2 Wakorintho 6
6
1Ndamu isi sa wadei kazi ngila mojori na Mlungu, tendemvoya inyo mpatile mbazi ya Mlungu simwaihakile bule. 2Kwani Mlungu waghora:
“Kele ngelo ifweni nekusikile,
Kele ngelo ya ukizi nekuwarure.”
Zighana! Ndamu niyo ngelo ifweni, zighana lelo nilyo ijua lya ukizi.
3Sitimwikilagha mundungi kindu chemukwalisa, eri kazi yetu siyaoneke na makosa ghengi. 4Ela isi sa watumishi wa Mlungu taonyeza kwa kila ngila, kurumaghia kwetu kele matiriro, wasi na masirimi. 5Kele kukwito kwetu, kufungo na kudiilo; kwa kudea kazi na ndighi; kwa kusowa haring'a na kusowa chakulya; 6kwa ueli ghwetu na kumanya kwetu, kwa kurumaghia na ngolo yaloli, kwa undu ghwa Roho wa Kuela, na mashayo gha fulo. 7Tikeghora ilya fulo, kwa undu ghwa ndighi za Mlungu ngila mojori na mata za hachi kele mkonu ghwa kijo na ghwa kimosho. 8Kele kuhawo ishima na kumenyeso, kele kughoro laghelaghe na kughoro kirani. Tatalo sa waghori ndimi, ela nisi waghori fulo; 9tio sa wandu siwemanyikane, ela wamanyikane kwa wandu wose, tio sa wandu wafwile, ela tio moyo, tio sa wandu wekwitogho, ela siweulaghogho, 10tio sa wandu wetirirogho, ela kila ngelo tana maboelo, tio sa wandu wakiwa, ela tawadea wandu wengi kukala wazuri wa mali, tio sa wandu sitewesi kindu chingi, ela tana vindu vose.
11Wakorintho, Isi taghora mwazi mwazi kwenyu, ngolo zetu zio mwazi. 12Gasi yetu ngolo zio mwazi, inyo ninyo mwatirugharira ngolo zenyu. 13Ndamu naghora sa tatio, Rughureni ngolo zenyu nanyose.
Ionyo ighulu ya kuirima gha wandu siweo wa Mlungu
14Simwawatane na wandu siwedumuse. Kwani hachi na makosa ghanawatanagha? Mlangazi ghwanawatanagha na kiza? 15Kristo udimagha ije kusikilana na Shetani? Uyu adumuse udimagha ije kusikilana na uyu sedumuse? 16Hekalu ya Mlungu yadima ije kusikilana na sanamu za wandu siwedumuse? Kwa kukala isi nisi hekalu ya Mlungu ewo moyo selyi kwenyi Mlungu aghora,
“Nijekala kwawe na kuselanya nawo;
Nijekala Mlungu wawe nawo wejekala wandu wangu.
17Kwa hung'u fumeni ghati yawe
na mukusaghule, waghamba Bwana,
simwawate icho chiluwe;
nemi nijemuhokera.
18Na nikalagha Aba wenyu
nenyo mjekala wana wangu wa kialume na wa kiwake,
waghamba Bwana wa Ndighi.”
Currently Selected:
2 Wakorintho 6: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993