मरकुस 14

यीशुन विरुद्ध चाल

(मत्ती 26:1-5; लूका 22:1-2; यूहन्ना 11:45-53)

1दुय दिह ज्यां उवतू तो एने फसह एने अखमीरी रोटान तिवार आवुहु होता मुख्य याजक एने शास्त्री आज्यो गोष्टव होदणेमाय एता का यीशुह केहि एने देराव एने मारणेन; 2पुण मुख्य याजक एने शास्त्री केताला, “पूर्व ने दिह नाहं, ओहलो नाहं होव वो कि माणहान माय गडबड एय.”

यीशु पोर एक बायकू द्वारा मोगालो ईत्र टाकणो

(मत्ती 26:6-13; लूका 12:1-8)

3जेवी तो बैथानी गाव एने न्या शिमोन कुष्ठरोगान घेराम खाणेन बोह्ना एता, तेवी एक बायकू अलाबास्त्रन कुपत जटामांसन जुलुम मौल्यवान सुगंधव एने शुद्ध तेल लेईन आवी; एने कुपव फोडन तान मुंडपोर टाकील. 4पुण कूण कूण आपणो मोनाम चडफडून कियेल, “ज्यो सुगंध तेलान का नाश केरील गीया? 5काहाकाय हे सुगंध तेल तीन होव दीनार पेक्षा होवटो रुप्यामाई पाकील गारीबांह रुपये आपुह शकताला.” एने ते तापोर कुरकुर केरणे लागिल. 6यीशु कियील, “तीह सोडीन द्या; तीह का त्रास आपतेन हि? ती तर मारकेरीन हाजो केरील हि. 7गौरगेरिब तुमरो हेरी कायम रेतेह, एने तुमूह जर लागणे रेंय तर तान हेरी हजो केरणे केरसेक्तालू; पुण मी तुमरो हेरी दाडवन नाहं रेहू. 8जे कांही तान केरणे शकलव, तान केरील; तिने मारो उत्तरकार्या केरता पेल्ला तारीन मारो शरीर सुगंधव ईत्र लागाडील. 9मी तुमूह खेरीच केथु, किथे, आखा जगाम जाहारी कां हा सुवार्ता पोरचार आपणे माय आवी, ताहारी आवो बोहीही कामान वर्णन पुण इआवीह केरणेम आवी.”

यहूदा द्वारा धोको देणो

(मत्ती 26:14-16; लूका 22:3-6)

10यहूदा इस्कर्योत एने विश्वास घात केरनाम एक इतू मुख्य याजका आहने गीयो कि तो तान आथ देराव दिईल. 11ता ज्यो होमलीन आंनदित एना, ताह पोयशा आपणेन वायदो केऱ्या, एने ज्यो टायम होदणे लागो का ताह किहिक देराव देय.

आखरी भोज

(मत्ती 26:17-25; लूका 22:7-14,21-23; यूहन्ना 13:21-30)

12अखमीरी रोटान तीवारान पेल्ला दिह, ज्यामाय ते एने ल्हांळाह होस बलीदान केरताला, तान चेला ताह फुसील, “तू काय जानह कि आमु जाइन तारो केरता एने फसहान तियारिन केरणे?” 13तान आपणा चेला मायरीन दुईजानाह हे केयेल मोकलील ल, “यरूशलेम नगरात जा, एने एक माणुह पाण्यान बांधड एने विसीन तुमूह जुडव, तान पासाण चालू. 14एने तो ज्या घेरामाय जाहू, ता घेराम घेर धन्याहा केव वो, गुरु किथे कि मारी उतरनेल ज्यामाय मी आपणो चेला हेरी एने फसह खाण्यू कियील हि? 15तो तुमूह एक होबाडव एने तियार केरील मोटलव का जाईल माडव देखाडव आपण्यू, ताहारिन आमरा केरता तियारिन केरू.” 16तेवी ता दुय चेला निकलीन नगरात आवो, एने जोहलो तो ताह कियेल एता, ता प्रमाणे देखाईल; एने फसह तियार केरील. 17उवतू तो हांजपोर एनी, तर तो बाराजाणान हेरी आवा. 18ताहेरया ते बोहन भोजन केरतीन एता, तर यीशु कियील, “मी तुमूह खेरिन खेरिनच किथे कि तुमरो मायरीन एक, तो मारो हेरी भोजन केरतीन एतो, माहु देरीन आपण्यू.” 19चेला निराश एय गीयो एने ते एक-एक केरीन ताह केहू लागिल, “काय तो मी हि” 20तास ताह कियील, “तो बारांजाण मायरीन एक हि, जो मारो हेरी तेल एने माय आथ टाकणे.” 21काहाकाय माणहान सोरो तर, जव ज्यां तान विषयव लिखील हि, जाथू; पुण ता माणहापूर हाय ज्यान मुळे माणहान सोरो देराव ना.

चेला हेरी प्रभु भोज

(मत्ती 26:26-30; लूका 22:14-20; 1 कुरिन्थियो 11:23-25)

22ताहेरया ते खातालूच एता, तास रूटू लव जाईल, एने आशीर्वाद फाचन मुळनु, एने ताह आपील, एने कियील, “लव हे मारा शरीर हि.” 23ओवतो तो प्याला लेईन ईशोपकारस्मरण किरील, एने ताह आपील; एने ता आखान तामायरीन पियव. 24एने तो ताह कियील, “हा वाचान रक्त हि, तो आखान केरता ओंतिले जाथू. 25मी तुमूह खेरिन खेरिनच किथे कि अंगूर रूह ता दिहावोर पोशा केध्दह नाहं पिनार, जेवी पुर बोगवानान राज्यातम मी नोवालो पिहु.” 26उवतू ता स्तोत्र गाव एने बाहेर जैतुनान डोंगरापोर गीया.

पतरसान नाकारणेन भविष्यवाणी

(मत्ती 26:31-35; लूका 22:31-34; यूहन्ना 13:36-38)

27तेवी यीशु ताह कियील, “तुमूह आखा ठोकर खाहू, काहाकाय लिखील हि: मी होबालनेन मारील, एने मेंढरे दाणा दाणा घोणार. 28पुण मी जवतालू एह तेवी मी तुमरे पेल गलील लामाय जाह.” 29पतरस ताह कियील, जर आखा ठोकर खाय ते खाय “पुण मी ठोकर नाय खाव.” 30यीशु ताह कियील, “मी तुवाह खेरिज किथु का आजुच रातव कुकडाह दुय वारीन आवेडणे पोयले, तू माहु तान वारीन नाकारहव.” 31पुण तो उजू जोरेस बोलनू, “जर माहु तारे हेर्यो मोरने भी पोडव तेवी भी, तेभी मी तारो नाकार केधीच नाहं केरू.” इही आखा भी कियील.

गतसमनी माय यीशुन प्रार्थना

(मत्ती 26:36-46; लूका 22:39-46)

32उवताता ते गतसमनी नावान जागापोर आवो, एने तो आपणा चेलाह कियील, “न्या बोह रीन वू, ता वूर मी प्रार्थना केरथू. 33एने तो पतरस एने याकूब एने यूहन्ना न्या आपणो हेरी लेईन गीयो, एने जादा भोगलाईन अस्वस्थ एहू लागिल” 34एने ताह कियील, “मारो मोन जुलुम दुखव हि, याउर कि मी मोरणेपोर हि: तुमूह न्या उबरीन वू, एने जागता रीवू वू.” 35उवतू ता तो थोडोक ओगांण गीयो एने जोमनि पोर पोडव प्रार्थना केरणे लागिल कि जर एता रेंय तर हि टाइम मारेहरिन काळव आप, 36एने कियील, “हे अब्बा, हे आबुक, तुवाह आखा कांही एहू शकते; आज्यो प्यालाला माफायरीन काड टाक: तेभी पुण माहु लागीह ताहोलो नाहं, पुण जे तुवाह लागीह ताहोलो होव वो.” 37उवतू ता तो आवा एने ताह हूवताला देख पतरसाला कियील, “हे शिमोन, तू हुविह हि? काय तू घटकाभरहव जागनो नाहं? 38जागा रेवू एने प्रार्थना केरतीन रीन वू का तुमूह परिक्षाम पोडनू नाय केरीन आत्मा तियार हि, पुण डील अश्यक्त हि.” 39एने तो पोशा चालन्यू गीयो एने ता शब्दाम प्रार्थना केरील. 40पोशा आवीन ताह हुवातालून देखील, काहाकाय तान डोला निंदिमाय एती; एने मालूम एता कि ताह काय उत्तर आपणे. 41उवतू तो तिसऱ्या टायव मा आवीन तास कियील, “ऐव एने हुविह रीन वू एने थाकमुळने लव, पुरोज एय गीयो घडका आवी हि; देखू माणहान सोरो पापव माणहान आथे देरीन आपाय जाय. 42उठू, चालू! एने देखू, माहु देरीन आपणार आहने आवील ज्यां”

गतसमनी माय यीशुह धोको से देरावणो

(मत्ती 26:47-56; लूका 22:47-53; यूहन्ना 18:3-12)

43तो हे केतूच एतो, कि यहूदा जो बाराजाणान मारीन एक एतो, आपणो हेरी मुख्य याजक एने शास्त्री एने डाय डाया न्या फायरीन एक मोटलव गेर्दव लेईन जेल्दव आवीन पोचना, ते तलवारे एने डेंगा विसवएता. 44ताह देरीन आपणारा ताह हे खुन केयेल आपील एता कि ज्याह मी चुंबन लेहु तोच तो हि, ताह देरीन होमालावा लेईन जा. 45तो आवा एने जेल्दव तान आहने आवीन कियील, हे गुरु! एने ताह जुलुम चुंबने लव जाईल. 46तेवी तास तान आथ टाकील ताह देरीन लव जाईल. 47तामायरीन जो आहने उबरीन येल एतो, एक जाणान तलवार सांडाळव महायाजक दासापुर चालाडव ल, एने तान कान काट दियेल. 48यीशु ताह कियील, “काय तुमूह लुटारू होमजाडव माहु देरणे केरता तलवार एने डेंगा लेईन निकेलनाह? 49मी ते प्रत्येक दिह मंदिरामाय तुमरे हेरी रेयन शिक्षण आपतालु, उवतू तो तेवी तुमूह माहु नाहं देरीन ल: पुण ज्यो ज्यान केरील ता एय गीयो का पवित्र शास्त्रन शब्द पुरो एय.” 50ज्यापरीन आखा चेला ताह सोडीन नाहव गीया. 51एक जुवान आपणो उघड्या डव लापूर फाडका पाघरीन तान पासाण चालतो एता; एने मांणहे ताह धव रीन. 52पुण तो फाडका टाकील उगाडलोच दोवळ पोळल.

यीशु महासभान सामने

(मत्ती 26:57-68; लूका 22:54-55,63-71; यूहन्ना 18:13-14,19-24)

53बादमाय तास यीशुह महायाजकाफाय लेईन गीया; एने आखा मुख्य याजक एने शास्त्री एने डाय डाया एखठाच जोमना. 54पतरस सेटेवाला सेटो तान पासाण पासाण महायाजकान आंगणामाय वोर गीया, एने कामदारा हेर्यो बोहव आगठो आहने हेकातेन बोहवल. 55मुख्य याजक एने आखा न्यायसभा यीशुह मारीन टाकणे केरता तान एने मोकताज ठेगणे केरता गवाहीव दारान होदामाय एता, पुण ताह नाहं जुडना. 56पाच काहा का जादा जन तान विरूधाम हि खोटव सांक्ष आपतेन एता, पुण तान सांक्ष एक सारखव नाह एती. 57तेवी कांही माणहान उठीन तान विरूधाम हि खोटव सांक्ष आपील एती, 58“आमु ताह हे केतालून होमलील हि, मी आज्यो आथान तियार केरील मंदिराह पाडन, एने तीन दिह उवतू तो दिहरा बोणावनार, जो आथा बोणव नाहं.” 59ज्यापुररीन पुण तान सांक्ष एकाफायरिन पुण निकलील नाहं. 60तेवी महायाजकान मध्यभागव उबरीन येल रेयव यीशुह फुसील, “तू उत्तर नाह आपीत काय नाहा ज्या माणहे तार विरुद्धामाय काय गवाही आपतेह.” 61पुण ते उद्डूच रेणू, एने काहीच उत्तर नाहं आपील महायाजकान ताह पोशा फुसील, “काय तू ता परमधन्य सोरो मसीह हि?” 62यीशु कियील, “मी हि: एने तुमूह माणहान सोरो सर्व सामर्थ्यने जेव डव उगे बोह्ना, एने आकाशात मेघां सहा हेरी आव तालून देखणार.” 63तेवी महायाजक आपणा फाडका फाडव कियील, “ऐव एने आमूह गवाही सांक्षिदारान उंजू काय गिरज ज्यां? 64तुमूह जव निंदा होम्ल्या तुमूह काय लागीह?” ता आखा कियील का ज्यो मरण दण्डास योग्य हि. 65तेवी कूण ते तापोर थुपताला, एने कूण ते तान मूय दाबव एने ताह दुमा केरीन देताला, एने ताह केणे लागिल का “भविष्यवाणी किर” एने शिपायी ताह देरीन थापडा केरीन देईल.

पतरसान यीशुह नाकारणू एने रेडनु

(मत्ती 26:69-75; लूका 22:56-62; यूहन्ना 18:15-18,25-27)

66जेवी पतरस बुंदे खोलव माय एतो, तर महायाजकान दासव मायरीन एक ताहारिन आवी, 67एने पतरसाला ओगांण शेक लेतालून देखव ताफाय एक होस देखील एने केवाय लागिल, “तू पुण तर ता नासरी यीशुहाती एतो.” 68तान नाकारीन ल, एने कियील, “मी नाहं ओळखतेह एने नाहं होमजाडणे कि तू काय किथी हि” उवतू तो तो बाहेर बोगवानान डव पुर गीयो; एने कुकडो वाहनो. 69तान दासव ताह देखव केयेल ज्यो आहने उबरीन जाईल केयेल का ज्यो तामाय वालो एक ज्यां, एने पोशो केणे लागिल का, “ज्यो तामरिन एक हि.” 70पुण तो पोशा नकार केरील थोडच वेळानबादमाय तास जा आहने उबरीन येल एता पोशा पतरसाह केणे लागिल, “खेरिन खेरिनच तू तामरिन एक हि; काहाकाय तू गलीलभी हि.” 71तेवी तो नाहा केरीन शपथ खाणे लागिल, का “मी ता माणहाह, जान तुमूह चर्चा करतेह, नाहं ओलखव.” 72चालूच दिहरो टाइम कुकडो वाहनो पतरसाह तान वात जव यीशु ताह कियील एती तान इर आविह आवी, “कुकडा दुय वारीन आयेडने पेल तू माहु तीनन वारीन मारो नकार केरही” तो आखव वातून विचार केरीन रेडने लागिल.

Currently Selected:

मरकुस 14: NLXNT

Highlight

Compare

Copy