लूका 11
11
पारथना चो सिक्या
1फेर हुन कोनी जगा पारथना करते रलो। जिदलदाय हुन पारथना करून सरालो, तेबे हुनचो चेलामन थानले गोटक हुनचो ले बल्लो, “हे परबु, जसन यूहन्ना आपलो चेलामन के पारथना करतोर सिका लो असने ची आमके बले तुय सिकाऊन देस।”
2हुन हुनमन ले बल्लो, “जिदलदाय तुमी पारथना करा, तेबे बोला:
‘हे बुआ,
तुचो नाव पवितर माना जाओ,
तुचो राज ऐओ।’
3‘आमचो दिनभर चो रोटी हरदिन आमके दिया कर,’
4‘आउर आमचो पापमन के छमा कर,
कसनबल्लोने आमी बले आपलो हरकोनी अपराधी के छमा करू आंव,
आउर आमके परीक्षा ने नी आन।’”
मांगते राहा
5तेबे हुन हुनमन ले बल्लो, “तुमचो ने कोन आय कि हुनचो गोटक मित होओ, आउर हुन अधघर राती हुनचो लगे जाऊन भाती हुनचो ले बोलो, ‘हे मीत; मोके तीन ठान रोटीमन देस। 6कसनबल्लोने गोटक यातरी मीत मोचो लगे ईलो से, आउर हुनचो पुरे संगातो काजे मोचो लगे काईची निआय।’ 7आउर हुन भीतर ले जबाप देओ, ‘मोके दुक नी देस; ऐबे तो कपाट बंद आसे आउर मोचो लेका मोचो लगे ओचना थाने आसोत, ऐईकाजे मय उठून भाती तुके देऊ नी सके?’ 8मय तुमचो ले बलें सें, अगर हुनचो मीत होलो थानले बले हुनके उठून भाती नी देओ, तेबले बले हुनचो लाज छांडुन भाती मांगतोर कारन हुनके जितरो जरूरत आसे हुतलीई उठून भाती देये दे। 9आउर मय तुमचो ले बलें सें कि मांगा, तेबे तुमके दिया जाये दे; डगराहा, तेबे तुमी पाहा से; ठक-ठकाहा, तेबे तुमचो काजे उगाढ़ा जाये दे। 10कसनबल्लोने जोन कोनी मांगु आय, हुनके मिरू आय; आउर जोन डगराऊ आय, हुन पाऊ आय; आउर जोन ठक-ठकाऊ आय, हुनचो काजे उगाढ़ा जाये दे। 11तुमचो ने असन कोन बुआ होये दे, कि जिदलदाय हुनचो बेटा रोटी मांगो, तेबे हुनके पकना देये दे; नाहले मछरी मांगलो ने, तेबे मछरी चो पलटा ने हुनके सांप देये दे? 12नाहले गार मांगलो ने हुनके बिच्छु देओ? 13बल्ले जिदलदाय तुमी खराप होऊन भाती आपलो पिलामन के अच्छा तीजमन देऊक जानास, तेबे सरग चो बुआ आपलो मांगतो बितामन के पवितर आत्मा केंव नी देये।”
ईशु आउर दुष्टआत्मामन चो राजकरू
14फेर हुन गोटक कोंदी दुष्टआत्मा के निकरालो। जिदलदाय दुष्टआत्मा निकरून गेली तेबे कोंदा बोलुक मुरयालो; आउर लोगमन अकचकित होला। 15मान्तर हुनमन थानले कितलो बल्ला, “ऐ तो दुष्टआत्मामन चो परधान शयतान चो सायता ले दुष्टआत्मामन के निकराऊ आय।” 16दुसरमन हुनचो परीक्षा करतो काजे हुनचो ले बादरी चो गोटक चिना मांगला। 17मान्तर हुन हुनमन चो मन चो गोठमन जानुन भाती, हुनमन ले बल्लो, “जोन-जोन राज ने फुट होऊ आय, हुन राज उजरुन जाऊ आय; आउर जोन घर ने फुट होऊ आय, हुन नष्ट होऊन जाऊ आय। 18अगर शयतान आपली ची बिरूदी होओ, तेबे हुनचो राज कसन बनुन रये दे? कसनबल्लोने तुमी मोचो बारे ने तो बलेसास कि ऐ शयतान चो सायता ले दुष्टआत्मा निकराऊ आय। 19अच्छा अगर मय शयतान चो सायता ले दुष्टआत्मामन के निकराऊ आंय, तेबे तुमचो पिलामन काचो सायता ले निकराऊ आत? ऐईकाजे हुनीमन ची तुमचो नियाय चुका दे। 20मान्तर अगर मय माहापुरू चो सामरत ले दुष्टआत्मामन के निकराऊ आंय, तेबे माहापुरू चो राज तुमचो लगे ऐऊन अमरली से। 21जिदलदाय बलबीता माने हत्यार बान्दलोर आपलो घर चो राका करू आय, तेबे हुनचो धनमाल बाचुन रऊ आय। 22मान्तर जिदलदाय हुनचो ले बडुन भाती कोनी आउर बलबीता हमला करून हुनके जीतु आय, तेबे हुनचो हुन हत्यार जेचो उपरे हुनचो भरसा रली, झिकुन धरू आय आउर हुनचो धनमाल जुरून भाती बाटुन देऊ आय। 23जोन मोचो संगे निआय हुन मोचो बिरूद ने आसे, आउर जोन मोचो संगे नी सकले हुन बिखरु आय।
अशुद्ध आत्मा के घर चो खोज
24“जिदलदाय अशुद्ध आत्मा माने थानले निकरून जाऊ आय तेबे सुकलो जगामन ने आराम डगराते फिरू आय, आउर जिदलदाय नी पाये तेबे बोलु आय, ‘मय आपलो हुनी घर ने जोन थानले निकरून रले आपस जायें दें।’ 25आउर ऐऊन भाती हुनके झाड़लोर-बड़ालोर आउर सजालोर पाऊ आय। 26तेबे हुन जाऊन भाती आपलो ले खराप सात आउर आत्मामन के आपलो संगे धरून ऐऊ आय, आउर हुनमन हुन थाने बसुन भाती डेरा करू आत, आउर हुन माने चो पाटे चो हालत पयले ले बले खराप होऊन जाऊ आय।” 27जिलदाय हुन ऐ गोठमन बोलते रलो तेबे भीड़ थानले कोनी बायले लेकी जोर ले बल्ली, “धन्य आय हुन गरब जेचो थाने तुय रलीस आउर हुन छाती जोन तुय चुपरलिस।” 28हुन बल्लो, “हव; मान्तर धन्य हुनमन आत जोन माहापुरू चो बचन सुनु आउर मानु आत।”
सरग चो सबुत चो मांग
29जिदलदाय बड़े भीड़ रूंड़ा होते रली तेबे हुन बोलुक मुरयालो, “ऐ जुग चो लोग खराप आत; हुनमन चिना डगराऊ आत; मान्तर योना चो चिना के छांडुन कोनी आउर चिना हुनमन के नी दिया जाये। 30जसन योना निनवे चो लोगमन चो काजे चिना ठेबलो, असने ची माने चो बेटा बले ऐ जुग चो लोगमन चो काजे ठेबे दे। 31दक्षिण चो रानी नियाय चो दिने ऐ समया चो मानेमन चो संगे उठून भाती हुनमन के दोषी ठेबा ये दे, कसनबल्लोने हुन सुलेमान चो गिआन सुनतो काजे धरतनी चो कटा ले ईली, आउर दका, ऐथा हुन आसे जोन सुलेमान ले बले बड़े आय। 32निनवे चो लोगमन नियाय चो दिने ऐ समया चो लोगमन चो संगे उबा होऊन भाती हुनमन के दोषी ठेबा दे; कसनबल्लोने हुनमन योना चो परचार सुनुन भाती मन फिराला, आउर दका, ऐथा हुन आसे जोन योना ले बले बड़े आय।
देंह चो दिया
33“कोनी माने दीया जराऊन भुईंग्रा ने नाहले पयमाना चो खाले नी संगाये, मान्तर दिवट थाने संगाऊ आय कि भीतरे ऐतो बिता उजर पाओत। 34तुचो देंह चो दीया तुचो आँईक आय, ऐईकाजे जिदलदाय तुचो आँईक निंगल आसे तो तुचो सपाय देंह बले उजर आसे; मान्तर जिदलदाय हुन खराप आसे तेबे तुचो देंह बले अंधार आसे। 35ऐईकाजे तिआर राआ कि जोन उजर तुचो थाने आसे हुन अंधार नी होऊन जाओ। 36ऐईकाजे अगर तुचो सपाय देंह उजर होओ आउर हुनचो कोनी हिसा अंधार नी रओ तेबे सपाय चो सपाय असन उजर होये दे, जसन हुन समया होऊ आय जिदलदाय दीया आपलो उजर ले तुके उजर देऊ आय।”
शास्तरीमन आउर फरीसीमन के धमकातोर
37जिदलदाय हुन गोठयाते रलो तेबे कोनी फरीसी हुनचो ले गुहार करलो कि मोचो थाने भात खा हुन भीतरे जाऊन भाती भात खाऊक बसलो। 38फरीसी ऐ दकुन भाती भक्यालो कि हुन भात खातोर पयले नी नाहालो। 39परबु हुनचो ले बल्लो, “हे फरीसीमन, तुमी बटकामन आउर थारी के उपर-उपर ले मांजेसास, मान्तर तुमचो भीतरे अंधार आउर दुष्टता भरली से। 40हे बेअकलमन, जोन बाहार चो हिस्सा बनालो, काय हुन भितर चो हिस्सा नी बनालो? 41मान्तर हव, भीतर बिती तीजमन के दान करून दिआस, तेबे दका, सपाय काई तुमचो काजे शुद्ध होये दे।
42“मान्तर हे फरीसीमन, तुमचो उपरे हाय! तुमी पदीना आउर सुदाब चो आउर सपाय बरन-बरन चो साग डार चो दसवां भाग देऊ आस, मान्तर नियाय के आउर माहापुरू चो मया के टालुन देऊ आस; जरूरी तो रली कि ऐ मन के बले करते रतास आउर हुनमन के बले नी छांड़तास। 43हे फरीसीमन, तुमचो उपरे हाय! तुमी आराधना घरमन ने मुख्य-मुख्य आसन आउर हाटमन ने जुहार मनकरू आस। 44हाय तुमचो उपरे! कसनबल्लोने तुमी हुन बसलो मोटमन चो असन आस, जेचो उपरे लोग हिन्डु आत मान्तर नी जानोत।”
45तेबे गोटक नियमकारी हुनके जबाप दिलो, “हे गुरू, ऐ गोठमन चो बल्लो ले तुय आमचो निन्दा कर सीस।” 46हुन बल्लो; “हे नियमकारीमन, तुमचो उपरे बले हाय! तुमी असन बोजा जेके उठातोर मशकिल आय, मानेमन उपरे लतुआस मान्तर तुमी खुद हुन बोजामन के आपलो गोटक अंडकी ले बले नी छिंआस। 47हाय तुमचो उपरे! तुमी हुन अगम गिआनीमन चो मोटमन बनाऊ आस, जोनमन के तुमचो बुआ-दादीमन मारून रला। 48आउर तुमी गोहई आस, आउर आपलो बुआ-दादीमन चो काममन ले सला आसास; कसनबल्लोने हुनमन तो हुनमन के मारला आउर तुमी हुनमन चो मोटमन बनाऊ आस। 49ऐईकाजे माहापुरू चो अकल बले बल्लो से, ‘मय हुनमन चो लगे अगम गिआनीमन आउर पठालोबितामन के पटायें दें, आउर हुनमन-हुनमन थानले कितलो के मारून पका दे, आउर कितलो के कन्दरा दे।’ 50बल्ले जितरो अगम गिआनीमन चो लऊ जगत चो उपजास ले बहाया गेली से, सपाय चो लेखा ऐ जुग चो लोगमन ले धरा जाय दे, 51हाबिल चो हत्या ले धरून भाती जकर्याह चो हत्या लगले, जोन बेदी आउर मंदिर चो मंजी ने मारा गेला। मय तुमचो ले सते बलें सें, ऐ सपाय चो लेखा ऐई समया चो लोगमन ले धरा जाये दे। 52हाय तुमी नियमकारीमन उपरे! तुमी गिआन चो कुचीकाड़ी धरलासास मान्तर तुमी खुद नी ओलास, आउर ओलतो बितामन के बले थेबालास।”
53जिदलदाय हुन हुता ले निकरलो, तेबे शास्तरी आउर फरीसी घिन-घिना ढंग ले हुनचो पाटे पडुन गेला आउर खेबलाऊक मुरयाला कि हुन खुबे असन गोठमन चो चरचा करो, 54आउर घात ने भिडू रवत कि हुनचो मुंह चो काई गोठ धरोत।
Currently Selected:
लूका 11: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
