लुका 17

चेतावनी

(मत्ती 18:6-7,21-22; मरकुस 9:42)

1ओवते येसु आपना चेला काजे कोयू, “होय नि सोकतो कि ठूकर नि लागे, बाकीन हाय, तीना माणसो पोर जीनान वोजेसी आवतेली.” 2जे इना नाना मायला काहना एक काजे ठूकर खावाळे, तिंदरेन कोरीन यो वारू होतो कि घट्टीन पुळ तेरा गोवामा तीनाक बांधाय जातो, एने चू दोरीयामा नाखाय जातू. 3हुशारीमा रोयू; ओगर तारू भाश पाप कोरे ती तीनाक सोमजाड, एने ओगर मोन फिरावे ती माफ कोर. 4ओगर एक दाहळामा चू सात कावार तारू पाप एने सात कावार तारेनचा आवीन कोये “मे पश्चताप कोरने बाज रोयू ती तीनाक माफ कोर.”

तुमरू भुरसू कोतरू मोटू छे?

5जेतार प्रेषितोन प्रभू काजे कोया, “आमरू भुरसू बोढाव.” 6प्रभू कोयू, “ओगर तुमु काजे राईन दाना बोराबोर बी भुरसू होतु, ती प्रभू इना झाड काजे कोयतू कि जोळोमा गोथू उखवीन दोरीयामा उग जा, ती चू तुमरी मान लेतू.”

मोटलु सेवक

7“तुमरेमा ओसू कून छे, जेरु पावोर होव जुपतेलू नीती गाडरा चारतू होसे, एने जेतार चू खेतोम गोथू आवे, ती तीनाक कोये, मामार आवीन खाणो खाणे बोस, 8एने यो नि कोये, मारे जुगू खाणे बोनाव, एने जेतार तोक मे खायीस-पिस तेत्यार तोक कोळ्यो बांधीन मारी चाकरी कोर; इनान ओवतेन तू बी खाय पी लेजी, 9काय चू तिना पावोरोन आभार माणसे कि चू चेत कामे कोऱ्यु जेरी आग्या आपायली होती.” 10इना रितीसी तुमु बी जेतार जे आखा कामे पुरा कोरले जिनान आग्या तुमुक आपली होती ती कोयू “आमु रिकामा पावोर छे; जो आमुक कोरनो जुवतो होतो आमु निस्ता चे ओतरा कोरला छे.”

कुळाविन आभार

11ओसो नि होये कि चू यरुशलेममा जाणे बाज रोयू ती सामरिया एने गलीलोन इचमा माईन जाने जाणे बाज रोयू होतु. 12कहाना एक गावोमा जाणेन टेमे तीनाक दोस कुळावा भेटाया. 13चे नांबेत उभरोहीण मोटेत आवाजोमा कोया, “हे येसु, हे मालिक, आमरेपोर दया कोर.” 14चू तीनु काजे देखीन कोयु, “जावू एने आपना खुदो काजे पुजारा काजे देखाळू” एने जाता जाताच चे चुखा होय गोया. 15तेत्यार तिंदरेमा गोथू एक यो देखीन कि मे चुखू होय गोयलु छे, मोटेत आवाजमा परमेश्वरोन महिमा कोरतू जाईन पोछु आव्यु;. 16एने येसुन पायो पोर उबळू पोळीन तेरो धन्यवाद कोरने बाज गोयू, एने चू सामरी होतु. 17इनापोरसी येसु कोयू, “काय दोस जना चुखा नि होया, ती ओवते चे नव जना का छे? 18काय इना परदेशी काजे छुळीन कुदु ओवी नि निकव्यू यु परमेश्वरोन महिमा कोरतू.” 19तेत्यार चू तीनु काजे कोयू, “उठीन जात रोय तारू भुरसू तुसेक वारू कोरलु छे.”

परमेश्वरोन राजोन आवनो

(मत्ती 24:23-28,37-41)

20जेतार फरुशी तीनाक पुछा कि परमेश्वरोन राज कोत्यार आवसे, ती येसु तीनाक जोवाब आप्यू “दोवोन राज देखनेन रुपमा नि आवतेलु. 21एने माणसे यो नि कोये, ‘देखू, परमेश्वरोन राज या छे, नीती वा छे काहाकि देखू, परमेश्वरोन राज तुमरा इचमा छे.’” 22एने येसु चेला काजे कोयू चे दाहळा आवसे, जीनमा तुमु माणसोन पुऱ्यु दाहळा गोथू एक दाहळा काजे देखनेन मोर्जी कोरसू, एने देख नि सोके. 23माणसे तुमु काजे कोयसे, “देखू, वा छे, नि ती या छे,” बाकीन तुमु जाता झुनी एने नि तिंदरे पोछोव जाता. 24काहाकि जोसी सोरगोमा गोथी विजवी इना एक धोळे गोथी रीसवायीन सोरग दिसरे धोळे तोक चमकतेली तोसोच माणसोन पुऱ्यु बी आवता दाहळामा देखायसे. 25बाकीन पेहले जोरुरी छे कि चू घोन दुख उठावे, एने इनी कोवीन माणसे तिनाक भुंडलू ठेरावे. 26जोसा नुहान दाहळामा होयलो होतो, तोसुच माणसोन पुऱ्यान दाहळामा बी होयसे. 27जिने दाहळे गोथू नुहा ढोंड्या पोर चोळ्यु, तिने दाहळे तोक माणसे खाता-पिता होता, एने तिंदरेमा वियाव होयता होता तेत्यार पाणी आवीन तीनु आखाक खोतम कोरु. 28एने जोसो लुतोन दाहळामा होयलो होतो कि माणसे खाय पियीन लेनो-देणो कोरता, झाडे चूपता एने घोरे बांधता होता; 29बाकीन जिने दाहळे लुत सदोममा गोथू निकव्यू, तिने दाहळे आगठो एने गधंक सोरगोमा गोथो पोळ्यो एने आखाक खोतम कोर देदो. 30माणसोन पुऱ्यान देखायनेन दाहळे बी ओसोच होयसे.

31तिने दाहळे जे छोत पोर होसे एने तेरो सामान घोरमा होसे, चू तीनाक लेणे कोरीन भूयमा नि उतेरनो; एने तोसोच जे खेतमा छे पोछा नि आवनो. 32लुतोन लाडीन फोम राखू. 33जु कूदू आपनु जीव वाचाडनेन कोरसे चू तीनाक खुव देसे, एने जु कुदु खुवसे चू जीवतु रोयसे. 34मे तुमु काजे कोयो, तिने राती दुय माणसे खाटला पोर होसे; एक चुटाय जासे एने दिसराक छुळ देसे. 35दुय बायरा एखठा दोवता होसे, एक चुटाय जासे एने दिसरीक छुळ देसे. 36(दुय जोना खेतोमा होसे, एक चुटाय जासे एने एक दिसराक छुळ देसे). 37यो सोमवीन चे तिनाक पुछा, “हे प्रभू यो का होयसे?” चू तीनु काजे कोयू, “जा धोळ छे, चा घुवळा एखठा होयसे.”

Currently Selected:

लुका 17: BFBNT

Highlight

Copy