Madeo 6

Wawaruri mfungate wa watumo

1Nao ko nyuma ilyi isabu lya walye wadumuse lyeluo lyikejuzilika, kukakala na manung'uniko ghati ya awa weluo wekeghora Kigiriki na walye weluo wakeghora Kihebrania. Walye weluo wekeghora Kigiriki weluo wekenung'unika kamba wake wafwililo ni walume wawe, siweluo waketalo ngelo kusarogho mahitaji gha kila ijua. 2Kwa hung'u watumo ikumi na waili wakawapang'a walye wandu wadumuse wose andu kumojori, wakaghora, “Si kirani kungi kwetu isi kusigha kuchila ilagho lya Mlungu eri tisareghe mahitaji. 3Kwa hung'u, wana wakwetu, saghuleni wandu mfungate ghati yenyu weo waloli na wajule Roho wa Kuela na suku, nesi tijewaika kwa kazi iyi. 4Ela isi tijekufunya putu kele kulomba na kuchila ilagho.”

5Nao wose wakaboelo ni ghalye ghaghoriro ni watumo. Wakamusaghula Stefano, mundu ejule idumusi na Roho wa Kuela, Filipo, Prokoro, Nikonora, Timona, Pananasi na Nikolas wa Antiokia eghaluke kele dini ya Kiyahudi. 6Nao wakawaika hambiri ya watumo, nawo wakawalombela na kuwaikilila mikonu. 7Nao Ilagho lya Mlungu lyikajuzila kuera na isabu lya wairimi Jerusalemu lyikajuzilika kukala ibwaa na wakohani wengi wakadumusa.

Stefano kuwato

8Naye Mlungu omubarikie Stefano na kumhawa ndighi zedea wana mwakilimbita na mashiniko kwa wandu. 9Ela wandu wamoju wakakala kinyume chake. Awa ni wandu wa sinagogi ya wandu weluo huru, nawo ni Wayahudi wefumile Kurene na Alekzandaria na wamoju wafumile Kilikia na Asia. Wakadyowa kudeelana nganyi na Stefano. 10Ela siwadimile kumwisa Stefano, kwani Roho omuhawile suku yeghoranya nawo na siwamusime. 11Kwa hung'u, wakalipa wandu wamoju kwa kiviso waghore, “Tanamsikile Stefano keghora laghelaghe ighulu ya Musa na Mlungu.” 12Kwa ngila iyi wakakumba wandu sheshe ngila mojori na waghosi na walimu wa Sheria, wekeja wakamwata Stefano na kumughenza hambiri ya Baraza. 13Nao wakaleta washahidi wa ndimi waghorire, “Mundu uyu sasighagha kughora laghelaghe ighulu ya andu aha kwa kuela na ighulu ya Sheria za Musa. 14Tanamsikilagha keghora kamba uyu Jesu wa Nazareti uhakilagha andu aha na kughalula ada tihawilo ni Musa.” 15Nao wose weluo kele Baraza wakamukulila meso Stefano, nawo wakaona ushu ghwake kukala sa ushu ghwa malaika.

Currently Selected:

Madeo 6: SAGALLANT

Highlight

Copy