Lukas 22

Taw Udyu at ngay Tagmagurang Kamasadan Gananfateun Isus

(Mat. 26:1-5; Mar. 14:1-2; Uan 11:45-53)

1Ay katsi makbang wan at fagmafulun sa baliwas Tinafay at yud e Famadaul. Ay tibak taw nu gngayan, fagmafulun sa baliwas Tagfabarita nu Glangfe. 2Ay at ngay taganyun daul ay at ngay tagfoyung Muisis at Suguwan gamatangan te, “Setain ban siring nu gfafate tam Isus?” At fagnamatanganun katanya, teway kalimu ngay taw.

Udas Igfadiyuganan Gananfoyungun Isus sas Mauri fag ngay Taw

(Mat. 26:14-16; Mar. 14:10-11)

3Ay ginanya Satanas nafaamatanganan Udas Iskaryute, kanya wan at sadi at Nasugu fag Labi Duwa. 4Ay Udas nananlag wa sa sangay taganyun daul ay anggan sa sangay fun sirut tagulit Diyus bale. Ay ginto te, “Setain ro nu gfoyung aw ayu te, kanya Isus.” 5Ay ka fag ngay taw inkumsig dawdaw Udas at longan. Ay nalong sas Udas te, “Nanfon ami emu singku.” 6Ay Udas gamatangan te, “Ginain fag lungud laman nanfoyung ban aw Isus sanya fag ngay taw, kaduge at ngay taw gyud gsaful?”

Nu Gfamasadan Isus At Yafun

(Mat. 26:17-25; Mar. 14:12-21; Uan 13:21-30)

7Ay indasug at fagmafulun sa baliwas Tinafay at yud e Famadaul. Ginanya taw Udyu nu gfate tupa laman at fakonun gina gamatangan at fagmafulun sa baliwas Tagfabarita nu Glangfe. 8Ay Isus nasugu Pedru ay Uan te, “Loi wan ay famasadani tam fakonun laman sa tam fagmafulun sa baliwas Tagfabarita nu Glangfe.” 9Ay kanya nainto sas Isus te, “Dada ro am fakaumsigun nu kamasadan ro ami?” 10Ay Isus nalong te, “Nu ndasug wam sas fulan Erusalem, sanya gfablang ro am sik ama tagubanan sik baringan mamam. Ay aloi anya sat fagsakboan fag bale. 11Ay intoi sa tagbilug bale te, ‘Tam Takamoyung ginto sa emu te: dada ro manga fag silid nu gfangon aw gfasfuwan ku ngay tagadal gina ami nangamatangan fagmafulun sa baliwas Tagfabarita nu Glangfe?’ 12Ay kanya moyung ro sa ayu sas tagbiya fag silid sat tungud. Sanya e ngay fagnuwan ayuwayu. Ay sanyai nu kamasadan am tam yafun.” 13Ay ka fag duwak tagadal nalo wan. Ay at nalag kata wa fiya aro ataw Isus at longan. Ay sanya wa fiya nu gfamasadan at yafun.

Isus At Yafun

(Mat. 26:26-30; Mar. 14:22-26; 1 Kur. 11:23-25)

14Nu ndasug wa ginanya fag buknga, Isus malunggung gfangon gfasfuwan at ngay Nasugu. 15Ay Isus nalong te, “Kaumsig aw dawdaw gfasfuwan ayu kon, gina tam gamatangan at fagmafulun sa baliwas Tagfabarita nu Glangfe, gina yud e nanfauri angku. 16Anway glong aw ayu te, kwa ban gdog kon takatatuy fag yafun yap ngay ban umgurungan ka fag yafun at masuwad gina Diyus nu gmagurang taw.” 17Ay Isus nabul sik taya at ke safa ay nafauseganan sas Diyus. Ay nalong te, “Na, inumi ay afudani sa ay iba. 18Glong aw ayu te, kwa ban gdog ginum tuy yap ngay ban umdasug Diyus nu gmagurang taw.” 19Ay Isus nabul yangay fiya sik tinafay ay nafauseganan sas Diyus. Ay nafanramyukan ay nafon sat ngay Nasugu ay nalong te, “Tuy ku bilug wan. Nafon aw ku bilug laman e fanambagun am. Faningi ban ku fagbulun, laman sik fagamatanganun ban sa angku.” 20Ay katanya yangay, nu ntabu wa nu kon, Isus nabul sik taya at ke safa. Ay nalong te, “Tuy fag safa at masuwad, sik bagu fag fatuyanan sas Diyus ay sas taw, ku taguk at nafatvngvd, ay at kumbusbus ban laman gfalyam ay ngay asalanan.

21“Ay linggati! At namoyung ro angku ste wan tagfasfuwan angku sis fagfangonan. 22Aw, Taw at Baguwama, ku fagnangateun laman umgurungan Diyus at fasadan. Ay roro mafanyu ban ka fag taw at nafoyung angku sat mauri fag ngay taw.” 23Ay at ngay tagadal gidgintoan sit dayu te, “Sinu ro si antam tagfagbulun aro Isus at longan?”

At ngay Nasugu Igbadbaboan te, “Sinu ban Tam Tiba Tungud?”

24Isus at ngay Nasugu gbadbaboan te, “Sinu ban tam tiba tungud?” 25Nu katanya, Isus nalong te, “At ngay fun sa sangay talun ke fagmadaragangun sat ngay taw. Kanya fagayu kaumsig dawdaw at ngay taw nu gseg anya te, ‘Masine tuwa tam fun.’ 26Ay roro dangay am katanya. Antuwa baliwa te, am at tiba tungud, kanya katai sik sisiyan. Ay at tagfangguna kanya katai ay fanuguwan. 27Go inday manga fag duwa at tiba tungud? Go kanya at malunggung sat fagfangonan? Ay go ate kanya tagubanan fakonun? At malunggung, go kin? Aw wan tagufud ayu kata sik tagubanan.”

28Isus glong yay te, “Am wan at tagufud angku faggugat gina aw e natakan. 29Ay nus nga setain ku Mama nu nafon sa angku sik fagmagurangan, katanya kyangay nanfon ban aw sa ayu sik fagmagurangan. 30Kon ay ginum ban am sa ku fagfangonan sa ku fagmagurangan. Ay nanmagurang ban am ay nanfili te, go Israel at labi duwak fulan taw at fagbulun, masine tuwa ay ate mauri way?”

Isus Naguna Nafoyung Pedru nu Kamayud sa Anya

(Mat. 26:31-35; Mar. 14:27-31; Uan 13:36-38)

31Isus glong te, “Simun, Simun, dungugani ku longan. Matvngvd Satanas nu get laman nanfaskud ayu fagayu, kata sik taw nu gyapyap sik fare, laman nanfalayug at mafis. 32Ay dewa katanya, nadarangin akwa emu, laman am fagafanudun di malyam. Ay nu gdog yay o kafoli sa angku, fatvngvdi am ngay fadugsay at fagafanudun.” 33Ay Pedru nalong sas Isus te, “Ku fun, mafamasadan akwa nangufud emu dewa sas bale sungsungan ay dewa e fate anta.” 34Ay Isus iglong anya te, “Pedru, sik tabag bagu tumarakit katsi fag yabi, tulu ginan ro nu kamayud o te, wo gsaful angku.”

Famasadani

35Ay Isus nalong sat ngay Nasugu te, “Ebi gina aw gsugu ayu, ay gina am glo, wam e uba fagsuwadan singku, ay ambag, ay sinilas. Go e fagayudanun am?” Ay at Nasugu nabalus te, “Yaya. Di ami e fagayudanun.” 36Ay Isus nalong yangay te, “Ay katsi, nus nga sinu si ayu nu e fagsuwadan tuwa singku ubai. Ay nus nga sinu si ayu nu dway e fiso, fabilii yap at balukas ay bilii sik fiso. 37Anway glong aw ayu te, umgurungan wa ban fiya sa angku at marirukan sis Diyus at longan te, ‘Natap anya kata sik tagasalanan.’ Ay fagayu at marirukan sis Diyus at longan katsi gakagurunganun wan.” 38Ay kanya fagayu nalong sas Isus te, “Em Fun, tuy wan duwak fiso.” Ay Isus nalong te, “E kin. Sak wan.”

Isus Igdarangin

(Mat. 26:36-46; Mar. 14:32-42)

39Ay Isus nalo wan sas Bugsul Ulibu, kata at ugali gugat. Ay at ngay tagadal naalo yangay anya. 40Ay nu ndasug, Isus nalong sat ngay tagadal te, “Darangini laman di am gafaskudan sas asalanan.” 41Ay Isus nalo wa sat dayu. Ay garungan sas daga ay igdarangin te, 42“Mama, nu kaumsig o, falangfei yap angku sanya ginan fag mataka tagadasugun. Ay roro bunwa ku fakaumsigun ku fagfaningun, am fakaumsigun tuwa.” [43Ay rodi nsure sas Isus sik tagfabarita siginans banwa, ay nafatvngvd Isus at amatanganan. 44Ay Isus gatakan sat amatanganan, ay matvngvd dawdaw nu gdarangin. Ay at fangenit kata wa sik taguk nu nasiksik sas daga.]

45Ay Isus inlindug, ay nananlag sat ngay tagadal. Ay manlag di gtiyug way, anway kabalu. 46Ay Isus nalong te, “Taw ro ay fagtiyugun? Alunggungi wan ay darangini laman di am gafaskudan sas asalanan.”

E Nagamat Isus

(Mat. 26:47-56; Mar. 14:43-50; Uan 18:3-11)

47Ay gina Isus gelongan, rodi tv ndasug wa daw sik ngay taw ayuwayu. Ay Udas, sadi at Nasugu fag Labi Duwa, tagfangguna at tiba. Ay Udas inkakbang sas Isus ay naayuk. 48Ay Isus nalong Udas te, “Go am fagayukun angku, Taw at Baguwama, namoyung o angku sas mauri fag ngay taw?” 49Ay at ngay tagufud Isus nasaful wan at ngay bagu kadasug at fagbulun ro. Ay kanya get sas Isus te, “Em Fun, go masing wami?” 50Ay rodi at sadi nabasing fun taganyun at fanuguwan at siyun baliwa fag talinga ay naayas way sigad. 51Ay Isus nalong te, “Lagi, lag katanya!” Ay Isus nated ka fag taw talinga ay nafafiya.

52Ay ngay taganyun daul, ay ngay fun sirut ngay tagulit Diyus bale, ay anggan taw Udyu at ngay tagmagurang indasug laman nan-gamat Isus. Ay Isus nalong sanya fag ngay taw te, “Go gubanan am ay ngay fiso ay ay ngay famalang laman nan-gamat am angku kata sik takamul? 53Ay madyay kayu menit kayu menit gufud akway ayu sas Diyus bale. Ay madyay wam nated angku ginanya. Ay fakatanyaun, katsi wan ay buknga, gina at marum gmagurang.”

Pedru Kamayud te, wa Gtoglag Isus

(Mat. 26:57-58,69-75; Mar. 14:53-54,66-72; Uan 18:12-18,25-27)

54Ay ka fag ngay taw nagamat wa Isus ay nataban sas fun taganyun at bale. Ay Pedru ngayayu yay nu gaguyanan. 55Ay at ngay taw sanya nafaigang sik afuy sis wabilug faglanuwan ay malunggung sanya. Ay anggan Pedru malunggung yangay maful sanya. 56Ay rodi sik fanuguwan fag baguyna nalag Pedru sisad damlag afuy. Ay nu nafatuyan wa anya, glong te, “Kanya wa fiya fag taw at sadi at tagufud Isus.” 57Ay Pedru kamayud te, “Yaya long! Sena, kwa gsaful te, sinu am longan fag taw.” 58Ay rodi sadi yak taw nalag anya, ay nalong yay fiya te, “O wa fiya at sadi Isus at ufud.” Ay Pedru nalong te, “Yaya, bunwa long aw.” 59Ay rodi nu sik kadugayan wan, sadi ya fiya ktaw matvngvd nu nalong te, “At matuyan, kanya wa fiya at sadi Isus at ufud, madyay sik taw Galiliya yangay.” 60Ay Pedru nalong yangay te, “Sama, yaya long. Kwa gsaful am longan at masuwad.” Ay kaduge gelongan tabag natarakit. 61Ay rodi tv tam Fun Isus inbiling ay nalinggat Pedru. Ay Pedru namatang tam Fun Isus at longan, gina glong anya te, “Tulu ginan ro nu kamayud o angku, bagu tabag tumarakit.” 62Ay Pedru nalaklo wan, ay guyway dawdaw anway matvngvd nu kabalu.

E Gfalingun ay e Gfalang Isus

(Mat. 26:67-68; Mar. 14:65)

63Ay ka fag ngay taw tagulit Isus igfalingun ay igfalang anya. 64Ay natabun Isus at mata, ay nafalang, ay ginto anya te, “Foyungi emi te, go sinu at nafalang emu?” 65Ay ngayu yay at longan at mauri sas Isus baliwa kaduge gfalang.

Isus sa was Taw Udyu Tiba Tungud Tagmagurang

(Mat. 26:59-66; Mar. 14:55-64; Uan 18:19-24)

66Ay ginas balabag sirut, taw Udyu at ngay tagmagurang inful: at ngay taganyun daul ay at ngay tagfoyung Muisis at Suguwan. Kanya fagayu nataban Isus sas taw Udyu at Tiba Tungud Tagmagurang, ay ginto Isus te, 67“Go o wan Diyus at nafili fag Fun? Foyungi emi.” Ay Isus nalong te, “Dewa ngap ro aw nafoyung ayu, wa ro am gafanud. 68Ay dewa ngap ro aw ginto ayu, wa ro am gbalus. 69Ay dewa katanya, katsi ban aw wan, Taw at Baguwama, malunggung ban aw sas Diyus at Madaragang at siyun baliwa fag day tigyangan.” 70Ay kanya fagayu ginto yangay sas Isus te, “Nu katanya, go o wan Diyus at Baguwama?” Ay Isus nabalus yangay te, “Am wan at nalong takatanya.” 71Ay ka fag ngay taw nalong sa tiba te, “Katsi dewa yud wan tagfatuyan antam Isus at asalanan, anway itam wa fiya fiya at nadungug at longan.”

Currently Selected:

Lukas 22: TAWEAST

Highlight

Copy