Machitilo 3
3
1PETRO na Yohana ŵenzokwera kuyoloŵa mchipupilo pa nsita yosengeramo, ni yakasano na kane. 2Naye muntu ngana wolemala chitatikile mvumo mwa anyina etwaliwa, wenzolalika nsiku zyonse pa mulyango wa chipupilo apo poitiwa Paweme, kuti asenge vyabule kwa aŵo oloŵa mchipupilo: 3wamene uyu pechiŵona Petro na Yohana ŵesakoloŵa mchipupilo esenga apokeko vyabule. 4Petro pomlolesisya pamo na Yohana echiti, Lola seo. 5Naye eŵamvwila, elinga kuti apoke kantu kwaŵo. 6Lomba Petro echiti, Ndalama zituŵa na zisweta niliye; sembe chamene chinili nacho nikupe. Mzina la Yesu Kristo Mnazarayo, yenda. 7Naye emkata kwanja kwendi nomuusya: lombalomba vikandilo vyake na tunkombwa vitang'ishiwa. 8Naye akanyotoke epanama noyamboyenda; eloŵa naŵo pamo mchipupilo enzoyenda noyanga nomlumba Mlungu. 9Ŵantu ŵonse emuŵona oyenda nomlumba Mlungu: 10emsingalwa kuti ni wamene uyo enzonkala nosenga vyabule pa Mulyango Paweme pa chipupilo: naŵo ezula mazuzu nozizwa pa icho champonera.
11Naye penzoŵakata Petro na Yohana ŵantu ŵonse eŵautukira pamo pa lukoro loitiwa lwa Solomoni kuzizwa kwene kantu. 12Petro naye akaŵone eŵayasuka ŵantu, Mwaŵantu mwa Israeli muzizwiranji pa uyu? mutilolesyeranji seo, nga ni pa mpamvu zyasu saŵene kano ulambilo wasu ni patamyendesya? 13Mlungu wa Abrahamu na wa Isake na wa Yakobo, Mlungu wa ausu wasu, wamzizya Mwana wake Yesu; wamene wimwipeleka nomkana pa menso pa Pilato, apo pechiti ammangulule. 14Namwe mwimkana Ula Mtuŵa na Wozila, nosenga kuti chipaya apewe kuli mweo, 15nompaya Mwine wa moyo; wechiusya Mlungu kwa akufwa, wamene nase nise ntoni zyake. 16Pochetekera zina lake zina lake lamkosesya uyu muntu umulola nomziŵa: inde, kuchetekera uko kuli mwa yeve ni kwampa kupola uku konse kwa mmuŵili pa menso pa mweo monse. 17Lomba, akwasu, nuziŵa kuti mwichita teti tyala kosaziŵa, umo mwechichitira naŵo akuru ŵanu. 18Mlungu evisilizya teti ivyo vyechilulula kale pakanwa pa ŵonse aŵirizi vyati azatamanishiwe navyo Kristo wake. 19Teti molapa noyaruka soti kuti viipa vyanu vizimaizyiwe, kuti zize nsita zyosinsimuka kufumila pali Asikuru; 20soti kuti amtume Kristo uyo eikiwila kuli mweo, ni Yesu: 21uiti yakupokera mikumbi mpaka nsita zyowamya soti vyonse, zyechinena Mlungu pakanwa pa aŵirizi ŵake ŵozila chitatikile popoza vyaro. 22Ni chendi Musa enena, Asikuru Mlungu azampanamikileni muŵirizi mwa akwanu nga ni neo; wamene ni umti mze momvwila mvintu viri vyonse vyati azanene namwe. 23Kuze kuŵepo kuti wamoyo ali wonse ati azakane kummvwila ula muŵirizi azachenekewe kwene kantu mu ŵantu. 24Inde, aŵirizi ŵonse ŵala chitatikile pa Samwele na aŵo emkonka, amene ŵonse elaŵira, naŵo soti enena zya nsiku zino. 25Nimwe ŵana a aŵirizi ŵala na a mapangano ŵechipangana Mlungu na ausu wanu pechiti kwa Abrahamu, Pa mbuto yako ni peiti yoshukishiwa mikoka yonse ya mcharo cha pansi. 26Kutangulila pali mweo Mlungu akaimisye Mlumbwana wake emtuma kumshukisyani, pomkwentesyani muli monse pa viipa vyanu.
Currently Selected:
Machitilo 3: MA23
Highlight
Share
Copy
Want to have your highlights saved across all your devices? Sign up or sign in
Mapangano Alomba © Bible Society of Zambia, 1923.
