Fagbulun 12

Fun Erudes Nafate Santiagu

1Ay ginanya fag lungud, fun Erudes gfasigad gfauri sa tibak tagafanud. 2Ay kanya nasugu at ngay fanuguwan laman nanfate Santiagu, Uan at fadugsay, at famate sik fiso. 3Ay Erudes nu nalag te, taw Udyu guseganan sat nafagbulun, kanya nafagamat yay fiya Pedru. Ay nu ggamat gina e fagmafulun sa baliwas Tinafay at yud e Famadaul. 4Ay nu nagamat wan, nasungsung wa sas bale fagsungsungan. Ay ufat fulan sundalu gungbusan gtanud. Sik fulan ufat sundalu. Ay Erudes at fasadan nanfataban yay Pedru sa sangay taw at faglagan laman nanginto te, “Tain ro ku fagbulun ste fag taw?” Nu magbulun katanya gina ntabu at fagmafulun sa baliwa Tagfabarita nu Glangfe. 5Ay kaduge Pedru masungsungan, at ngay tagafanud matvngvd nu gdarangin sas Diyus.

E Nafalfas Pedru

6Ay ginanya fag yabi, makbang wan Erudes nu nantaban Pedru, Pedru gtiyug yay masiyukan duwak kadina sis buknga sundalu. Ay at tibak sundalu nu gtanud sis day dingding sakbawan. 7Ay rodi, insure wa daw tam Fun at tagfabarita at sadi, ay nadamlag sanya fag silid fag daw. Ay at tagfabarita nated Pedru tigyangan laman gfulo anya te, “Alindugi mafali.” Ay at fansiyuk fag kadina ntong wa siginan at take. 8Ay at tagfabarita nalong te, “Suluni am balukas ay am sinilas.” Ay Pedru nafaning wa fiya at longan. Ay at tagfabarita nalong yangay fiya te, “Umutani wan ay aloi wa angku.” 9Ay Pedru naalo wa fiya dewa yud nasaful te, sik tagfabarita wa mangaro. Pedru nu gfasad, igtaginfanan way. 10Ay kanya fag duwa nu nlangfe wa sit fasadik tagtanud ay anggan sit faduwak tagtanud, kanya ndasug sa at sakbawan alad at fangawat bakal, tagsasad fulan baliwa. Ay ka fag dingding sakbawan inluwang wa mandi, ay kanya fag duwa nalfas wan ay nalo wa sa sik dalan. Ay at tagfabarita naubun way sigad Pedru. 11Ay rodi Pedru bagu daw namatang te, “Katsi nasaful kwa te, tam Fun nasugu mangaro at tagfabarita laman gfalfas angku siginans fun Erudes at fagmadaragangun ay siginans taw Udyu at fasadan fagayu sa angku.”

12Ay Pedru nu nasaful wan at kin-gurungan, nalo wa sas Maria bale. Maria, Uan at tina. Ay Uan at ngayan tiba, Markus. Ay ginanya ngayuk taw at maful sanya fag bale ay igdarangin. 13Ay Pedru nu ndasug wa sanya, katuk sis day dingding sakbawan, ay Ruda sik fanuguwan nananlag sad sakbawan te, go sinu takatuk. 14Ay kanya natogdungug te, Pedru wan tagelongan, ay katvngvdan guseganan, ya naluwang at dingding sakbawan, kanya nfoli yay sasad bale ay gfoyung te, “Pedru snay sas day sakbawan.” 15Ay at ngay taw nalong anya te, “Kata way o siring at yud e amatanganan.” Ay Ruda gfabulun dawdaw glong te, “Muwag! Matuyan ku longan, isnay wa fiya.” At tiba nabalus te, “Labon sik tagfabarita way tagulit Pedru.” 16Ay Pedru gtunglus yay nu katuk. Ay at tiba naluwang wa fiya at sakbawan, ay manlag di, Pedru wa fiya. Ay kanya fagayu nadulawan. 17Ay Pedru nu nasakbo wan, nafaabat at take te, lag garingang. Ay kanya nafoyung tam Fun at fagbulun gina gfalfas anya siginan fagsungsungan. Ay kanya nalong yangay te, “Foyungi yangay sas Santiagu ay sa tiba tam ngay fadugsay ku nafoyung sa ayu.” Ay rodi Pedru nalo wa sa tibak talun.

18Ay nus balabag wan, ka fag ngay tagtanud fagsungsungan garingangan te, “Dada wan Pedru?” 19Ay matvngvd fun Erudes nu gfasarap Pedru sat ngay sundalu. Ay nu dway e nalag, kanya nainto sat ngay tagtanud fagsungsungan te, dada wan, ay wa mafabalus te, go dada. Ay rodi Erudes nasugu te, “Fatei wan ka fag ngay tagtanud fagsungsungan.” Ay Erudes nalo yay siginans talun Udiya ay nabanwan sas fulan Sesaria.

Fun Erudes Inkate wan

20Fun Erudes kadotama dawdaw taw Tiru ay taw Sidun. Ay sanya fag duwak fulan at taw insadi laman nanfasine at fanlonganan sas fun Erudes. Ay taguna ka fag ngay taw at fagnanfasulitananun sa yays Blastus, anway kanya at tagtanud at fun at bale daul, ay at fasadan, laman ro at fun Erudes di kadotama. Anway at fagbulan at fakonun siginan yays fun Erudes at talun. 21Ay nu ndasug wan fun Erudes at filian fag menit, kanya nasulun at fanfun fag balukas ay malunggung sit faglunggungan fanfun, ay gelongan sa sangay taw. 22Ay ka fag ngay taw nauro te, “Nu gelongan kata wa sik Diyus, ay wa kata sik taw!” 23Ay rodi daw, tam Fun at tagfabarita nafauri wa Erudes, anway Erudes at fakaumsigun te, laman nu e gseg sa way anya, ay lagi sas Diyus. Ay sik ngay ulud naon wa anya ay inkate wan.

24Ay Diyus at longan kaugat yay nu karapyag ay ngayuk taw tagafanud.

25Ay Bernabe ay Saulu noli wa sas Antiukia siginans Erusalem anway intabu wan nu gfon at ngay fanarabangun sanya. Ay nu guli wan nataban yay Uan, at tiba at ngayan Markus.

Currently Selected:

Fagbulun 12: TAWEAST

Highlight

Copy