GÉNESIS 30

1Raquel huarmica huahuata na chari ushashpami, paipaj ñañataca, ñucapash paishna cashcaiman yashpa ricujun carca. Shina cashpami Jacobtaca:

“Cambaj huahuatami charingapa munani, na cashpaca huañushapachami” nirca.

2Shina nijpimi Jacobca, Raquel huarmitaca fiñarishpa cashna nirca:

“¿Ñucaca, Taita Dioschu cani? Can ama vijsayu tucuchunga, Taita Diosmi chashna munashca” nirca.

3Shina nijpimi Raquelca:

“Ñucapajta ruraj Bilha huarmihuan huahuacunata charilla. Ñuca migllapi chai huahuacunata charishpami, huahuayujmi cani yajusha” nirca.

4Chashnami paipajta ruraj Bilha huarmitaca, paipaj huarmi cachun Jacobman curca. Shina cujpimi Jacobca, chai huarmihuan pacta puñurca.

5Shinamandami Bilha huarmica, Jacobpajta vijsayu tucushpa, shuj jari huahuata charirca. 6Chaimandami Raquelca cashna nirca: “Taita Diosmi, ñucata ricushpa llaquihuashca. Ñuca mañashcatapash uyashpami, shuj jari huahuata carahuashca” nishpami, chai huahuataca, Dan shutita shutichirca.

7Raquelpajta ruraj Bilha huarmica, Jacob runapajta cutin vijsayu tucushpami, cati churitapash charirca. 8Chaimandami Raquel huarmica: “Taita Dios ñucata juyajpimi, ñuca ñañataca mishashcani” nishpami chai huahuataca, Neftalí shutita shutichirca. 9Lea huarmica, huahuacunata, ña na chari ushashpami, paipajta ruraj Zilpa shuti huarmita, Jacobpaj huarmi cachun curca. 10Leapajta ruraj Zilpa huarmipashmi, Jacobhuanga shuj jari huahuata charirca. 11Shina charijpimi, Lea huarmica: “Ñucaca alitami charini” nishpa chai huahuataca, Gad shutita shutichirca. 12Chai jipamambash, Lea huarmipajta ruraj Zilpa huarmica, cutinmi shuj jari huahuata Jacobhuan charirca. 13Chaimandami, Lea huarmica: “Ñucapaca ninanda cushijunami chayamushca. Shuj huarmicunapash, ñucataca ninanda cushijushcami cangui ninajungami” nishpami chai huahuataca, Aser shutita shutichirca.

14Rubenga, trigo tandachi punllacunapi llujshishpami, mandrágora shuti micuna murucunata pambapi tarishpa, paipaj mama Leaman apamurca. Chaimandami Raquel huarmica, Lea huarmitaca cashna nirca:

“Cambaj churi apamushca mandrágora murucunata, ñucaman carahuai nipanimi” nirca.

15Shina nijpimi Lea huarmica:

“Ñuca cusata quichushpaca, ¿imapash na canllu yanguichu? ¿Ñuca churi apamushca mandragoratapash quichungapachu munangui?” nirca.

Shina nijpimi Raquel huarmica, cashna nirca:

“Cambaj churi apamushca mandragoracunata ñucaman cushcamandaca, cunan tutaca Jacobca canhuanmi pacta puñunga” nircami.

16Ña chishashcapi pambamanda Jacob tigramujujpimi Lea huarmica, paitaca cashna nirca:

“Ñuca churi apamushca mandragoracunata cushpami, can ñucahuan pacta pacarichun mañarcani” nijpimi, Jacobca, chai tutaca Lea huarmihuan pacarirca.

17Lea huarmi, Taita Diosta mañashcata uyajpimi, caihuanga picha huahuata paica, Jacobhuan charirca. 18Chaimandami Lea huarmica, cashna nirca: “Ñucapajta ruraj huarmita, ñuca cusaman cushcamandami, Taita Diosca ñucaman aliguta tigrachihuashca” nishpami chai huahuataca, Isacar shutita shutichirca. 19Lea huarmica, cutin vijsayu tucushpami, cutin shuj huahuata Jacobhuan charirca. 20Chaimandami Lea huarmica, cashna nirca: “Taita Diosmi, shuj juyaillagutapacha carahuashca. Cunanga, sucta huahuacunata charishcamandami ñuca cusaca, ñucahuan causanga” nishpami chai huahuataca, Zabulón shutita shutichirca. 21Chai jipapashmi, shuj huarmi huahuata charirca. Chai huahuataca, Dina shutitami shutichirca. 22Raquel huarmitapash juyashpami, pai mañajujta uyashpa, Taita Diosca jari huahuacunata cararca. 23Raquel huarmi vijsayu tucushpaca, shuj jari huahuata charishpami: “Ñuca rimai tucushpa pingaichi tucushcataca, Taita Diosmi anchuchihuashca” nirca. 24“Mandaj Diosmi, ashtahuan shuj huahuata carahuashca” nishpami chai huahuataca, José shutita shutichirca.

Jacobpash, Labán runapash umachirishcamanda

25Raquel huarmi, Joseta charishca jipami, Jacobca, Labán runataca cashna nijurca:

“Ñuca alpaman, ñuca llactaman ringapami munapani, cachahuailla. 26Ñuca huarmicunata, ñuca huahuacunata pushashpa ringapa, saquihuailla. Paicunamandami, cambajta rurashpa causajurcani. Tucuita ñuca rurashcataca, canllata yachanguimi” nirca.

27Shina nijpimi Labán runaca:

“Cambaj ñaupajpi ñuca ali ricurishca cajpica, caipi causapailla ninimi. Mandaj Diosca, canmanda ñucata bendiciashca cashcataca alimi yachani” nirca.

Paica cashnatapashmi nirca:

28“Can ñucapajta rurashpa causajushcamanda, mashnata cuchun munashpapash villahuailla, cushallami” nircami.

29Shina nijpimi Jacobca, cashna nirca:

“Imashna cambajta rurashpa causashcatapash, cambaj animalcunata imashna ricujushcatapash, canllata yachanguimi. 30Ñuca nara shamujpica, ashatallami charircangui. Cunanga ashtacatami mirachishcangui. Ñuca chayamujpimi, Mandaj Diosca bendiciashca. Cunanga, ¿ñuca huahuacunapaj, imatallapash ruranami capani?” nirca.

31Shina nijpimi, Labán runaca cutin:

“¿Imatata cuchun munangui?” nirca.

Shina nijpimi Jacobca, cashna nirca:

“Imatapash na cuchun mañajunichu. Cambaj llamacunata michishpa catingapa, ñuca nishcatalla pactachipai. 32Cambaj tucuilla animalcunata ricugrishpa, lishta llamacunata, yana llamacunata, lishta chivocunatapashmi shicanyachisha. Chaicunami, ñucapaj saquiringa. 33Chashna rurashpami jipacunapica, canda na umachishpa, ñuca japina cashcatalla shicanyachishcata yachangui. Lishta illaj llamacunatapash, lishta illaj chivocunatapash, shinallata, yana llamacunatapash na japinachu capani. Chaicunata ñuca japishpaca, shuhuashcapimi ricurisha” nircami.

34Shina nijpimi, Labán runaca:

“Can nishcashna pactachun” nirca.

35Chai punllallatami Labán runaca, lishta llamacunata, yana llamacunata, lishta chivocunatapash tucuillata agllashpa, paipaj churicuna michinajuchun cacharca. 36Jacob causajushca pushtumandaca, quimsa punllata purina canata caruman rishpa michinajuchunmi cacharca. Jacobca, Labán runapaj saquirishca llamacunatami michijurca. 37Chashna michijushpami Jacobca, álamo, avellano, castaño verde caspicunata faquishpa, yurajlla raya ricuringacaman, carata lluchurca. 38Chai lluchushca caspicunataca, animalcuna shamushpa, yacuta ufianajun pushtupimi churarca. Llamacuna yacuta ufiangapa shamushpami, jari llamacunaca, huarmi llamacunataca chaipi puñuj carca. 39Chashnami llamacunaca, vara caspicuna tiyanajuj pushtupi chichu tucushpa, lishta llamacunata huacharca. 40Jacobca, chai lishta huahua llamacunatapash, yana llamacunatapash, Labán runapaj llamacunamanda agllashpami, paipaj llamacunahuan tandachijurca. Paipaj llamacunataca, shican churashpami, Labán runapaj ashtaca llamacunahuanga, na tandachin carca. 41Ashtahuan ali llamacuna cunujyana punllacunapica Jacobca, yacuta ufiachina pushtupimi, chai caspicunataca, llamacunapaj ñaupajpi churan carca. Chaipi chichu saquirinajuchunmi, chashna churan carca. 42Ashtahuan tsala llamacuna shamunajujpica, chai caspicunataca na churanchu carca. Chashnami, ashtahuan tsala llamacunaca, Labán runapaj carca. Ashtahuan ali llamacunaca, Jacobpajmi carca. 43Jacobca, ashtaca gañan huarmicunata, jaricunatami charirca. Shinallata, llamacunatapash, camellocunatapash, burrucunatapash, ashtacatapacha charishpami ninan charij tucurca.

Currently Selected:

GÉNESIS 30: QVI16

Highlight

Copy