JUAN 6

Picha huaranga runacunaman micuchun carashcamanda

(Mat. 14:13-21; Mar. 6:30-44; Luc. 9:10-17)

1Chai jipami Jesusca, Galilea cucha chimbaman rirca. Chai cuchallatami, Tiberias shutipash carca. 2Huañunajujcunata Jesús alichijujta ricushca cashpami, ashtaca gentecuna catinajurca. 3Shina cajpimi Jesusca urcuman vichai rishpa, Paipaj yachajujcunahuan tiyarirca. 4Shinallata, judiocunapaj pascua punllacunapash ñami chayamujurca. 5Jesusca, ashtaca gentecuna Paipajman shamushcata ricushpami:

“Cai tucuilla gentecuna micunajuchunga, ¿maimandata tandata randishpa apamushunyari?” nishpami Felipetaca tapurca.

6Ashtahuangarin, imata ninta yachangapallami chashna tapurca. Jesusca, imata ruranatapash ñami yacharca. 7Shina nijpimi Felipeca, cashna nirca:

“Tucuicunaman asha ashagu carana cashpapash, ishcai patsaj denario culquihuan randishca tandaca na pactangachu” nijurcami.

8Jesuspaj yachajujpuramanda, Simón Pedropaj huauqui Andresmi, Jesustaca cashna nijurca:

9“Caipi shuj huambragumi, picha cebada tandaguta, ishcai pijiguhuan charijun. Cai tucui gentecunaman carangapaca, ¿maitata pactangayari?” nijurcami.

10Shina nijpimi Jesusca:

“Shina cashpaca, tucuicunata tiyachipaichi” nirca.

Chaipica, jihua juyailla viñashcami carca. Chaipimi, picha huarangashna jaricuna tiyarinajurca. 11Jesusca, chai tandacunata japishpa, Taita Diosta pashi nishpami, Paipaj yachajujcunaman chaupishpa curca. Chai yachajujcunaca, chaipi tiyanajuncunamanmi caranajurca. Shinallata, pijicunatapash, mashnata munashcatami caranajurca. 12Ña na munashpa tiyanajujta ricushpami, Paipaj yachajujcunataca:

“Ama yanga shitachun puchucunataca tandachipaichi” nishpa mandarca.

13Paicunaca, chunga ishcai taza jundatami tandachirca. Picha cebada tandamandallami na micuita ushashpa, chashna puchuchirca. 14Pipash na rurai ushanallacunata, Jesús rurajta ricunajushpami, chai gentecunaca cashna ninajurca:

“Cai runaca, cai pachaman Dios cachamusha nishca profetapachami shamushca” ninajurcami.

15Ashtahuangarin Jesusca, Paita japishpa, jatun mandaj cachun churangapa munanajujta yachashpami, chai urcumanllata Pailla cutin tigrarca.

Yacu jahuata Jesús purijushcamanda

(Mat. 14:22-27; Mar. 6:45-52)

16Ña tutayajujpimi Jesuspaj yachajujcunaca, cuchaman urai rinajurca. 17Paicunaca, shuj barcopi tiyarishpami, cuchata chimbashpa Capernaúm puebloman rinajurca. Ña tutayashca cajpipash, Jesusca paicunapajman nara shamushcachu carca. 18Ninan huaira jatarijpimi, cucha yacuca caiman chaiman shitarijurca. 19Picha kilometrotashna, na cashpaca sucta kilometrotashna ña rinajujpimi, Jesusca yacu jahuata purishpa barcoman ña chayamujurca. Paita ricushpaca, ninandami manllarinajurca. 20Ashtahuangarin Jesusca:

“Na manllarinachu canguichi, Ñucamari cani” nircami.

21Shina nijpimi Jesustaca, cushijushpa barcopi chasquinajurca. Shinami, paicuna rinajuj puebloman ñapash chayagrinajurca.

Gentecunaca Jesustami mascanajushca

22Chai cayandi tutamandami, cucha chimbaman saquirishca gentecunaca, cashna ninajurca: “Cainaca, shujlla canoami caipi carca. Chaipica, Paipaj yachajujcunallami rirca. Jesusca, na paicunahuan rircachu” ninajurcami.

23Ashtahuangarin, Tiberías shuti pueblomandami barcocuna chayamushca carca. Apunchi Jesús, Taita Diosta pashi nishpa, tandata micuchun gentecunaman carashca, pushtu quimiriallamanmi chayamurca. 24Chaipica Jesuspash, Paipaj yachajujcunapash illajtami chai gentecunaca ricunajurca. Shinamandami, chai barcocunapi tiyarishpa, Capernaúm pueblopi Jesusta mascangapa rinajurca.

Jesusca, causaita caraj tandagumi

25Chai gentecuna cuchata chimbashpa, Jesusta tuparishpaca:

“Rabí, ¿ima punllata caiman chayamurcangui?” nishpami tapunajurca.

26Shina nijpimi Jesusca, cashna nirca:

“Napacha llullashpami, cangunataca cashna nini: Pipash na rurai ushashcata Ñuca rurashcata ricushcamandaca na shamushcachu canguichi. Ashtahuangarin, tandata na munajta micunajushcata yarishpallami shamushcanguichi. 27Tucurinalla micunamandaca, na imatapash ruranachu canguichi. Ashtahuangarin, causaita causagrinata caraj micunaguta japingapami tucuita rurana canguichi. Chai micunagutaca, Runa Aichayuj tucushca Ñucallami, cangunaman carasha. Chaita carachunmi, Taita Diosca, Pai munashcashnallata Ñucatapacha cachamuhuarca” nijurcami.

28Shina nijpimi:

“Taita Dios munashcata pactachingapaca, ¿imatata rurana capanchi?” nishpa tapunajurca.

29Shina nijpimi Jesusca cashna nirca:

“Taita Dios munashcata pactachinaca, Pai cachamushca Ñucata crichunmi munan” nircami.

30Shina nijpimi, cashna nishpa tapunajurca:

“Canda cringapaca, ¿Pipash na rurai ushanallacunata rurashpa ricuchiyari? Na cashpaca, ¿imatata ashtahuan ruranguiyari? 31Ñucanchipaj ñaupaj taitacunaca, chaquishca pambacunapimi maná shuti tandata micunajurca. ‘Tandata micuchunga, jahua pachamandami caramurca’ nishpa quilcashcami tiyajun” ninajurcami.

32Shina nijpimi Jesusca cashna nijurca:

“Napacha llullashpami, cangunataca cashna nini: Jahua pachamanda tandataca Moisesca na cararcachu. Ashtahuangarin, Ñuca Taitami jahua pachamanda tandatapacha caramushca. 33Taita Dios caramushca tandami, jahua pachamanda shamushpa, cai pachapi causajcunaman causaita causagrinata caramujun” nijurcami.

34Shina nijpimi:

“Chai tandataca punllandi ñucanchiman carahuanguilla, Apunchi Jesús” ninajurca.

35Jesusca, paicunata cashnami nirca:

“Ñucami, causaita caraj tandagu cani. Maijambash Ñucapajman shamushpaca, napacha yarjachingachu. Ñucata crishpaca, napacha yacunayachingachu. 36Ashtahuangarin cangunataca ñami nircani: Cangunaca, Ñucata ricushpapash, na crishpami purinajunguichi. 37Ñuca Taita carashca tucui gentecunami Ñucapajman shamunajunga. Ñucapajman shamujcunataca, na llujchishpa cachashachu. 38Jahua pachamanda shamushpaca na Ñuca munaita rurangapa shamurcanichu. Ashtahuangarin, Ñucata cachamuj Taita munashcata pactachingapami shamurcani. 39Ñucata cachamuj Taitapaj munaica cashnami capan: Ñucaman carashcacunataca, shujtallapash na chingachishpa, shamui punllapica tucuicunata causachijuchunmi munan. 40Ñucata cachamuj Taitapaj munaica cashnami capan: Paipaj Churita ricushpa, Paita crishpa, causaita causagrichunmi munan. Ñucata crijcunataca, tucuicunatami tucurimui punllapica causachisha” nijurcami.

41“Ñucami, jahua pachamanda shamushca tandagu cani” nishpa Jesús villajujpimi, judiocunaca fiñashpa, na alicachinajurca.

42Paicunaca cashnami ninajurca: “¿Nachu, cai runaca, Josepaj churi Jesús? Paipaj taitatapash, mamatapash ñucanchica rijsinchimari. ¿Imashpata paica: ‘Jahua pachamandami shamurcani’ nijunyari?” ninajurcami.

43Chashna ninajujpimi Jesusca, cashna nirca:

“Cangunapurapica, na chashna fiñashpa na alicachinachu canguichi. 44Ñucata cachamuj Taita pushamujpillami Ñucapajman shamui ushanga. Tucurimui punllapimi paitaca causachisha. 45Profetacunaca cashnami quilcashca carca: ‘Mandaj Diosmi, tucuicunata yachachinga’. Shina cashcamandami, Ñuca Taita yachachijujta uyashpa chasquijcunalla, Ñucapajmanga shamunga.

46Ñuca Taitataca, pipash na ricushcachu. Taita Diosmanda shamushca Ñucallami, Ñuca Taitataca ricurcani. 47Napacha llullashpami, cangunataca cashna nini: Ñucata crijcunallami, causaita causanata charin. 48Ñucami, causaita caraj tandagu cani. 49Cangunapaj taitacunaca, chaquishca pambapimi maná shuti tandata micunajurca. Chashna cashpapash tucuicunami huañurca. 50Caimi jahua pachamanda shamushca tandagu. Cai tandaguta maijambash micushpaca, na huañungachu. 51Ñucami, jahua pachamanda shamushca causaj tandagu cani. Cai tandaguta maijambash micushpaca, causaitami causanga. Ñuca carana tandaguca, Ñuca aichami. Cai pachapi causajcunaman causaita causanata carangapaca Ñucallatami huañusha” nijurcami.

52Shina nijpimi judiocunaca, paicunapura fiñanajushpa cashna nirinajurca:

“¿Imashnata caica, Paipaj aichata micuchun carai ushangayari?” ninajurca.

53Shina nijpimi Jesusca cashna nirca:

“Napacha llullashpami, cangunataca cashna nini: Runa Aichayuj tucushca Ñucapaj aichata na micushpa, ñucapaj yahuartapash na ufiashpaca, causaita causagrinataca na charingachu. 54Ñucapaj aichata micushpa, Ñucapaj yahuartapash ufiashpallami, causaita causagrinataca charinga. Tucurimui punllapimi paitaca causachisha. 55Ñuca aichataca, micunapachami, Ñuca yahuartapash, ufianapachami. 56Ñuca aichata micushpa, Ñuca yahuarta ufiashpallami, Ñucahuan shujlla tucushpa causajunga. Shinallata Ñucapash, paihuanmi causajusha. 57Causaita causaj Taita, Ñucata cachamujpimi paimandalla causajuni. Shinallatami, Ñucata micushpaca, Ñucamandalla causaita charinga. 58Caimi jahua pachamanda shamushca tandagu capan. Cangunapaj taitacunaca, maná shuti tandagutami micunajurca. Chashna cashpapash tucuicunami huañurca. Cai tandata micushpaca causaitami causanga” nijurcami.

59Cai shimicunataca, Capernaúm pueblo, sinagogapimi yachachijurca.

Causaita causagrinata caraj shimicunami

60Chaita uyashpami, Jesusta catij ashtaca gentecunaca:

“Cai shimicunaca shinllipachamari. ¿Pita pactachi ushangayari?” ninajurca.

61Paipaj yachajujcuna, chashna fiñashpa na alicachinajujta yachashpami, Jesusca cashna nijurca:

“¿Ñuca yachachishcacunachu, cangunataca fiñachijun? 62Runa Aichayuj tucushca, maimanda shamushca cashpapash, chaimanllata tigrajta ricushpacarin ¿imatashi ninguichi? 63Espiritullami causaita causagrinataca caranga, aichaca na chai causaitaca carai ushanllu. Ñuca rimashca shimicunallami, causaita causagrinata caraj Espíritu capan. 64Ashtahuangarin, cangunapuramanda huaquingunaca, napacha crishcami uyanajunguichi” nircami.

Shinamandami Jesusca, maijanguna Paita na crinatapash, maijanguna huañuchijcunaman japichinatapash, callarimandallata ña yacharca. 65Shina cajpimi cashna nijurca:

“Ñucata cachamuj Taita carajpillami Ñucapajman shamui ushanga, ashtahuangarin, Ñuca taita na carajpica ‘na shamungachu’ nishpami villajurcani” nijurcami.

66Chai punllamandami Jesusta catishpa purijcunaca, ashtacacuna, Paitaca saquishpa rinajurca. 67Shinamandami Jesusca, Paipaj chunga ishcai yachajujcunataca:

“¿Cangunapashchu Ñucata saquishpa ringapa munanguichi?” nirca.

68Shina nijpimi Simón Pedroca, cashna nishpa tigrachirca:

“Apunchi Jesús, ¿pipajmanda ashtahuanga rishunyari? Canllami, causaita causagrinata caraj shimicunataca charipangui. 69Ñucanchica, Canda crij cashpami, causajujlla Taita Diospaj Churi, Cristopacha cajta yachapanchi” nijurcami.

70Shina nijujpimi Jesusca, cashna nishpa tigrachirca:

“Cangunataca, ¿nachu chunga ishcaipurata agllarcani?, shina cashpapash, cangunapuramanda shujca, diablomari” nircami.

71Chashna nishpaca, Simonbaj churi Judas Iscariotetami nijurca. Paimi, chunga ishcaipuramanda cashpapash, Jesustaca huañuchijcunaman japichina carca.

Currently Selected:

JUAN 6: QVI16

Highlight

Copy