MAT 24

Yesu yari ar gontu bapi cina ɗe gwa

1Nan Yesu ba za Bom kǝ Yam kawo, ar ni mir mǝn kartǝn gǝs ɗir gode ti wimti tu'i Bom kǝ Yam ju. 2Ama tǝ wul wur'e, <<Kǝ shin Bom ju kan tu gwaya? A yari ine ko tat nǝm ra kan ba sa den gon kan baa yasi ka da gwa.>>

3Yesu ra njon den tlǝndǝr mǝn kin Zaitun. Ar ni mir mǝn kartǝn gǝs ɗir kar ti mol, wu wul ti'e, <<Yarimi, gigasini bar ju ba piwe? Kano ununu'e, alama kǝ paltǝn gi sur na kǝ patǝn kǝ zhan kǝnu?>>

4Ar ni Yesu wul wur'e, <<dǝmni gǝɗǝn, badǝ murgon jǝli in nika da'a. 5Mbarǝm na womti ba ɗir gip sun gǝni, wu wul kǝn'e, <Ami ni'e Almasihuyi.> Wi jǝli mbarǝm ka na womti. 6Ki pi ta kumi tlitǝn kǝ dlan ɗe na barta, ama badǝ bǝrti ci inni da'a. An, bar ju ba pi, ama ar ni'e, patǝn kǝ zhan da'a. 7Atl ba tli esi atl gami, kan dǝ mulki tli esi mulki gami. Ba pi guzum na jititǝn kǝ atl ko ako. 8Muntu kupo, pare kumi dli kan ba ɗir gwa ni.

9<<Kan dǝ ta kǝn am dǝ mǝn bǝni, dǝ kumi in dli, dǝ ri jen gin eka. Ba nge in gip atl gundǝrindlip den bi sun gǝni. 10Wokoci ta ni, ngǝshtǝn den Yam kǝ mbarǝm na womti ba iɗaka, kan wu bali ezǝn kari, wu nge ezǝn esi. 11Mǝn yari shirǝm na Yam kǝ lar baa cwati, kan wu jǝli mbarǝmka na womti. 12Domici kǝ womtitǝn kǝ warwat pitǝno, ndutǝ kǝ mbarǝm na womti baa iɗaka. 13Ama munju kan ɓal mbatl dlom gam ar ri patǝn kǝ baro, ba ɗǝli wuri. 14Baa pi wazu kǝ zo shirǝm kǝ mulki kǝ Yam gip atl gundrǝndlip den bi seda dǝ munju kan mǝn kopi ni dagwa, kan dǝ patǝn kǝ bari i ɗiri. 15Kǝn ni kǝ shin bar kǝ saɓo kan ba kem ɗǝɗaye, muntu kan mǝn yari shirǝm kǝ Yam Daniel yari gwa ra dlor kǝba las mǝn Tsarki. Na dǝ mǝn zhǝti tǝlan kuri momi. 16Na dǝ munju kan ra gip Yahudiya kǝtǝr wu to gǝzǝn gip dlǝndǝre. 17Muntu kan ra te kari kawo ba tǝ ngen tetǝn kǝ pǝni ar gon gip bomi da'a. 18Ba dǝ muntu kan ra bi lǝpo, tǝ pal rǝn bom ka kǝ pǝni tutul dli gǝs da'a. 19Imnu ar ba dǝmi mǝtli mun tu'e, na munju kan den bi mimir nyin den pǝt ta gwa! 20Shirǝm ni na Yam badǝ kǝtǝr gin ɗiri inni gip watlǝn, ko gas Asabar da'a. 21Domici baa kum dli mǝn nartǝn tu kan tabe pi da'a tun nan laa atl gwa, har se'ini. Kano ba'i sake pi badǝr kumi dli tu da'a. 22Dǝ wule cani muri juka dawo, nya mbarǝm gon ra kan baa zam ɗǝltǝn gwa da'a. Ama domici kǝ munju kan Yam zǝzari wo, ba ca muri kǝ kumi dliyi ka.

23Wokoci tawo, gon ni wulki'e, <Shini, Almasihun kǝni!> Ko, <Yan ta!> Ba kǝ nǝm ni da'a. 24Domici Almasihu kǝ lar na mǝn shirǝm na Yam kǝ lar ba cwati, kan wu pi bar kǝ nǝmi bi na am na bar kǝ dlikǝntǝne. Kǝdǝ wu jǝli munju kan zǝzari gwa-untuyi ni ba pi gwa. 25Kum ni, A yari in wi bǝle-bǝle. 26<<Ra'untuwo, murgon ni wul kǝn'e, <Yan ta, gip lǝpe,> ba kǝ ɗǝlni kari da'a. Ko, <Almasihu yin ta te kushi ka,> ba kǝ nǝm ni da'a. 27Kandatu cirtǝn kǝ cibi kǝ Yam ba ɗǝl gabǝs ar to yamma wo, untu ni paltǝn kǝ Nya mbarǝm ba nǝra. 28Las tu mǝshi bar rawo, lasini zhipki ba dom wuri.

29Bar tuni den kar kǝ muri kǝ kumi dli ju arni,

Pǝt ba dǝmǝn ka, kan dǝ kyar nge cirtǝnka,

Zǝnges ba nda sur yamka, kan dǝ bar ju kan ra to yam ka jiti wuri.

30<<Wokoci tani baa shin alama kǝ Nya mbarǝm ba ɗǝl to yam ka, kan dǝ bǝn kǝ atl kundǝrǝndlip pi kulu keti. Wi shin surtǝn kǝ Nya mbarǝm gip ndun yam kǝ to yam ka, na iko na ɗǝɗatǝn mǝn nartǝni. 31Ti kar mir mǝn kartǝn gǝs na hori nyo mǝn larǝm tǝn hoyi, kan wu dom munju kan zǝzar wur gwa, ko tǝp ako gip atl kundǝrǝndlip.

32<<Kǝ kǝno kulci ni den kin turume. kini kǝ shin am kini sanje ka kan ba pare gilitǝn na fel wolo, mom ni'e watlǝn mbira wi. 33Untu ni ma, kǝn ni kǝ shin bar ju den pitǝno, mom ni'e ar mbira wi kosak, ar ra bǝdlabǝn wi. 34Ge shirǝm ni a yari in'e, zhan kǝn ba pa da'a, se bar ju ni piwi kup gwa. 35Dlom yam na atl baa paka, ama shirǝm gǝn ba paka da'a.

Murgon ra kan mom pǝti gwa da'a

36<<Murgon ra kan mom pǝti ko awayi da'a, ko mir mǝn kartǝn kǝ Yam to yamka, ko Nyayi, ama Bǝbayi ni katl za'i gam gǝs momi pǝti. 37Kandatu ar pi gip wokaci kǝ Nuhu gwa, untun surtǝn kǝ Nya mbarǝm ba nǝra. 38Gip muri jawo, kapǝn bar ghon kan sar ko-unuka den kaar atlo, mbarǝm ra den ci na tle, moni den gudlumi, kan den ri mir mǝtli kushi, ar ba ri pǝt tu kan Nuhu to gip Kungǝlǝn jikat mal gwa. 39Mbarǝmi mom argon tu bari kǝ pitǝn gwa da'a, arni mal kos den wur kan ba sar wurka kup. Untun paltǝn kǝ Nya mbarǝm ba nǝra. 40Wokoci tawo mbarǝm rop baa nǝra den mbap gip kǝne, baa pǝn nǝmka, dǝ za nǝmi. 41Mǝtli rop baa nǝra den lu'i bari, baa pǝn nǝmka dǝ za nǝmi.

42Ra'untuwo, dǝm ni gǝɗǝn, domici kǝ mom pǝt tu kan Babom gin baa sur gwa da'a. 43Ama mom ni muntu, dǝ wule babom ba mom gas tu mur ba teti gip bomo. Ti dǝm gǝɗǝn, tǝ hane muri tetǝn gip bom gǝs dǝ pi ti mure. 44Ra'untuwo, kǝn ma dlǝr ni jetgǝr, domici Nya mbarǝm baa sur ni den pǝt tu kan kǝ mom da gwa. 45Wo ni'e zher mǝn bopya kan ba pi argon tu yari ti gwa, muntu kan babom gǝs ne ti gam bom gǝsi, kǝ tǝ bi mǝn bomi fingal kandatu ar ndari gwawe? 46Ar ba mbuni zheri, Babom gǝs ni pal kan tǝ zam ti den pi untuyi gwa. 47Ge shirǝm ni a yari ine, ti ne ti den gam kǝ bar ju kup tǝra nari gwa. 48Ama zheri ni dǝm mǝn wani pitǝno, ti wul gam gǝs'e, <Babom gǝn ba pal bǝle dawo, 49kan tǝ nda gip ezǝn zheri na ɓe, tǝ den ci na tle na mǝn tle ɗu'e. 50Babom kǝ zher tu ba pal bat na momi kǝ zheri, den pǝt na awa tu kan tǝ mom da gwa. 51Babomi ba ɓo zheri, kan tǝ hukunte ti na mǝn ɗasi tu ju. Bar tuni ba pi kuli na ngasi kur bi.

Currently Selected:

MAT 24: PLJ

Highlight

Copy