Johana 14

Jesu ni ngila yeghenda kwa Aba

1Jesu kawauza, “Simwahariso ni ngolo. Mudumuseni. Mlungu, nidumuseni namose. 2Kele nyumba ya Aba kuo na makalo mengi. Ngera sikoluo hung'o, mango nimughorere kamba nendeghenda kumuboesela ulalo ghwenyu. 3Nemi nikaghenda na kuboesa ulalo ghwenyu, nikujagha sena, nimuse kwangu, eri andu nio nanyose mukale. 4Nenyo mwanaweni ngila ya andu nighendagha.”

5Thoma kamuza, “Bwana, sitiweni andu ughendagha, ndamu tiimanyagha ije ngila?” 6Jesu kamtumbulila, “Imi nimi mwenyi ngila, na fulo na umana, mundungi sekujagha kwa Aba seitilile kwangu. 7Ngera mwanimanya imi, mwamumanya Aba naese; kufuma indakwenyi mwamumanya na kumuona.”

8Filipo kamuza, “Bwana, tionyeze Aba nesi tijekato.” 9Jesu kamuza, “Luma nakala nenyo Filipo wanatulagha somweni? Uwo wose aniona imi wamwona Aba. Ndamu kudani ughoragha, ‘Tionyeze Aba.’ 10Ado sudumusagha kamba imi nio amweni kwa Aba na Aba uwo amweni kwangu? Ghore nimughoreragha imi, sizighoragha kwa udimo ghwangu ghwenyi, ela Aba ewo amweni kwangu niye adea kazi zake. 11Nidumuseni kwa kumuza kamba imi nio amweni kwa Aba na Aba uwo amweni kwangu; ango nidumuseni kwa kazi zenyi. 12Fulo kwenyi namuza, uwo wose anidumusa imi naese udeagha kazi nizideagha na hata kuisa izi ujedea, kwa kukala nendeghenda kwa Aba. 13Na icho chose, mlombagha kwa izina lyangu nijedea, eri Aba aliko amweni kwa Mwana. 14Ilyi mwalomba kindu chingi kwa izina lyangu, nijedea.

Jesu kulaga gha kuja kwa Roho wa Kuela

15“Mkanishaya, mjewata milomu yangu. 16Nemi nijemlomba Aba, naye ujemletela Mwaruri Mzima, ejekala nenyo kwa kale na kale. 17Iye ni Roho yeonyeza Fulo, sedimagha kuhokero ni urumengu, kwani urumengu sighudimagha kumwona ango kumumanya, ela inyo mwanamweni kwa kukala wanakalagha amweni kwenyu, na ujekala nenyo.

18“Simusighagha wakiwa kungi; Nimujilagha sena. 19Kumukamuka kachache, urumengu sighunionagha, ela inyo mjeniona; kwa kukala nio moyo, na nanyose mjekala moyo. 20Na ijua ilyo mujemanya kamba imi nio amweni kwa Aba, nenyo muo amweni kwangu, na imi nio amweni kwenyu. 21Uyo wose ewatagha milomu yangu na kuidea, uyu niye anishaile, naye anishaile imi ushayogho ni Aba, nemi nijemshaya na kukumanyisa kwake.”

22Juda (si Juda Iskariote) kamuza, “Bwana, kudani ukumanyisagha kwetu na si kwa urumengu?” 23Jesu kamtumbulila, “Uwo wose anishaya imi ujewata ghore zangu, naye ujeshayo ni Aba, nesi tijeja kwake na kukala naye. 24Uwo wose senishaile sawatagha ghore zangu; na ghore mwaisikila si yangu ingi, ela ni ya Aba uyu anitumile.

25“Namughorera ghore izi ngelo nitulagha tikezanye. 26Ela Mwaruri, Roho wa Kuela, uyu etumogho ni Aba kwa izina lyangu, ujemufundisa ghore zose na kumukumbusa ghose nemughorerere.

27“Namusighila sere, sere yangu namhawa, si selyi urumengu ghufunyagha kungi, namuhawa imi. Simwahariso ni ngolo na hata simwadee wogha. 28Mwanasikile selyi nimuzile, ‘Nendeghenda, ela nimujilagha sena.’ Ngera mwonishaile, macho mwaboelo, kwa kukala nendeghenda kwa Aba; andu iye ni mubwaa kuniisa imi. 29Ndamu namughorera agho ghose kihambiri, eri ngelo ghakala, mudumuse. 30Siheleagha nenyo luma kungi, kwa kukala mubwaa wa urumengu ughu ondeja. Naye sawesi ndighi ighulu yangu. 31Ela urumengu ni suti ghumanye kamba nanamushaile Aba, nemi nadea kila kindu anuza nidee Ukeni tighende noko.

Currently Selected:

Johana 14: SAGALLANT

Highlight

Copy