Uan 6

Isus Nafafangon 5,000k Taw

(Mat. 14:13-21; Mar. 6:30-44; Lukas 9:10-17)

1Ay sanya ginan Isus nadife wa Lino Galiliya. (Sadi way Lino Galiliya ay Lino Tiberias.) 2Ay sik ngay taw ayuwayu naalo Isus, teway nalag Isus at ngay nafagbulun at madulawan nu gfafiya at ke ngay daylan. 3Isus ay at ngay tagadal nalo sa sik tungud muyud ay malunggung sanya. 4Ay ginanya makbang wan taw Udyu at fagmafulun sa baliwas Tagfabarita nu Glangfe. 5Ay Isus nabantay ay nalag sik ngay taw ayuwayu nu kakbang sa anya. Ay Isus nainto sas Filipi te, “Daginan ro tam fagbulan takayunya fag fakonun laman ro at ngay taw di kalunus?” 6(Ay Isus fagnaintoun katanya gfaskud Filipi. Ay dewa katanya, Isus nasaful wan at fagbulun ro.) 7Ay Filipi nabalus Isus te, “Dewa ro waluk magdanun at fansali sik taw nafagbulunan, wa kalong kalong umsak sas fagayu taw laman ro e naon tuwa sirut.” 8Ay at sadi at tagadal, Andres, Pedru at fadugsay, nalong sas Isus te, 9“Iste e sik baguwama gubanan limak tinafay ay duwak uyang. Ay nu kayu way ro niya, wa kalong kalong umsafung sanya fag ngay taw?” 10Ay Isus nalong sat ngay tagadal te, “Falunggungi fagayu taw.” Ay sanya fag talun mamakmak. Ay kanya fag ngay taw malunggung sa sangaba makmakan. Ay at ngay mangama way sanya nu ndain 5,000. 11Ay Isus nabul ka fag limak tinafay ay nauseganan sas Diyus. Ay nafafafud sa sangay taw at malunggung. Ay nabul yangay ka fag uyang ay nauseganan sas Diyus. Ay nafafafud sa sangay taw, ay fagayu napsug wan. 12Ay nu naon wan, Isus nalong sat ngay tagadal te, “Fafuli yap at ngay nagsawadan laman we mfangulan.” 13Ay at ngay tagadal nafaful at ngay nagsawadan. Ay inkapnu yay labi duwak sabi, at sawad siginan aro fag limak tinafay at ngay taw at naon.

14Ay ka fag ngay taw nu nalag Isus at madulawan fag fagbulun, nalong te, “Matuyan tuy wa fiya Diyus at taglong at fatuyanan takadasug ban ste swa daga.” 15Ay Isus nasaful ka fag ngay taw at fasadan, anway kaumsig nantaban Isus ay nanfabulun te, “Oi wan em fun.” Ay katanya wayay, Isus gdog yay nalo gsesadian sas tungud muyud.

Isus Nalo sa sangaba Tungud Lino

(Mat. 14:22-33; Mar. 6:45-52)

16Ay nu gakayabiun wan, Isus at ngay tagadal nalo wan ay indasug wa sas tigyangan lino. 17Ay at ngay tagadal nasakay sa sik balutu ay nafasigad nafalo sas fulan Kapernaum. Ay gina glo, marum wan. Ay Isus ya ndasug. 18Ay kaduge si sangaba lino, glumbak wayu daw, teway gtagmara dawdaw. 19Ay at ngay tagadal nu gsakay at kayayuwan nu ndain lima ate unumk kilumitru nalag Isus nu glo sa sangaba tungud lino. Ay Isus inkakbang sas balutu. Ay at ngay tagadal matvngvd nu kalimu. 20Ay Isus nalong sat ngay tagadal te, “Aw wadi, lag kalimu.” 21Ay at ngay tagadal nafasakay Isus sa at balutu. Ay rodi ndasug wa sas tigyangan lino, sa aro at fasadan.

Ngay Taw Gasarapan Isus

22-23Ay balabag di, sanya yay gugat sis dife lino ka fag ngay taw at nafangon tinafay nu ntabu wan Isus nu gfauseganan sas Diyus. Kanya fag ngay taw nasaful te, sfafun sadi wayk balutu tagsanya. Ay Isus at ngay tagadal nu nasakay wa sat balutu, Isus wa nasakay sanya, at ngay tagadal way. Ay rodi tibak balutu siginans fulan Tiberias indasug yangay sanya fag tigyangan lino. 24Ay ka fag ngay taw nasakay wa sa sik ngay balutu, ay suma ros Kapernaum laman nansarap Isus.

Isus Nafafaskudanan Anya, sik Tinafay Tagfon Leleg

25Ay ka fag ngay taw nu ndasug sas Kapernaum nalag Isus sanya. Ay nainto sas Isus te, “Em Takamoyung, ginain nu kadasug o ste?” 26Ay Isus nalong te, “Matuyan iglong aw ayu te, ay fagsarapun angku mangaro bunwa te, nalag am ku ngay fagbulun at madulawan. Ay fagsarapun angku anway mangaro te, ebi naon am ku nafon ayu fag tinafay ay napsug am. 27Lag dawdaw gasarapan ay fagsarapun nu anway fafa takabalangug. Ay fagsarapun dawdaw ani tuwa fafa at yud kabalangug faggugat, ay at tagfon leleg sas taw faggugat. Aw wa ban, Taw at Baguwama, tagfon ayu ka fag fafa. Anway tam Diyus tam Tama tagfatuyan te, ‘O wan ban tagfon fafa, at masuwad te, leleg at yud e fakatabuwan.’ ” 28Ay ka fag ngay taw ginto Isus te, “Tain ngani ban em fagbulun laman gfafaning ami Diyus at fakaumsigun?” 29Ay Isus nabalus te, “Katatuy wan Diyus at fakaumsigun: afanudi sa angku, Diyus at nasugu.” 30Ay ka fag ngay taw nalong sas Isus te, “Falagi ngani emi at madulawan fag fagbulun, laman nu nalag ami, gafanud wa ban ami emu. 31Em ngay aguyangan ebi sis talun at yud e taw naon mana. At marirukan sis Diyus at longan, ‘Kanya nafon sa sangay taw tinafay siginans banwa.’ ” 32Ay Isus nalong te, “Matuyan iglong aw ayu te, bunwa Muisis at nafon ka fag tinafay siginans banwa, ku Mama tuwa. Ku Mama tuwa tagfon ayu at matuyan fag tinafay tagsiginans banwa. 33Diyus at fon fag tinafay tagsiginans banwa, kanya wa at kindasug tagfon leleg sas fagayu taw ste swa daga.” 34Ay ka fag ngay taw nalong sas Isus te, “Em Fun, foni tuwa gugat emi ka fag tinafay.” 35Ay Isus nafafaskudanan te, “Aw wan at tinafay tagfon leleg. Nus nga sinu at kinkakbang sa angku di ban kalunus. Ay nus nga sinu tagafanud sa angku di ban kadanum faggugat.

36“Ay nalong aw ayu te, dewa am nalag angku, yam gafanud. 37Ku Mama gfon angku fag ngay taw kakbang ban sa angku. Ay at takakbang angku, dakdi gayan. 38Ku fagindasugun siginans banwa ste swa daga dakwa nanfagbulun ku fakaumsigun mandi. Nanfagbulun aktuwa at nasugu angku at fakaumsigun. 39Ay at nasugu angku at fakaumsigun te, dangay aw gfalyam nus di sadi at nafon angku. Ay fangkabat di ro, gfaleleg aktuwa ban fagayu at nafon angku fag taw sas fakatabuwan fag menit. 40Anway ku Mama fakaumsigun, fagayu taw tagtoglag ay at tagafanud sa angku, at baguwama, kanya e leleg ban faggugat, ay gfaleleg aktuwa ban fagayu at nafon angku fag taw sas fakatabuwan fag menit.”

41Ay ka fag ngay taw Udyu gibugan anway Isus nalongan te, “Aw wan ka fag tinafay at kindasug siginans banwa.” 42Ay glong te, “Go sangay kanya bunwa Use baguwama? Nu kanya way, gsaful way tam at tama ay at tina. Taw ro at fagnalongun te, ‘Indaga aw siginans banwa’?” 43Ay Isus nalong te, “Lag am gfangibuganan. 44We taw maakbang sa angku yap ngay ku Mama, at nasugu sa angku, at tagfaakbang anya sa angku, ay gfaleleg aktuwa ban anya sas fakatabuwan fag menit. 45Ebi ebi ngay taglong nariruk wa te, ‘Diyus gfoyung ban sas fagayu taw.’ Fagayu taw at nadungug ay at nasaful Diyus at foyungan, kanya nangakbang sa angku. 46We taw batang nalag ku Mama, aw way tagsiginans Diyus at batang glag ku Mama.

47“Matuyan iglong aw ayu te, nus nga sinu at tagafanud sa angku, e leleg tuwa faggugat. 48Aw wan tinafay tagfon leleg. 49Ay ngay aguyangan dewa naon ka fag fakonun at nangayan te, ‘mana,’ sis talun at yud e taw, inkate wan. 50Ay nus nga sinu at naon ka fag tinafay at kindaga siginans banwa, di ban kate faggugat. 51Aw wan tinafay tagfon leleg at kindaga siginans banwa. Nus nga sinu fag taw at naon ka fag tinafay, gleleg tuwa ban faggugat. Ay angku ku nafon fag tinafay, ku bilug wan, laman at ngay taw ste swa daga gleleg tuwa ban.”

52Ay taw Udyu gfabadbaboan sa tiba te, “Tain ro ka fag taw nu gfon unu antam at bilug, laman kon tam?” 53Ay Isus nalong te, “Matuyan iglong aw ayu te, nu dway am naon ku bilug, at masuwad, Taw at Baguwama at bilug, ay nu dway am nainum ku taguk, wa long ban am e leleg faggugat. 54Nus nga sinu takon ku bilug, ay taginum ku taguk, e leleg tuwa ban faggugat. Ay aw wan tagfon anya at leleg sas fakatabuwan fag menit. 55Anway ku bilug sik fakonun wa fiya. Ay ku taguk sik fanginum wa fiya. 56Nus nga sinu at naon ku bilug ay at nainum ku taguk, kanya nsadi wa sa angku. Ay aw insadi akwa sa anya. 57Ku Mama tagleleg faggugat at nasugu angku. Ay gleleg akyangay anway ku Mama gfaleleg tuwa angku. Ay katanya yangay sik taw at naon ku bilug. Kanya gleleg tuwa anway aw wan tagfaleleg anya. 58Ka fag tinafay at kindasug siginans banwa di kata ay aguyangan at naon. Kanya naon ay inkate wan. Nus nga sinu at naon ka fag tinafay gleleg tuwa ban faggugat.” 59Katanya Isus at foyungan gina gfoyung sa sangay taw Udyu at bale fakafulan sas Kapernaum.

Isus At Nalongan Nafalimatan Tibak Taw

60Ay Isus at ngay tagadal nu nadungug ka fag foyungan, nalong te, “Mafalyu way Isus at longan. Sinu ro at sumaful ka fag longan at masuwad?” 61Ay Isus dewa yud nadungug at ibugan, nasaful wan, ay nalong te, “Go ku longan gfalimatan way ayu? 62Tain nu kin ban ay amatanganan gina am glag angku, Taw at Baguwama, nu kafoli aw sa ebi ku talun? 63Diyus at Masine fag Falad tagfon leleg sas taw. Ay we taw mafafagbulun katanya. Ku nafoyung ayu fag longan siginan wa at Masine fag Falad. Ay at Masine fag Falad tagfon leleg sas taw. 64Ay am tiba tagste ya gafanud.” (Fakatanyaun at longan anway Isus nasaful wan siginan ngay ebi taguna te, kanya fag ngay taw at yud way gafanud. Ay manga kanya fag taw ban at namoyung way anya.) 65Ay Isus nalong te, “Katanya ku fagnalongun ayu te, we taw maakbang sa angku nu dway ku Mama gfaakbang anya sa angku.”

66Isus at nalongan katanya, ngayu wan at ngay tagadal at naubun ay wa galo anya. 67Ay Isus nainto sat Nasugu fag Labi Duwa te, “Go anggan am gubun wa ban am angku?” 68Ay Simun Pedru nabalus Isus te, “Em Fun, sinu nu kin ban em fagnangaloan? O way at ke longan tagfon leleg at yud e fakatabuwan. 69Ay gafanud tuwami. Nasaful wami te, o wan at Malayun sat Masine tagsiginans Diyus.” 70Ay Isus nalong te, “Aw wan at nafili ayu fag Labi Duwa, go kin? Ay at sadi si ayu Satanas way.” 71Isus at longan fag taw kanya Udas, at tama Simun Iskaryute. Dewa Udas sadi at Labi Duwa, kanya wan at namoyung ban Isus sat mauri fag ngay taw.

Currently Selected:

Uan 6: TAWEAST

Highlight

Copy