Chhòng-sè-kì 38
38
Iû-tāi kap Tha-má
1Tāi-iok hit-ê sî, Iû-tāi lī-khui i ê hiaⁿ-tī, khì tòa tī A-tō͘-lân-lâng Hi-la ê chhù hù-kūn. 2Iû-tāi tī hia khòaⁿ-tio̍h Ka-lâm-lâng Su-a ê cha-bó͘-kiáⁿ, chiū chhōa i, kap i tâng-pâng. 3I chiū hoâi-īn siⁿ-kiáⁿ; Iû-tāi kā gín-á hō-miâ kiò-chòe Ní. 4I koh hoâi-īn siⁿ-kiáⁿ; eⁿ-á ê lāu-bú kā i hō-miâ kiò-chòe Gô-lâm. 5I koh siⁿ chi̍t ê kiáⁿ, chiū kā i hō-miâ kiò-chòe Sī-la; Sī-la chhut-sì ê sî, Iû-tāi tú-á tī Ki-sek.
6 Iû-tāi kā i ê tōa-kiáⁿ Ní chhōa Tha-má chòe bó͘. 7Iû-tāi ê tōa-kiáⁿ Ní chòe Siōng Chú khòaⁿ-chòe pháiⁿ ê sū, Siōng Chú chiū hō͘ i sí. 8Iû-tāi kā Gô-lâm kóng, “Lí tio̍h kap lí ê hiaⁿ-só tâng-pâng, tùi i chīn lí chòe sió-tī ê pún-hūn, kā lí ê hiaⁿ-ko siⁿ hō͘-sû.” 9Gô-lâm chai, i siⁿ ê kiáⁿ bōe-tàng kui i ka-kī, só͘-í tâng-pâng ê sî, siā-cheng tī thô͘-kha, bô beh hō͘ i ê hiaⁿ-ko ū hō͘-sû. 10I ê só͘-chòe, Siōng Chú khòaⁿ-chòe pháiⁿ; Siōng Chú mā hō͘ i sí. 11Iû-tāi kiaⁿ Sī-la ōe chhin-chhiūⁿ i nn̄g ê hiaⁿ-ko kâng-khoán sí, chiū tùi i ê sin-pū Tha-má kóng, “Lí tò-khì lín lāu-pē hia chiú-kóaⁿ, thèng-hāu góa ê kiáⁿ Sī-la tōa-hàn.” Tha-má chiū tò-khì in āu-thâu-chhù.
12Kè chin kú, Iû-tāi ê bó͘, Su-a ê cha-bó͘-kiáⁿ sí; song-kî kè-liáu, Iû-tāi kap i ê pêng-iú A-tō͘-lân-lâng Hi-la khì Têng-ná, khì kā Iû-tāi chián iûⁿ-mn̂g ê lâng hia. 13Ū lâng kā Tha-má kóng, “Lín ta-koaⁿ khì Têng-ná chián i iûⁿ-kûn ê mn̂g.” 14Tha-má khòaⁿ-tio̍h Sī-la í-keng tōa-hàn, iáu-bē lâi chhōa i choh-bó͘, chiū thǹg i chiú-kóaⁿ ê saⁿ, ēng phè tà bīn, ēng kun moa seng-khu, chē tī beh khì Têng-ná ê lō͘ I-ná-ìn ê siâⁿ-mn̂g-kháu.
15 Iû-tāi khòaⁿ-tio̍h Tha-má, lia̍h-chún i sī chhiong-ki, in-ūi i ū tà-bīn. 16Iû-tāi chiū oat-khì lō͘-piⁿ Tha-má hia, kā i kóng, “Lâi, hō͘ góa kap lí chòe-hé khùn.” Iû-tāi m̄ chai hū-jîn-lâng sī i ê sin-pū.
Tha-má ìn i kóng, “Lí beh kap góa khùn, beh sím-mi̍h hō͘ góa?”
17 Iû-tāi kóng, “Góa ōe tùi iûⁿ-kûn lia̍h chi̍t chiah soaⁿ-iûⁿ-á sàng hō͘ lí.”
Tha-má kóng, “Lí sàng--lâi í-chêng, tio̍h ū mi̍h-kiāⁿ hō͘ góa tau--teh.”
18 Iû-tāi kóng, “Góa tio̍h ēng sím-mi̍h hō͘ lí tau--teh?”
Tha-má kóng, “Lí ê ìn, ìn-á-tòa, kap chhiú--ni̍h ê koáiⁿ-á.” Iû-tāi chiū hō͘ i, kap i khùn; i chiū tùi Iû-tāi hoâi-īn. 19Tha-má chiū tńg--khì, chiong bīn-phè the̍h--khí-lâi, koh chhēng i goân-lâi chiú-kóaⁿ ê saⁿ.
20 Iû-tāi thok i ê pêng-iú A-tō͘-lân-lâng Hi-la sàng chi̍t chiah soaⁿ-iûⁿ-á khì hō͘ hit-ê hū-jîn-lâng, beh chiong hō͘ i tau--teh ê mi̍h-kiāⁿ the̍h tò-tńg; m̄-kú chhē bô hit-ê hū-jîn-lâng. 21Hi-la chiū mn̄g hit só͘-chāi ê lâng, kóng, “I-ná-ìn lō͘-piⁿ sī-biō ê ki-lú tī tó-ūi?”
In kóng, “Chia bô sī-biō ê ki-lú.”
22I tò-khì kā Iû-tāi kóng, “Góa chhē bô i; hia ê lâng mā kóng in hia bô sī-biō ê ki-lú.”
23 Iû-tāi kóng, “Góa beh kā chit-chiah soaⁿ-iûⁿ-á sàng hō͘ i, lí soah chhē bô i. I tau--teh ê mi̍h-kiāⁿ, kù-chāi i lâu--teh, chiah bián lán hō͘ lâng chhiò.”
24Tāi-iok kè saⁿ ge̍h-ji̍t, ū lâng kā Iû-tāi kóng, “Lí ê sin-pū Tha-má chòe ki-lú; koh in-ūi kiâⁿ-îm hoâi-īn.”
Iû-tāi kóng, “Kā i thoa chhut-lâi sio.”
25 Tha-má hō͘ lâng thoa--chhut-lâi ê sî, i kiò lâng khì kìⁿ i ê ta-koaⁿ, kóng, “Chiah-ê mi̍h-kiāⁿ sī sím-mi̍h-lâng ê, góa chiū-sī tùi i hoâi-īn. Chhiáⁿ lí jīn, khòaⁿ chit-ê ìn-á, ìn-á-tòa, kap koáiⁿ-á sī sím-mi̍h-lâng ê.”
26 Iû-tāi ōe-jīn--tit, chiū kóng, “I pí góa khah ū-lí, in-ūi góa bô chiong i kè hō͘ góa ê kiáⁿ Sī-la.” Tùi hit-chūn khí, Iû-tāi bô koh kap i chòe-hé khùn.
27 Tha-má teh-beh siⁿ, kèng-jiân pak-tó͘ lāi sī siang-siⁿ. 28I siⁿ ê sî, ū chi̍t ê eⁿ-á chhun chi̍t ki chhiú chhut--lâi; sán-pô the̍h âng-sòaⁿ pa̍k tī i ê chhiú, kóng, “Chit-ê sī seng chhut-sì--ê.” 29Āu-lâi i ê chhiú kiu--ji̍p-khì; i ê hiaⁿ-tī chhut-sì, sán-pô kóng, “Lí sī-án-chóaⁿ chông--chhut-lâi?” In-ūi i chông--chhut-lâi, só͘-í i ê miâ kiò-chòe Hoat-le̍k-su#38.29 “Hoat-le̍k-su” ì-sù sī “chông--chhut-lâi”.. 30Āu-lâi, hit-ê chhiú pa̍k âng-sòaⁿ--ê siⁿ--chhut-lâi, i ê miâ kiò-chòe Siā-la#38.30 “Siā-la” ì-sù sī “âng-sek”..
Currently Selected:
Chhòng-sè-kì 38: TTVR
Highlight
Share
Copy
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
The Bible Society in Taiwan