ମାର୍କ 13
13
ଈଶ୍ୱର ମାନି ଇଲ୍ ବୁଡାଇ କିନି ବିଷୟ
(ମାଥି. ୨୪:୧,୨; ଲୁକ. ୨୧:୫,୬)
1ଦିନେକ୍ ଯୀଶୁ ଈଶ୍ୱର ମାନି ମନ୍ଦିର୍ତାଙ୍ଗ୍ ହସିହାନିହିଙ୍ଗ୍ ତା ଚେଲାହିର୍ ବିତ୍ରେତାଙ୍ଗ୍ ରକାନ୍ ହେୱାନିଙ୍ଗ୍ ୱେଚ୍ଚାନ୍, “ଏ ଗୁରୁ, ହୁଡ଼ା, କାଲ୍କୁ ଲାହାଙ୍ଗ୍ ମିସ୍ତୁରି ଇନେସ୍ କିଜି ଏଚେକ୍ ହାର୍ ଇଲ୍ ରସ୍ତାର୍ନା!”
2ହେବେତାଙ୍ଗ୍ ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ନଙ୍ଗୟ୍ ଏନେଙ୍ଗ୍ ଇମ୍ଣି ଗାଜା ଇଲ୍ ହୁଡ଼୍ନାୟା, ମାତର୍ ଶାତ୍ରୁ ଇବେ ର କାଲ୍ ପା ଇଡ଼୍ଦେଙ୍ଗ୍ ହିଉତ୍, ୱିଜୁ କାଲ୍କୁକାଙ୍ଗ୍ ବୁଡାଇ କିନାତ୍।”
ଯୁଗ୍ ୱିଜ୍ନି ଚିନା
(ମାଥି. ୨୪:୩-୧୪; ଲୁକ. ୨୧:୭-୧୯)
3ଦିନେକ୍ ଯୀଶୁ ଜିତ୍ମାର୍ ମାନି ମାଡ଼ିତାକେ ହାଚାନ୍, ଆରେ ହେ ଈଶ୍ୱର ମାନି ମନ୍ଦିର୍ ନିପଣ୍ ମୁମ୍କିଜି କୁଚ୍ଚାନ୍। ହେପାଦ୍ନା ଇନେର୍ ହିଲ୍ୱିହିଙ୍ଗ୍ ପିତର, ଯୋହନ୍, ଯାକୁବ, ଆରେ ଆନ୍ଦ୍ରିୟ ହେୱାନ୍ତାକେ ହାଲ୍ଜି ୱେନ୍ବାତାର୍, “ଇଦାଙ୍ଗ୍ ଇନାୱେଡ଼ାଙ୍ଗ୍ ଗଟାଆନାତ୍? ଇ ବିଷୟରେ ମାଙ୍ଗେଙ୍ଗ୍ ୱେଚ୍ଚା। 4ଆରେ, ଏଚେକାଡ଼୍ଦ ହେ ଗଟ୍ନା ୱାନାତ୍ ଇନାଚିନ୍ ହୁଡ଼୍ଜି ଆପେଙ୍ଗ୍ ପୁନାପ୍? ହେ ବିଷୟତାଙ୍ଗ୍ ମାଙ୍ଗେଙ୍ଗ୍ ୱେଚ୍ଚା।”
5ହେବେତାଙ୍ଗ୍ ଯୀଶୁ ୱେଚେଙ୍ଗ୍ ଲାଗାତାନ୍, “ଜାଗ୍ରତ୍! ମିଙ୍ଗେଙ୍ଗ୍ ଇନେର୍ ପୁସ୍ରାଇ କିଜି ବିନ୍ ହାଜ୍ଦିଙ୍ଗ୍ ଅସାହାଞ୍ଜୁର୍। 6କେତେକ୍ ମାନାୟ୍ ନା ତର୍ଦାଙ୍ଗ୍ ୱାଜି, ‘ଆନେଙ୍ଗ୍ ଖ୍ରୀଷ୍ଟ’ ଇଞ୍ଜି ୱେଚ୍ଚି କେତ୍ଜାଣ୍ ପୁସ୍ରାଇ କିଜି ବିନ୍ ହାଜ୍ଦିଙ୍ଗ୍ ଅସାହାଞ୍ଜ୍ନାର୍। 7ମାତର୍ ଏପେଙ୍ଗ୍ ଏଚେକାଡ଼୍ଦ ଯୁଜ୍ ବିଷୟ ଆରେ ଯୁଜ୍ ଆନାତ୍ ଇଞ୍ଜି ଏପେଙ୍ଗ୍ ୱେନାଦେର୍, ହେପାଦ୍ନା କାକୁଲ୍ତି ଆମାଟ୍, ଇୱିଜୁ ହାତ୍ପା ଗଟାଆନାତ୍, ମାତର୍ ଇପାଦ୍ନା ଯୁଗ୍ ୱିଜୁତ୍। 8ଇନେସ୍କି ର ଜାତିର୍ତାଙ୍ଗ୍ ଆରେ ର ଜାତିର୍ ଯୁଜ୍ କିନାର୍, ଆରେ ର ଦେସ୍ତାଙ୍ଗ୍ ଆରେ ର ଦେସ୍ତିଙ୍ଗ୍ ବିରଦ୍ କିଜି ଯୁଜ୍ କିନାର୍। ଆରେ ବାହା ବାହାତ ବୁମିକମ୍ପ୍ ଆନାତ୍ ଆରେ କାତାର୍ ଆର୍ନାତ୍, ଇ କଷ୍ଟ ର କଗ୍ଲେ ହିମ୍ଣା ଜନମ୍କିନି ତା ଗରବ୍ ନନାକା ଲେକେ ହେ କଷ୍ଟ ଆରମ୍ ଆନାତ୍। 9ମାତର୍ ଏପେଙ୍ଗ୍ ଜାର୍-ଜାର୍ବିତ୍ରେ ଜାଗ୍ରତ୍ ଆଜି ମାନାଟ୍, ମାନାୟାର୍ ମିଙ୍ଗେଙ୍ଗ୍ ବିଚାର୍ନା କିଦେଙ୍ଗ୍ ଯିହୁଦି ଦଳ୍ନି ନେତାର୍ତାକେ ମିଙ୍ଗେଙ୍ଗ୍ ନିଲି କିଦ୍ନାର୍। ଆରେ ମାନାୟାର୍ ମିଙ୍ଗେଙ୍ଗ୍ ଯିହୁଦିର୍ ପାର୍ତାନା ଇଞ୍ଜ ଟ୍ରାକ୍ତାନାର୍, ଆରେ ଏପେଙ୍ଗ୍ ନାଙ୍ଗେଙ୍ଗ୍ ପାର୍ତିକିନି କାଜିଙ୍ଗ୍, ଦେସ୍ ସାସନ୍ କିନି ମାନୟ୍ତାକେ ଆରେ ରାଜା ମୁମ୍ଦ ବିଚାର୍ନା ଆଦେଙ୍ଗ୍ ନିଲ୍ନାଦେର୍। ହେପାଦ୍ନା ଏପେଙ୍ଗ୍ ନା ହାର୍ଦିକାବୁର୍ ଶୁଣାୟ୍ କିନାଦେର୍। 10ଆରେ, ଯୁଗ୍ ୱିଜ୍ୱିହିଙ୍ଗ୍ ନା ହାର୍ଦିକାବୁର୍ ୱିଜୁ ଜାତିରିଙ୍ଗ୍ ୱେଚ୍ନାକା ମାନାତ୍। 11ଆରେ ମାନାୟାର୍ ମିଙ୍ଗେଙ୍ଗ୍ ବିଚାର୍ନା କିନି ଇଞ୍ଜ ନିଲି କିଦ୍ନାର୍, ହେପାଦ୍ନା ଏପେଙ୍ଗ୍ ଇନାକା ଇନାପ୍ ଇଞ୍ଜି ଚିନ୍ତା କିମାଟ୍, ଈଶ୍ୱର ମି ମାନ୍ତ ଇନାକା ହିଦ୍ନାନ୍ ହେଦାଙ୍ଗ୍ ଏପେଙ୍ଗ୍ ୱେଚାଟ୍। ଇନେସ୍କି ଏପେଙ୍ଗ୍ ମି ବାବ୍ନାନି ବେଣ୍ ଇନୁଦେରା, ମାତର୍ ପବିତ୍ର ଆତ୍ମା ମିଙ୍ଗେଙ୍ଗ୍ ଇନା ବେଣ୍ ୱେଚ୍ଚେଙ୍ଗ୍ ସାଇଜ କିତ୍ତିସ୍ ହେ ବେଣ୍ ୱେଚ୍ନାଦେରା।
12ହେପାଦ୍ନା ଇମ୍ଣି ମାନାୟ୍ ନାଙ୍ଗେଙ୍ଗ୍ ପାର୍ତି କିଦୁର୍, ହେୱାନ୍ ନାଙ୍ଗେଙ୍ଗ୍ ପାର୍ତି କିଦ୍ନାକାରିଙ୍ଗ୍ ଅହିକିଦେଙ୍ଗ୍ ଆହିକିନାର୍। ଆବାର୍ ପା ତା ହିମ୍ଣାକାଙ୍ଗ୍ ହେଲେକେ କିନାର୍, ଆରେ ହିମ୍ଣାଙ୍ଗ୍ ଆବାଙ୍ଗ୍ ଆୟାଙ୍ଗ୍ ବିରଦ୍ତାକେ ନିଙ୍ଗ୍ଞ୍ଜି ହେୱାରିଙ୍ଗ୍ ମାର୍ନେ ଅହ୍ନାର୍। 13ଆରେ, ନାବେ ପାର୍ତି କିତିସ୍ ମିଙ୍ଗେଙ୍ଗ୍ ୱିଜାକାର୍ ଜେକ ହୁଡ଼୍ଦାନାର୍, ମାତର୍ ଇମ୍ଣି ମାନାୟ୍ ନାବେ ହାରିହାରା ପାତେକ୍ ପାର୍ତି କିଜି ମାନାନ୍, ହେୱାନ୍ ରକ୍ଷା ପାୟା ଆନାନ୍।”
ଗାଜା ବିପତ୍
(ମାଥି. ୨୪:୧୫-୨୮; ଲୁକ. ୨୧:୨୦-୨୪)
14“ଆନେଙ୍ଗ୍ ନଙ୍ଗୟ୍ ଇନାକା ୱେଚ୍ଚେଙ୍ଗ୍ ହାନାଙ୍ଗା ପଡ଼ି କିନାକାଦେର୍ ବୁଜାଆଡ। ରଦିନ୍ ଏପେଙ୍ଗ୍ କରାପ୍ ମାନାୟ୍ତିଙ୍ଗ୍ ଯିରୁଶାଲାମ ମନ୍ଦିର୍ତାକେ ନିଲ୍ତାକା ହୁଡ଼୍ନାଦେର୍, ଇମ୍ଣି ବାହାତାକେ ହେୱାନ୍ ମାନ୍ୱାକା ମାଚାତ୍ ହେବାହାତାକେ ହେୱାନ୍ ମାଚିଲେ, ହେ ମନ୍ଦିର୍ ବୁଡାଇ କିନାନ୍। ହେପାଦ୍ନା ଯିହୁଦା ଜିଲ୍ଲାତ ମାନାକାଦେର୍ ଜାର୍ ଜିବୁନ୍ ରକ୍ଷା ପାୟା ଆଦେଙ୍ଗ୍ ମାଡ଼ିତ ହନ୍ଚିହାଲେର୍। 15ଆରେ ଏପେଙ୍ଗ୍ ଇଲ୍ ଚାତ୍ ଜପି ମାନିହିଙ୍ଗ୍ ତାରେନ୍ ଜୁଜି ହନ୍ଚିହାଲାଟ୍, ମାତର୍ ଏପେଙ୍ଗ୍ ମି ଇଞ୍ଜ ଜିନିଷ୍ ତାକେଦେଙ୍ଗ୍ ହାଲ୍ମାଟ୍। 16ଆରେ, ଇମ୍ଣାକାର୍ ଜମିତ ମାନ୍ଙ୍ଗାନାର୍, ହେୱାର୍ ଜାର୍ ଶାଲ୍ ତାକେଦେଙ୍ଗ୍ ଲେଉଟା ଆଜି ଇଞ୍ଜ ହାଲ୍ମେର୍। 17ଗାଗାଡ଼୍ତ ମାନି କଗ୍ଲେ ଆରେ ହିମ୍ଣାତାଡ଼ି କଗ୍ଲେକ୍ତି ବେସି ଦୁଃକ୍ନି ସମୟ୍, ଇନେସ୍କି ହେୱେକ୍ ଜିବୁନ୍ ରକ୍ଷା କିଦେଙ୍ଗ୍ ହନ୍ତେଙ୍ଗ୍ କଷ୍ଟ ଆନିକ୍। 18-19ଇନେସ୍କି ହେପାଦ୍ନା ମାନାୟାର୍ ବେସି କଷ୍ଟ ପାୟାଆନାର୍, ଈଶ୍ୱର ପୁର୍ତିତିଙ୍ଗ୍ ରସ୍ତିଦିନ୍ତାଙ୍ଗ୍ ନଙ୍ଗୟ୍ ପାତେକ୍ ମାନାୟାର୍ କଷ୍ଟ ପାୟାଆୱାତାର୍ନା ଆରେ, ଏଲେଙ୍ଗ୍ ଆରେ ଇନେୱାଡ଼ାଙ୍ଗ୍ ପା ହେଲେକେ ଗଟ୍ନା ଗାଟାଆଉତ୍। ହେଦାଙ୍ଗ୍ କାଜିଙ୍ଗ୍ ପାର୍ତାନା କିୟାଟ୍ ଯେ ହେଲେକେ କଷ୍ଟ ପିନି ମାସ୍ତ ଆମେତ୍ ବାର୍ତ ହାଞ୍ଜେଙ୍ଗ୍ କଷ୍ଟ। 20ଆରେ ମାପୃ ହେ କଷ୍ଟତିଙ୍ଗ୍ ଉଣା କିୱାଦାଙ୍ଗ୍ ମାଚିସ୍ ଇନେର୍ ପା ରକ୍ଷା ପାୟା ଆୱାତାର୍ମା। ମାତର୍ ହେୱାନ୍ ତା ବାଚିକିତି ମାନାୟ୍ କାଜିଙ୍ଗ୍, ହେ ଦିନ୍ତିଙ୍ଗ୍ ଉଣା କିତାନ୍ନା।
21ହେପାଦ୍ନା ମିଙ୍ଗେଙ୍ଗ୍ ଇନେର୍ ଇଞ୍ଜ୍ନାର୍, ‘ହୁଡ଼ାଟ୍! ଖ୍ରୀଷ୍ଟ ଇବେ ମାନାନ୍,’ ଆରେ ‘ହୁଡ଼ାଟ୍! ଖ୍ରୀଷ୍ଟ ହେବେ ମାନାନ୍,’ ହେୱାନିଙ୍ଗ୍ ପାର୍ତି କିମାଟ୍। 22ମିଚ୍ୱା ଖ୍ରୀଷ୍ଟ ଆରେ ମିଚ୍ୱା ଭବିଷ୍ଯତବକ୍ତାର୍ ଚଞ୍ଜିଆଆଦ୍ନାର୍। ଆରେ ହେୱାର୍ ଗାଜାଗାଜା କାମାୟ୍ କିନାର୍ ଆରେ ଚାନିଆ କାମାୟ୍ କିଜି ଈଶ୍ୱର ବାଚିକିତି ମାନାୟାରିଙ୍ଗ୍ ବୁଲ୍କାଇ କିନାର୍। 23ମାତର୍ ଏପେଙ୍ଗ୍ ଜାଗ୍ରତ୍ ଆଜି ମାନାଟ୍, ଇ ୱିଜୁଗଟ୍ନା ୱାୱି ଆଗେ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା।”
ମାନାୟ୍ ମେହି ୱାନିଦିନ୍
(ମାଥି. ୨୪:୨୯-୩୧; ଲୁକ. ୨୧:୨୫-୨୮)
24“ତାପାଚେ ହେ ଦୁଃକ୍ ୱାତିସ୍ ୱେଡ଼ା ମାଜ୍ଗା ଆନାତ୍ ଆରେ ଲେଞ୍ଜ୍ ଅଜଡ଼୍ ଆଉତ୍,
25ଆରେ ହୁକାଙ୍ଗ୍ ବାଦାଡ଼୍ତାଙ୍ଗ୍ ତାରେନ୍ ଆର୍ଦିନିକ୍ ଆରେ ବାଦାଡ଼୍ନିବାହା ସାକ୍ତି#୧୩:୨୫ ବାଦାଡ଼୍ନିବାହା ସାକ୍ତି ଇଦାଙ୍ଗ୍ କରାପ୍ ସାକ୍ତିତିଙ୍ଗ୍ ବୁଜାଇ କିନାତା ହୁଦାଙ୍ଗ୍ ବାଗ୍-ବାଗ୍ ଆନାତ୍।
26ହେପାଦ୍ନା ମାନାୟାର୍ ନାଙ୍ଗେଙ୍ଗ୍, ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା, ବାଦାଡ଼୍ ଲାହାଙ୍ଗ୍ ପୁର୍ତିତାକେ ୱାନାକା ହୁଡ଼୍ନାଦେର୍। ହେୱାନ୍ ନା ଗାଜା ଶାକ୍ତି ଆରେ ଗୌରବଆଜି ୱାନାକା ହୁଡ଼୍ନାର୍। 27ଆନେଙ୍ଗ୍ ବାଚିକିତି ମାନାୟ୍ତିଙ୍ଗ୍ ରୁଣ୍ଡାୟ୍ କିଦେଙ୍ଗ୍ ନା ଦୁତ୍କୁକାଙ୍ଗ୍ ପକ୍ତାନାଙ୍ଗ୍, ହେୱାନ୍ ପୁର୍ତି ଆରେ ବାଦାଡ଼୍ ୱିସ୍ତିତାଙ୍ଗ୍ ହାନାର୍ ଆରେ ମାନାୟାରିଙ୍ଗ୍ ୱିଜୁ ନିପ୍ଣି କନାତାଙ୍ଗ୍ ରବେ ରୁଣ୍ଡାଇ କିନାର୍।
ତଗାମାର୍ତାଙ୍ଗ୍ ହିକ୍ଷା ପାୟାଆନାକା
(ମାଥି. ୨୪:୩୨-୩୫; ଲୁକ. ୨୧:୨୯-୩୩)
28ତଗାମାର୍ କାତାତାଙ୍ଗ୍ ଏପେଙ୍ଗ୍ ହିକ୍ଷା ଆହାଟ୍, ଏଚେପାଦ୍ନା ତା କେନ୍ଦାକାଙ୍ଗ୍ ଆକିଙ୍ଗ୍ ପିଲ୍କା ଆନିକ୍, ହେପାଦ୍ନା ଏପେଙ୍ଗ୍ ପୁନାଦେର୍ ଯେ ପଗୁଣ୍ ଲେଞ୍ଜ୍ ଏକିୱାତାତେ। 29ହେଲେକେ ଏପେଙ୍ଗ୍ ପା ଇ ୱିଜୁଗଟ୍ନା ହୁଡ଼୍ନାଦେର୍, ହେପାଦ୍ନା ଏପେଙ୍ଗ୍ ପୁନାଦେର୍ ଯେ ଯୁଗ୍ଶେସ୍ ଏକିୱାତାତେ। 30ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ‘ଇ ଯୁଗ୍ନି କେତେକ୍ ମାନାୟ୍ ହେ ଗଟ୍ନା ଗଟାଆୱିହିଙ୍ଗ୍ ଜିବୁନ୍ ମାନ୍ଗାନାର୍। 31ବାଦାଡ଼୍ ଆରେ ପୁର୍ତି ବୁଡାଆନାତ୍ ହିନା, ମାତର୍ ନା କାତା ଅଲପ୍ପା ବୁଡା ଆଉତ୍।’
ଯୀଶୁ ୱାନିଦିନ୍ ଇନେର୍ ପା ପୁନୁର୍
(ମାଥି. ୨୪:୩୬-୪୪)
32ମାତର୍ ହେ ଦିନ୍ ତିପ୍କୁ ୱାନାତ୍, ହେଦାଙ୍ଗ୍ ସରଗ୍ତାଙ୍ଗ୍ ୱାତି ଈଶ୍ୱର ମେହି କି ସରଗ୍ନି ଦୁତ୍କୁ ପା ଇ ବେଣ୍ତିଙ୍ଗ୍ ପୁନୁର୍, ମାତର୍ ଈଶ୍ୱର ନେ ପୁନାନ୍। 33ମାତର୍ ଏପେଙ୍ଗ୍ ପାର୍ତାନାତାକେ ଜାଗ୍ରତ୍ ଆଜି କାସିମାନାଟ୍! ଇନେସ୍କି ହେ ଦିନ୍ ଇନାୱେଡ଼ାଙ୍ଗ୍ ଇ ଗଟ୍ନା ଏକିୱାନାତ୍ ହେଦାଙ୍ଗ୍ ଏପେଙ୍ଗ୍ ପୁନୁଦେର୍।
34ଯୀଶୁ ତା ଚେଲାହିରିଙ୍ଗ୍ କୁକ୍ଚି ୱେଚ୍ଚାନ୍, ‘ୱାଡ ର କାତା ୱେଚ୍ଚାନାଙ୍ଗ୍, ର ମାନାୟ୍ ତା ଇଲ୍ ପିସ୍ତି ବେସି ଦେହା ହାଚାନ୍। ହେୱାନ୍ ହାନିହିଙ୍ଗ୍ ତା ହଲିଆରିଙ୍ଗ୍ ଇମ୍ଣି କାମାୟ୍ ହିତାନ୍ନା ହେୱାନ୍ କିନାକା ମାନାତ୍, ଆରେ ତା ଜାଗୁୱାଡ଼ିଙ୍ଗ୍ ୱେଚ୍ନାନ୍ ଆରେ ହାନାନ୍, ନା ୱାନାକା ଏପେଙ୍ଗ୍ ଜାଗ୍ରତ୍ ଆଜି କାସିମାନାଟ୍।’ 35ଆରେ ଯୀଶୁ ତା ଚେଲାହିରିଙ୍ଗ୍ କୁକ୍ଚି ଆରେରଗ ୱାଚ୍ଚାନ୍, ‘ଇଲ୍ ମାଲିକ୍ ଇନାୱେଡ଼ାଙ୍ଗ୍ ୱାନାନ୍ ହେଦାଙ୍ଗ୍ ଜାଣା ଆକାୟ୍। ହେୱାନ୍ ମିକାହାରେସ୍ ୱାନାନ୍, କି ମାଦିମାଦାନାଣା ୱାନାନ୍, କି ୱେଡ଼ାହତ୍ନିହିଙ୍ଗ୍ ୱାନାନ୍ ଏପେଙ୍ଗ୍ ପୁନୁଦେର୍। 36ଯଦି ହେୱାନ୍ ହେଦାପ୍ରେ ୱାଜି ଏକାନାନ୍, ମିଙ୍ଗେଙ୍ଗ୍ ହୁନ୍ଞ୍ଚି ଲଗାଙ୍ଗ୍ ଇନେସ୍କି ମିଙ୍ଗେଙ୍ଗ୍ ହୁଡ଼୍ଦୁନ୍, ଇଦାଙ୍ଗ୍ କାଜିଙ୍ଗ୍ ତା ୱାନି ହାଜ୍ଦିଙ୍ଗ୍ କାସିମାନାଟ୍। 37ଆନେଙ୍ଗ୍ ମିଙ୍ଗେଙ୍ଗ୍ ଇନାକା ୱେଚ୍ଚାନାଙ୍ଗା, ହେଦାଙ୍ଗ୍ ଜେକନିକାରିଙ୍ଗ୍ ପା ୱେଚ୍ଚାନାଙ୍ଗା, ଜାଗ୍ରତ୍ ଆଜି ୱିଜୁଦିନ୍ କାସିମାନାଟ୍।’ ”
Currently Selected:
ମାର୍କ 13: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
