦିକାର୍ ହୁଦାଙ୍ଗ୍ ହିକ୍ଷା ହିନାକା ୱେନୁପେ, ହେୱାନ୍ ବୁତ୍ଆତ୍ମାକାଙ୍ଗ୍ ପା ଆଦେସ୍ ହିତିସ୍, ବୁତ୍ଆତ୍ମାକ୍ ପା ତା ଆଦେସ୍ ମାନିକିନିକ୍।” 28ହେବେତାଙ୍ଗ୍ ଯୀଶୁ କିତି କାମାୟ୍ ଗାଲିଲୀ ଜିଲ୍ଲାନି ଚାରିବେଣ୍ତି ନାସ୍କୁକାଙ୍ଗ୍ ହେଦାପ୍ରେ ବିଚାଆତାତ୍।
କେତେକ୍ ଜାଣ୍ତିଙ୍ଗ୍ ହାର୍କିତାନ୍
(ମାଥି. ୮:୧୪-୧୭; ଲୁକ. ୪:୩୮-୪୧)
29ତାପାଚେ ଯୀଶୁ ଆରେ ତା ଚେଲାହିର୍ ଯିହୁଦିର୍ ପାର୍ତାନା ଇଞ୍ଜାଙ୍ଗ୍ ହସି, ଯାକୁବ ଆରେ ଯୋହନ ହୁଦାଙ୍ଗ୍ ହେଦାପ୍ରେ ଶିମୋନ ପିତର ଆରେ ଆନ୍ଦ୍ରିୟ ଇଞ୍ଜ ହାଚାର୍। 30ହେପାଦ୍ନା ଶିମୋନ ପଦାହି ନଚ୍ନାକା ହୁନ୍ଞ୍ଜି ମାଚାତ୍, ଆରେ ହେୱାର୍ ହେଦାପ୍ରେ ତା ବେଣ୍ ଯୀଶୁଙ୍ଗ୍ ୱେଚ୍ଚାର୍। 31ହେବେତାଙ୍ଗ୍ ହେୱାନ୍ ଲାଗେ ହାଲ୍ଜି ତା କେଇ ଆସ୍ତି ହେଦିଲିଙ୍ଗ୍ ନିକ୍ତାନ୍, ଆରେ ତାଙ୍ଗେଙ୍ଗ୍ ନମେର୍ ପିସ୍ତାତ୍, ଶିମୋନ ପଦାହି ଯୀଶୁଙ୍ଗ୍ ଆରେ ତା ଚେଲାହିରିଙ୍ଗ୍ ହେବା କିଦେଙ୍ଗ୍ ଲାଗାତାତ୍।
32ଏଚେପାଦ୍ନା ଯିହୁଦିର୍ ଜମ୍ନିଦିନ୍ ମିକାହାରେସ୍ ୱେଡ଼ାହାଚିହିଙ୍ଗ୍, ମାନାୟାର୍ ରଗିୟାରିଙ୍ଗ୍ ଆରେ ବୁତ୍ ଡୁୟାଆତାକାରିଙ୍ଗ୍ ତାବେ ତାହିୱାଦେଙ୍ଗ୍ ଲାଗାତାର୍, 33ଆରେ କପୁର୍ନାହୁମ୍ ସହର୍ନି ହେନି ମାନାୟାର୍ ୱାଜି ଶିମୋନ ପଦାହି ଇଲ୍ ଦୁୱେର୍ କଚଣ୍ତ ରୁଣ୍ଡାଆତାର୍। 34ହେବେତାଙ୍ଗ୍ ହେୱାନ୍ ୱିଜୁ ପର୍କାର୍ ରଗିୟାରିଙ୍ଗ୍ ହାର୍କିତାନ୍, ଆରେ କେତେକ୍ ବୁତ୍ଆତ୍ମା ଡୁୟାଆତାକାରିଙ୍ଗ୍ ପିହିକିତାନ୍। ମାତର୍ ବୁତ୍କୁ ଈଶ୍ୱର ମେହି ଯୀଶୁ ଇଞ୍ଜି ପୁନ୍ଞ୍ଜି ମାଚିକ୍, ହେଦାଙ୍ଗ୍ କାଜିଙ୍ଗ୍ ଯୀଶୁ ବୁତ୍କୁକାଙ୍ଗ୍ ବେଣ୍ ୱେଚ୍ଚେଙ୍ଗ୍ ହିୱାଦାଙ୍ଗ୍ ମାଚାନ୍।
ଗାଲିଲୀ ଜିଲ୍ଲାତାକେ ଯୀଶୁ ଶୁଣାୟ୍ କିତାନ୍
(ଲୁକ. ୪:୪୨-୪୪)
35ଅଜଡ଼୍ ଆୱିହିଙ୍ଗ୍ ଯୀଶୁ ନିଙ୍ଗ୍ଞ୍ଜି ର ଟାଙ୍ଗ୍ରାବାହାତ ପାର୍ତାନା କିଦେଙ୍ଗ୍ ହାଚାନ୍। 36ଅଲପ୍ ହାଚି ପାଚେ ଶିମୋନ ଆରେ ତା ହାଙ୍ଗ୍ଦାକାର୍ ଯୀଶୁ ମା ହୁଦାଙ୍ଗ୍ ହିଲୁନ୍ ଇଞ୍ଜି ପୁଚାର୍, ହେୱାର୍ ତାଙ୍ଗେଙ୍ଗ୍ ଦାସ୍ତେଙ୍ଗ୍ ହାଚାର୍। 37ଆରେ ଯୀଶୁଙ୍ଗ୍ ହେୱାର୍ ହୁଡ଼୍ତି ପାଚେ, ହେୱାର୍ ହେୱାନିଙ୍ଗ୍ ୱେଚ୍ଚାର୍, “ବେସିହେନି ନିଙ୍ଗେଙ୍ଗ୍ ଦାସ୍ତାନାରା।”
38ହେବେତାଙ୍ଗ୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, ୱାଡ, “ଆସେଙ୍ଗ୍ ବିନ୍ବିନ୍ ବାହାତ ହାନାସ୍ ଆରେ ଲାଗେନି ନାସ୍କୁକାଙ୍ଗ୍ ହାନାସ୍, ହେୱାର୍ତାକେ ଆନେଙ୍ଗ୍ ହାର୍ଦିକାବୁର୍ ଶୁଣାଇକିନାଙ୍ଗ୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ୱାତାଙ୍ଗ୍ନା।” 39ଆରେ, ଯୀଶୁ ଗାଲିଲୀ ଜିଲ୍ଲାନି ବିନ୍ବିନ୍ ସହର୍ତାକେ ହାଲ୍ଜି, ଯିହୁଦିର୍ ପାର୍ତାନା ଇଞ୍ଜ ହାର୍ଦିକାବୁର୍ ଶୁଣାୟ୍ କିତାନ୍, ଆରେ ବୁତ୍ଆତ୍ମା ଡୁୟାଆତାକାରିଙ୍ଗ୍ ପିହିକିତାନ୍।
କୁଷ୍ଟରଗ୍ ଆତାକାର୍ ହାର୍ଆତାର୍
(ମାଥି. ୮:୧-୪; ଲୁକ. ୫:୧୨-୧୬)
40ଇବେତାଙ୍ଗ୍ କୁଷ୍ଟରଗ୍ କାଟାକାନ୍ ରକାନ୍ ଯୀଶୁ କଚଣ୍ତ ୱାଜି ମେଣ୍ଡାକୁନ୍ଦିକିଜି ଯୀଶୁଙ୍ଗ୍ କାକୁଲ୍ତି ଆଜି ୱେଚ୍ଚାନ୍, “ଆଜ୍ଞା ନାଙ୍ଗେଙ୍ଗ୍ ହାର୍ କିଦା, ଯଦି ଏନେଙ୍ଗ୍ ମାନ୍କିତିସ୍। ନାଙ୍ଗେଙ୍ଗ୍ ହାର୍ କିଦ୍ନାୟ୍ ଇଞ୍ଜି ପୁଚାଙ୍ଗ୍ନା।”
41ହେବେତାଙ୍ଗ୍ ଯୀଶୁ କାର୍ମାଆଜି କେଇ ଲାମାୟ୍ କିଜି ତାଙ୍ଗେଙ୍ଗ୍ ଆସ୍ପାତାନ୍ ଆରେ ୱେଚ୍ଚାନ୍, “ଆନେଙ୍ଗ୍ ମାନ୍ କିଦ୍ନାଙ୍ଗା। ହାର୍ ଆ!” 42ହେଦାପ୍ରେ କୁଷ୍ଟରଗ୍ତାଙ୍ଗ୍ ପୁରାପୁରି ହାର୍ ଆତାନ୍। 43ଆରେ, ଯୀଶୁ ହେୱାନିଙ୍ଗ୍ ଆଦେସ୍ ହିଜି ୱେଚ୍ଚି ପକ୍ତାନ୍, 44“ହୁଡ଼ା, ଇନେରିଙ୍ଗ୍ ପା ଇବେଣ୍ ୱେଚ୍ମା, ମାତର୍ ହାଲା! ଆରେ ଈଶ୍ୱର ହେବାକିନି ପୁଜାରିତାକେ ହାର୍ ଆତାଙ୍ଗ୍ ଇଞ୍ଜି ୱେଚା, ତାପାଚେ ମୋଶା ଲେକିକିତି ନିୟମ୍ତାଙ୍ଗ୍ ଈଶ୍ୱରତିଙ୍ଗ୍ ପୁଜାକିୟା, ଏଲେଙ୍ଗ୍ କିତିସ୍ ଏନେଙ୍ଗ୍ ବିଦିଅନୁସାତାଙ୍ଗ୍ ହାର୍ ଆନାୟ୍ ଆରେ ନିଙ୍ଗେଙ୍ଗ୍ ହାର୍ ଆତାନ୍ ଇଞ୍ଜି ୱିଜାକାର୍ ପୁଞ୍ଜ୍ନାର୍।”
45ମାତର୍ ହେ କୁଷ୍ଟରଗ୍ଦି ମାନାୟ୍ ହେ ବାହାତାଙ୍ଗ୍ ହସିହାଚି ପାଚେ, ଯୀଶୁ ନାଙ୍ଗେଙ୍ଗ୍ ହାର୍ କିତ୍ତାନ୍ ଇଞ୍ଜି ୱିଜୁ ନିପଣ୍ ୱେଚ୍ଚି ବୁଲାଆତାନ୍। ହେଦାଙ୍ଗ୍ କାଜିଙ୍ଗ୍ ଯୀଶୁ ଇମ୍ଣି ସହର୍ତାକେ ପା ଚଞ୍ଜିଆଆଜି ହାଞ୍ଜେଙ୍ଗ୍ ଆଡ୍ୱାଦାଙ୍ଗ୍ ମାଚାନ୍। ଆରେ ଯୀଶୁ ଟାଙ୍ଗ୍ରାବାହାତ ମାଚାନ୍। ମାତର୍ ୱିଜୁ ନିପ୍ଣି ମାନାୟାର୍ ତାବେ ୱାଦେଙ୍ଗ୍ ଲାଗାତାର୍।
Currently Selected:
ମାର୍କ 1: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
