मरकुस 3
3
सुकला हात वावान वारू होयनो
(मत्ती 12:9-14; लुका 6:6-11)
1एने चू ओवी यहुदिन प्रार्थना घोरमा गोयू एने चा एक माणूस होतु तेरू हात सुक गोयलु होतु, 2एने चे तीना पोर गुणू लागाळनेन कोरता तेरे पोर डाव धोर रोया होता कि देखता, यु शब्बाथोन दाहळे तीना काजे वारू कोरतेलु कि नी. 3येसु सुकाला हातोवावा माणसो काजे कोयू, “इचमा उबरोयजा.” 4एने तीनु काजे कोयू, “काय शब्बाथोन दाहळे वारू कोरनो वारू छे कि बुरो कोरनो, जीवो काजे वाचाडनो कि मारनो?” बाकीन चे हुगा रोया. 5एने चू तिंदरा काठला मोनोसी दुखी होयीन, तीनु काजे रीसवायीन चारू धोळे देख्यू, एने तीना माणसो काजे कोयू “तारू हात ओगु कोर” चू ओगु कोऱ्यु, एने तेरू हात वारू होय गोयू. 6तेत्यार फरुशी बारथे जायीन तेत्यारुत हेरोदीया साते तेरे खिलापमा वात कोरणे बाज गोया कि इना काजे कोसा सारजे.
येसुन पोछोव गोरदीन आवनो
7एने येसु आपना चेला पुठी दरिया भूनी जात रोयू एने गलीलमा गोथी एक मोटीत गोरदी तेरे पोछोव आवी;. 8एने यहुदिया, एने यरुशलेम सोहोरोम, एने इदोम, एने यरदनोन पोल धोळे, एने सोर एने सिदोनोन आस पास गोथी एक मोटीत गोरदी यो सोमवीन कि येसु कोसू चमत्कारी काम कोरतेलू, तेरेनचा आव्या. 9एने येसु तेरा चेला काजे कोयू, “गोरदीन वोजेसी एक नानलो ढोंड्यो मार जुगू तीयार राखू काहाकि ये मेसेक डाबी नी सोके.” 10काहाकि येसु घोणा सोवटा काजे वारू कोरलु होतु, तेरेन कोरता जोतरा माणसे मांदवायला होता, येसुक हात लागाळने कोरीन तीना पोर हिट पोळता होता. 11भुंडली आत्मा बी, जेतार तीनाक देखतेली, ती तेरे ओगोव हिट पोळती होती, एने आयळीन कोयती होती कि तू परमेश्वरोन पुऱ्यु छे. 12एने चू तीनु काजे घोनु कोयू कि मेसे काजे सामने लावता झुनी.
येसुन लारे बारा चेलाक नेवाळनो
(मत्ती 10:1-4; लुका 6:12-16)
13ओवतेन येसु बोयळा पोर गोयू, एने जीनाक चे जुवता होता तीनु काजे आपने साते बुलाव्यू; एने चे तेरे साते आव्या. 14तेत्यार चू बारा माणसो काजे नेम देदू कि चे तेरे साते-साते रोये, एने चू तीना काजे मूकल्यु कि चे प्रचार कोरे, 15एने भुंडली आत्मा काजे निकावनेन होक राखे. 16एने चे ये छे शिमोन जेरो नाव चू पतरस मेक्यू, 17एने जब्दिन पुऱ्यु याकुब एने याकुबोन भाश योहान, जेरो नाव चू बुअनरगिस मतलब “आयळनेन पुऱ्यु” मेक्यू, 18एने अन्द्रियास, एने फिलीप, एने बरतुल्मै एने मत्ती, एने थोमा, एने हलफईन पुऱ्यु याकुब, एने तद्दै, एने शिमोन कनानी, 19एने यहुदा इस्कारीयोत जू तीनाक धोराय बी देदलु.
येसु एने बालजबलुन
(मत्ती 12:22-32; लुका 11:14-23)
20एने तेत्यार येसु घोरमा आव्यु एने ओसी गोरदी एखठी होय गोयी कि चे रूटा बी नी खाय सोक्या. 21जेतार तेरा परिवार यो सोमव्या, ती चे तिना काजे धोरणे कोरीन निकव्या; काहाकि चे कोयता होता कि तेरो मोन ठीकान नि होय. 22एने शास्त्री बी जे यरुशलेममा गोथा आवला होता, चे कोयता होता, हिनामा भुतडू छे, एने चू भुतडान सरदारोन साहायतासी भुंडली आत्मा काजे नीकावतेलु. 23एने इनान कोरता चू तीनु काजे साते बुलावीन तीनु काजे दाखलासी कोयने बाज गोयू, “भुतडू कोसू भुतडा काजे निकाव सोकतेलु? 24एने जेतार काहना राज्यामा फुट पोळती, तेत्यार चो राज कोसो सुदो रोय सोकतलो? 25एने जेतार कुदान घोरमा फुट पोळती, ती चो घोर कोसो सुदो रोय सोकसे? 26एने इनान कोरता जेतार भुतडू खुदपोरुत खिलाप कोरीन खुदपोरुत फुट पाळे, ती चु कोसू बोनीन रोय सोकतेलू? तेरू ते नाश होय जातेलू.
27“बाकीन काहनु माणूस कुदा ताकत वावान घोरमा भोरायीन तेरू माल नी लुट सोकतेलू, जेतार तोक कि चू पेहेले तिना ताकत वावा काजे बांध नी लेये; एने तेत्यार तेरा घोरो काजे लुट लेसे.” 28“मे तुमु काजे छाचलीन कोयो कि माणसोन आखा पाप एने बुराई जे चे कोरतेला, माफ कोराय जासे, 29बाकीन जू कुदू पवित्र आत्मान बुराई कोरे, चे कोबी बी माफ नि कोराये बाकीन चे सदा ओमोरकाई पापोन गुणावा ठेरायतला.” 30काहाकि चे यो कोयता होता कि इनामा भुंडली आत्मा छे.
येसुन आया एने भाश
(मत्ती 12:46-50; लुका 8:19-21)
31एने तेत्यार येसुन आया एने तेरा भाश आव्या, एने बारथे उबरोयीन तिना काजे बुलावने कोरीन मुकल्या. 32एने गोरदी तेरे आळी-छेळी बोसरोयली होती, एने चे तिना काजे कोया, “देख, तारी आया एने तारा भाश बहोनिश बारथे तुसेक हेरे.” 33येसु तीनु काजे जोवाब आप्यू, “मारी आया एने मारा भाश कून छे?” 34एने तीनुपोरसी जे तेरे आळी-धोळे बोस रोयला होता, नोजोर नाखीन कोयू, “देखू, मारी आश एने मारा भाश जे छे. 35काहाकि जू कुदू परमेश्वरोन मोर्जीसी चालतलु, चू मारू भाश एने बहोनिश एने आश छे.”
Currently Selected:
मरकुस 3: BFBNT
Highlight
Share
Copy
Want to have your highlights saved across all your devices? Sign up or sign in
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.
