GÉNESIS 21
21
Isaac huacharishcamanda
1Mandaj Dios imashna nishcashnami Sara huarmica, Abrahambaj huahuata vijsayu tucurca. 2Sara huarmica ña payagu cashpapash, Taita Dios villashca pactajpimi shuj jari huahuaguta, Abrahamhuan charirca. 3Abrahamga, paipaj huarmi Sarahuan charishca churitaca, Isaac shutitami shutichirca. 4Shinallata, Taita Dios mandashcashnami Abrahamga, pusaj punllapica paipaj churi Isaacta circuncisionda rurarca. 5Abrahamga, paipaj churi Isaacta charishca punllapica, patsaj huatatami ña charirca. 6Chaimandami Sara huarmica cashna nijurca: “Taita Diosmi ñucataca asichihuashca. Chaita uyashpaca, ñucahuanmi shujcunapash asinga” nircami. 7Ashtahuan cashnatapashmi nirca: “¿Pita Abrahamdaca: ‘Sara huarmica, cambaj huahuata chuchuchingami’ ningayari? Ña rucugu cajpimi, paihuan shuj churiguta charishcani” nircami.
Agartapash, Ismaeltapash, Abrahambaj huasimanda llujchishpa cachashcamanda
8Isaac ña viñajpi, mamapaj chuchumanda anchuchishca punllapimi, Abrahamga jatun micuita rurarca. 9Shuj punllami Sara huarmica, Egiptomanda Agar shuti huarmihuan Abraham charishca churi, paipaj churi Isaacta na alicachishpa asijujta ricurca. 10Chaimandami Sara huarmica, Abrahamdaca cashna nirca: “Cai gañan huarmitaca, paipaj churindi caimanda llujchishpa cachai. Cai gañan huarmipaj churica, ñuca churi Isaac imatalla japinataca napacha japingachu” nircami.
11Paipaj churi Ismaelta chashna nishcamandaca, Abrahamga ninan llaquimi carca. 12Chashna cajpimi Taita Diosca, Abrahamdaca cashna nirca: “Chai huahuamandapash, cambajta ruraj huarmimandapash ama ninanda llaquirichu. Cambaj huarmi Sara tucui imata nishcata rurailla. Isaacmandami canmanda miraicunaca catinga. 13Shinallata, gañan huarmipaj churipash, cambaj miraillata cashcamandami, shuj jatun llactata rurasha” nircami.
14Shina nijpimi Abrahamga, cayandi tutamandata jatarishpa, tanda huatashcatapash, cara muchilapi jundachishca yacutapash, Agar huarmiman apachishpa, paipaj churigutapash “cayacaman” nishpa cacharca. Shina cachajpimi Agar huarmica, Beerseba shuti jichushca pambapi chingashpa, caiman chaiman purijurca. 15Chashna purijujpi cara muchilapi yacupash tucurijpimi, paipaj churitaca shuj quiru llandupi sirichishpa saquirca. 16Shina saquishpami, paipaj churi huañunta na ricungapa munashpa, arcohuan flechata cacharijpi urmanapishnalla caruman rishpa tiyajurca. Chaipi paipaj mama tiyajujpimi, chai huahuaguca ninanda caparishpa huacajurca.
17Chai huahuagu huacajujta, Taita Dios uyajpimi, Taita Diospaj angelca, Agar huarmita jahua pachamanda cashna nirca: “¿Agar, imata tucungui? Ama manllaichu, Taita Diosmi, cambaj huahua huacajujtaca uyashca. 18Cunanga huahuata jatarichishpa, maquihuan charigrilla. Ñucami, chai huahuamandaca shuj jatun llactata rurasha” nirca.
19Taita Diosllata, Agar huarmipaj ñavita pascajpimi shuj pugyuta ricurca. Shina ricushpa, cara muchilapi yacuta jundachishpami, huahuaman ufiachijurca. 20Taita Dios, chai huahuaguta huacaichijujpimi, chai huahuaguca jichushca pambapi viñashpa, arcohuan flechata shitanatapash alipacha yachajurca. 21Paicunaca, Parán shuti jichushca pambapimi causanajurca. Shina cashpami, paipaj mamaca, Egipto llactamanda huarmihuan cazarachirca.
Abrahammandapash, Abimelecmandapash
22Chai huatacunapimi, Abimelec shuti runaca, paipaj macanajuj runacunata mandaj Ficol shuti runandi, Abrahamda ricungapa rishpa cashna ninajurca:
“Taita Dios, candaca tucuipi yanapajushcatami yachani. 23Cunanga, Taita Diospaj ñaupajpi: ‘Ñucatapash, ñuca churitapash, ñuca churipaj churicunatapash na llaquichishachu’ nishpa juramentuilla. Shinallata, canhuan, ñucahuan ali cashcashnallata, ñucatapash can causajushca cai llactatapash, alita rurasha nishpa juramentuilla” nirca.
24Shina nijpimi Abrahamga:
“Ari, juramentunimi” nirca.
25Shina nishca jipami Abrahamga, yacuta llujchingapa allashca jatun utujuta, Abimelec runapajta rurajcuna, ñaupaj punllacuna quichushcamanda, Abimelectaca shinllita rimajurca. 26Abimelec runaca:
“Maijan chashna rurashcatapash na yachashcanichu. Cambash na villahuashcanguichu. Ñucapash, chaitaca cunangaman na uyapashcanichu” nishpa llaquirijurca.
27Shinallata Abrahamga, llamacunata, huarmi huagracunata, Abimelec runaman carashpami, tucuita pactachingapa ari nijurca. 28Chai jipami Abrahamga, canchis huarmi llamacunata shican churarca. 29Chaita ricushpami Abimelec runaca, Abrahamdaca:
“Can shican churashca, chai canchis huarmi llamacunaca, ¿imatata nisha nin?” nirca.
30Shina nijpimi Abrahamga:
“Cai canchis huarmi llamacunata, ñuca maquimanda chasquipailla. Yacuta llujchina cai jatun utujutaca, ñuca allashcata ricuchijuchunmi chashna rurana capangui” nircami.
31Chaimandami chai alpataca, Beerseba shutita shutichirca. Chaipi ishcandi juramentushcamandami chashna shutichirca.
32Beerseba shuti pambapi ari ninajushca jipaca, Abimelec runaca, paipaj macanajuj runacunata mandaj Ficol shuti runandi, filisteocuna causanajuj llactaman tigrarcallami. 33Abrahamga, Beerseba shuti pambapi, tamarisco quiruta tarpushpami, causaita causajuj Mandaj Taita Diostaca ninanda alicachijurca. 34Shinami Abrahamga, filisteocunapaj llactapi unaita causarca.
Currently Selected:
GÉNESIS 21: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
