Lō͘-ka Hok-im 13

Bô Hóe-kái Chiū Bia̍t-bông

1Tú hit-ê sî, ū kúi-nā ê lâng lâi, tùi Iâ-so͘ kóng-khí Pí-lia̍p-to thâi-sí tī chè-tôaⁿ hiàn-chè ê Ka-lī-lī-lâng ê tāi-chì. 2Iâ-so͘ ìn kóng, “In-ūi chiah-ê Ka-lī-lī-lâng siū chit-khoán ê chai-lān, lín chiū siūⁿ-kóng in pí kî-tha ê Ka-lī-lī-lâng ū hoān khah-tāng ê chōe sī--bô? 3Góa kā lín kóng, m̄-sī, lín nā bô hóe-kái, lóng ōe chhin-chhiūⁿ in án-ni bia̍t-bông. 4Kiám-chhái lín mā siūⁿ-kóng, Se-lô-a ê thah tó--lo̍h-khì ê sî, hō͘ i teh-sí hit cha̍p-poeh ê lâng pí tòa tī Iâ-lō͘-sat-léng lóng-chóng ê lâng ū hoān khah-tāng ê chōe. 5Góa kā lín kóng, m̄-sī, lín nā bô hóe-kái, lóng ōe chhin-chhiūⁿ in án-ni bia̍t-bông.”

Bô Kiat Ké-chí ê Bû-hoa-kó-chhiū

6Āu-lâi, Iâ-so͘ kā in kóng chit-ê phì-jū. I kóng, “Ū chi̍t ê lâng tī i ê phû-tô-hn̂g chèng chi̍t châng bû-hoa-kó-chhiū. I lâi hit-châng chhiū chhē ké-chí, m̄-kú chhē lóng bô. 7I chiū tùi kò͘-hn̂g ê lâng kóng, ‘Lí khòaⁿ, góa liân-sòa saⁿ nî lâi chit-châng bû-hoa-kó-chhiū chia chhē ké-chí, chhē lóng bô. Kā i chhò--khí-lâi! Ná tio̍h lâu-teh tìn só͘-chāi?’ 8Hit-ê kò͘-hn̂g--ê ìn kóng, ‘Chú-lâng ah, koh kā i lâu chi̍t nî, góa lâi ku̍t sì-piⁿ ê thô͘, koh lo̍h-pûi; 9mê-nî nā ū kiat ké-chí chiū hó, nā bô, chiah kā i chhò--khí-lâi.’”

Tī An-hioh-ji̍t I-hó Seng-khu Oan-khiau ê Hū-jîn-lâng

10Ū chi̍t ê An-hioh-ji̍t, Iâ-so͘ tī chi̍t ê hōe-tn̂g lāi teh kà-sī lâng. 11Ū chi̍t ê hū-jîn-lâng hō͘ siâ-sîn hū-sin, phòa-pīⁿ cha̍p-poeh nî, seng-khu oan-khiau chhun bōe ti̍t. 12Iâ-so͘ chi̍t-ē khòaⁿ--tio̍h, chiū kiò i lâi, kā i kóng, “Hū-jîn-lâng, lí ê pīⁿ í-keng hó lah!” 13Iâ-so͘ ēng siang-chhiú kā i hōaⁿ; i ê seng-khu sûi-sî chhun-ti̍t, chiū kui êng-kng hō͘ Siōng-tè.

14Put-kò hōe-tn̂g ê chú-koán, in-ūi Iâ-so͘ tī An-hioh-ji̍t kā lâng i-pīⁿ, chiū chin siū-khì, tùi chèng-lâng kóng, “Lán ū la̍k ji̍t thang chòe kang, beh i-pīⁿ tio̍h tī chit tiong-kan lâi i, m̄ eng-kai tī An-hioh-ji̍t.”

15Chú ìn kóng, “Ké-hó ê lâng, lín ta̍k-ê lâng kiám bô tī An-hioh-ji̍t tùi tiâu--ni̍h tháu gû á-sī lû, khan-khì lim-chúi? 16Chit-ê hū-jîn-lâng sī A-pek-la-hán ê kiáⁿ-sun, í-keng siū Sat-tàn sok-pa̍k cha̍p-poeh nî kú, tī An-hioh-ji̍t kā i tháu-pàng kiám m̄ eng-kai?” 17Iâ-so͘ kóng chiah-ê ōe ê sî, I ê tùi-te̍k lóng kám-kak kiàn-siàu; só͘-ū ê kûn-chiòng in-ūi I só͘ chòe it-chhè kî-biāu ê tāi-chì lóng chin hoaⁿ-hí.

Kòa-chhài-chí ê Phì-jū

(Thài 13.31-32; Khó 4.30-32)

18Iâ-so͘ kóng, “Siōng-tè-kok chhin-chhiūⁿ sím-mi̍h? Góa tio̍h ēng sím-mi̍h lâi pí-phēng? 19Siōng-tè-kok chhin-chhiūⁿ chi̍t lia̍p kòa-chhài-chí, ū lâng the̍h-khì iā tī ka-kī ê hn̂g--ni̍h. Kòa-chhài chiām-chiām tōa-châng, chiâⁿ-chòe chhiū, khong-tiong ê chiáu-á mā tī chhiū-ki chòe siū.”

Kàⁿ-bú ê Phì-jū

(Thài 13.33)

20Iâ-so͘ koh kóng, “Góa beh ēng sím-mi̍h lâi pí-phēng Siōng-tè-kok? 21Siōng-tè-kok chhin-chhiūⁿ kàⁿ-bú, ū chi̍t ê hū-jîn-lâng the̍h-khì lām tī saⁿ táu mī-hún chòe-hé chhiau, chòe-āu kui-ê lóng hoat--khí-lâi.”

Oe̍h ê Mn̂g

(Thài 7.13-14, 21-23)

22Iâ-so͘ keng-kè siâⁿ-chhī kap chng-kha khì Iâ-lō͘-sat-léng, iân-lō͘ kà-sī lâng. 23Ū lâng mn̄g I kóng, “Chú ah, ōe tit-tio̍h kiù ê lâng chin chió sī--bô?”

Iâ-so͘ kā in kóng, 24“Tio̍h chīn-la̍t tùi oe̍h ê mn̂g ji̍p--khì. Góa kā lín kóng, ū chin chōe lâng siūⁿ-beh ji̍p--khì ia̍h bōe-tàng ji̍p. 25Chú-lâng khí-lâi koaiⁿ-mn̂g liáu-āu, lín chiah khiā tī mn̂g gōa phah-mn̂g, kóng, ‘Sian-siⁿ, chhiáⁿ kā goán khui-mn̂g!’ I ōe ìn kóng, ‘Góa m̄ chai lín sī tó-ūi lâi ê lâng.’ 26Hit-sî, lín ōe kóng, ‘Goán bat kap lí chòe-hé lim-chia̍h; lí mā bat tī goán ê koe-lō͘ kà-sī.’ 27M̄-kú I ōe kóng, ‘Góa kā lín kóng, góa m̄ chai lín sī tó-ūi lâi ê lâng. Lín chiah-ê choh-pháiⁿ ê lâng lóng lī-khui góa!’ 28Lín khòaⁿ-tio̍h A-pek-la-hán, Í-sat, Ngá-kok, kap só͘-ū ê sian-ti tī Siōng-tè-kok ê lāi-bīn, ka-kī khiok siū kóaⁿ chhut-khì gōa-bīn, hit-sî lín ōe tī hia thî-khàu, kā-gê-chhiat-chhí. 29Lâng ōe tùi tang sai lâm pak lâi, tī Siōng-tè-kok chē-toh chham-ka iàn-hōe. 30Án-ni, siōng lō͘-bé--ê ōe chòe tē-it; tē-it--ê ōe chòe siōng lō͘-bé.”

Ūi-tio̍h Iâ-lō͘-sat-léng Pi-siong

(Thài 23.37-39)

31Tú hit-ê sî, ū chi̍t-kóa Hoat-lī-sài-phài ê lâng óa-lâi kā Iâ-so͘ kóng, “Lí tio̍h lī-khui chia khì pa̍t-ê só͘-chāi, in-ūi Hi-lu̍t siūⁿ-beh thâi lí.”

32Iâ-so͘ kā in kóng, “Lín khì kā hit-chiah hô͘-lî kóng, ‘Lí khòaⁿ, kin-á-ji̍t, bîn-á-chài góa kóaⁿ-kúi, i-pīⁿ, tē-saⁿ ji̍t oân-sêng góa ê kang-chok. 33Sui-jiân sī án-ni, kin-á-ji̍t, bîn-á-chài, kap āu--ji̍t, góa it-tēng tio̍h kè-sio̍k kiâⁿ góa ê lō͘, in-ūi sian-ti bô eng-kai tī Iâ-lō͘-sat-léng í-gōa ê só͘-chāi hō͘ lâng thâi-sí.’

34“Iâ-lō͘-sat-léng ah, Iâ-lō͘-sat-léng ah, lí thâi-sí sian-ti, koh ēng chio̍h-thâu tìm-sí Siōng-tè chhe-lâi lí chia ê sù-chiá. Góa jōa-chōe piàn ài-beh chū-chi̍p lí ê kiáⁿ-jî, chhin-chhiūⁿ koe-bú chū-chi̍p koe-á-kiáⁿ kā in áⁿ tī si̍t-kó͘-ē, lín lóng bô ài. 35Lín khòaⁿ, lín ê chhù ōe hong-hòe! Góa kā lín kóng, tùi taⁿ í-āu lín choa̍t-tùi khòaⁿ bōe tio̍h góa, ti̍t-kàu lín kóng ‘Hōng Chú ê miâ lâi Hit-ūi eng-kai siū chheng-chàn!’”

Currently Selected:

Lō͘-ka Hok-im 13: TTVR

Highlight

Copy

Want to have your highlights saved across all your devices? Sign up or sign in

The Bible Society in Taiwan

Learn More About 現代台語譯本羅馬字版

Popular Bible Verses from
Lō͘-ka Hok-im 13

Videos for Lō͘-ka Hok-im 13

Luke 10-24

The Bible Project

The Kingdom of God as a Mustard Seed

Jesus Film Project

Lō͘-ka Hok-im 13

Popular Bible Verses from
Lō͘-ka Hok-im 13

Videos for Lō͘-ka Hok-im 13

Luke 10-24

The Kingdom of God as a Mustard Seed

Bible:

Chinese, Min Nan

Version: 現代台語譯本羅馬字版 - TTVR

Lō͘-ka Hok-im 13

Lō͘-ka Hok-im 13

Popular Bible Verses from Lō͘-ka Hok-im 13

Videos for Lō͘-ka Hok-im 13

Luke 10-24

The Kingdom of God as a Mustard Seed

Bible:

Chinese, Min Nan

Version: 現代台語譯本羅馬字版 - TTVR

Lō͘-ka Hok-im 13

Popular Bible Verses from
Lō͘-ka Hok-im 13