लूका 16
16
चलाक जुगाड़करू
1फेर ईशु चेलामन ले बले बल्लो, “कोनी सवकार चो गोटक भण्डारी रलो, आउर लोगमन हुनचो पुरे हुनचो उपरे ऐ दोष लगाला कि हुन तुचो सपाय जायदाद उड़ाऊन देये से। 2आउर हुन हुनके हाग देउन भाती बल्लो, ‘ऐ काय आय जोन मय तुचो बारे ने सुने से? आपलो भण्डारीपन चो हिसाब देस, कसनबल्लोने तुय अदायं ले भण्डारी नी रऊक सकीस।’ 3तेबे भण्डारी बिचार करूक मुरयालो, ‘अदायं मय काय करें दें? कसनबल्लोने मोचो मालिक अदायं भण्डारी चो काम मोचो ले झिके से। माटी तो मोचो ले खोड़ा नी जाये; आउर भीक मांगतो ने मोके लाज ऐऊ आय। 4मय समजुन गेले कि काय करें दें, बल्ले जिदलदाय मय भण्डारी चो काम ले छंडाया जायें दें तेबे लोग मोके आपलो घरमन ने धर दे।’ 5तेबे हुन आपलो मालिक चो लागाखायामन के गोटक-गोटक करून हाग दिलो आउर पयला ले पचारलो, ‘तुचो उपरे मोचो मालिक चो कितलो लागा आसे?’ 6हुन बल्लो, ‘सव मन तेल,’ तेबे हुन हुनचो ले बल्लो, ‘आपलो खाता बई धर आउर बसुन भाती तुरते पचास लिकुन देस।’ 7फेर हुन दुसर ले पचारलो, ‘तुचो उपरे कितलो लागा आसे?’ हुन बल्लो, ‘सव मन गऊँ,’ तेबे हुन हुनचो ले बल्लो, ‘आपलो खाता बई धरून भाती अस्सी लिकुन देस।’
8“मालिक हुन अधरमी भण्डारी के सहरालो कि हुन चलाक ले काम करलो से। कसनबल्लोने ऐ संवसार चो लोग आपलो समया चो लोगमन चो संगे रीति बेवहारमन ने उजर चो लोगमन ले खुबे चलाक आत। 9आउर मय तुमचो ले बलें सें कि अधरम चो धन ले आपलो काजे मीत बनाहा, बल्ले जिदलदाय हुन जाते रये दे तेबे हुन तुमके अमर डेरामन ने धरून नेओं। 10जोन खिन्डिक ले खिन्डिक ने सत आय, हुन खुबे ने बले सत आय: आउर जोन खिन्डिक ले खिन्डिक ने अधरमी आय, हुन खुबे ने बले अधरमी आय। 11ऐईकाजे जिदलदाय तुमी अधरम चो धन ने सत नी ठेबले, तेबे सत धन तुमके कोन सोपे दे? 12आउर अगर तुमी पराया धन ने सत नी थेबा से तो जोन तुमचो आय, हुनके तुमके कोन देये दे?
13“कोनी दास दुय मालिकमन चो सेवा नी करूक सके कसनबल्लोने हुन तो गोटक ले बईर आउर दुसर ले मया संगाये दे; नाहले गोटक ले मिलुन रये दे आउर दुसर के तुच्छ जाने दे। तुमी माहापुरू आउर धन दुनो चो सेवा नी करूक सकास।”
माहापुरू चो राज चो मोल
14फरीसी जोन लोभीई रवत, ये सपाय गोठमन सुनुन भाती हुनके मजाकमन ने उड़ाऊक मुरयाला। 15हुन हुनमन ले बल्लो, “तुमी तो मानेमन चो पुरे आपन खुद के धरमी ठेबाऊ आस, मान्तर माहापुरू तुमचो मन के जानु आय, कसनबल्लोने जोन तीज मानेमन चो नजर ने बड़े आय, हुन माहापुरू चो लगे घिन-घिना आय।
16“नियम आउर अगम गिआनी यूहन्ना लगले रवत; हुन समया ले माहापुरू चो राज चो नगतखबर सुनाया जाये से, आउर हरकोनी हुन थाने हिम्मत ले ओले से। 17बादरी आउर धरतनी चो गुचुन जातोर नियम चो गोटक बिन्दु चो मेटुन जातोर ले सरल आय।
18“जोन कोनी आपलो बायले के छांडुन भाती दुसर ले बिहा करू आय, हुन बेबीचार करू आय, आउर जोन कोनी असन छांडलो बिती बायले लेकी ले बिहा होऊ आय, हुन बले बेबीचार करू आय।
सवकार माने आउर गरीब लाजर
19“गोटक सवकार माने रलो जोन बयंजनी फटीई आउर मलमल फिन्दते आउर रोजे दिना सुक बिलास आउर धुम-धाम चो संगे रते रलो। 20लाजर नाव चो गोटक कंगाल घावमन ले भरलोर हुनचो डेवना थाने छांडुन दिया जाते रलो। 21आउर हुन चाहते रलो कि सवकार चो टेबुल थानचो झूठा ले आपलो पेट भरो; ऐथा ले कि कुकूरमन बले ऐऊन भाती हुनचो घावमन के चाटते रवत। 22असन होली कि हुन कंगाल मरून गेलो, आउर सरग दूतमन हुनके धरून भाती अब्राहाम चो खोरा ने पोंहचाला। हुन सवकार बले मरलो आउर माटी दिया गेलो, 23आउर अधलोक ने हुन दुख ने पढ़लोर आपलो आँईकमन उठालो, आउर लापी ले अब्राहाम चो कोरा ने लाजर के दकलो। 24तेबे हुन चिचयाऊन भाती बल्लो, ‘हे बुआ अब्राहाम, मोचो उपरे दया करून लाजर के पटाऊन देस, बल्ले हुन आपलो अंडकी चो तिप पानी ने भिजाऊन भाती मोचो जीब के सितर करो, कसनबल्लोने मय ऐ आईग ने तड़पे सें।’ 25मान्तर अब्राहाम बल्लो, ‘हे बेटा, सुरता कर कि तुय आपलो जीवना ने अच्छा तीजमन धरून चुकली सीस, आउर असने ची लाजर खराप तीजमन मान्तर अदायं हुन ऐथा शान्ति पाये से, आउर तुय तड़प सीस। 26ऐ सपाय गोठमन के छांडुन आमचो आउर तुमचो मंजी गोटक बड़े भारी खोदरा थेबाया गेली से कि जोन ऐथा ले हुनपाट तुमचो लगे जाऊक मन करे दे, हुनमन नी जाऊक सकोत; आउर ना कोनी हुता ले ऐ पाट आमचो लगे ऐऊक सकोत।’ 27हुन बल्लो, ‘तेबे हे बुआ, मय तुचो ले गुहार करें से कि तुय हुनके मोचो बुआ चो घरे पठाव, 28कसनबल्लोने मोचो पांच भाई आसोत; हुन हुनमन चो पुरे ऐ गोठमन चो गोहई देओ, असन नी होओ कि हुनमन बले ऐ तकलीस चो जगा ने ऐ ओत।’ 29अब्राहाम हुनचो ले बल्लो, ‘हुनमन चो लगे तो मूसा आउर अगम गिआनीमन चो किताबमन आसे, हुनमन हुनचेई सुनोत।’ 30हुन बल्लो, ‘नाई, हे बुआ अब्राहाम; मान्तर अगर कोनी मरलो बितामन थानले हुनमन चो लगे जादे, तेबे हुनमन मन फिरा दे।’ 31हुन हुनचो ले बल्लो, ‘जिदलदाय हुनमन मूसा आउर अगम गिआनीमन चो नी सुनोत, तेबे अगर मरलो बितामन थानले कोनी जीव बले उठ दे तेबले बले हुनचो नी मान दे’।”
Currently Selected:
लूका 16: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
