GÉNESIS 17
17
Ari nishcata ricuchingapa, circuncisionda rurashcamanda
1Abramga, iscun chunga iscun huatata charijpimi, Mandaj Dios ricurishpa cashna nirca:
“Ñucami, Tucui Ushaita charij Taita Dios cani. Ñuca ñaupajpica, ima pandatapash na rurashpa, aligutami causana cangui. 2Shinami Ñucahuan, canhuan ari nijushcata pactachingapaca, canmanda miraicunataca ninandapacha mirachisha” nirca.
3Shina nijpimi Abramga cungurishpa, alpaman chayajta cumurirca. Shina cumurijpimi Taita Diosca, cashna nijurca:
4“Ñuca ari nishcataca canhuanmi pactachisha. Shinamandami canga, ashtaca gentecunapaj taita tucugringui. 5Chaimandami, cambaj shutica, ña na Abram canga. Ashtahuangarin cambaj shutica, Abrahammi canga.
Candaca, ashtaca gentecunapaj taita cachunmi churarcani. 6Cambaj miraicunaca, ashtacapachami canga. Shinami ashtaca llactacuna tucunga. Canmandaca, jatun mandajcunapashmi llujshinga. 7Ñucahuan, canhuan, cambaj miraicunahuan, cambaj cati miraicunahuanga, causaita causaicaman pactachingapami, ari nircani. Cambajpash, jipa miraicunapajpash, Taita Dios cangapami chashna ari nircani. 8Can causangui chai llactataca, canman, cambaj jipa miraicunamanmi carasha. Tucuilla Canaán llactataca, causaita causaicaman, paicunapaj cachun carashpami, paicunapaj Taita Dios casha” nijurcami.
9Taita Diosca, cutinmi Abrahamdaca cashna nirca:
“Canga, Ñucahuan ari nishcataca pactachinami cangui. Cambaj jipa miraicunapash, cati miraicunapashmi chashnallatami pactachina. 10Ñucahuan, canhuan, cambaj jipa miraicunahuan, ari nijushcata pactachinaca cashnami: Cangunapuramanda tucui jaricunatami, circuncisionda rurana canguichi. 11Jaricuna charishca asha carata fitishpami, circuncisionda rurana canguichi. Chashna rurashpami Ñucahuan, cangunahuan ari ninajushcata ricuchinguichi. 12Ungushca punllamanda pusaj punllapimi, cangunapurapica tucui mirai jaricunata, circuncisionda rurana canguichi. Chaitaca, huasipi huacharishca cajpipash, caru llactamanda cashpa, na cangunapaj mirai cajpi, culquipaj randishca cajpipash, chashnallatami rurana canguichi. 13Cambaj huasipi huacharishca cajpipash, culquipaj randishca cajpipash, circuncisionda ruranapachami canguichi. Cangunapaj aichapi chashna rurashpami, Ñucahuan ari ninajushcataca, causaita causaicaman ricuchijunga. 14Maijan jaripash, paicuna charishca asha carata fitishpa, circuncisionda na rurashca cashpaca, paicunapuramanda anchuchi tucushcami canga. Paica, Ñucahuan ari nijushcata na pactachishcamandami, chashna anchuchi tucunga” nijurcami.
15Taita Diosca, cashnatapashmi Abrahamdaca nirca:
“Cambaj huarmi Saraitaca, ama ashtahuan Sarai nishpa rimanguichu. Paipaj shutica, Sara#17:15 Sara shutica: «Jatun mandajpaj ushi» nijunmi. shutimi canga.
16Ñuca, paita bendiciajpimi, shuj churiguta canhuan charinga. Ari, paita bendiciajpimi, llactacunapaj mama tucunga. Paimandami, gentecunata jatun mandajcunapash miranga” nircami.
17Shina nijpimi Abramga, alpaman chayajta cumurishpa, paipaj shungupica asishpa, cashna yajurca: “¿Patsaj huatata charij runachu, churita charigrini? ¿Sarapash, iscun chunga huatata charij huarmichu, vijsayu tucugrin?” yajurcami. 18Abrahamga, Taita Diostaca cashnami nirca:
“Ismaelca, Cambaj ñaupajpica aliguta causajushpachari ali capanman” nirca.
19Shina nijpimi Taita Diosca, cashna nirca:
“Na llullashpami nini. Sara shuti cambaj huarmica, shuj churigutami, canhuan charinga. Paitaca, Isaactami shutichina cangui. Ñuca, ari nishcataca, paihuan shinllitapacha churashpami, paipaj cati miraicunahuambash, causaita causaicaman pactachijusha. 20Ismaelmanda mañajtapashmi candaca uyashcani. Paitapash bendiciashami. Paimandapash ninanda mirashpami, ashtaca gentecuna tucunga. Paica, chunga ishcai mandajcunapaj taitami canga. Paimandaca, shuj jatun llactatami rurasha. 21Sara shuti cambaj huarmica, cunan punllamanda, caya huatapajmi, shuj jari huahuata, canhuan charinga. Paica, Isaac shutimi canga. Paihuanmi, Ñuca ari nijushcataca pactachisha” nircami.
22Abrahamhuan parlaita tucuchishpaca, Taita Diosca, jahuaman rircallami. 23Chai jipami, Abrahamga paipaj churi Ismaeltapash, paipaj huasipi huacharishca tucuilla paipajta rurajcunatapash, culquipaj randishca tucui paipajta rurajcunatapash, Abrahambaj huasipi tucuita rurashpa causanajuj jaricunatapash, Taita Dios mandashcashna, paicuna charishca asha carata fitishpa, chai punllallata circuncisionda rurarca. 24Abrahamga, pai charishca asha carata fitishpa circuncisionda rurajui punllapica, iscun chunga iscun huatatami charirca. 25Paipaj churi Ismaelca, pai charishca asha carata fitishpa circuncisionda rurajui punllapica, chunga quimsa huatatami charirca. 26Chai punllapillatami, Abrahambash, paipaj churi Ismaelpash, circuncisionda rurai tucunajurca. 27Paipaj huasipi tucuilla jaricunapash, huasipi huacharishca paipajta ruraj jaricunapash, culquipaj randishca shuj llactamanda jaricunapashmi, Abrahamhuan circuncisionda rurai tucunajurca.
Currently Selected:
GÉNESIS 17: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
