मरकुस 1

बाप्तिस्मा आपने वावु योहानोन संदेश

(मत्ती 3:1-12; लुका 3:1-9,15-17; योहान 1:19-28)

1परमेश्वरोन पुऱ्यु येसु मसिहन बारामा वारली खोबरोन प्रचारोन सुरवात. 2जोसो यशयाह भविष्य कोरतान किताबमा लिखलो छे

“देख, मे मारा दुतो काजे तारे ओगोव मुकलो, चू तारे जुगू वाट सुधारसे

3बोयळामा एक आयळने वावान आवाज सोमवायने बाजीरोय कि,

प्रभून वाट तीयार कोरु, एने तेरी

वाट सुदी कोरु.”

4एने योहान आयु, चू बोयळामा बाप्तिस्मा आपे, एने पापोन माफीन कोरता मोन फिरावनेन बाप्तिस्मान प्रचार कोरतू होतु. 5आखा यहुदिया देसोन, एने यरुशलेमोन आखा रोयने वावा निकवीन तेरेनचा गोया, एने तिंदरा पापो काजे मानीन यरदन नोंदीमा तेरे जुव बाप्तिस्मा लेदा. 6योहान उटळान चामळान छिंदरा पेहेरलु एने खुदोन कोड्यामा चामळान पोटटू बांदलू राखतू होतु, एने टीड्या एने बोयळा मायला माहावे खातू होतु. 7एने यु प्रचार कोरतू होतु, “मारे पोछोव चू आवने वावु छे, जू मारे गोथू ताकत वावू छे” मारी लायकी नि होय कि मे ढोंगु वोवीन तेरा खासळान बोंद छुळो. 8मे ते तुमु काजे पाणीसी बाप्तिस्मा आपलु छे बाकीन “चू तुमु काजे पवित्र आत्मान बाप्तिस्मा आपसे.”

येसुन बाप्तिस्मा

(मत्ती 3:13-17; लुका 3:21-22)

9तीनु दाहळामा येसु गलील देसोन नासरेथ गावमा गोथू आवीन, यरदन नदीमा योहानोसी बाप्तिस्मा लेदू. 10एने जेतार चू पाणीमा गोथू निकवीन उपोर आव्यु, ती तेत्यारूत चू सोरग उगेळतलो एने आत्मा काजे पेरवा सारको तेरेपोर उतरतेलु देख्यू. 11एने ओसी सोरगोन बुल होयी, “तू मारू मोंगावू पुऱ्यु छे, तारेसी मे खुश छे.”

येसुन पारख

(मत्ती 4:1-11; लुका 4:1-13)

12तेत्यार आत्मा तेत्यारूत येसु काजे बोयळा भूनी मूकल्यु. 13बोयळामा चावीस दाहळा तोक भुतडू तेरी परीक्षा कोऱ्यु; एने चू बोयळा मायला जोनावर साते रोयू, एने सोरग दूत तेरी सेवा कोरता रोया.

गलीलमा येसुन प्रचार

(मत्ती 4:12-17; लुका 4:14-15)

14योहान काजे धोरावनेन ओवतेन येसु गलीलमा आवीन परमेश्वरोन राजोन वारली खोबरोन प्रचार कोऱ्यु, 15एने कोयू, “टेम पुरी होय गोयली छे, एने परमेश्वरोन राज साते आव गोयलो छे; मोन फिरावू एने वारली खोबर पोर भुरसू कोरू.”

चार माछल्यान बुलावनो

(मत्ती 13:10-17; लुका 8:9-10)

16गलीलोन दरियान धोळे-धोळे चालतू जाईन येसु शिमोन एने तेरु भाश अन्द्रियास इनू काजे दोरीयामा जावे नाकतेला देख्यू; काहाकि चे माछ्ल्या होता. 17एने येसु तीनु काजे कोयू, “मारे पोछोव आवू; मे तुमु काजे माणसे धोरणे वावा बोनावीस.” 18चे तेत्यारुत जाव्या छुळीन तेरे पोछोव चाल पोळ्या. 19थुलूक ओगू जायीन, चू जब्दिन पुऱ्यु याकुब, एने तेरु भाश योहान काजे, ढोंड्यामा जाव्या सुधारतेला देख्यू. 20चू तेत्यारुत तीनु काजे बुलाव्यू; एने चे तिंदरा बास जब्दि काजे दाहळक्या साते ढोंड्यामा छुळीन, येसु पोछोव चाल पोळ्या.

भुंडली आत्मा लागला माणसोक वारू कोरनो

21तेत्यार चे कफर्णहुममा आव्या, एने येसु तेत्यारुत शब्बाथोन दाहळे प्रार्थना घोरमा जायीन भोनावने बाज गोयू. 22एने माणसे तेरो भोनावनेसी वाहराय गोया; काहाकि चू शास्त्री सारको नी, बाकीन अधिकारी सारकू भोनावतू होतु. 23तीने टेमे, तिंदरा प्रार्थना घोरोमा एक माणूस होतु, जीनामा एक भुंडली आत्मा होती. 24चू आयळीन कोयू, हे येसु नासरेथकर, आमुक तारेसी काय काम? “काय तू आमुक नाश कोरने आवलु छे? मे तुसेक जानतलु, तू कुन छे परमेश्वरोन चुखलु जन.” 25येसु तीना काजे धोमकावीन कोयू, हुगु रोय, एने हिनामा गोथू निकवी जा. 26तेत्यार भुंडली आत्मा तीनाक पिव्वीन, एने मोटेत ओवाजसी आयळीन तीनामा गोथी निकवी गोयी. 27इनापोरसी आखा माणसे वाहरायता जायीन एक दिसरा काजे पुछने बाज गोया, “जी काय वात छे? यो ते काहनो नोवलो भोनावनेसी छे! चू ते होकसी भुंडली आत्मा काजे बी आग्या आपतलु, एने चे तेरी आग्या मानतेला.” 28एने तेरो नाव तेत्यारुत जे गलीलोन जिल्लान आस पासोन आखा देसमा फेल गोयो.

मांदला काजे वारू कोरनो

(मत्ती 8:14-17; लुका 4:38-41)

29एने चू तेत्यारुत प्रार्थना घोरमा गोथू निकवीन, याकुब एने योहानोन साते शिमोन एने अन्द्रियास घोर आव्या. 30शिमोनोन सासू काजे सेरी चोळ रोयलो होतो, एने चे मामार तेरे बारामा तीना काजे कोया. 31तेत्यार येसु साते जायीन तेरु हात धोरीन तिनी काजे उठाळ्यू; एने तेरो सेरी उतरी गोयो, एने ची तेरी सेवा कोरणे बाज गोयी. 32सांतली टेमे जेतार सूर्य डूब गोयू ती माणसे आखा बिमारी वावा काजे एने तीनु काजे, जिंदरेमा भुंडली आत्मा होती, तेरेनचा लाव्या. 33एने आखो गाव झोपला पोर एखठा होया. 34चू घोन सोवटा काजे जे भाती भातीन बिमारीसी दुखी होता, वारू कोऱ्यु, घोन सोवटा भुंडली आत्मा काजे निकाव्यू, एने भुंडली आत्मा काजे बुलने नी देदू, काहाकि ची तीनाक उवखती होती.

एखलामा येसुन प्रार्थना

(मत्ती 8:14-17; लुका 4:38-41)

35वेगुत सोंदारे सूर्य उगनेन घोनो पेहेल, चू उठीन निकव्यू, एने एक बोयळान जागे गोयू एने चा प्रार्थना कोरणे बाज गोयू. 36तेत्यार शिमोन एने तेरा साती तीना काजे हेरने गोया. 37जेतार चू जोळ्यू ती तीना काजे कोया, “आखा माणसे तुसे काजे हेरने बाज रोया”. 38चू तीनु काजे कोयू, “आवू; आमु एने कानली आस पासोन वस्तीमा जाजे, कि मे चा बी प्रचार कोरो, काहाकि मे इनान कोरता निकवलू छे”. 39आखरी चू आखा गलीलमा तिंदरा प्रार्थना घोरोमा जायीन प्रचार कोरतू एने भुंडली आत्मा काजे निकावतू रोयू.

कुळावा काजे वारू कोरनो

(मत्ती 8:1-4; लुका 5:12-16)

40एक कुळावू तेरेनचा आव्यु, तीना काजे विनता कोऱ्यु, एने तेरे ओगोव माडा टेकविन तीना काजे कोयू, अगर तारी मोर्जी होय ती मेसेक चुखू कोर सोकतलु. 41चू तीना पोर गिन कोरीन हात ओगु कोऱ्यु, एने तीना काजे छिमीन कोयू, “मारी मोर्जी छे तू चुखू होय जा.” 42एने तेत्यारुत तेरो कुळावान बिमारी जाने बाज गोयी, एने चू चुखू होय गोयू. 43तेत्यार चू तीना काजे जोताळीन तेत्यारुत मुकली देदू, 44एने तीना काजे कोयू, “देख, कुदा काजे काहीन झुन कोयतू, बाकीन जायीन खुदो काजे पुजारू काजे देखाळ, एने तारो चुखो होयनेन बारामा जो काय मुसा ठेरावलू छे तीनाक भेट चोळाव कि तीना पोर गोवायी होयनो जुवे.” 45बाकीन चू बारथे जायीन इनी वातो काजे जादा प्रचार कोरणे एने न्या तोक फेलावने बाज गोयू कि येसु एने उजोनतु सोहोरोमा नी जाय सोक्यू, बाकीन बारथे बोयळान जागामा रोयू; एने चारू धोळे गोथा माणसे तेरेनचा आवता रोया.

Currently Selected:

मरकुस 1: BFBNT

Highlight

Copy