JUAN 18
18
Jesusta prezu apashcamanda
(Mat. 26:47-56; Mar. 14:43-50; Luc. 22:47-53)
1Jesusca, chashna nishca jipami, Paipaj yachajujcunata pushashpa, llujshishpa rirca. Paicunaca, Cedrón shuti yacu ninanda jatarijuj huaicuta chimbashpami, shuj huertaman yaicunajurca. 2Jesusca, chaipimi Paipaj yachajujcunahuan cutin cutin tandanajun carca, shinamandami Jesusta japichij Judasca chai huertataca alipacha rijsij carca. 3Shina rijsishpami Judasca, sacerdotecunata mandajcunapaj, fariseocunapaj, ashtaca macanajuj runacunata, chapajcunatapash pushashpa rirca. Paicunaca michacunata, michungunata, macanajungapa imata charishcatapash apashcami rinajurca. 4Paita imata ruranatapash Jesusca ña yachashpami, ñaupashpa rishpa:
“¿Pitata mascanguichi?” nishpa tapurca.
5Shina tapujpimi:
“Ñucanchica, Nazaret pueblomanda Jesustami mascanajunchi” ninajurca.
Shina nijpimi, Jesusca:
“Ñucami cani” nirca.
Jesusta japichij Judaspash paicunahuanmi chaipi carca. 6“Ñucami cani” nijhuanmi, chai macanajuj runacunaca huashaman suchurishpa alpapi shitarirca. 7Jesusca cutinmi:
“Cangunaca, ¿pitata mascanguichi?” nishpa tapurca.
Paicunaca:
“Ñucanchica, Nazaret pueblomanda Jesustami mascanchi” ninajurca.
8Shina nijpimi Jesusca:
“ ‘Ñucami cani’ nishpa ñami villarcani. Ñucata mascanajushpaca, paicunataca richun saquipaichilla” nirca.
9“Ñucaman carashcacunataca, shujllatapash na chingachircanichu” nishca pactachunmi, chashnaca nijurca. 10Simón Pedroca, shuj espadata charijushpami, chaita surcushpa, Malco shuti runapaj ali maquiman tiyajuj rinrita fitirca. Chai runaca, sacerdotecunata mandajpajta rurajmi carca. 11Chashna rurajpimi Jesusca, Pedrota cashna nirca:
“Cambaj espadataca, maipi tiyajushcapillata cutin alichilla. Ñuca Taita cushca copamandaca, ¿nachu ufianallata cani?” nircami.
Sacerdotecunata mandajpajmanmi Jesustaca apashca
(Mat. 26:57-58; Mar. 14:53-54; Luc. 22:54)
12Shina nijpimi macanajuj runacunapash, paicunata mandajpash, judiocuna cachamushca chapajcunapash, Jesustaca japishpa huatanajurca. 13Chashna japishpami, Anás shuti runapajmanra, punda aparca. Paica, sacerdote Caifaspaj huarmipaj taitami carca. Caifás runaca, chai huatapica sacerdotecunata mandajmi carca. 14Sacerdote Caifasmi: “Cai llactapi causajcunamanda shujlla runa huañunaca alipachamari” nishpa judiocunaman yuyaita cushca carca.
Pedroca, Anaspaj huasi patiopimi cashca
(Mat. 26:69-70; Mar. 14:66-68; Luc. 22:55-57)
15Jesustaca, Simón Pedropash shuj yachajujpashmi catishpa rinajurca. Chai yachajujtaca, sacerdotecunata mandajpash rijsijmi carca. Paimi, mandaj sacerdotepaj huasi patioman, Jesusta catiriyaj yaicurca. 16Ashtahuangarin Pedroca na yaicushpami, pungu huashapi shayajurca. Shina shayajujpimi, chaishuj yachajujca mandaj sacerdotepaj rijsij cashpa, pungupi ricujuj cuitsataca:
“Pedro yaicumuchun saquipai” nishpa ucuman pusharca. 17Shina yaicujpimi, chai cuitsaca:
“¿Nachu chai runapaj yachajujpura cangui?” nishpa, Pedrotaca tapurca.
Shina tapujpimi Pedroca:
“Na chaipurachu cani” nirca.
18Chiri chiri cajpimi, ima nishcata rurajcunapash, chapajcunapash, yamdata rupachishpa cununajurca. Paicunahuanmi, Pedropash cunushpa shayajurca.
Jesustaca, sacerdotecunata mandaj Anasmi tapuchishca
(Mat. 26:59-66; Mar. 14:55-64; Luc. 22:66-71)
19Sacerdotecunata mandajmi, Jesustaca, Paipaj yachajujcunamandapash, pai imata yachachishpa purishcatapash tapujurca. 20Shina tapujpimi Jesusca, cashna nirca:
“Ñucami tucuilla gentecuna uyanajujta villashpa purijurcani. Judiocuna tandanajuj sinagogacunapi, Diosta yarina huasipipashmi yachachishpa purijurcani. Imatapash na pacalla villajurcanichu. 21¿Imamandata Ñucataca tapuchihuangui? Ñuca imata villajushcata uyashca gentecunata tapuchipailla, paicunami Ñuca imata yachachishcatapash yachan” nijurcami.
22Shina nijhuanmi Jesustaca, chaipi shayanajujpuramanda shuj chapajca:
“Mandaj sacerdotetaca, ¿cashna ninalla yanguichu?” nishpa ñavipi huajtarca.
23Shinamandami Jesusca cashna nirca:
“Ima na alita nijushca cajpipash, nihuailla. Ashtahuangarin, aliguta nijushca cajpica, ¿imamandata huajtahuangui?” nijurcami.
24Chai jipami Jesustaca, maquita huatashpa, Anás runaca, sacerdotecunata mandaj Caifaspajman cacharca.
Pedroca, Jesusta na rijsinichu nishcami
(Mat. 26:71-75; Mar. 14:69-72; Luc. 22:58-62)
25Pedropash chaipillata cunushpa shayajujpimi:
“¿Nachu cambash, chai runapaj yachajujpura cangui?” nishpa tapurca.
Shina nijpimi Pedroca:
“Napacha chaipurachu cani” nirca.
26Chai jipami, sacerdotecunata mandajpajta ruraj shuj runaca, Pedrotaca:
“¿Nachu candapash, huertapi Paihuan pacta cajta ricurcani?” nirca.
Pedroca, chai runapaj ayllupuratami rinrita fitishca carca.
27Pedroca cutimbashmi:
“Na chaipichu carcani” nijurca.
Shina nijhuanmi, galloca ñapash candarca.
Jesustaca, Pilatopaj ñaupajmanmi apashca
(Mat. 27:1-2,11-31; Mar. 15:1-20; Luc. 23:1-5,13-25)
28Narapash ali punllayajpillatami Jesustaca, Caifás sacerdotepaj huasimandaca, mandaj Pilatopajman apashpa rinajurca. Ashtahuangarin paicunaca, chai mandajpaj huasiman na yaicurcachu. Paicunaca, pascua punllata yarishpa micungapa, ama mapayashca cangapami na yaicurca. 29Shinamandami Pilatoca, canllaman llujshishpa:
“Cai runataca, ¿imata juchachishpata apamunguichi?” nirca.
30Shina nijpimi, cashna nirca:
“Cai runa, ima na alitapash na rurashca cajpica, cambaj ñaupajman na apamunchimanllu carca” ninajurca.
31Shina nijpimi Pilatoca, cashna nirca:
“Cangunapaj mandashca shimipi nijujta ricushpa, cangunallata ricuichilla” nircami.
Shina nijpimi judiocunaca:
“Ñucanchica, pitapash na huañuchi ushanachu canchi” ninajurca.
32Jesús imashna huañuchi tucunata villashca shimicuna pactachunmi, paicunaca shina ninajurca. 33Pilatoca, pai mandashpa tiyajunaman cutin tigrashpami, Jesusta cayachun cachashpa:
“¿Canllu judiocunata Jatun Mandaj cangui?” nirca.
34Shina nijpimi Jesusca:
“¿Cambaj munaichu cashna tapujuhuangui, na cashpaca, shujcuna villajpichu tapujuhuangui?” nirca.
35Shina nijpimi Pilatoca:
“¿Ñucataca, judío runa yanguichu? Ashtahuangarin, cambaj llactapurallata, mandaj sacerdotecunallatami Candaca, ñuca ñaupajman apamushca. ¿Canga, imatata rurashpa purijurcangui?” nirca.
36Shina nijpimi Jesusca:
“Ñucapaj mandanaca, na cai pachapichu. Cai pachata Ñuca mandana cajpica, Ñucapajta rurajcunami judiocuna ama japichunga, paicunahuan macanajunman carca. Ashtahuangarin Ñuca mandanaca, na cai pachapi tiyajunllu” nirca.
37Shina nijpimi Pilatoca:
“Shinaca, ¿Canllari jatun mandaj cangui?” nishpa tapurca.
Shina nijpimi Jesusca:
“Canllatami, jatun Mandajmi cangui nijuhuangui. Shina cashpami, na llullashpa villangapa cai pachapi huacharimurcani. Na llullashpa villajujta cazujcunaca, tucuicunami Ñuca imata villajujtapash aliguta uyanajun” nircami.
38Shina nijpimi Pilatoca:
“¿Imata na llullayari?” nishpa tapurca.
Shina tapushpallami cutin llujshishpa judiocunataca cashna nijurca:
“Cai runa ima na alita rurashcatapash na tarinichu. Shina cajpimi, na juchachita ushani. 39Ashtahuangarin, pascua punllapica, prezu tiyajpuramanda shujta cacharichunmi mañanata yachanguichi. Shina cashpaca, ¿judiocunata Jatun Mandajtachu cacharichun munanguichi?” nijurcami.
40Shina nijpimi, tucuicuna cutin ninanda caparinajushpa:
“Chai runataca napacha cacharinachu cangui, ashtahuangarin Barrabastami cacharina cangui” ninajurca.
Barrabasca, shuhua runami carca.
Currently Selected:
JUAN 18: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
