यूहन्ना 11

लाजर चो मरना

1मरियम आउर हुनचो भईन मारथा चो गाँव बैतनिय्याह चो लाजर नाव गोटक माने बेमार ने रये। 2ऐ हुनी मरियम रली जोन परबु उपरे इतर डालुन हुनचो पाँयमन के आपलो केशमन ले पोछुन रये, ऐचीई भाई लाजर बेमार रये। 3आउर हुनचो भईनमन हुनके खबर पठाला, “हे परबु, दक, जेचो ले तुय मया संगाऊ आस, हुन बेमार आसे।” 4ऐ सुनुन भाती ईशु बल्लो, “ऐ बेमार मरना चो नुआय; मान्तर परबु चो महिमा चो काजे आय, कि हुनचो बाटले माहापुरू चो बेटा चो महिमा होओ।” 5ईशु मारथा आउर हुनचो भईन आउर लाजर ले मया संगाते रये। 6फेर बले जिदलदाय हुन सुनलो कि हुन बेमार आसे, तेबे जोन जगा ने हुन रलो, हुता दुई दिन आउर थेबुन रये। 7ऐचो पाचे हुन आपलो चेलामन ले बल्लो, “ईआ, आमी फेर यहूदिया ने जांवा।” 8चेलामन हुनके बल्ला, “हे रब्बी, ऐबे तो यहूदी तुचो उपरे पकना मारूक चाहते रवत, आउर काय तुय फेर बले हुताय जाय सीस?” 9ईशु जबाप दिलो, “काय दिन चो बारा घंटा नी होये? अगर कोनी दिन ने हिन्डो तो ठोकर नी खाये, कसनबल्लोने ऐ जगत चो उजर दकु आय। 10मान्तर अगर कोनी राती ने हिन्डे दे तो ठोकर खाऊ आय, कसनबल्लोने हुता उजर निआय।” 11हुन ऐ गोठमन बल्लो, आउर ऐचो पाचे हुनमन के बोलुक धरलो, “आमचो मीत लाजर सोऊन गेलो से, मान्तर मय हुनके उठाऊक जाए से।” 12तेबे चेलामन हुनके बल्ला, “हे परबु, अगर हुन सोहलो से, तो बाचे दे।” 13ईशु तो हुनचो मरना चो बारे ने बोलुन रये, मान्तर हुनमन समजला कि हुन झुमा ले सोऊन जातोर बारे ने बल्लो। 14तेबे ईशु हुनमन ले छुकछुका बोलुन दिलो, “लाजर मरून गेलो से; 15आउर मय तुमचो लागुन हरिक आंसे कि मय हुता नी रले जोन के तुमी बिश्वास करा। मान्तर अदायं ईआ, आमी हुनचो लगे जाऊँ।” 16तेबे थोमा जोन दिदुमुस बलाया जाऊ आय, आपलो संगवारी चेलामन ले बल्लो, “ईआ, आमी बले हुनचो संगे मरूक लाय जांवा।”

ईशु जीव उठतोर आउर जीवना

17हुता अमरतो के ईशु के ऐ मालुम होली कि लाजर के कबर ने संगालोर चार दिन होऊन चुकली से। 18बैतनिय्याह यरूशलेम चो लगे कोनी दुय मिल चो दूर ने रये। 19खुबे असन यहूदी मारथा आउर मरियम चो लगे हुनचो भाई चो मरना थाने शान्ति देतो काजे ऐऊ रओत। 20जिदलदाय मारथा ईशु चो ऐतोर खबर सुनली तेबे हुनचो ले भेट करूक गेली, मान्तर मरियम घरे बसुन रली। 21मारथा ईशु ले बल्ली, “हे परबु, अगर ऐथा होतीस, तो मोचो भाई केबीई नी मरतो। 22आउर ऐबे बले मय जाने से कि जोन काई तुय माहापुरू ले मांग से, माहापुरू तुके देयेदे।” 23ईशु हुनचो ले बल्लो, “तुचो भाई फेर जीव उठेदे।” 24मारथा हुनचो ले बल्ली, “मय जाने से कि सरासरी दिने जीव उठतोर समया ने हुन जीव उठेदे।” 25ईशु हुनचो बल्लो, “जीव उठतोर आउर जीवना मय ची आंय; जोन कोनी मोचो उपरे बिश्वास करू आत हुन अगर मरून बले जाये तेबले बले जियेदे, 26आउर जोन कोनी जीव आसे आउर मोचो उपरे बिश्वास करू आय, हुन केबीई नी मरे दे। काय तुय ये गोठ उपरे बिश्वास कर सीस?” 27हुन हुनचो ले बल्ली, “हव हे परबु, मय बिश्वास करें से कि माहापुरू चो बेटा मसीह जोन जगत ने ऐतो बिता रये, हुन तुय ची आस।”

लाजर चो जिआय जातोर

28ये बोलुन भाती हुन जाते गेली, आउर आपलो भईन मरियम के हाग देऊन भाती खुसखुसा बल्ली, “गुरू ऐथाय आसे आउर तुके हाग देये से।” 29ये सुनते ची हुन तुरते उठून भाती हुनचो लगे ईली। 30ईशु ऐबे गाँव ने नी अमरू रलो मान्तर हुनी जगा ने रलो जोन थाने मारथा हुनचो ले भेट करू रली। 31तेबे जोन यहूदी हुनचो संगे घर ने रवत आउर हुनके शान्ति देते रओत, ऐ दकुन भाती कि मरियम तुरते उठून भाती बाहरे गेली से ऐ समजला कि हुन कबर थाने गागुक लाय जाये से, तेबे हुनचो पाटे होला। 32जिदलदाय मरियम हुता अमरली जोन थाने ईशु रये, तेबे हुनके दकते ची हुनचो पाँय थाने घसरुन पड़ली आउर बल्ली, “हे परबु, अगर तुय ऐथा होतीस तो मोचो भाई नी मरतो।” 33जिदलदाय ईशु हुनके आउर हुन यहूदीमन के जोन हुनचो संगे ऐऊ रवत, गागतोर दकलो, तेबे आत्मा ने खुबे ची मुरमुरा आउर डाहल बिकाल होलो, 34आउर बल्लो, “तुमनमन हुनके काहां संगालासास?” हुनमन हुनचो ले बल्ला, “हे परबु, जाऊन भाती दकुन दक।” 35ईशु गागलो। 36तेबे यहूदी बोलुक मुरयाला, “दका, हुन हुनचो ले कितलो मया संगाते रलो।” 37मान्तर हुनमन ले कितलो बल्ला, “काय ऐ जोन कानामन चो आँईकमन के खोललो, ऐ बले नी करूक सकलो कि ऐ माने नी मरतो?” 38ईशु मन ने फेर खुबे मुरमुरा होऊन भाती कबर थाने ईलो। हुन गोटक करपन रली आउर गोटक पकना हुन थाने संगालोर रये। 39ईशु बल्लो, “पकना गुचाहा।” हुन मरलो बिता चो भईन मारथा हुनचो ले बोलुक मुरयाली, “हे परबु, हुन थानले ऐबे तो बास ऐये से, कसनबल्लोने हुनचो मरलोर चार दिन होऊन चुकली से।” 40ईशु हुनचो ले बल्लो, “काय मय तुचो ले नी बोलु रले कि अगर तुय बिश्वास कर से, तेबे माहापुरू चो महिमा के दक से।” 41तेबे हुनमन हुन पकना के गुचाला। ईशु आँईक उठाऊन भाती बल्लो, “हे बुआ, मय तुचो धन्यबाद करें से कि तुय मोचो सुनली सीस। 42मय जानते रले कि तुय हरमेशा मोचो सुनु आस, मान्तर जोन भीड़ लगे-लगे उबा आसे, हुनचो लागुन मय ऐ बल्ले, जेचो ले कि हुनमन बिश्वास करोत कि तुय मोके पठाली सीस।” 43ऐ बोलुन भाती हुन बड़े शब्द ले हाग दिलो, “हे लाजर, निकरून आव!” 44जोन मरून जाऊ रये हुन मोड़ा फटीई ले हाथ पाँय बान्दलोर निकरून ईलो, आउर हुनचो थमना ओंगची ले गुन्ड़ीयाय होऊ रली। ईशु हुनमन ले बल्लो, “हुनके खोलुन दिआ आउर जाऊक दिआ।”

ईशु चो खिलाप खराप उआट

45तेबे जोन यहूदी मरियम चो लगे ऐऊ रवत आउर हुनचो ऐ काम दकुन रओत, हुनमन थानले खुबे असन हुनचो उपरे बिश्वास करला। 46मान्तर हुनमन थानले कितलो फरीसीमन चो लगे जाऊन भाती ईशु चो काममन चो खबर दिला। 47ऐ थाने परधान याजकमन आउर फरीसीमन बड़े सभा हाग दीला, आउर बल्ला, “आमी करू आंव काय? ऐ माने तो खुबे चिना दकाऊ आय। 48अगर आमी हुनके असने ची छांडुन देऊँ, तेबे सपाय हुनचो उपरे बिश्वास आनदे, आउर रोमि ऐऊन भाती आमचो जगा आउर जाति दुनो थाने अधिकार कर दे।” 49तेबे हुनमन थानले कैफा नाव चो गोटक माने जोन हुन बरक चो माहायाजक रलो, हुनमन ले बल्लो, “तुमी काई बले नी जानास; 50आउर ना ऐ समजसास कि तुमचो काजे ऐ नगत आय कि आमचो लोगमन चो काजे गोटक माने मरो, आउर सपाय जाति नष्ट नी होओ।” 51ऐ गोठ हुन आपलो बाटले नी बल्लो, मान्तर हुन बरक चो माहायाजक होऊन भाती अगम गोठ करलो, कि ईशु हुन जाति चो काजे मरे दे; 52आउर ना मात्र हुन जाति चो काजे, आउर येई काजे बले कि माहापुरू चो जत-खत पिलामन के गोटक करून देये दे। 53आउर हुनी दिन ले हुनमन हुनके मारून देतोर उआट करूक मुरयाला। 54ऐईकाजे ईशु हुन समया ले यहूदीया मन थाने उजागर होऊन भाती नी बुललो, मान्तर हुता ले रान चो लगे बिती परदेश चो एप्रैम नाव चो गोटक नंगर ने जाते गेलो; आउर आपलो चेलामन चो संगे हुनी थाने रऊक मुरयालो। 55यहूदीमन चो फसह तिआर लगे रली, आउर खुबे असन लोग तिआर ले पयले देहात ने यरूशलेम ने गेला कि आपन खुद के शुद्ध करोत। 56आउर हुनमन ईशु के डगराऊक मुरयाला आउर मंदिर ने उबा होऊन भाती आपस ने बोलुक मुरयाला, “तुमी काय समजेसास? काय हुन तिआर ने नी ऐये दे?” 57परधान याजकमन आउर फरीसीमन ऐ हुकुम देऊ रवत कि अगर कोनी ऐ जानोत कि ईशु काहां आसे तेबे सांगा, बल्ले हुनमन हुनके धरूक सकोत।

Currently Selected:

यूहन्ना 11: HLBNT

Highlight

Copy