JUAN 20
20
Jesús causarishcamanda
(Mat. 28:1-10; Mar. 16:1-8; Luc. 24:1-12)
1Semana callari tutamandataca nara ali punllayajpillatami, Magdala pueblomanda Mariaca, Jesusta pambashcata ricungapa rirca. Chaiman chayashpaca, chai utujuta quilpashca rumita anchuchishcatami ricurca. 2Chaita ricushpaca Simón Pedromanbash, Jesús ninanda juyashca yachajujmambash villangapami calparca. Paicunapajman chayashpaca:
“Apunchi Jesustaca utujumanda apashcamari. Maipi churashcatapash na yacharinllu” nijurcami.
3Shina nijhuanmi, Pedropash, caishuj yachajujpash, Jesusta pambashca utujuta ricungapa llujshirca. 4Ishcandi calpashpaca, caishuj yachajujrami Pedrotaca mishashpa, Jesusta pambashca utujuman punda chayagrirca. 5Ricungapa urai rishpaca, fachacunalla tiyanajujta ricushpami paica na yaicushca shayajurca. 6Jipaman Simón Pedro chayamushpaca, utuju ucuman yaicurcallami. Paipash fachacunatallami ricurca. 7Jesuspaj umapi pilluchishca fachaguca caishuj fachacunahuanga na tandachishpa churashca cashpami, shuj pushtupi aliguta pillushca tiyajurca. 8Shinallata, punda chayamushca caishuj yachajujpash utujuman yaicushpa ricushpami crijurca. 9Paicunaca: “Huañushcacunapaj chaupimandami causaringa” nishpa quilcashca tiyajujtami, nara ali yachashca carca. 10Chashna cashpami, chai yachajujcunaca paicunapaj huasiman tigranajurca.
Magdala pueblomanda Mariamanmi, Jesusca ricurishca
(Mar. 16:9-11)
11Ashtahuangarin Mariallami, Jesusta pambashca utuju ñaupajpi huacajurca. Paica huacashpandimi, utuju ucuta cumurishpa chapajurca. 12Shina chapajushpaca, yurajta churajushca ishcai angelcuna tiyanajujtami ricurca. Paicunaca shujca umaman, shujca chaquimanmi, Jesusta maipi churashcapi tiyanajurca 13Chai angelcunami:
“Canga, ¿imamandata chashna huacajungui?” nishpa tapunajurca.
Shina nijpimi María huarmiguca, cashna nirca:
“Ñucata Mandaj Jesusta apashcamandami huacajupani. Paitaca, maipi churashcatapash na yacharinllu” nijurca.
14Shina nishpalla tigrashpa ricushpaca, Jesustami paica ricurca. Ashtahuangarin Jesustaca na rijsircachu.
15Shina cajpimi Jesusca:
“Canga, ¿imashpata huacajungui? ¿Pitata mascajungui?” nishpa tapurca.
Shina tapujpimi,cai runaca huertata ricushpa alichij runamari yashpa, cashna nijurca:
“Taitalla, Jesús huañushcata maipi churangapa apashca cashpapash villahuailla, ñuca apamugripashallami” nijurca.
16Shina nijujpimi Jesusca:
“¡María!” nirca.
Shina nijpimi:
“¡Raboni!” nishpa tigrachirca.
(Raboni nishpaca, Yachachij nijunmi).
17Shina nijpimi Jesusca, cashna nijurca:
“Ñucataca ama tacarihuaichu. Nara Ñuca Taitapajman vichai rinichu. Ñuca Taitaca, cangunapajpash Taitami. Ñuca Taita Diosca, cangunapajpash Taita Diosmi. Shinamanda, cunanga Paipajmanmi vichai rigrijuni, chaitaca, Ñuca huauquicunapajman rishpa villagripai” nijurcami.
18Shina nijujpimi, Magdala pueblomanda Mariaca, Apunchi Jesusta ricushcatapash, paiman Jesús imatalla nijushcatapash, Jesuspaj yachajujcunaman villangapa rijurca.
Paipaj yachajujcunamanmi Jesusca ricurishca
(Mat. 28:16-20; Mar. 16:14-18; Luc. 24:36-49)
19Chai semana callari punlla ña tutayajujpimi, Jesuspaj yachajujcunaca, judiocunata manllaimanda pungucunataca alipacha vicharishpa tandanajushca tiyanajurca. Chaipimi Jesusca paicunapaj chaupipi shayarishpa:
“Cangunapajca, cushijushpa causana tiyachun” nijurca.
20Shina nishpallami, Paipaj ishcandi maquitapash, costillatapash paicunaman ricuchirca. Paipaj yachajujcunaca, Apunchi Jesusta ricushpami ninanda cushijunajurca. 21Shinamandami Jesusca, cutin cashna nirca:
“Cangunapajca, cushijushpa causana tiyachun. Imashnami Ñuca Taita, Ñucata cachamuhuarca, chashnallatami cangunatapash cachajuni” nircami.
22Shina nishpallami, paicunataca shimihuan fucushpa cashna nijurca:
“Jucha illaj Diospaj Espirituta chasquichilla. 23Pipaj juchacunatapash perdonajpillami, paicunataca perdonashca canga. Shinallata, paicunapaj juchacunata na perdonajpica, paicunatapash napacha perdonangachu.” nijurcami.
Tomasca, Jesús causarishcatami na crishca
24Dídimo nishpa rijsishca Tomasca, chunga ishcai yachajujpurami carca. Paica, paicunapajman Jesús shamujpica illashcami carca. 25Shinamandami caishuj yachajujcunaca:
“Apunchi Jesustaca ricurcanchimi” ninajurca.
Shina nijpimi Tomasca cashna nijurca:
“Paipaj maquipi clavocunahuan tacai tucushcata ricushpa, chai chugripi ñuca maqui dedota satishpallami crisha. Shinallata, Paipaj costilla chugripi ñuca maquita na satishpaca napacha crishachu” nijurcami.
26Pusaj punlla jipami, chai huasi ucupillata Jesuspaj yachajujcunaca, cutin tandanajushca tiyanajurca. Tomaspash chaipimi carca. Shina tiyanajujpimi, pungucunata ali vichashca cajpipash, Jesusca yaicumushpa, paicunapaj chaupipi shayarishpaca:
“Cangunapajca cushijushpa causana tiyachun” nirca.
27Shina nishpallami, Tomastaca cashna nijurca:
“Cambaj maqui dedota, Ñucapaj maqui chugripi churashpa ali ricuhuai. Shinallata, Ñucapaj costilla chugripi cambaj maquita, satishpa ali ricuhuai. Ama chashna caichu, Ñucataca crinami cangui” nijurcami.
28Shina nijujpimi Tomasca:
“¡Ñucata Mandaj Taitalla, ñuca Taita Dioslla!” nijurca.
29Shina nijpimi Jesusca, cashna nijurca:
“Tomás, canga ricushpapachami crishcangui. Ashtahuangarin, na ricushpapash crishcacunaca ninandapacha cushijuichi ninimi” nijurcami.
Jesusta crinajuchunmi cai shimicunataca quilcashca
30Jesusca, pipash na rurai ushanallacunataca Paipaj yachajujcuna ricujtami ashtahuan rurashpa purijurca. Chaicunataca, na tucuita caipi quilcashca tiyajunllu. 31Ashtahuangarin Jesustaca, Cristo cajtapash, Taita Diospaj Churi cajtapash crinajuchunmi caitaca quilcashca. Paita crishpaca, Paipaj shutipi causaita causagrinata charichunmi quilcashca.
Currently Selected:
JUAN 20: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
