Zona 4
4
Ia Haala Ka Zona Nia Ia Dudumana Ka God
1Ne riva ghini ghu iahi God, Zona ne age faa vanani ta deona ge veha vanani ghu neke age toraina hali ghu. 2Verevere lao tuna ka Iahova, neke ghua, “?Iahova, eka ghua ghu iahi mu heve nake kaheina ara ka ia fafata augu nga ka malauro? Nake ghua mamu ara ghe nake kabai magali pelo lao nga aianihi Tasisi#4:2 , vununa ara nake avohigho mo agho ta God varisuteuna nia vari dudumanaiuna e ghua; taka magali halighona ghu nia ta foudigho namaha tuduna e ghua, ia God ta ke age holari ia nganganau ta deo ghu ke va kilasarira ira noni. 3Ghatunaina agho Iahova, hio kaini ghu doli ini ka ara, vununa gato leme ghegu lama, geala e veha fuludu laoi ta dolina ara.” 4Ghe Iahova neke ungene tughui, “?Heve veha mu ta kuruighona agho ta mala halighona?” ne ghua ghini.
5Kave kaini tuna malau leghaha ani ge la nohe hinae ghu ka kaike malau visi fateona mo, neke ghua Zona. Aianimu neke la riva vananina taghonai kaike mala va kakapo neke la nohe ghu manei ka ia pekana, afa ta fininina ghu heve ta age dufuna ka malau leghaha ani. 6Ianimu tuna ghe neke va kodolo vonai nga kaike heke naroho Iahova ia God ka fatena Zona mala vanani kakapona ia pauna ta va kakapotina ghu ka ia taunu. Zona neke toraina age faa vanani va manemane ghu ka heke naroho ani. 7Ghe ka ia ghalaghalana fugho ka ia keha ravata, God neke va mehai kaike rekahana adogho, neke la ghani va lemei ghu heke naroho ani. 8Ka ia vona mehana ia taunu, God neke va mehai kaike dafena fateo mo ta sisito, neto ke nona kudoko ghu manei fera hinaeina taunu ia pauna. Manei neke kabai leme neke kahe ghua ghu iahi, “gato leme ghegu lama, geala e veha fuludu laoi ta dolina ara,” neke ghua.
9Ghe God neke kahe ghua iahi ka Zona, “?Heve mu veha ta kuruighona agho ta mala hala ghinighona ia leme ka heke naroho nia?” ne ghua ghini.
“Uve,” ne ghua Zona, “halau fuludu mala fatai lemena ara.”
10Ghe Iahova neke ghua iahi, “Agho mu geta deo mo goke numa ghini ghu, ba, va kodoli ghu heke naroho iahi ghe, tare muko hihingou ini mo ghinina manei. Manei mu neke kodolo vona ma ka kaike redu mo nia ke leme ma tuna keha reduna, ta ghua ini ma. 11Nga ka ia malau leghaha Nineve mu, e fuludi 120,000 noni ta aura, ira ta deo gedi avohi ghedi ghu heve ta lotorona nia heve ta mukona e ghua, nia tehi bulumakau haro ta aura, e ghua. ?Heve, eka veha la ghu ta dudumana ghinina ara mu malau leghaha ianimu?”
Currently Selected:
Zona 4: kji
Highlight
Share
Copy
Want to have your highlights saved across all your devices? Sign up or sign in
© 2022, Islands Bible Ministries. All rights reserved.