Marko 1

Machilo gha Johana Mubatizi

(Matayo 3:1-12; Luka 3:1-18; Johana 1:19-28)

1Uku ni kudyowa kwa Ilagho Lyaloli lya Jesu Kristo Mwana wa Mlungu. 2Lyanadyowile selyi tondolo Isaya awandike:

“Mlungu wanaghorire, ‘Nimtumagha mtumo wangu akukayaile;

akuboesele ngila yako.’

3Lwaka lwa mundu mumoju ekemagha kireti,

‘Boeseni ngila kwa undu ghwa Bwana;

ghororeni ngila kwa undu ghwake.’”

4Johana Mubatizi kaonekana Kireti, kechila kamba wandu warihe na wabatizo, na Mlungu ujewafwila waya kaung'a zawe. 5Wandu wengi kufuma Judea na Jerusalemu wakamghendela, wekeriha kaung'a zawe, naye kawabatiza kele mweta ghwa Jordani.

6Johana orwere nguo ilukilo na singa za ngamila, na mkoa ghwa mrongo chunu. Na chakulya chake cheluo ni nzighe na uki ghwa kireti. 7Naye kachila keghamba, “Ukujagha mundu nyuma yangu aniisile imi. Hata imi sifweni kudamika na kuvifungula vilatu vake. 8Imi namubatiza na meji, ela iye ujemubatiza na Roho wa Kuela.”

Kubatizo na kutimo kwa Jesu

(Matayo 3:13—4:11; Luka 3:21-22; Johana 4:1-13)

9Nao majua ghalye, Jesu keja kufuma Nazareti, muzi ghwa Galilaya, kabatizo ni Johana kele mweta ghwa Jordani. 10Naye Jesu aghenda kufuma mejini, shwa ng'ori kaona mlunguni kwafunguka, na Roho wa Kuela kaselela sa iringo ighulu yake. 11Na lwaka lukafuma mlunguni lukeghamba, “Uwe ni Mwanwangu mshayo, niboelogho nuwe.”

12Nao shwa ng'ori Roho kamghenza kireti. 13Naye kakala aho kireti matuku mirongo mine, ketimo ni Shetani; naye oluo na nyamandu, nawo wana malaika wakamtumikila.

Jesu kuwapang'a wawati makumba wane wamwirime

(Matayo 4:12-22; Luka 4:14-15; 5:1-11)

14Nao ikakala Johana aghenda angizo kifungoni, Jesu keja Galilaya kechila Ilagho Lyaloli lya Mlungu, 15keghamba, “Ngelo yafika, na uzuri ghwa Mlungu ghuo avui, riheni na kudumusa llagho Lyaloli.”

16Nao ilyi Jesu eluo keita mbalimbali ya bahari ya Galilaya, kaona wawati makumba waili: Simoni na Andrea wakwawe, wekewata makumba na nyavu zawe. 17Naye Jesu kawauza, “Niirimeni, nemi nijemdea wawati wandu.” 18Nawo iyo ngelo yenyi wakasigha nyavu zawe, wakamwirima. 19Naye asughuta hambiri kuchache, kamwona Jakobo mwana wa Zebedayo na Johana wakwawe, kele ishua lyawe wekeboesa nyavu zawe. 20Naye shwa ng'ori kawapang'a wamwirime; nao wakamsigha tatie Zebedayo na wadei kazi, wo wakamwirima.

Mundu eluo na pepo

(Luka 4:31-37)

21Nao Jesu na wairimi wake wakafika Kapernaumu; nao ijua lya Sabato, kangila kele sinagogi kufundisa. 22Nawo wandu wakashiniso ni mafundiso ghake, kwani oluo kefundisa sa mundu ewo na udimo, na si karakara na walimu wa Sheria.

23Na alyenyi kele sinagogi yawe koluo mundu eluo na pepo. 24Naye kakema, “Uwo na undu muni nesi, Jesu wa Nazareti? Wendeja kutihaitisa-ba? Nakumanya kamba uwe nuwe Mweli afumile kwa Mlungu!” 25Ela Jesu kaikemela pepo keghamba, “Nyamala, na umfume!” 26Nao iyo pepo ikamruha, ikakema na lwaka lubwaa, ikamfuma. 27Na wandu wose weluo alye wakashinika, hata wakauzana, “Nini ichi? Ni mafundiso maishi! Hata kwa udimo wazikemela pepo na zamsikila!” 28Nao awenyi uvoro ghwake ghukaera isanga lyose lya Galilaya.

Jesu kuboesa wandu wengi

(Matayo 8:14-17; Luka 4:38-41)

29Nao Jesu na wairimi wake waghenda kufuma kele sinagogi, wakangila nyumba kwa Simoni na Andrea, weluo ngila mojori na Jakobo na Johana. 30Na alyenyi mkekulu wa Simoni otungure kwa kukala oluo mkongo wa msuko, nawo wakamghorera. 31Niko Jesu kamghendela, kamwata mkonu na kumnula, na msuko ghukamsigha; naye kawatumikila.

32Ilya hafukeni yenyi, ijua lyamalika, wandu wakamletela Jesu wakongo wose na awa weluo na pepo. 33Wandu wose wa muzi wakamtindirira hambiri ya mjangoni. 34Naye kawaboesa wakongo wengi weluo na makongo gha kila mbari na kufunya pepo ziwase, hata sadumusile pepo ingi kughora, kwani zemumanyile.

Jesu kuchila Galilaya

(Luka 4:42-44)

35Nao ilyo ikesho Jesu kauka na ikesho kiro sikotambuke, kaghenda andu kwa chanya kulomba Mlungu. 36Naye Simoni na wambawe wakamwirima. 37Na waghenda wamwona wakamuza, “Wandu wose wendekuhada.” 38Naye kawauza, “Ndokoni tighende mizi mizima, eri nipate kuchila nakose, kwa kukala ilyo nilyo lyiniletile.” 39Naye kaita Galilaya yose, kechila kele sinagogi zawe na kufunya pepo.

Jesu kumuboesa mundu wa ukoma

(Matayo 8:1-4; Luka 5:12-16)

40Nao mundu mumoju wa ukoma kamjila Jesu, kadyaya ngokoro na kumvoya keghamba, “Kwadima, uniombochole.” 41Jesu kamfwila waya, kaghorora mkonu ghwake, kampeta kemuza, “Nashaya uombochoke.” 42Nao iyo ngelo yenyi ukoma ghukabowa, naye kaombochoka. 43Nao Jesu kamfunda na kumtuma, 44kemuza, “Ola swamghorere mndungi, ela ghenda kwa mkohani ukuonyeze, na ufunye sadaka ya kuombochoka kwako, selyi Musa alaghize, eri wandu wamanye kamba waboa.” 45Ela iye kafuma na kudyowa kueresa uvoro ghwa kuombocholo kwake, nagho uvoro ghukaera hata Jesu kadeo sangile kele muzi keono. Kwa hung'u kakala shighati ya muzi; nawo wandu wakamghendela kufuma gasi zose.

Currently Selected:

Marko 1: SAGALLANT

Highlight

Copy