Lukas 14
14
Liningasan di Yisus Iso Tulun do Poloon
1-2Om kivaro iso Tadau Koingkajadan do minongoi i Yisus mangakan siri valai diri iso kotua di kumpulan Porisi. Nga kivaro dii iri iso kusai do poloon do rinumikot si gotuvang Disido. Nga piimat-imatai dii di tongotulun diri i Yisus nong mangalanggar di Undang-undang Ugama do Joudi ko au. 3Om pongoduatno dii i Yisus di tongoguru do Undang-undang Ugama do Joudi om i kumpulan do Porisi do ka, “Kalanggar naku do Undang-undang Ugama tokou nong mongolingos do tulun au kataru ontok do Tadau Koingkajadan? SoromononKu au, kon?” ka.
4Nga ausoi mungkomi diolo jumawap. Om kuutaino dii di Yisus iri longon di kitoruol, om lingasaino dii, om suuoJo nogi pouli.
5Om pitangar nogi dii i Yisus diolo do ka, “Isaai nopo dikovu do kivaro tanak ko kivaro sapi do naratu siri torobong ontok Tadau Koingkajadan, mistino do piagaan muju do potindal insan Tadaupo do Koingkajadan, kon?” kaDisido.
6Nga ausoi diolo nakadapat jumawap di tinangar di Yisus diri.
Osumbung om Osuribak Ginavo
7Nga kaantangai dii di Yisus iri tongotulun di linoou di tulun Porisi mongoi siri valaijo do momili toogomon do subai nong mogom siri toogomon di tulun do kipangkat. Om irino dii kinoontodoJo do minaganu diti iso poiradan do ka, 8“Loovonko nopo do tulun siri pikowinan nga adano mogom siri toogomon di naatur mantad, do ogomon di tulun do ongogagajo pangkat, do kivaropo kama tulun vokon do agajo pangkat mantad dika do noloou porikot siri, 9om auno ongoionko tangaro di minongoloou dikovu mongiduvo do ka, ‘Valiu dikau mogom sino do siti nopo nga ogomon di tuan,’ ka nopo, om makinpo dii koikumannu nong irad diri do sinuukopo dii mogom siri toogomon do ausoi ngaran-ngaran. 10Nga loovonko nopo di tulun siri pikowinan nga ogomno siri toogomon di ogomon di tulun diri auso ngaran-ngaran; do rumikot dii i tulun di minongoloou dika do mitangar dika do, ‘Apa, ogom pogi silo gotuvang,’ ka, om makinpo dii kaandai nong irad diri do urumatanko si gotuvang di sasamanu linoou. 11Do pointikid-tikid do tulun di misinggagajo nga irino poinsuribakon, om isaai nopo tulun di sumuribak i ginavo nga irino poinggojoon,” kadi poiradan di Yisus.
12Om pitangarno dii i Yisus di tulun diri minongoloou Disido do ka, “Kivaro nopo mangangakan siti dika ontok do tadau ko totuvongpo, adano mongoloou di tongokoruangnu, ko i tongosulodnu, ko i tongowaris-warisnu ko i tongotulun siri somoknu diri akaya. Do iolo nopo nga kosulipo mongoloou dika. Jadi nong irad dino onuu nopo iri kivaro siri dikau irino sulian diolo. 13Nga nong mongoloouko nopo do tulun do moginakan nga loovono i tulun di miskin, om i pukung i takod om iri longon, om i mimpo-kimpo mampanau om i bolou, 14om ososogitkoi, do iolo nopo nga ausoi isuli dika. Nga ontok kovijaan kavagu di tulun do abanar, suliankoi di Kinoringan,” kadi Yisus.
Poiradan Momuka do Iso Poginakanan Tagajo
(Mat. 22:1-10)
15Om korongou nopo dii iri iso tulun di tangar di Yisus, om iri nogi koruang Disido mangakan, om pitangarno isido di Yisus do ka, “Ososogitno i tulun iri mongoi rumuung mangakan di tongotulun porintawon do Kinoringan do insan tadau,” ka.
16Om minaganu i Yisus do iso poiradan, kaDisido, “Kivaro iso tulun do momuka do poginakanan tagajo, om oguu dii i tongotulun do linoou daa disido do mongoi mangakan. 17Om korikot nopo dii i tadau kopongukaban diri poginakanan si disido, om ponuuno dii isido di turiponjo do popoilo diri tongotulun di nolooujo laid do sumapul mangakan do, ‘ “Ongoino bo do nosodiano kasangkat i taakanon,” kanto nono,’ kadi tuan.
18Om tikidno dii isido diri tongovalai do popoilo, nga sompori-pori nopo iri tulun sangkatangar-tangari do koontodon do au mongoi. Togina iri iso tulun minitangar do, ‘Mokimaap oku, do nokoboli oku do tana, jadi ongoiokupo dii antangai iri, nga maapo okuno do au oku dii diti koongoi,’ kadisido.
19Om pitangarno dii iri koduvo do ka, ‘Mokimaap oku, do nokoboli oku diri limo pasang i sapi, nga antatangaikupo dino iri nong potingkukuro, nga maapo okuno do au oku dii diti koongoi,’ kadisido.
20Om pitangarno dii iri vokon do ka, ‘Oruaipo kinokowinanku, jadi au oku dii diti koongoi,’ kadisido.
21Nga ulino dii iri turipon, om abaraino dii kasangkat disido di tuanjo iri tangar diolo. Nga karaatai nopo dii i tuan, i sanganu di valai, om pitangarno dii kavagu isido di turiponjo do ka, ‘Pampanaupo kavagu, om gogoono mongoi silo alun-alun om silo vajaan do ongopopoyok soi bandar, om isai-isai nopo tulun di miskin, om iri pukung i takod om iri longon, om iri bolou om iri mimpo-kimpo mampanau nga angataino kasangkat dogo do mongoi mangakan siti valaiku,’ kadi tuan.
22Aupo alaid om sinono iri turipon do mitangar di tuanjo do ka, ‘Tuan, noongoikuno i nisuunu, nga aupo noponu do tulun iti valainu,’ kadi turipon.
23Om pitangarpo dii kavagu i tuan disido, ‘Pimpanaupo soi tongovavajaan si tongokampung om siri tongotantason, om isaai nopo diolo siri nga angataino marong mongoi siti do kouvanganku nopo nga ogisok iti valaiku. 24Oinomodno do iso tulun pun di noloouku laid nga adano mangakan diti taakanonku!’ kadi tuan,” kadi poiradan di Yisus.
Ada Soromono Kouvangan Kondiri do Maja di Yisus
(Mat. 10:37-38)
25Insan tadau oguu marong i tongotulun do minaja di Yisus mampanau, nga kovili dii Isido om pitangarno diolo do, 26“Tulun nopo di rumikot siri Dogo nga misti au kojuu Dogo lobi mantad iamojo#14:26 iamo: iapa om iinojo, om savojo om tangaanakjo, om tongosulodjo kusai om tongondu om i kovijaanjo kondiri. Nong okonko irad dino, au isido osiliu do tulunKu. 27Om isaai nopo iri au monimban di salibjo kondiri, irino mijau matai tumaan di kasansaraanjo sabap aparsaya Dogo om maja nogi Dogo nga aui isido osiliu do tulunKu.
28Nong kivaro dikovu mamaal do valai tasavat nga misti mongijappo laaid diri siinjo nong kosukup do ivaal di valai ko au. 29Do nong au, osia-sia naama potonduk di torigi diri ko oopod i valai diri sabap aui kosukup iri siinjo. Nong irad dino tantu do irak-irakan isido di tongotulun diri koontong, 30om kadino di tongotulun, ‘Notimpuunani diri tulun mamaal nga aui dii nakadapat mongopod do aui kosukup iri siinjo,’ kaano diri tongotulun do nokoontong.
31Nong kivaro raja do kumimusu di raja vokon misti tumandai minsoromo laaid nong kasanggup lumavan diri duvo nopulu ribu soujor om opului noribu iri soujorjo. 32Do nong noilaanjono do au kalavan, om tantu monuu isido di susuuonjo do mongoi mongoduat nong potingkukuro kumiandai do aupo korikot iri musujo. 33Om irad nogi dino, isai-isai nopo dikovu do au kalangkat diri onuu nopo i si disido kondiri nga aui isido kosiliu do tulunKu,” kadi Yisus.
Poiradan di Tasin
(Mat. 5:13; Mar. 9:50)
34Om minaganu i Yisus do iso poiradan kavagu do monuduk Isido di tongotulun do isaai nopo sumiliu do tulunJo nga irad do tasin, kaDisido, “Tasin nopo mimang aandai pongongosin do onuu nopo do taakanon supaya au apasa, jadi sabap aandai i gaagaya di tongotulunKu nga okodos i tulun vokon di gaagaya do araat. Nga nong malono iri rasa do tasin diri nga auno dii moilo poosinon kavagu. 35Irad dino ausono dii kogunaan insan silionpo do baja nga ausono dii kogunaan, misti do itaam iri.
Nga isaai nopo iri kitolingo, rumongouno marong diti tinangaranKu,” kadi Yisus.
Currently Selected:
Lukas 14: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.
