Lukas 5

Kotimpuunon di Yisus Mongoloou di TulunJo

(Mat. 4:18-22; Mar. 1:16-21)

1Nga ginumuli kavagu i Yisus si Vonuvo Golilia mantad si Vonuvo Yudia. Om kivaro insan tadau do miningkakat Isido siri pantai, disan di Botung Tagajo di Gonisarit. Om oguu dii i tongotulun moitomping-tomping do mongoi muntun siri Disido do mongkinongou diri tinangaran do Kinoringan. 2Nga kaantangai dii di Yisus i duvo talud do poingompit, nga auso tulun siri talud do linumintuun do mongugas di pukot doisido. 3Om sanganu nopo diri iso talud nga di Simun. Om sakono dii i Yisus siri talud om pokiliadaiJo dii di Simun do poinsodu kopooyok mantad si disan vaig. Liadaino dii di Simun i talud om isido nga sinumako nogi siri talud. Om ogom nogi dii i Yisus siri talud do monuduk di tongotulun.

4Koopod nopo dii Isido monuduk om pitangarno dii Isido di Simun do ka, “Pokooyo pogi iti talud silo taralom om poolumo ino pukot muju,” kadi Yisus.

5Nga jawapno i Simun do, “Tuan, noujan ikoino do nosuvaban momukot nga insan iiso ko kivaro nopukotja. Nga sabap do Ika i monuu dagai, momukot ikoi nono,” kadi Simun.

6Om pogtaan diolo di pukot, oguu dii i sada nosulung gosob do siruruak i pukot diolo do noolian koguu di sada. 7Nga kopojono dii diolo i songkoruangan doisido siri talud sondiang do mokiuup maganu di sada. Om rikotno dii iolo om sompori-ori pasako di sada siri duvo talud doisido om noponu mongiduvo iri talud diolo gosob silolosod.

8Nga kaantangai nopo dii di Simun Pitrus do irad diri, tungubno dii isido siri gotuvang di Yisus, om pitangarno do, “Tuhan, iduai okuno, do ioku nopo diti nga tulun do kiduso,” kadi Pitrus. 9Minitangar isido do irad diri sabap noiranan marong isido om i songkoruanganjo do nakadapat di sada oguu marong do insani pomukot. 10Om irad nogi dii i Yakub om i Yaya, i tanak di Jobidi, songkoruangan di Simun nga noiranan nogi.

Nga kadi Yisus di Simun, “Ada korosi. Mantad do maino sumiliuko tulun do mogigium do tulun irad do momukotko do sada,” kadi Yisus.

11Om gajatono dii diolo iri talud siri pantai, om iduai nopo kasangkat diolo iri siri talud om vajano dii iolo di Yisus.

Nolingasan i Tulun di Rumanai i Kojuvanjo

(Mat. 8:1-4; Mar. 1:40-45)

12Kivaro insan tadau do nokoongoi i Yisus siri iso bandar. Om bandar nopo diri nga kivaro iso tulun kitoruol do rumanai iri kojuvan disido. Om kaantangai dii disido i Yisus om insomokno dii om tungub do mokitulung marong Disido do, “Tuhan, nong kouvanganNu, olingasan okui Dika,” ka.

13Om porolojono dii di Yisus i longonJo do minangama disido, om pitangar do, “KouvanganKui, olingasankono!” ka. Om turus do nolingasan dii isido.

14Om suuono dii di Yisus isido do ka, “Adako popoilo do tulun vokon pasal diti, nga ongoino pogi si di imam om ipoontongno disido ino kojuvannu, om mangaabar do, ‘Nolingasan okuno,’ kanto. Om manaak kouno do duvo tinan tombolog di imam onuonnu do isogit maja diri nisuu di Musa di pogulu, supaya oilaan di tongotulun vokon do nolingasanko,” kadi Yisus.

15Nga insan irad dino tangar di Yisus nga makin nogi dii do nokotongkop siri vonuvo iri abar Disido; om oguu dii marong i tongotulun do rinumikot do mongkinongou om mokilingos di toruoljo. 16Nga rijang nogi dii i Yisus di tongotulun do minongoi sambayang sosoiso siri tana tojongou.

Tulun Kimai Nolingasan

(Mat. 9:2-8; Mar. 2:1-12)

17Om kivaro insan tadau do minonuduk i Yisus di tongotulun. Om ontok nopo dii nga kivaro iri piipiro kotua tulun Porisi om iri guru do Undang-undang Ugama do Joudi do rinumikot mantad siri pointikid-tikid do kampung si Vonuvo Golilia om si Vonuvo Yudia om mantad si Bandar Yorusalim. Nga i Yisus nopo om kikuasa mantad do Tuhan do mongolingos do toruol. 18Om kivaro piipiro kusai rumikot di minoiompujung do mongovit di iso tulun kimai do poingodop siri pinaadapanjo. Korikot dii iolo siri, om oviton daa dii diolo isido masu siri valai do poilion siri gotuvangan di Yisus. 19Nga au dii kaasu iolo do atabanan di tongotulun do oguu marong. Nga vaja dii iolo di tukad si labus do valai do minindakod si soribau taap, om langkatono dii diolo iri taap si saau di Yisus, om pouluo nogi dii diolo iri tulun kimai di poingodop siri pinaadapanjo siri tanga diri tulun do pinoinsomok siri gotuvang di Yisus.

20Nga kaantangai nopo dii di Yisus iolo do aparsaya marong Disido, om tangarono dii Disido i tulun kimai, do, “Apa, maino noompunanno ino dusonu,” ka.

21Nga kivaro nogi siri monunuduk do Undang-undang Ugama om kumpulan do Porisi, om poiburung-burungno dii iolo do ka, “Ombo do tulun Isido do opusu mangararaat do Kinoringan do rumantai Isido do Kinoringan? Do ausono buli mangampun do duso nga irino i Kinoringan!” kadiolo.

22Nga oilaani di Yisus i sinoromo diolo, om kadii Disido diolo, “Nokuro do minsoromo kou irad dino? 23Inombono agaan tangaronKu, nong mitangar Okupo do, ‘Noompunanno i dusonu,’ kangKupo ko, ‘Tungagno om pampanauno muli,’ kangKupo disido? 24LingasanKu iti tulun kimai do poontong Oku dikovu supaya oilaan muju do kikuasa Oku do mangampun do duso siti vonuvo do Iokuno i sinumiliu do tulun,” kadi Yisus. Om tilombusai Disido mitangar iri tulun kimai do, “Tungagno pogi, om kakatono ino inonododoponnu om pampanauno muli,” kadi Yisus. 25Om turus tungagno dii i tulun kimai, om kakatono i pinaadapan disido siri gotuvang di tongotulun toguu, om pampanauno dii muli mivaja do mangarajou#5:25 mangarajou: mongompod do Kinoringan. 26Nga osumboijani i tongotulun om rumosii, om mangarajou iolo do Kinoringan. Om kadiolo, “Kosumbaaino dii marong i naantangan tokou maino,” ka.

Minongoloou i Yisus di Liwi

(Mat. 9:9-13; Mar. 2:13-17)

27Kouli nopo dii iri tulun nolingasan, labus nopo dii i Yisus do mantad siri valai, nga koontong dii Isido di iso tulun momumumpung do sukai do poingogom siri upis pangatadan di tongotulun do sukai. Ngaranjo nopo nga i Liwi. Om kaantangai dii di Yisus i Liwi om kaDisido do, “Kayo, vaja Dogo!” ka. 28Om ingkakataino dii disido i karajajo do maja di Yisus.

29Om pomukano dii i Liwi do poginakanan tagajo siri valaijo do pongurumat disido di Yisus. Om oguu dii i tulun momumumpung do sukai om iri tongotulun vokon nogi do minuruk di Yisus mangakan. 30Om kivaro siri kumpulan do Porisi om kivaro nogi piipiro Porisi do monunuduk do Undang-undang Ugama do Joudi. Om mungos-ungos dii iolo mitangar di tongotulun di Yisus do, “Nokuro kou dikovu do muruk mangakan om mongiup di tongotulun do momumumpung do sukai om iri tulun kiduso i au songkuro maja di Undang-undang Ugama tokou?” kadiolo.

31Nga karangaai nopo dii di Yisus i tangar diolo, om minaganu Isido do iso poiradan do ka, “I tulun do au kataru mokiubat do duktur, okoniko i tulun do apangkau. 32Rinumikot Oku diti do mongoloou di tulun kiduso do pavaja Dogo supaya rumorogo iolo mamaal do duso. Okoniko i tulun minsoromo do abanar isido do loovonKu,” kadi Yisus.

Mogpuasa om Ponudukan Kavavagu

(Mat. 9:14-17; Mar. 2:18-22)

33Om pitangarno i kumpulan Porisi om iri tongosongkoruanganjo di Yisus do ka, “Iri nopo i tongotulun di Yaya Mamamatis om soumur do mogpuasa om sumambayang, om ilo tongotulunja, i kumpulan Porisi, nga irad nogi dino. Nga ilo nopo tongotulunNu om auso mogpuasa om mangakani om mongiupi iolo,” ka.

34Nga minaganu i Yisus do iso poiradan do Isidono irad di kumawin, om kaDisido, “Kasaramaanan muju nopo batoi om obuli suuon i sumapul di kawin do mogpuasa ontok do poirunggumpo diolo i kinumawin? SoromononKu au, kon! 35Nga orikotpo iri tadau do kapanangkapan di tongotulun diri kusai di kumawin do patajon, om ampa nogi dino do mogpuasa i sumapul di kawin. Om irad nogi dino, salaid do siti Okupo di tongotulunKu au mogpuasa iolo,” kadi Yisus.

36Om minaganu kavagu i Yisus do iso poiradan do ponudukanJo nopo di kavavagu nga irad di kain om kinomol kavavagu, do kaDisido, “Ausoi tulun do monginis do sabung di vagu do pangampil#5:36 pangampil: ponompong di sabung laid! Do nong irad diri, inongi do tomodoni disido do monginis iri sabung vagu sabap aui kopiirad do linanut di sabung vagu om i sabung laid. 37Om auso nogi tulun do papaasu diri kinomol kavavagu siri poijanan i vinaal mantad do kulit do kambing di navaal laid, nga siri poijanan di vagupo. Do nong siri poijanan laid poosuon om kumambang nopo i kinomol kavavagu om tumudak i kulit pinoijanan sabap do okoris, om irad dii do nitaam toomod i kinomol kavavagu do opirubatanpo i kinomol do obubusno om oruakpo i pinoijanan. 38Nga iri nopo kinomol kavavagu om vaguno iri poijanan. 39Om nogi nong nokoiupno i tulun di kinomol di laid, auno uvang mongiup iri kinomol vagu sabap kadisido, ‘Aandaipo kopurimananku iri kinomol laid,’ kadiri tulun,” kadi Yisus.

Currently Selected:

Lukas 5: LabukPKV

Highlight

Copy