GÉNESIS 26

Isaac runa, Gerar shuti pueblopi causajushcamanda

1Chai jipami chai llactapica, Abraham causajui punllacunapi yarjai tiyashcashnami, ninan yarjai tiyarca. Shinamandami Isaac runaca, filisteocunata jatun mandaj Abimelec mandajuj Gerar shuti puebloman rirca. 2Mandaj Diosca, Isaacman ricurishpami cashna nirca: “Ama Egiptomanga urai ringuichu. Ñuca mandashca llactapimi causana cangui. 3Shuj llactamanda purij runashna, cai llactapi causajujpimi, Ñucapash canhuan cashpa, bendiciasha. Cai tucui alpacunataca canmambash, cambaj miraicunamambashmi carasha. Chashna rurashpami, cambaj taita Abrahamhuan juramentushcataca pactachisha. 4Cambaj miraicunataca, jahua pachapi luzerocunatashnami, ninandapacha mirachisha. Cambaj miraicunamanmi, cai tucui alpataca carasha. Tucui cai pachapi tiyaj llactacunaca, cambaj miraicunamandami bendiciai tucunga. 5Ñuca rimashcata, imata rurai nishcata, Ñuca mandashca shimicunata, Ñuca yachachishca shimicunata Abraham uyashpa cazushcamandami, chashna bendiciai tucunga” nijurcami.

6Isaac runaca, Gerar shuti pueblopimi causajurca. 7Chaipi causaj runacuna tapujpica, Rebeca huarmica ñuca panimi nishpami villajurca. Rebeca huarmica juyaillagu cajpimi paica: “Ñuca huarmimi nijpica, chai runacunaca, Rebecataca quichushpami, ñucataca huañuchihuanga” yashpami chashna nijurca.

8Isaac runaca, ñami tauca punllacunata chai llactapi causajurca. Shuj punllami, filisteo runacunata jatun mandaj Abimelec runaca, Isaac runa Rebecata juyachijujta, ventanamanda ricurca. 9Chaimandami Abimelec runaca, Isaacta cayashpa cashna nirca:

“Chai huarmica, cambaj huarmimari cashca. ¿Imamandata: ‘Ñuca panimi’ nircangui?” nishpami tapurca.

Shina nijpimi Isaac runaca:

“Ñuca huarmimandami huañuchihuanga yashpami, chashna niparcani” nirca.

10Shina nijpimi Abimelec runaca:

“¿Imashpata ñucanchimanga chashna llullarcangui? Cai pueblopi causaj runacuna, cambaj huarmihuan pacta puñushca cajpica, canmi ñucanchita juchata rurachinguiman carca” nirca.

11Shinamandami Abimelec runaca, tucui gentecunata:

“Cai runata, na cashpaca paipaj huarmita maijambash ima na alita rurashpaca, huañungapachami” nirca.

12Chai huatapimi, Isaac runaca alpacunapi tarpushpa, Mandaj Dios bendiciajpi, shujlla granomanda patsajta tandachijurca.

13Chashnami Isaac runaca, ninanda bendiciai tucushpa, ninan charij tucurca. 14Paica, llamacunata, huagracunata, tarpushca chagracunatapash, ashtacatapachami charirca. Shina cajpimi filisteo runacunaca, ñucanchipash paishnalla charishcanchiman yashpa ricunajurca. 15Shinamandami, Isaacpaj taita Abraham causajui punllacunapi, Abrahambajta rurajcunaca yacuta alichina utujucunata allashcataca filisteo runacunaca alpata jundachishpa, quilpanajurca. 16Shinallata Abimelec runapash, Isaactaca:

“Caimanda llujshishpa rilla. Canga, ñucanchita yali ushaita charijmari tucushcangui” nirca.

17Shinamandami, Isaac runaca chai llactamanda llujshishpa rishpa, Gerar shuti puebloman chayanapi tiyaj, pugru pambapi carpacunata shayachishpa causajurca. 18Isaac runaca, paipaj taita Abraham causajui punllacunapi, yacuta alichingapa allashca utujucunatami cutin allarca. Chai utujucunataca, Abraham huañushca jipami, filisteo runacuna quilpashca carca. Chaicunataca, paipaj taita shutichishca shutitallatami shutichirca. 19Ashtahuangarin Isaac runapajta rurajcunaca, chai pugru pambapi allanajushpami, chaipica yacu llujshijuj pugyuta tarirca. 20Shina cajpimi, Gerar shuti pueblomanda michijcunahuan, Isaacpaj michijcunahuanga ninandapacha fiñanajushpa: “Yacuca ñucanchipajmi” nirinajurca. Chaimandami, chai pugyutaca, “macanajuna pushtumi” nishpa shutichirca. 21Shinamandami, shuj utujutapash allanajurca. Chaimandapashmi, ninandapacha fiñanajunajurca. Shinamandami, “fiñarina pushtu” shutita shutichirca.

22Isaac runaca, chaimanda rishpami cutin shuj utujuta allachirca. Chashnami yacumandaca, ña na fiñanajunajurca. Chaimandami chai yacutaca, “Rehobot”#26:22 Rehobot nishpaca jatun pamba nishpami villajun shutita shutichishpa: “Tucuipi ali causashpa caipi mirachunmi, Mandaj Diosca yanapahuarca” nishpami chashna shutichirca.

23Chai pushtumanda vichai rishpami Isaac runaca, shuj pushtupi causajurca. Chai pushtuca jipamanga, Beerseba shutimi tucurca. 24Chai tutallatami Mandaj Diosca, Isaacman ricurishpa, cashna nirca: “Ñucami, cambaj taita Abrahambaj Taita Dios cani. Ama manllaichu, Ñucami canhuan cani. Ñucapajta ruraj Abrahamda juyashcamandami, candaca bendiciasha. Cambaj huahuacunatapash, ashtacatami mirachisha” nircami.

25Shina nijpimi Isaac runaca, chaipi shuj altarta shayachishpa, Mandaj Diospaj shutita jatunyachijurca. Shinallata paipaj causana carpatapash chaipimi churarca. Isaac runapajta rurajcunaca, yacuta llujchingapami shuj utujuta allanajurca.

26Chaipi causajujpimi, Abimelec runaca, Gerar shuti pueblomandaca, paipaj cumba Ahuzat shuti runandi, paipaj macanajuj runacunata mandaj Ficol shuti runandi, Isaac runapajman shamurca. 27Shina shamujpimi Isaac runaca, cashna nirca:

“¿Imapata ñucapajman shamunguichi? Cangunallatami na ricunayachishpa, llujchishpa calpachihuarcanguichi” nirca.

28Shina nijpimi, cashna ninajurca:

“Mandaj Diosca, canhuan cajtami ricupashcanchi. Shinamandami: ‘Cunanga cambash, ñucanchipash ishcandimanda juramentupashun nishpami shamupanchi. Chashnami, canhuan ari nishcataca pactachipashun. 29Imashnami ñucanchipash candaca, na llaquichishpa, alitalla rurashpa cachamurcanchi, chashnallata ñucanchitapash ima na alitapash na rurana capangui. Cunanga, Mandaj Dios bendiciashcamari capangui’ nipanchimi” ninajurcami.

30Chai jipaca, paicunaman jatun micuita Isaac rurajpimi micunajurca, ufianajurca. 31Cayandi tutamanda jatarishpami, paicunaca caishujmanda, chaishujmanda ali causangapa juramentunajurca. Chai jipaca Isaac runaca, cayacaman nishpa cachajpimi, chai runacunaca, cayacaman nishpa cushijushpa rinajurca.

32Chai punllapimi, Isaac runapajta rurajcunaca, “yacuta llujchingapa utujuta allashpaca yacuta tarircanchimi” nishpa villanajurca.

33Chai allashca utujutaca, “Seba”#26:33 Seba nishpaca pactachingapa ari nishcatami shina nijun shutitami shutichirca. Chaimandami, chai puebloca cunan punllacaman, “Beerseba” shutihuan saquirirca.

34Esaú runaca, chuscu chunga huatata charishpami, heteopura Beeri shuti runapaj ushi Judit huarmihuan cazararca. Shinallata heteopuramandallata, Elón shuti runapaj ushi Basemat shuti huarmihuambashmi cazararca. 35Chai huarmicunaca Isaactapash, Rebecatapash ninandapachami llaquichinajurca.

Currently Selected:

GÉNESIS 26: QVI16

Highlight

Copy