Lukas 4

Pinonsubaan i Yisus di Kotua do Rogon

(Mat. 4:1-11; Mar. 1:12-13)

1-2Om noponuno dii i Yisus do kuasa di Tatod Tolidang ontok di guli Isido mantad siri Bavang Yurdon, om ovitono dii di Tatod Tolidang Isido do mongoi siri padang do kovotuvan. Om sirino Isido pinonsubaan di kotua do rogon gosob do apat nopulu tadau linaid. Om salaid#4:1-2 salaid: salama Disido siri, auso naakan-akan Disido. Om kaavipo dii tadau diri om nokopuriman nogi dii Isido do vitilon.

3Jadi pitangarno dii i kotua do rogon Disido do, “Nong TanakKo do Kinoringan, suuopo iti vatu sumiliu do taakanon,” kadi rogon.

4Nga jawapno dii i Yisus di kotua do rogon, “Kivaro nokotulis siri Kitab do, ‘Okoniko bubugol taakanon kovijau do tulun,’ ka,” kadi Yisus.#Antangai Gulion 8:3.

5Om ovitono dii kavagu i Yisus di kotua do rogon tumakad siri kulud#4:5 kulud: kotud om au noungkirapan linaid om pinoimpa di rogon Isido di kasangkat diri kopomorintaan siti vonuvo. 6Om pitangarno dii kavagu i kotua do rogon do, “Kasangkat diti kuasa om kakayaan itaakku daa Dikau sabap kasangkat diti nga nakataakno dogo. Om isaai nopo iri kouvanganku manaak om irino onuanku. 7Jadi nong sumambaKoi dogo, om Ikano sumanganu kasaangkat diti,” kadi rogon.

8Nga jawapno dii i Yisus di kotua do rogon do, “Nokotulisno siri Kitab do, ‘Misti sumambako di Tuhan i Kinoringannu, om iri noo kouvangan Disido vojoonnu,’ kadiri tinangaran,” kadi Yisus.#Antangai Gulion 6:13.

9Om ovitono dii kavagu di kotua do rogon i Yisus do mongoi soi Bandar Yorusalim, om angataino dii mindakod, om poingkokotono dii Isido siri soribau di taap di Valai Sasambayangan Tagajo. Om pitangarno dii i kotua do rogon di Yisus do, “Nong TanakKo do Kinoringan potuunaipo silo suribak do aui orualanKo, 10sabap nokotulis siri Kitab do,

‘Suuon di Kinoringan i tongomoloikatJo

do mangajaga Dika kaandai-andai,’

kadiri tinangaran si Kitab,

11om,

‘Poingkaangi iolo Dika,

supaya au orualan ino takodNu

do kootung dilo vatu,’

kadi tinangaran vokon si Kitab,”

kadi rogon.#Antangai Gulion 6:13.

12Nga jawapno i Yisus di kotua do rogon do, “Kivaro nogi nokotulis siri Kitab do, ‘Adano monsuba do Tuhan, i Kinoringannu,’#4:12 Kinoringannu: Iti nopo tangar diti nga mantad si buuk Gulion 6:16. Komoion nopo diri “nu” nga irino i tulun Israil di poguluupo, okoniko i kotua do rogon. kadiri tinangaran si Kitab,” kadi Yisus.#Antangai Gulion 6:16.

13Kaavi nopo dii di kotua do rogon pointikid-tikid i ponsubajo di Yisus, om pogidupo dii mantad siri di Yisus do mangandad tadau do taandai.

Auso Tulun Aparsaya di Yisus siri Bandar Nasarit

(Mat. 13:53-58; Mar. 6:1-6)

14Om guli nogi dii i Yisus soi Vonuvo Golilia do poimponu kuasa di Tatod do Kinoringan, om karangaaino dii do tongotulun mitotongkop siri Golilia iri abar Disido. 15Om monuduk Isido si valai sasambayangan diolo, om kasangkat di tongotulun siri nga mangarajou Disido.

16Om uli nogi dii i Yisus siri Bandar Nasarit, si pantok kinosukadanJo. Om ontok diri Tadau Koingkajadan, ongoino dii Isido siri valai sasambayangan do tulun Joudi irad di koubasanJo. Om mingkakat i Yisus do mambasa di Kitab, 17om onuaino dii di palayan Isido do buuk i tinulis di nabi Yasaya, om valadono dii Disido iri buuk om naayangan dii Disido iri tinangaran do irad diti,

18“Poimvaja Dogo i Tatod do Tuhan,

do inonuan Okuno Disido

supaya mangaabar di Abar do Aandai

kumaa siri tulun do miskin.

Om sinuu Oku nogi Disido papaabar di tongotulun

do poiduonKu iolo i pinitatangkap.

Om sinuu Oku nogi do mongolingos di tongotulun bolou supaya koontong,

om popoidu di tongotulun di ulak-ulakan do tulun vokon.

19Om papaabar Oku di tongotulun

do itino toun maino do popoontong i Tuhan di tongotulun

do osianan Isido diolo,”

kadi buuk diri tinulis di Yasaya do binasa di Yisus.#Antangai Yasaya 61:1-2.

20Om lulunono dii Disido i buuk, om pogulio dii kavagu Disido siri di palayan, om ogom nogi dii Isido.#4:20 ogom nogi dii Isido: Kinaagaman nopo di Yisus nga irino do monuduk Isido di tongotulun, do ontok nopo di maso diri nong monuduk i tulun Joudi nga mogom-ogom. Om kasangkat iri tongotulun siri valai sasambayangan diri nga mangatul#4:20 mangatul: monirap di pamarasan#4:20 pamarasan: vuros Disido. 21Om timpuunno i Yisus mitangar diolo do, “Tadau do maino norikotno dii i komoion sino Kitab i norongou muju maino,” kaDisido.

22Om kasangkat dii di tongotulun nga pakaandai Disido om oiranan marong diri tinangaran Disido do aandai. Nga kadii diolo, “Isido bo iti tanak di Jusip, kon?” ka.

23Nga pitangarno dii i Yisus diolo, “Tantu mitangar kou Dogo do kamuju dino, ‘Duktur, lingosopo ino Dika do toruol kondiri. Vaalopo ino kosunduvanNu siti daton kampung kondiri irad di norongouja do vinaalNu soi Bandar Kaparnaum,’ kamuju.

24Mitangar Oku dikovu nong siri kampungjo kondiri aui urumaton di tongotulun i nabi, i popolombus di tinangaran do KInoringan. 25Om itipo tangaronKu, ontokpo diIlia, minagadau tolu toun satanga linaid gosob do nokotongkop i mononlikop, om ontok nogi diri oguu iri tongotongondu do napatajan do savo siti Vonuvo Israil. 26Nga insan irad diri aui sinuu di Kinoringan iIlia do mongoi si iso tongondu do mantad pialatan di tongotongondu di napatajan do savo diri, nga pinoongoi nogi isido monulung diri iso tondu di napatajan do savo, iri okonko bansa do Joudi, siri Bandar Soripat si Vonuvo Sidun. 27Om ontok di nabi Ilisapo nga oguu iri tulun di rumanai iri kojuvan siti Vonuvo Israil, nga kasangkat tulun di rumanai diri nga auso nolingasan. Soisono i Namaan do nolingasan, i tulun mantad silo Vonuvo Siria,” kadi Yisus.

28Nga kasangkat di tongotulun siri valai sasambayangan diri nga araatan marong do nokorongou di tinangaranJo. 29Om insan-insani dii iolo mingkakat do monunsub di Yisus poidu mantad siri bandar, om ovito dii daa diolo pakaa siri timpak do kulud, pantok di bandar diri, do liadan daa diolo Isido do paratu. 30Nga aupo nokorikot siri timpak do kulud#4:30 kulud: kotud om pampanauno i Yisus mogidu sinumoriat di tongotulun.

Sinunsub di Yisus Popoidu i Rogon

(Mar. 1:21-28)

31Om antad Bandar Nasarit linumombus i Yisus rumuuk siri Bandar Kaparnaum, iso bandar siri Vonuvo Golilia, om ponudukno dii Isido di tongotulun siri valai sasambayangan di ontok do Tadau Koingkajadan. 32Nga osumboijan dii marong iri tongotulun do nokorongou di ponudukanJo, do kikuasa marong i tangarJo monuduk. 33Om siri nopo valai sasambayangan diri nga kivaro iso kusai di rinosukan do rogon. Nga koontong nopo isido di Yisus, om pongogijakno dii isido do opuod marong do ka, 34“Yisus! Kukuroyon ikoi Dika? Ika tulun Nasarit, nokuroKo do mongoiKo siti nong mominasaKo dagai? Otutunankui Ika, do Ikano i Tolidang do mantad silo di Kinoringan,” kadi rogon.

35Nga turus sunsubo dii di Yisus i rogon do kaDisido, “Otosno! Pogiduno mantad diti tulun!” ka. Nga podumpauo nogi dii di rogon i tulun siri pialatan diri tulun kinoguuan, om pogidu nogi dii iri rogon mantad siri ginavojo om i kojuvan do tulun nogi nga aui pinokorualan di rogon.

36Nga noirananno marong i tongotulun, om poiduat-duatno dii iolo do ka, “Atuuk! Onu tangarJo diti? Kikuasa bala Isido om osundu monunsub do rogon, om i rogon nga lumabus!” kadiolo. 37Om mantad dii diri abar pasal di Yisus nokotongkopno dii siri Vonuvo Golilia.

Oguu i Tulun Liningasan di Yisus

(Mat. 8:14-17; Mar. 1:29-34)

38Om labusno dii i Yisus do mantad siri valai sasambayangan do mongoi siri valai di Simun. Om ii nopo tivanon di Simun tondu kangkagan marong om pokilingasan dii diolo di Yisus isido. 39Om ongoino dii insomok i Yisus di tongondu do potingkod di kongkogjo. Kolingasaipo tungagno dii isido do mongoi muup do papaakan diolo.

40Om kotonob dii iri tadau om ongoino dii i tongotulun do mongovit iri tongokosuladan diolo diri kivaro onuu nopo i toruol do pinakaa siri di Yisus do pokilingasan. Om tikidono dii di Yisus mangama i tongotulun do mongolingos di toruol doisido. 41Om i tongorogon dii nga minogidu mantad siri tongotulun di rinosukan om songgijak-gijak do, “Ikano i Tanak do Kinoringan,” kaano. Nga auno pinoungkomipo di Yisus i tongorogon, turus do sunsubo sabap kotutun i tongorogon do i Koristus Isido, i pinili do Kinoringan sumiliu do Raja.

Papaabar i Yisus di Abar do Aandai

(Mar. 1:35-39)

42Kanavau nopo dii di susuvab om pampanauno dii i Yisus mantad siri bandar do minongoi siri pantok tojongou. Nga asapou dii i tongotulun do mogium Disido, om kaantangai nopo dii diolo Isido, om ovudan daa dii diolo supaya au koidu Isido mantad siri. 43Nga kadi Yisus diolo, “Potingkuropo nga misti do papaabar Oku di tongotulun siri bandar vokon diti Abar do Aandai nong potingkuro i Kinoringan momorinta di tongotulunJo, do irino i nisuu Dogo do Kinoringan,” kadi Yisus. 44Om ongoino dii Isido siri tongovalai sasambayangan siri Vonuvo Yudia do papaabar diolo di Abar do Aandai.

Currently Selected:

Lukas 4: LabukPKV

Highlight

Copy