LUCAS 19

Jesusmandapash, Zaqueomandapash

1Jericó puebloman Jesús chayashpaca, chai pueblo chaupitami yalijurca. 2Chaipimi, Zaqueo runa causajurca. Paica, impuestota japij runacunata mandaj, ninanda charijpashmi carca. 3Paimi, Jesustaca maijan cajta rijsingapa ninanda ricunayachirca. Ashtahuangarin, gentecuna ninanda junda cajpimi, Zaqueo runaca uchilla cashpa, na ricui usharca. 4Paica, sicómoro quiru jahuamanda ricungapami, ñaupashpa calparca. Jesusca, chaitapachami yalina carca. 5Chaiman Jesús chayashpa vichai ricushpami, Zaqueo runata ricushpa cashna nirca:

“Zaqueo, ucha uriajumui. Cunanga, cambaj huasipimi mingarina cani” nircami.

6Shina nijpi ucha uriajushpami, Zaqueo runaca ninanda cushijushpa mingachigrirca.

7Chaita ricushpami, juchayu runapaj huasipirachu mingaringapa yaicun nishpa tucuicuna na alicachinajurca.

8Ashtahuangarin, Zaqueo runa shayarishpami, Apunchi Jesustaca cashna nirca:

“Apunchi Jesús, ñuca imata charishcatapash chaupitami, huajchacunaman caragripani. Maijandapash umashpa, culquita japijushcatapash, chuscucaman mirachishpami tigrachigrini” nijurcami.

9Shina nijpimi Jesusca cashna nirca:

“Cunanmi, cai huasipi causajcuna quishpirina punlla chayamushca. Paipash, Abrahambaj miraipura cashcamandami quishpirishca. 10Runa Aichayuj tucushca Ñucami, chingashca causajcunata mascashpa, quishpichingapa shamurcani” nircami.

Chunga culquihuan yarichishpami yachachishca

11Chashna nijujta uyanajujpimi Jesusca ña Jerusalenman chayajushpa, shuj yarichinahuan ashtahuan yachachishpa catirca. Gentecunaca: “Taita Dios mandajpi causanaca, ñallapachami chayamunga” yanajurcami.

12Shina cajpimi cashna nijurca: “Jatumbi churai tucushca runaca, pai mandanata caru llactapi chasquingapa rishca jipami cutin tigramurca. 13Paica, nara rishpallatami, paipajta ruraj chungapurata cayashpa, chunga mina culquicunata, paicunaman mingarca, shina mingashpami: ‘Cai culquihuanga, ñuca tigramungacaman randishpa, jatushpa mirachinguichi’ nirca. 14Ashtahuangarin paipaj llactapuracunaca, ninanda na ricunayachishpami: ‘Chai runa ñucanchita mandachunga, napacha munanchica’ ninajuchunmi, paicunamanda rimajcunata huashalla cachanajurca. 15Shina cajpipash, chai runaguca, pai mandanata chasquishca jipa tigramushpami pai mingashca culquita mashnata mirachishcatapash yachangapa, paipajta rurajcunata cayachun cacharca. 16Paipajta ruraj runa, pundalla chayamushpami: ‘Can mingashca mina culquitaca, chungacamanmi mirachiparcani, taitalla’ nirca. 17Shina nijpimi chai mandaj runaca, cashna nirca: ‘Tucuita ali pactachijmi cashcangui. Ashagutalla mingajpipash, aliguta pactachin cashcamandami, chunga pueblocunata mandajuchun, churasha’ nircami. 18Chai jipami, caishuj runa chayamushpaca: ‘Can mingashca mina culquitaca, pichacamanmi mirachiparcani, taitalla’ nirca. 19Shina nijpimi: ‘Picha pueblocunata mandajuchunmi, candapash churasha’ nirca. 20Chai jipaca, shuj runa chayamushpami cashna nirca: ‘Taitalla, can mingashca mina culquica caipimi. Chaitaca shuj findupi huatashpami alichiriyajurcani. 21Candaca, fiñajlla runa cajpimi manllarcani. Canga, imata na cushpapash mañaj shamujlla, na tarpushpapash tandachij shamujlla runami cangui’ nirca. 22Shina nijpimi, paitaca cashna nirca: ‘Canga, na ali runamari cashcangui. Canllata chashna nirijushcamandami, llaquichi tucungui. Fiñajlla runa cajtapash, imata na cushpapash mañaj shamujlla, na tarpushpapash tandachij shamujlla, runa cajtaca yachashcanguimi. 23Shina cashpaca, ¿imashpata ñuca culquitaca, culquita huacaichina ucupi na churagrircangui? Chaipi churajpica ñuca tigramushpaca, mirashca culquindimi japiman carcani’ nircami. 24Chaipi shayajcunatami, cashna nirca: ‘Cunanga, cai runa charijuj culquita quichushpa, chunga mina culquicunata charij runaman cuichi’ nircami. 25Shina nijpimi paicunaca: ‘Paica, ñamari chunga mina culquicunata charin, taitalla’ ninajurca. 26Ñucami, cashna nini: ‘Ashtacata charij runamanmi ashtahuan caranga. Ashtahuangarin, na charij runataca, ashatalla charishcatapashmi quichunga. 27Paicunata mandachun, ñucata na munashpa fiñajcunataca, caiman apamushpa, ñuca ñaupajpi cungata fitichi’ nishpami mandarca” nircami.

Jesusca alicachi tucushpami Jerusalenman yaicushca

(Mat. 21:1-11; Mar. 11:1-11; Juan 12:12-19)

28Chashna villaita tucuchishpallami Jesusca, Jerusalenman ashtahuan vichai rijurca. 29Betfagé, Betania pueblo quimiriallapi tiyajuj Olivo lomamanmi chayajurca. Chaiman chayajushpami, Paipaj ishcai yachajujcunata cacharca. 30Paicunataca cashna nishpami cacharca:

“Chai chimba uchilla puebloman ripaichi. Chaiman chayashpaca, pipash nara tiyarishca maltun burruguta huatashca shayajujtami taringuichi. Chai burrugutaca, cacharishpa apamupanguichilla. 31‘¿Imapata cacharinajunguichi?’ nishpa pipash tapujpica, Apunchi Jesusmi apachun cachamun, ninguichi” nishpami cacharca.

32Apachun cachajpi rishpaca, Jesús nishcashnami tarigrirca. 33Maltun burruguta cacharijujpi, chai burruguta charij ricushpaca:

“¿Imapata maltun burrugutaca cacharinajunguichi?” nishpami tapunajurca.

34Shina tapujpica:

“Apunchi Jesusmi apachun cachamurca” ninajurcami.

35Jesuspajman ña apamushpaca, paicunapaj jahualla churajushcata, chai maltun burrupaj lomopi churashpami, Jesustaca tiyachinajurca. 36Jesús ña yalijujpimi gentecunaca, paicunapaj jahualla churajunacunata ñambi mandanajurca. 37Olivo lomamanda urai rina ñanda rinajujpimi, Jesusta tucuilla catijcunaca ninanda cushijushpa capari callarinajurca. Paicunaca, Jesús juyailla imagutapash rurashpa purijujta ricushca cashpami, Taita Diostaca ninanda alicachishpa, 38cashna ninajurca:

“¡Jatun Diospaj shutipi shamujuj Jatun Mandajca: ‘Aligumari cangui’ ni tucushca cachun! ¡Jahua pachamandaca, ali causaiguta caramuchun! ¡Jahua pachapi tiyajuj Diosca: ‘Punchapambagumi cangui’ ni tucushca cachun!” nishpami caparinajurca.

39Shina ninajujpimi, chai ashtaca gentecunahuan rinajuj huaquin fariseocunaca:

“Yachachij, Cambaj yachajujcunataca: ‘Upalla caichi’ niyari” ninajurca.

40Shina nijpimi Jesusca cashna nirca:

“Cai gentecuna upallayajpica, rumicunami caparinman” nircami.

41Jerusalenman Jesús ña chayajushpaca, chai pueblota ricushpami, chai pueblomanda huacarca. 42Paica cashnami nijurca: “¡Shungupi ali causaita canman caramujujta cunan punllallapash yachashpaca, alichari canguiman! Ashtahuangarin, cunanga cambaj ñavitaca quilpashcashnami cangui. 43Cangunata llaquichina punllacunaca chayamungami. Chai punllacunapimi, cangunata fiñajcunaca, muyundi shayarishpa cangunataca chaupipi churanga. Shina rurashpami, cangunataca caimanda, chaimanda quichijimunga. 44Shina shamushpami, ñutushpa alpapi shitanga. Shinallata, cambaj huahuacunandimi tucuringui, shuj rumillapash shuj rumi jahuapica na saquiringachu. Dios llaquishpa quishpichingapa shamushcata imatapash na yarishcamandami, chashna llaquichi tucungui” nircami.

Diospaj huasita mapayachijcunata llujchishpa cachashcamanda

(Mat. 21:12-17; Mar. 11:15-19; Juan 2:13-22)

45Diospaj huasiman Jesús yaicushpaca, jatujcunatapash, randijcunatapashmi llujchishpa calpachirca. 46Jesusca cashnami nirca:

“Quilcashcapica cashnami nijun: ‘Ñuca huasiguca, Ñucata mañana huasimi canga’ nijunmi. Ashtahuangarin cangunaca, shuhuacuna pacajuna utujutashnami rurashcanguichi” nircami.

47Diospaj huasipica, punllandimi Jesusca yachachijurca. Ashtahuangarin mandaj sacerdotecunapash, mandashca Shimita yachachijcunapash, shuj mandajcunapash huañuchingapami munanajurca. 48Ashtahuangarin Jesús villajujtaca, tucuilla gentecuna aligutapacha uyanajujpimi, imatapash na rurai usharca.

Currently Selected:

LUCAS 19: QVI16

Highlight

Copy