Matayo 17

Jesu kughaluka fwana

(Marko 9:2-13; Luka 9:28-36)

1Nao nyuma ya majua matandatu, Jesu kawatwala wana Petro na Jakobo na Johana wakwawe kajokanya nao wo wenyi kele mghondi mlele. 2Nao Jesu kaghaluka fwana hambiri yawe: ushu ghwake ghukang'ala sa ijua na nguo zikauya za mnyange sa mlangazi. 3Nao aoenyi wakaonekana Musa na Elija wekehelea na Jesu. 4Nao Petro kamuza Jesu, “Bwana, ni kirani tikale anyaha; ilyi washaya niwaghalagha vianda vitatu, kimoju chako na kimoju cha Musa na kimoju cha Elija.” 5Nao ilyi eluo keghora, iwengu lya mnyange lyikawabula na lwaka lukafuma kele iwengu lukeghamba, “Uyu ni Mwana wangu nimshaile niboelogho niye, msikileni!” 6Nao wairimi waghenda wasikila hung'u, wakagwa hubu kwa kungilo ni wogha. 7Ela Jesu keja kawawata keghora, “Ukeni simwadee wogha.” 8Nawo waghenda wanula meso ghawe siwaonile mundungi sala Jesu mwenyi.

9Nao ilyi weluo wekejika mghondini, Jesu kawakanya, “Simwamughorere mundungi agha mwaona, hata Mwana wa Mdamu azuso kufuma kwa wafwa.” 10Nao wairimi wakamkotela Jesu, “Ndamu kudani Walimu wa Sheria waghoragha kamba Elija udyowagha eje?” 11Jesu kawatumbulila, “Fulo Elija ukujagha na akatise vindu vose. 12Ela namuza kamba Elija wanamalile kuja na siwamtambule, nawo wanamdeile selyi weshaile. Na ni hung'u kwenyi Mwana wa Mdamu utirirogho mikonuni kwawe.” 13Nao wairimi wakatambula kamba oluo keghora ighulu ya Johana Mubatizi.

Jesu kuboesa mwanake eluo na pepo

(Marko 9:14-29; Luka 9:37-43a)

14Nao waghenda wauya kwa makoghano, mundu mumoju kamghendela Jesu, kamdyaila ngokoro, 15kemuza, “Bwana, mfwile mwanwangu waya, kwani uwo na ukongo ghwa vigwa na wasirima na ndighi. Kengi wagwa motoni na kaenga mejini. 16Nemi nemletile kwa wairimi wako, nawo siwadimile kumuboesa.” 17Jesu katumbulila, “Inyo kivali chelaghaya na sichedumusagha! Nikalanyagha nenyo hata nini? Nirumaghianyagha nenyo hata nini? Mleteni kwangu.” 18Na Jesu kaikemela ilya pepo na pepo ikamufuma ulya mwanake, naye kaboa iyo ngelo yenyi.

19Nao wairimi wakamghendela Jesu ewo andu kwa kiviso, na kumuza, “Kudani sitedimile kuigusa pepo?” 20Jesu kawatumbulila, “Ni kwa kukala idumusi lyenyu ni ichache, Fulo kwenyi namuza, ngera moluo na idumusi ichache lyikatane na ndembe ya haradali, macho mwauza ughu mghondi, ‘Uka aha ughende alye,’ nagho ghuukagha ghughende; na sikokalagha na undu ghungi simwodimagha kudea. [ 21Ela mbari iyi ya pepo siifumagha sala kwa kulomba na kufunga.]”

Jesu kuhelea sena ighulu ya kifwa chake

(Marko 9:30-32; Luka 9:43b-45)

22Nao ilyi wekoghanike Galilaya, Jesu kawauza, “Mwana wa Mdamu ujefunyo kwa wandu, 23nawo wejemulagha na ijua lya katatu ujezuso.” Nao wairimi wakahariso ni ngolo.

Kulipa kodi ya Hekalu

24Nao waghenda wafika Kapernaumu, Wafunyi Kodi ya Hekalu wakamjila Petro wakamuza, “Ado mwalimu wenyu wanalipagha kodi ya hekalu?” 25Petro katumbulila, “Ee, wanalipagha.” Nao afika nyumba, Jesu kahelea na Petro jako kemuza, “Uririkanyagha ije Simoni? Wazuri wa urumenguni wanafunyagha ushuru ango kodi kwa wana ani? Kufuma kwa wana wawe ango kwa wandu wazima?” 26Petro katumbulila “Kufuma kwa wandu wazima.” Jesu kamuza, “Kwa hung'u wana siwafunyagha. 27Ela eri sitawakwalise, ghenda baharini, ukumbe ndoana, uwate ikumba lya hambiri, na ulyifungule mlomu ghwake, nawe ujeona pesa; uwahawe kwa undu ghwako nemi.”

Currently Selected:

Matayo 17: SAGALLANT

Highlight

Copy