Luka 9

Jesu kutuma wairimi ikumi na waili

(Matayo 10:5-15; Marko 6:7-13)

1Nao Jesu kawapang'a wairimi ikumi na waili andu kumojori na kuwahawa ndighi na udimo ghogusa pepo zose na kuboesa makongo. 2Naye kawatuma kuchila gha Uzuri ghwa Mlungu na kuboesa wakongo. 3Kawauza, “Simwatwale kindu chingi mketamba, simwatwale mndata, hata kikuchu, hata chakulya, hata pesa, na simwarware nguo mbili. 4Na nyumba iyo yose mungilagha, mkale alyenyi hata mfume alye. 5Na andu kose simohokero, mkefuma ghulya muzi mughungudule vumbi iwo kele nywayo zenyu ikale ushuhuda kwawe.” 6Nao wakafuma wakaghenda mizi mizi wekechila ilagho lyaloli na kuboesa wakongo.

Herode kutambo ni malagho

(Matayo 14:1-12; Marko 6:14-29)

7Nao Mzuri Herode kasikila ghose ghadeilo, naye kakirimua, kwa kukala wandu weluo wekeghora kamba Johana Mubatizi wazuka. 8Na wamoju wekeghora Elija waonekana, na wazima kughamba ni mumoju wa wana tondolo azuka. 9Herode kaghora, “Johana nanampasile chongo, ela uyu nisikilagha malagho ghake nani?” Naye kalola ngila yemuona Jesu.

Jesu kulyisa walume elfu sanu

(Matayo 14:13-21; Marko 6:30-44; Johana 6:1-14)

10Nao watumo waghenda wauya, wakamghorera Jesu ghose wadeile. Naye kawatwala kaghendanya nawo wenyi hata muzi ghwa Bethsaida. 11Nao makoghano wamanya wakamwirima. Naye kawahokera na kuwaghorera ilagho lya Mlungu na kuwaboesa walye weshaile kuboeso.

12Nao kudyowa kuswa, walye wairimi ikumi na waili wekeja wakamuza, “Wauze makoghano waghende ngila zawe, waghende mizi mizi na mbweni wakupatile chakulya na andu kolala, kwani aha tio ni andu kwa chanya.” 13Ela Jesu kawauza, “Wahaweni chakulya walye.” Nawo wakaghora, “Tio na mikate misanu na makumba maili tu aha, ngera tighende tighule chakulya chekata awa wandu wose.” 14(Kwani koluo wandu elfu sanu alye.)

Nao Jesu kawauza wairimi wake, “Kaliseni wandu kitembo visungu visungu va wandu mirongo misanu.” 15Nao wakadea selyi wauzilo, wakawakalisa wose kitembo, 16Nao Jesu kausa mikate misanu na makumba maili, kalola mlunguni, kaibarikia na kuivunja, kawahawa wairimi wake, nawo wakawahawa makoghano. 17Nao wose wakalya wakaghuta. Wairimi wakashowa vikapu ikumi na vili va vilya vihangalike.

Petro kumghora Jesu ni Masihi

(Matayo 16:13-19; Marko 8:27-28)

18Nao ijua imoju ilyi Jesu eluo kelomba keng'weri ngelo ekezanye na wairimi wake, kawakotela, “Wandu wanaghoragha imi nimi ani?” 19Nawo wakamuza, “Johana Mubatizi, wamoju waghora Elija, na wazima waghora kamba nuwe mumoju wa wana tondolo azuka.” 20Naye kawauza, “Ela inyo mwaghora imi nimi ani?” Petro katumbulila, “Uwe nuwe Masihi wa Mlungu,”

Jesu kughora ighulu ya kusirima na kufwa kwake

(Matayo 16:20-28; Marko 8:30—9:1)

21Nao Jesu kawaonya siwamughorere mundungi malagho agha, 22kawauza, “Mwana wa Mdamu ni suti atiriro malagho mengi na alegho ni waghosi na wakohani na walimu wa Sheria, aulagho, nao ijua lya katatu azuso.” 23Nao kawauza wose, “Ngera mundungi ashaya kuniirima, ni suti akukane mwenyi, atuke msalaba ghwake kila ijua na aniirime. 24Kwani uwo wose ashaile kukiza umana ghwake ughuhaitisa, na uwo wose ehaitisagha umana ghwake kwa undu ghwangu, ughukizagha. 25Kwani mundu upatagha faida muni ilyi apata urumengu ghose na alaghaze ango akuhaitise mwenyi. 26Kwani uwo wose enifwighagha waya imi na malagho ghangu, naese Mwana wa Mdamu ujemufwa waya ngelo ekujagha na ubwaa ghwake na ubwaa ghwa Tatie na ghwa wana malaika wa kuela. 27Ela Fulo namuza, kuo wamoju weo kimusi aha siwetowagha kifwa hata waona Uzuri ghwa Mlungu.”

Jesu kughaluka fwana

(Matayo 17:1-8; Marko 9:2-8)

28Nao majua manane nyuma ya kughora agha, Jesu kawatwala Petro na Johana na Jakobo, kaghendanya nawo mughondini kulomba. 29Nao ilyi eluo kelomba kaghaluka fwana yake na nguo zake zikakala za munyange see zikang'alang'ala. 30Nao alyenyi wandu waili wakaonekana wekehelea naye, Musa na Elija. 31Nawo wewoneke na ubwaa na weluo wekehelea ighulu ya kifwa chake ichi cheluo chikatisogho Jerusalemu. 32Naye Petro na walye wekezanye weluo na haring'a nyingi, nawo waghenda wauka wakaona ubwaa ghwake na ghwa walye wandu waili wekalanye kimusi. 33Nao ilyi walye wandu waili weluo wekemsigha waghende, Petro kamuza Jesu, “Bwana, Ni kirani isi tio aha, tiwaghale vianda vitatu, kimoju chako, kimoju cha Musa na kimoju cha Elija.” Kwani semanyile lyeghora.

34Naye Petro ilyi eluo keghora hung'u iwengu lyikeja lyikawafinika na kiju chake, nao wairimi wakangilo ni wogha wabulo ni kiju cha iwengu. 35Nao lwaka lukafuma iwenguni lukeghamba, “Uyu ni Mwanwangu msaghulo wangu, musikileni.” 36Nao lwaka lumalila kughora, Jesu kasigho mwenyi. Nao wakanyamala hata siwaghorere mundungi ilya ngelo agha waonile.

Jesu kumuboesa mwanake eluo na pepo

(Matayo 17:14-18; Marko 9:14-27)

37Nao ilyo ikesho lyake, waghenda waselela kufuma mghondini ikoghano ibwaa, wakamumarira Jesu. 38Nao mundu mumoju kele makoghano kakema keghamba, “Mwalimu, nakulomba umulole mwanwangu, kwani ni mumojori! 39Naye ngelo pepo yamruha, iyo ngelo yenyi yamkemeza na kugwa vigwa na kufunya mafulo na mlomu, nayo siyimsighagha shoshoa. 40Nemi newalombile wairimi wako waifunye, ela wakalemo.” 41Jesu katumbulila, “Inyo simodumusagha na kivali chisikiriwe, nikalanyagha nenyo hata nini nikerumaghia? Mlete mwana wako aha.” 42Nao ilyi ulya mwanake eluo keja kwake, pepo ikamugwisha na kumuruha. Ela Jesu kaikemela pepo na kumuboesa ulya mwanake, na kumuuja kwa tatie. 43Nawo wandu wose wakashiniso ni udimo ghwa Mlungu.

Jesu kughora sena ighulu ya kifwa chake

(Matayo 17:22-23; Marko 9:30-32)

Nao ilyi weluo wekeshiniso ni ghalye ghose adeile, Jesu kawauza wairimi wake, 44“Sikileni agha nighoragha ndamu; Mwana wa Mdamu ungizogho kele mikonu ya wandu.” 45Ela wo siwatambukilo ni ghalye eluo keghora, kwani ghevisike kwawe na siwadimile kutambula. Nawo wakawogha kumkotela chilya eluo keghora.

Nani mubwaa?

(Matayo 18:1-5; Marko 9:33-37)

46Nao kukakala na nganyi ghati ya wairimi kamba nani wawe ewo mubwaa. 47Naye Jesu aghenda amanya maririkanyo ghawe, kamwata mwanake, kamwika kavui naye, 48kawauza, “Uyu wose emuhokeragha mwanake uyu, wanihokera imi, na uwo wose enihokeragha imi, wamuhokera uyu anitumile. Kwani uyu ewo mchache kwenyu inyose niye ewo mubwaa.”

Uwo seo mumaiza ni mgheni wenyu

(Marko 9:38-40)

49Nao Johana katumbulila, “Bwana tanamwonile mundu kegusa pepo kwa izina lyako, tikamwima, kwa kukala sairimanagha nesi.” 50Ela Jesu kamuza, “Simwamwime, kwani uyu seo kinyume chenyu uwo gasi yenyu.”

Muzi ghwa Samaria kulegha kumuhokera Jesu

51Nao ngelo ifika avui ya Jesu kujoka mlunguni, kadyowa kughenda Jerusalemu. 52Naye katuma wandu hambiri yake kele muzi ghumoju ghwa Samaria wamwikile kila kindu kirani. 53Ela wandu wakalegha kumuhokera, kwa kukala woluo keita kughenda Jerusalemu. 54Nao wairimi wake Jakobo na Johana waona agha, wakamuza, “Bwana, wanashaile tilombe moto kufuma mlunguni ghuwaishe, selyi Elija edeile?” 55Ela iye kawaghalukila kawakemela kewauza, “Simumanyagha ni roho muni muo nayo, kwani Mwana wa Mdamu sajile kuhaitisa wandu, ela kukiza.” 56Nao wakafuma wakaghenda muzi muzima.

Washaile kukala wairimi wa Jesu

(Matayo 8:19-22)

57Nao ilyi weluo wekeghenda ngila yawe, mundu mumoju kamuza, “Nikuirimagha kila andu ughendagha.” 58Jesu kamuza, “Kwehe zio na mirumo yawe na nyonyi vichunguri, ela Mwana wa Mdamu sawesi andu kotungura na kuzumua.” 59Nao kamuza mundu mumoju, “Niirime” Ela kamuza, “Bwana, sigha nighende nimuzike aba.” 60Ela Jesu kamuza, “Sigha wafwa wazike wafwa wawe, ela uwe ghenda na uerese Uzuri ghwa Mlungu.” 61Mundu mumoju kamuza “Bwana nikuirimagha, ela jako nisighe niwalage wandu wa nyumba kwangu.” 62Jesu kamuza, “Sikwesi mundungi edyowagha kulima na azighane nanyuma efwanagha kwa Uzuri ghwa Mlungu.”

Currently Selected:

Luka 9: SAGALLANT

Highlight

Copy