लुका 10

सत्तर चेलाक मुकलनो

1इनी वातोन ओवतेन प्रभू सत्तर ओवी माणसे नेवाळ्यू, एने जीना-जीना सोहोरमा एने जागे चू जानेवावू होतु, चा तीनुक दुय-दुय कोरीन तेरे ओगोव मूकल्यु. 2चू तीनु काजे कोयू, “पाकलो खेतोमा घोन सोवटो छे, बाकीन दाहाळक्या थुलाक छे; इनान कोरता खेतोन मालिक काजे विनता कोरु कि चू आपनो धान काटणे दाहाळक्या मुकली देये.” 3जावू; देखू, मे तुमु काजे गाडरान तोसा कुल्यान इचमा मुकोलणे बाज रोयू. 4इनान कोरता नी थोयलू, नी झुवनो, नी खासळा लेजू; एने नि वाटे कुदा काजे नमस्कार कोरजू. 5जिना कुदान घोरमा जाय, पेहेले कोयू, “इना घोरोन भोलो होये.” 6अगर चा कुदू भोलायीन लायक होसे, ती तुमरी भोलाई तिंदरे पोर रोयसे, नीती तुमरेनचा पोछि आवसे. 7तीना घोरोमा रोयू, एने जो काहीन तिंदरे जुव गोथो जोळे चोत खावू-पिवू, काहाकि दाहाळक्या काजे तिंदरी दाहाळकी जोळनु जुवे; घोरे-घोर झुन फिरता. 8जीना सोहोरोमा जासू, एने चांवावा माणसे तुमरु स्वीकार कोरसे एने जो तुमरे सामने आपायसे चोत खावू. 9चा वावा मांदलानु काजे वारू कोरु एने तीनु काजे कोयू, “परमेश्वरोन राज तुमरे साते आव लागलो छे.” 10बाकीन जीना सोहोरोमा जासू, एने चा वावा माणसे तुमरू स्वीकार नि कोरे, ती तिंदरा हाटोमा जायीन कोयू, 11तुमरा सोहोरोन छोयळू बी, जू आमरे पाये लाग रोयू, आमु तुमरे सामने झोटकी देजे; ते बी यो जान लेयू कि परमेश्वरोन राज तुमरे साते आव लागलो छे. 12मे तुमु काजे कोय कि तिने दाहळे तीना सोहोरोन हालोत गोथी सदोमोन हालोत जादा वेठनेन लायोक होयसे.

मन नि फिरावने वावा पोर हाय

(मत्ती 11:20-24)

13“हाय खुराजीन हाय बेथसदा जे मोटला कामे तुमरेमा कोरला, अगर चे सोर एने सिदोनमा कोरायता ती गोनटो पांगरीन एने रुखळामा बोसीन चे कोत्यारून मोन फिराव लेता.” 14बाकीन नियावोन दाहळे तुमरी हालोत गोथी सोर एने सिदोनोन हालोत जादा वेठनेन लायोक होसे. 15एने हे कफर्णहुम, काय तू सोरगे तोक उचू कोराय जासे? तुते अधोलोक तोक नेचू जायीस. 16“जू तुमरी सोमवतलु, चू मारी सोमवतलु; एने जू तुमु काजे नेचू सोमोजतलु, चू मेसे काजे नेचू सोमोजतलु; एने जू मेसेक नेचू सोमोजतलु, चू मेसेक मुकोलने वावा काजे नेचू सोमोजतलु”.

सत्तर चेलान पोछा आवनो

17चे सत्तर चेला खुशी कोरता जायीन पोछा आव्या एने कोयने बाज गोया, “हे प्रभू, तारा नावोसी भुंडली आत्मा बी आमरा ताबामा छे”. 18येसु तीनु काजे कोयू, मे भुतडा काजे विजवीन तोसु सोरगोमा गोथू पोळतेलु देख रोयू होतु. 19देखू मे तुमु काजे घोळसा एने विछाकाजे छेंदीन एने दुष्मोनोन आखा ताकत पोर होक आपलु छे; एने कानली चीजोसी तुमरो काहीन नुकसान नि होये. 20ते बी इनापोरसी खुश मा होयू कि भुंडली आत्मा तुमरा ताबामा छे, बाकीन इनापोरसी खुश होयू कि तुमरो नाव सोरगोमा लिखलो छे.

पुऱ्यान लारे बासोक देखाळने

(मत्ती 11:25-27; 13:16-17)

21तिने टेमे चू पवित्र आत्मामा भोरायीन खुशीसी भोराय गोयू, एने कोयू, “हे बास, सोरगोन एने कोवीन प्रभू, मे तारो धन्यवाद कोरो कि तू इनी वातो काजे ग्यानवावा एने सोमोजदारी वावासी डूकाळीन मेक्यू, एने पुऱ्या पोर प्रगट कोऱ्यु होव, हे बास, काहाकि तुसेक योत वारलो लाग्यो.” 22मारू बास मेसेक आखो काहीन आप देदलु छे; एने कुदु नि जानतलो कि पुऱ्यु कुन छे निस्तू बास, एने बास कुन छे ज्योबी कुदू नी जानतला निसतो पुऱ्यान तोरोफसी चू जीना पोर पुऱ्यु तीनाक प्रकट कोरतेलू.

23तेत्यार चेला भूनी वोवीन एखला होता ती कोयू, “सोयावा छे चे डूवा, जे ये वाते जे तुमु देख रोया देखतेला छे, 24काहाकि मे तुमु काजे कोयो कि घोन सोवटा भविष्य कोरता एने राजा इंदरी मोर्जी होती कि ये वाते तुमु देख रोया देखनेंन कोरला बाकीन नि देख्या, एने जे वाते तुमु सोमवने बाज रोया चे वाते सोमवनेन कोरला बाकीन नी सोमव्या.”

वारली सामरीन दाखलू

25एने देखू, एक शास्त्रध्यापक उठ्यू एने यो कोयीन तेरी परीक्षा कोरणे बाज गोयू, “हे गुरु, ओमोर जीवनोन वारीस होयनेन कोरता मे काय कोरो?” 26चू तीना काजे कोयू, “बायबोल शास्त्रमा काय लिखलो छे? तू कोसू भोनतेलू?” 27चू जोवाब आप्यू, “तू प्रभू आपना परमेश्वर पोर आपना आखा मोनोसी एने आपना आखा जीवोसी एने आपनी आखी ताकतसी एने आपना आखा ग्यानोसी मोंग कोर; एने आपना साते वावा काजे आपने सारको मोंग कोर.” 28चू तीना काजे कोयू, “तू सही जोवाब आप्यू, ओसू कोर ती तू जीवतु रोयीस.” 29बाकीन चू आपना खुदो काजे धोरमी ठेरावणेन मोर्जी येसु काजे पुछु, “ती मारे साते वावू कुन छे?” 30येसु जोवाब आप्यू, “एक माणूस यरुशलेममा गोथू यरीहो जातू होतु ती चुटा तेरा छिंदरा निकाव लेदा, एने ठूकीन आदु मोरतू छुळीन जात रोया. 31एने ओसो होयो कि तीनेत वाटे एक पुजारू जाणे बाज रोयू होतु, बाकीन तीनाक देखीन टोवीन जात रोयू. 32इना रितीसी एक लेवी तीना जागा पोर आव्यु, चू बी तीनाक देखीन टोवीन जात रोयू. 33बाकीन एक सामरी यात्री चा आव लाग्यू, एने तीनाक देखीन गिन आवी. 34चू तीनानचा आवीन तेरा घावोपोर तेल एने आंगुरोन रोस लागाळीन पाटा बांद्यू, एने आपना सवार पोर चोळावीन धोरोम शाळामा लीगोयू एने तेरी सेवा कोऱ्यु. 35दिसरे दाहळे चू दुय दिनार निकावीन धोरोम शाळान मालिक काजे आप्यू, एने कोयू, ‘एरी चाकरी कोरतू रोयजी, एने जो काहीन तारो एने लागसे, चो मे पोछु आवीन तुसेक आपदिस.’ 36हीमी तारी सोमोजमा जू चूटामा घेराय गोयलु होतु, इनू तीनु जोनामा गोथू तेरु साते वावू कून बोन्यू? 37चू कोयू, ‘चू जीना पोर चू दया कोऱ्यु’ येसु तीनाक कोयू, ‘जा, तु बी ओसुत कोर.’”

मार्था एने मरीयम

38जेतार चे जाता होता ती चू एक गावमा गोयू, एने मार्था नावोन एक बाय तीनाक आपने घोर बुलावी. 39मरीया नावोन तेरी एक बहोनिश होती ची प्रभून पायोंचा बोसीन तेरो वचन सोमवती होती. 40बाकीन मार्था सेवा कोरती-कोरती घाबराय गोयी एने तेरेनचा आवीन कोयने बाज गोयी, “हे प्रभू काय तुसेक काहीन चींता नि होय कि मारी बहोनिश मेसेक सेवा कोरनेन कोरता एखली काजे मेक देदली छे? इनान कोरता तिनी काजे कोय कि मारी मदत कोरे.” 41प्रभू तिनी काजे जोवाब आप्यू, “मार्था, हे मार्था; तू घोणा वातोन कोरता चिंता कोरतेली एने घाबराय तेली. 42बाकीन एक वात जोरुरी छे, एने तिना वारला वाटाकाजे मरीया नेवाळ लेदली छे जो तिनी जुव गोथो हापकाये नी.”

Currently Selected:

लुका 10: BFBNT

Highlight

Copy