Johana 10
10
Ikataniso lya mlisa
1“Fulo namuza, uwo wose sengilagha na mjango ghwa ng'onzi chagheni, ela wajokela andu kuzima, ni kiting'a na muvekuri. 2Ela uyu engilagha na mjango ni mlisa wa ng'onzi. 3Mrindiri mjango umurughuriragha; na ng'onzi zisikilagha lwaka lwake, naye wazipang'a kwa mazina ghawe na kuzilongoza shighati. 4Naye ilyi azifunya shighati zose, wakayaya, na ng'onzi zamwirima, kwa kukala zanaweni lwaka lwake. 5Sizidimagha kumwirima mugheni kungi, ela zijemukimbila, kwa kukala siziweni lwaka lwa mugheni.”
6Jesu owaghorere ikataniso ilyi, ela siwatambukilo agha eluo keghora.
Jesu mlisa waloli
7Nao Jesu kawauza sena, “Fulo namuza, Imi nigho mjango ghwa ng'onzi. 8Wazima wose wajile hambiri yangu weluo ni viting'a na wavekuri; ela ng'onzi siziwasikile. 9Imi nigho mjango, uwo wose engilagha kwa imi ukilagha, naye ujengila na kufuma na apate maliso. 10Kiting'a wanakujagha eri aiwe na aulaghe na ahakile. Imi nanajile eri mupate umana na mpate ghwaenga.
11“Imi nimi mlisa waloli, mlisa waloli wanafunyagha umana ghwake kwa undu ghwa ng'onzi. 12Mundu wa mafungu na seo mlisa, na hata ng'onzi sizeo zake, kaona turugha ikeja, wasigha ng'onzi na kukimbila, nayo turugha yaziwata ng'onzi na kuzisaghisa. 13Wakimbila kwa kukala ni mundu wa mafungu na setalagha ng'onzi. 14Imi nimi mlisa waloli. Nanaweni ng'onzi zangu, nazo zananiweni. 15Selyi Aba aniweni imi, nemi nimweni Aba; nemi nafunya umana ghwangu kwa ng'onzi 16Na nio na ng'onzi nzima sizeo kele uranu ughu; nazose ni suti nizilete na zisikile lwaka lwangu. Eri zikale uranu ghumojori na mlisa mumojori.
17“Kwa undu ughu Aba wananishaile, kwa kukala nafunya umana ghwangu eri nighupate sena. 18Sikwesi mundungi eghuusagha kufuma kwangu, ela naghufunya kwa kushaya kwangu imi mwenyi. Nio na ndighi yeghufunya na nio na ndighi yeghuusa. Agha nigho Aba ashaile nidee.”
19Nao kukakala na kusarikana kwa Wayahudi kwa undu ghwa malagho agha. 20Wengi wawe wakaghora, “Uwo na pepo, na wana mutu! Mumusikizila wani?” 21Wamoju wakaghora, “Agha si maghori ghengi gha mundu ewo na pepo. Mundu wa pepo wadima kufungula meso gha kifondo?”
Kulegho Jesu
22Nao ngelo ya ishika ilyi koluo na karamu ya ukumbuso ghwa kuiika Hekalu kwa Mlungu alye Jerusalemu; 23Jesu oluo keselasela Hekaluni kele baraza ya Solomoni. 24Nao Wayahudi wakamtindirira na kumuza, “Utiika sitemanyagha hata nini? Ngera nuwe Masihi tighorere mwazi.”
25Jesu kawatumbulila, “Nanamughorerere, na simudumuse; kazi nideagha kwa izina lya Aba, zanishuhudia; 26ela simudumuse kwa kukala sinyo ng'onzi zangu zingi. 27Ng'onzi zangu zanasikilagha lwaka lwangu; Nemi nanaziweni, nazo zananiirimagha. 28Nemi nanawahawagha umana ghwa kale na kale, hata lyingi siwefwigha na sikwesi mundungi edimagha kunisoka mikonuni kwangu. 29Aba uyu anihawile ni mubwaa kuisa vose. Na sikwesi mundungi edimagha kuzifunya kufuma kele mkonu ghwa Aba. 30Imi na Aba te mumojori.”
31Nao Wayahudi wakashowa mawe sena eri wamlase. 32Jesu kawauza, “Namwonyeza kazi nyingi zaloli kufuma kwa Aba; Ndamu ni kwa iyo imudeagha munilase?” 33Wayahudi wakamtumbulila, “Sitishaile kukulasa kwa undu ghwa kazi zaloli, ela kwa kukala waghora laghelaghe ighulu ya Mlungu. Uwe nuwe mdamu, nawe wakudea uwe mwenyi kukala Mlungu!” 34Jesu kawatumbulila, “Ado siiwandiko kele Sheria zenyu, ‘Neghorire ninyo milungu?’ 35Ikakala awaitile milungu walye waletile ilagho lya Mlungu, (nagho Mawandiko gha Kuela sighavunjogho,) 36Ndamu kudani mwaghora kwa uyu aikilo na kutumo ni Aba urumenguni, kamba waghora ‘Laghelaghe ighulu ya Mlungu’ kwa kukala nanaghorire, ‘Nimi Mwana wa Mlungu?’ 37Ngera sedeagha kazi za Aba, simwanidumuse; 38ela ngera nazidea, hata sani ngera Simonidumusagha, zidumuseni kazi zenyi, eri mumanye kamba Aba uwo amweni kwangu, nemi amweni kwa Aba.” 39Nao wakatima kumwata sena, ela kafusuka kele mikonu yawe.
40Jesu kaghenda sena chambuko cha Jordani andu Johana eluo kebatiza, kakala alye. 41Nao wandu wengi wakamughendela, nawo wakaghamba wenyi, “Johana sadeile wana mwakilimbita wengi, ela malagho ghose aghorire Johana ighulu ya uyu mundu ni fulo.” 42Nao wengi wakamdumusa andu alye.
Currently Selected:
Johana 10: SAGALLANT
Highlight
Share
Copy
Want to have your highlights saved across all your devices? Sign up or sign in
(C) The Bible Society of Kenya, 1993
