Madeo 8

1Na Saulo oonile ni kirani aulagho.

Saulo kutirira ikanisa

Nao lyilya ijua lyenyi ikanisa lya Jerusalemu lyikadyowa kutiriro. Wandu wose wedumuse, sala watumo wakasaghasagha kele isanga lya Judea na Samaria. 2Wandu wamshaile Mlungu wakamzika Stefano, wekemlilila na ndighi.

3Ela Saulo katima kusirimisa ikanisa, keghenda nyumba kwa nyumba na kuwakurughusa awa wadumuse, walume kwa wake, na kuwangiza kifungoni.

Ilagho Lyaloli kuchilo Samaria

4Nao walye wadumuse wakasaghasagha na kughenda kila andu, wekechila ilagho. 5Filipo kaghenda kele muzi ghwa Samaria kamuchila Masihi kwa wandu wa alye. 6Nawo wandu kwa ngolo mojori wakasikila selyi Filipo eluo keghora na kuona wana mwakilimbita eluo keidea. 7Pepo zeluo zikefuma wandu kwa kukema, awa wekelemele na weluo wekeshoghora wakaboeso. 8Kwa hung'u kukakala na maboelo kele ghulya muzi.

9Nao kele ghulya muzi koluo na mundu mumoju aitogho Simoni, naye ko hambiri oluo msai na kwa usai ghwake kadea malagho ghawashinise Wasamaria, kekudea kukala mundu mubwaa, 10na wandu wose wa muzi, wabwaa na wachache wakamusikizila, wakeghamba, “Iye ni ndighi za Mlungu ziitogho, ‘Ndighi Mbwaa.’” 11Kawashinisa na usai ghwake ngelo ndele na kwa hung'u wakamsikizila. 12Ela waghenda wadumusa malagho gha Filipo ighulu ya Ilagho Lyaloli lya Uzuri ghwa Mlungu na izina lya Jesu Kristo, wakabatizo, walume kwa wake. 13Hata Simoni naese kadumusa; naye aghenda abatizo, kakalanya na Filipo; kashiniso ni alama na wana mwakilimbita weluo wekedeo.

14Nao watumo weluo Jerusalemu wasikila kamba Wasamaria wawata ilagho lya Mlungu, wakawatuma Petro na Johana kwawe. 15Nawo waghenda wafika wakawalombela awa wadumuse eri wapate Roho wa Kuela. 16Kwani Roho wa Kuela okaile kuselela kwa wengi wawe; ela weluo wabatizo tu kwa izina lya Bwana Jesu. 17Nao Petro na Johana wakawaikilila mikonu, nawo wakapata Roho wa Kuela. 18Nao Simoni aghenda aona kamba wandu wapata Roho wa Kuela kwa kuikililo mikonu ni watumo, kashaya kuwahawa pesa Petro na Johana, 19keghamba, “Nihaweni izi ndighi namose, eri kila mundu nimwikililagha mkonu apate Roho wa Kuela.”

20Ela Petro kamtumbulila, “Fwa noko na pesa zako, kwa kukala waririkanya wadima kughula inosi lya Mlungu na pesa. 21Suwesi ifungu lyingi hata hachi kele ilagho ilyi kwa kukala ngolo yako siyaloli ingi hambiri ya Mlungu. 22Kwa hung'u riha ughu ulaghelaghe ghwako na umulombe Bwana akufwile waya kele maririkanyo sa agha. 23Kwani naona wanajule iziso, sa usungu ghwa nyongo na nuwe mfungo wa kaung'a.” 24Simoni kamuza Petro na Johana, “Namvoya munilombele kwa Bwana, kamba ilagho lyingi selyi mwaghora silyanipate.”

25Nao waghenda wawashuhudia na kuwaghorera ilagho lya Mlungu, Petro na Johana wakauya Jerusalemu. Nawo wekeuya wakachila ilagho lyaloli kele mizi ya Samaria.

Filipo na ofisa wa Ethiopia

26Nao malaika wa Bwana kamuza Filipo, “kubambanye ughende kusini kele barabara ifumagha Jerusalemu kughenda Gaza.” (Iyi ni barabara ya kireti). 27Nao Filipo kakubambanya kaghenda. Naye kamwona Muethiopia mumoju koloi kegala. Uyu mundu oluo mubwaa wa pesa zose za kandake ango malikia wa Ethiopia. Naye oghendile Jerusalemu kutasa Mlungu, naye oluo kegala ewo ighulu ya igari lyake lyeruto. 28Ilyi eluo kitembo igarini, oluo keshoma chuo cha tondolo Isaya. 29Nao Roho wa Kuela kamuza Filipo, “Sughuta avui na ilyo igari ughendanye nalyo.” 30Filipo kalyikimbilila lyilya igari kamusikila ulya mundu keshoma chuo cha tondolo Isaya, kamukotela, “Ado, watambukilo ni agho ushomagha?” 31Nao ulya mundu katumbulila, “Nitambukilogho ije ikakala mundungi senimanyise?” Nao kamlomba Filipo ajoke akalanye naye alye igarini. 32Na Mawandiko gha Kuela eluo keshoma ni agha:

“Sa ng'onzi ighenzogho kuulagho,

sa ng'onzi siyebeyagha ngelo ipasogho makushu.

Saghorire ilagho lyingi.

33Kasholelo na kuimo hachi yake,

Sikwesi mundungi echimanyagha kivali chake,

Kwani umana ghwake msangeni ghwadua.”

34Nao ulya mundu kamuza Filipo, “Nighorere, ni gha ani agha tondolo eghoragha? Ondeghora ghake ghenyi ango gha mundu mzima?” 35Nao Filipo kadyowa kuhelea naye kwa kutumia agha Mawandiko gha Kuela, kamghorera Ilagho Lyaloli lya Jesu. 36Nawo ilyi weluo wekeghenda kele barabara, wakafika andu koluo na meji, naye ulya mundu kaghora, “Meji sagha, Ndamu nini chiniimagha kubatizo?” [ 37Filipo kamuza, “Wadima kubatizo ilyi wadumusa kwa ngolo yako yose.” Naye katumbulila, “Nadumusa kamba Jesu Kristo ni Mwana wa Mlungu.”] 38Nao ulya mundu kaghora igari lyimangiso, na wose waili Filipo na ulya mundu wakajika mejini, naye Filipo kamubatiza. 39Nao waghenda wafuma mejini, Roho wa Bwana kamudea Filipo auke alye. Naye ulya Muethiopia sadimile kumona sena, kaghenda ngila yake keboelo na ndighi. 40Filipo kaonekana Azoto, naye kaita kechila Ilagho Lyaloli mizi yose hata kafika Kaisari.

Currently Selected:

Madeo 8: SAGALLANT

Highlight

Copy