M. Mattayo 6

1ŴONANI kuti msachita chilungamo chanu pakazanga pa ŵantu kuti muŵonekere kwaŵo: kati mwakuchita tetyo muliye chilambu kwa Ausu wanu ali kumulu.

2Teti pamene pupeleka vyabule usalizya mbata pantanzi pako, umo mwakuchitira ŵolipazya mmasunagoge na mmiseo, kuti aŵe na mtupo ku ŵantu. Lezee numnenelani, Alupokere kaŵera chilambu chaŵo. 3Sembe weo pupeleka vyabule, kwanja kwako kwa manzyere kusaziŵa icho chikuchita kwanja kwako kwendi: 4kuti vyabule vyako viŵe vyakunsei: nipo Auso oŵona kunsei azakuwezizye.

5Soti pamene pamusenga msaŵa nga ni ŵolipazya: pakuti aŵo otemwa kuima nosenga mmasunagoge na mmampindwe a miseo, kuti aŵonekere ku ŵantu. Lezee nikuti kuli mweo, Alupokere kaŵera chilambu chaŵo. 6Sembe weo apo pusenga ukaloŵe mchipinda chako, nozalako chisasa chako nomsenga Auso ali kunsei, naye Auso oŵona kunsei azakuwezizye. 7Posenga msawerezyawerezya malizu atyala, umo mwakuchitira a Mitundu: chikomo olinga kuti amvwike ponenanena kwaŵo. 8Teti mweo msalingana naŵo ŵeve: pakuti Ausu wanu oziŵilatu ivyo vumsoŵani pamkaliye nomsenga. 9Chifukwa choteti sengani teti: Ausu wasu muli kumulu, Zina lanu lilemekezyewe. 10Ufumu wanu uze. Vimupangwa vichitiwe nga ni kumulu teti na pansi. 11Mtipe lero chakulya chasu cha nsiku. 12Mtilekere mangaŵa ŵasu, nga ni seo soti mtuŵalekera amangaŵa ŵasu. 13Msatiulila poyezyewa, sembe mtipuzumusye pa uyo muŵipa. 14Chikomo kati muŵalekera ŵantu vyoifya vyaŵo, Ausu wanu wa kumulu azamlekereni namwe soti. 15Sembe kati ntemuŵalekera ŵantu vyoifya vyaŵo, Ausu wanu wa kumulu nteati amlekereni namwe soti vyoifya vyanu.

16Soti pamene pamulitana vilyo msaŵa na chinso chondandaula nga ni ŵolipazya: pakuti ŵeve oifya vinso vyaŵo kuti aŵonekere ku ŵantu kuti olitana vilyo. Lezee numnenelani, Alupokere kaŵera chilambu chaŵo. 17Sembe weo pamene pulitana vilyo uzole mafuta ku mutu wako nosamba ku menso; 18kuti ungaŵonekere ku ŵantu kuti ulitana vilyo, sembe kwa Auso ali kunsei: naye Auso oŵona kunsei azakuwezizye.

19Msalilongera mpango mcharo cha pansi, mwamene akanzerenzere na nguwe mvuifya, na njivi mzukumula nopunsha: 20sembe mulilongere mpango kumulu, kwamene akanzerenzere na nguwe kuvisaifya, na njivi kuzisakumula kano kupunsha: 21chikomo kwamene kuli mpango zyako ni kuuti uzoŵe mtima wako soti. 22Msaniko wa muŵili ni liso: teti kati liso lako ni lamsuma muŵili wako wonse uzula kuŵala. 23Sembe kati liso lako ndiipa muŵili wako wonse uzula mfinzi. Chikomo choteti kati kuŵala uko kuli mkati mwako kukaŵa mfinzi, ati kukula mfinzi iyo! 24Paliye muntu angaŵe kapolo wa asikuru aŵiri: pakuti kano amtinke umo nomtemwa muyake; kano asungane naye umo nompelula muyake. Simngaŵe akapolo a Mlungu na a chuma kumo. 25Ni panunena namwe, Msauchitira tupwe moyo wanu lakuti mulyenji kano mumwenji; kano muŵili wanu muvwalenji. Kansi moyo ntupula vyakulya, na muŵili kupula vyovwala? 26Ŵonani tuni twa mlulezi, kuti tosakomera mbuto, tosasanja, tosalonga mmantumba; naye Ausu wanu wa kumulu otulyesya. Kansi mweo simusiyana nato kutupula tweve? 27Yuni wa mweo pochita tupwe angayangizye pa msinku wake mkono umo? 28Muchitiranji tupwe na vyovwala? Kumbukani vipwiŵi vya ku sanga makulilo a vine; sivukata milimo, pambi kuvuta: 29sembe neo numnenelani kuti chukanga Solomoni mu mtupo wake wonse ntevwalapo nga ni chimo cha ivi. 30Lomba kati Mlungu ovwalika teti uzu wa ku sanga, uyo uŵapo lero, na mailo upozewa mu mchero, kansi nti mweo mupulamo ngako, mwe mwatonto mvwano? 31Teti msachita tupwe lakuti, Tilyenji? kano, Timwenji? kano, Tivwalenji? 32Chikomo vyonse vyamene ivi Mitundu yuvisakisya; pakuti Ausu wanu wa kumulu oziŵisya kuti vumsoŵani vyonse ivi. 33Sembe tangamsake ufumu wake na chilungamo chake; ninga viyangizyiwe kwanu ivi vyonse. 34Chifukwa choteti msachita tupwe na mailo: pakuti mailo lichite tupwe leka. Vukumanira nsiku ni viipa vya ine.

Currently Selected:

M. Mattayo 6: MA23

Highlight

Copy