Lukas 19

Isus ay Sakyu

1Ay Isus indasug sas fulan Eriku teway sanya at dalan nu glo sas fulan Erusalem. 2Sanya fag fulan e sik taw at ngayan, Sakyu. Kanya tagfangguna taget buwis ay mabalan dawdaw. 3Sakyu kaumsig gyalagun laman nangasaful te, sinu Isus. Ay roro wa nalag, teway sik ngay taw ayuwayu gfarum wayay anya. Ay manga te, Sakyu sik taw wayay mababa. 4Ay rodi Sakyu matarung nanangguna Isus. Ay naulul sa sik kayu laman ro lumag Isus, anway Isus dumalan ro sanya. 5Ay Isus nu ndasug sanya, natangda ay nalong te, “Sakyu, mafalii nu kadaga o, anway katsi wan suma aw am bale.” 6Nu katanya, Sakyu mafali way ngap nu kadaga. Ay kanya guseganan gfasakbo Isus. 7Ay tibak taw nu nalag, kalimata ay gibugan sit dayu te, “Isus nasakbo sa sik tagasalanan at bale.” 8Ay Sakyu nlindug ay nalong sa tam Fun Isus te, “Ku Fun, dungugani ku longan. Nanfon ban aw at kalati ku nanuranan sa sangay taw at yud e kwa, ay ku nafamul siginan ku nafanlukan, fafoli akyay ban ay gfamut akyay ban ufat ginan.” 9Ay Isus nalong anya te, “Fagayu taw ste fag bale nlangfe wan, teway kanya Abrayam yangay at kadagdagan. 10Aw, Taw at Baguwama, ku fagindasugun laman nansarap ay nanfalangfe aw at nalyam fag ngay taw.”

Isus At Fafaskudanan sas Tuluk Fanuguwan

(Mat. 25:14-30)

11Kaduge ngay taw igdungugan, Isus nafafaskudanan yangay, anway Isus makbang wa sas Erusalem. Ay anggan ngay taw gamatangan te, makbang wan Diyus nu gmagurang taw. 12Isus glong te, “Ebi e sik mabalan fag taw tagaloun sa tibak talun ngayayu, laman at fun sat fagloan fag talun mon ban sa anya sik fagmagurangan. Ay nu nabul wa ban, guli yangay sa at talun. 13Ay ka fag taw gina galoun nagewan sa anya safuluk fanuguwan ay nafon sa sadi sadik fanuguwan at singku, ay gsudan way at kayuwan. Ay nalong te, ‘Faayui, laman ngayu tuwa ku singku gina ban aw indasug.’

14“Ay sanya fag talun at ngay taw kalimata way ka fag taw at mabalan. Nu katanya, sanya ginan fag ngay taw nasugu sik ngay taw sa ka fag taw at mabalan at fagloan fag talun laman nanlong sas fun te, ‘Wami kaumsig kanya fag taw nu gmagurang ban emi.’ 15Ay dewa katanya, ka fag taw at mabalan e nafili yay anya sik fun, ay kanya noli wan. Ay nu ndasug wan, nafakbang sa anya at ngay fanuguwan ebi at fagfonan at singku, laman nangasaful te, seyu at kinfamut sa ebi at nafon fag ngay singku. 16Ay at taguna fag fanuguwan inkakbang sat fun ay nalong te, ‘Ku fun, am singku nfamut yay safulu ginan.’ 17Ay at fun nalong anya te, ‘Masine am fagbulun. O wan sik matuyan fag fanuguwan. Madyay matuyan tuwa am fagbulun dewa sat alay, katsi ban o wan tagmagurang sas safuluk fulan.’ 18Ay at faduwak fanuguwan inkakbang yangay sat fun ay nalong te, ‘Ku fun, am singku nfamut yay lima ginan.’ 19Ay at fun nalong anya te, ‘Kin. Katsi ban o wan tagmagurang sas limak fulan.’ 20Ay sadi ya fiyak fanuguwan inkakbang sat fun ay nalong te, ‘Ku fun, na, am nafamato sa angku ebi fag singku. Ebi nasifig akway sasad falefe ay nasandig akway, 21anway kalimu aw emu, sik malimu way o fag taw. Gbul way o dewa yud o at nasandig, ay gbul way o at buwadan dewa yud o at natanum.’ 22Ay at fun nalong te, ‘Mauri way o fag fanuguwan! Nanfauri aw emu anway sa am ngay nalong. Madyay nasaful wo te, sik malimu aw fag taw. Ay gbul akyay dewa aw at yud nasandig, ay gbul akyay at buwadan dewa yud aw at natanum. 23Taw ro am fagyudun nafasandig ku singku sas bangku, laman nu ndasug kwan nanbul aw ku singku ay e nfamut tuwa?’ 24Ay ka fag fun nalong sa at malindug sanya te, ‘Buli wan ka fag singku siginan ka fag fanuguwan, ay foni sat ke nafafamut taguna fag fanuguwan.’ 25Ay at malindug sanya nalong te, ‘Em fun, kanya ngani fag fanuguwan e nafafamut yay.’ 26Ay at fun nalong te, ‘Iglong aw ayu te, nus nga sinu at ke kwa, gfamut yay ban sa anya. Ay roro sat yud e kwa, dewa at sawad si anya alay way, e mul wa ban siginan anya. 27Ay ka fag ngay taw at takalimata angku ay yud kaumsig nu gmagurang aw, fastiyei ay fatei si ku akbang.’ ”

Isus nu Kadasug sas Erusalem kata wa sik Fun

(Mat. 21:1-11; Mar. 11:1-11; Uan 12:12-19)

28Ay Isus nu nalong wa katanya, natunglus wa nalo sas Erusalem. 29Ay nu makbang wa sas Bugsul Ulibu, ay makbang wa sas fulan Betfage ay sas fulan Betaniya, Isus nasugu at tagadal at duwa. 30Ay nalong te, “Nanlag am sanya am dayu fag fulan. Ay nu mdasug am sanya, rodi lumag ro am sik asnu masiyukan. Ay ya batang e nasakay sanya. Ay luwasi at siyuk, ay tabani ste. 31Ay gina am gluwas, nu e ginto ayu te, taw ro ay fagluwasun, longi te, ‘Em Fun gayudan at fagsakayan katsi.’ ” 32Ay at nasugu fag duwa nalo wa fiya. Ay nalag wa fiya kata wa fiya Isus longan sa anya. 33Ay kaduge gluwas, at tagbilug nainto te, “Taw ro ay fagluwasun ka fag asnu?” 34Ay at nasugu gbalus te, “Tam Fun Isus gayudan.” 35Ay rodi at nasugu fag duwa nataban wa fiya ka fag asnu sas Isus, ay nasagmak at ngay falefe sas tungud guyuy asnu, ay nafasakay Isus sanya. 36Ay kaduge gsakay, ngayuk taw sanya at narafad at ngay falefe sas Isus ngaba dalan. 37Ay Isus nu gakadagaun wa Bugsul Ulibu, makbang wa nu gadasugun sas Erusalem, fagayu at ngay tagadal gbiya nu gelongan guseganan ay gseg sas Diyus, teway ebi ataw ngayu wan at nalag Isus at madaragang fag fagbulun. 38Glong te, “Segi tam Diyus! Tam Diyus tumarabang tuwa sa takadasug fag Fun. Manabayan sas banwa.”

39Ay tibak taw Parisiyu sis wa taw fagngayuwan nalong sas Isus te, “Takamoyung, salagi am ngay tagadal.” 40Ay Isus nabalus te, “Igfoyung kwa ayu te, kanya fag ngay taw nu dway gelongan, ste wa ro fag ngay batu at taguseganan.”

41Ay Isus nu makbang wan ay glag wan fulan Erusalem, kanya guyway anway kafanyu. 42Ay Isus nalong te, “Satu ro nasaful wam te, daginan tagfon fagmanabayanun, ay roro yam nasaful, masuksukan yay sa ayu. 43Umdasug ban sik ngay menit, ay ngay fabarangyan sumafungan ay fulan, laman wam e fakalfasan. 44Ay gfate ban ayu anggan ay ngay sisiyan. Ay wa ban e batu gtudtungudan, anway wam nasaful te, Diyus indasug wa sa ayu.”

Isus Nalanu Diyus Bale

(Mat. 21:12-17; Mar. 11:15-19; Uan 2:13-22)

45Ay Isus nasakbo sas Diyus bale ay naayan fagayu tagfabili sanya. 46Ay nalong te, “Diyus at longan marirukan te, ‘Ku bale faggugat sik bale daranginan wadi.’#19:46 Isayas 56:7. Ay roro mangaro ku bale nafasik fagsuksuwan way am ngay takamul.”

47Ay fagayu menit Isus igfoyung sis Diyus bale. Ay ngay fun taganyun, ay ngay tagfoyung Muisis at Suguwan, ay anggan ngay tagfangguna sanya fag fulan, igsulitanan te, “Tain nu gfafate tam Isus?” 48Ay wa gsaful te, tain ban at fagbulun, anway ngay taw kaumsig tuway dawdaw gdungug sas Isus at foyungan.

Currently Selected:

Lukas 19: TAWEAST

Highlight

Copy