Madeo 14

Paulo na Baranaba alye Ikonio

1Nao alye Ikonio malagho ghakakala ukwenyi. Paulo na Baranaba wakaghenda kele sinagogi ya Wayahudi, wakahelea hata Wayahudi na Wagiriki wengi wakadumusa. 2Ela Wayahudi walye siwedumuse wakashoterea wandu wa mbari nzima na kughalula ngolo zawe ighulu ya walye wana wakwetu. 3Nawo watumo wakakala alye luma. Wakaghora gha Bwana siwewesi wogha ghungi. Naye kaghudea uvoro ghwake ghwa mbazi kukala ghwa fulo kwa kuwahawa ndighi yedea wana mwakilimbita na mashiniko. 4Nao wandu wa muzi wakasarikana wamoju kwa Wayahudi na wamoju kwa watumo.

5Nao wandu wa mbari nzima na Wayahudi ngila mojori na vilongozi vawe, wakashaya kuwatirira watumo, kwa kuwalasa na mawe. 6Nao watumo waghenda wamanya wakakimbila Listra na Derbe, mizi ya Lukaonia na isanga lyeimarire. 7Nawo wakachila Ilagho Lyaloli alye.

Paulo na Baranaba alye Listra na Derbe

8Nao alye Listra koluo na mundu mumoju akelemele maghulu hata seluo kedima kughenda kufuma unake ghwake. 9Uyu mundu okalile kitembo kemusikizila Paulo selyi eluo keghora. Paulo amuzighana ushu, kaona wadumusa kamba wadima kubowa. 10Kamuza na lwaka lubwaa, “Uka kimusi kwa maghulu ghako.” Naye ulya mundu kauka kimusi kadyowa kughenda. 11Nao makoghano waona ghalye ghadeilo ni Paulo, wakadyowa kukema kele kiteto cha Kilukonia. “Milungu yaselela na kutijila sa wadamu” 12Wakamwita Baranaba Zeu na Paulo wakamwita Hermes, kwa kukala niye eluo mughori mubwaa. 13Nao mkohani wa Zeu uyu Hekalu yawe yeluo shighati ya muzi, kaleta njau na maluwa kele mbengele. Naye ngila mojori na makoghano weshaile kuwafunyila watumo sadaka. 14Ela Baranaba na Paulo waghenda wasikila selyi weshaile kudea, wakarashura nguo zawe, wakakimbila kwa makoghano wekekema, 15“Kudani mudeagha hung'u? Natose nisi wadamu senyo, Tendemuletela Ilagho lyemughalusa kufuma ivi vindu sivefweni hata kwa Mlungu ewo moyo, uyu aumbile mlunguni na isanga na bahari na vose vio aomweni. 16Naye kokale osighile wandu wose waghende kikwawe. 17Ela lyingi sasighile kukuonyeza kwa kudea ghaloli, niye amunyesela mvula kufuma mlunguni na viro kele vilimo vake; wanamuhawagha chakulya na kujuza ngolo zenyu maboelo.” 18Na kwa malagho agha, kwa wasi, watumo wakawadea makoghano siwawafunyile sadaka.

19Nao Wayahudi wamoju wekeja kufuma Antiokia ya Pisidia na kufuma Ikonio, Wakawaghalula makoghano gasi yawe, wakamlasa Paulo na mawe na kumukurughusa hata shighati ya muzi, wekeghelela wafwa. 20Ela wairimi wakamumara girigo, naye auka kauya kele muzi ghulya. Nao ilyo ikesho, iye na Baranaba wakaghenda Derbe.

Kuwuya Antiokia ya Siria

21Paulo na Baranaba wakachila Ilagho Lyaloli Derbe, na wakadea wengi kukala wairimi. Nao ima wakauya Listra na Ikonio, nama wakaghenda Antiokia ya Pisidia. 22Nawo weluo wekewafungisa ndighi wairimi na kuwakumba ngolo yekala wa fulo kele idumusi. Wakawauza, “Ni suti tiitile kele masirimo mengi eri tingile kele Uzuri ghwa Mlungu.” 23Nawo kele kila ikanisa wakasaghula waghosi; na kwa kulomba na kufunga wakawaika mikonuni kwa Bwana uyu wamudumuse.

24Nao nyuma ya kuita isanga lya Pisidia, wakafika Pamfulia. 25Wakachila Ilagho Lyaloli Perga ima wakaghenda Atalia, 26na kufuma aho wakajoka melini wakauya Antiokia andu weikilo kele mikonu ya Mlungu kwa kazi iyo waikatisa.

27Nao waghenda wafika Antiokia wakawakoghanya wandu wa ikanisa ngila mojori na kuwaghorera ghose Mlungu adeile kwawe na selyi afungule mjango ghodumusa kwa mbari nzima. 28Nawo wakakalanya na walye wadumuse kwa ngelo ndele.

Currently Selected:

Madeo 14: SAGALLANT

Highlight

Copy