Luku 10
10
Zisas Ne Va Ghahe Rivari Ira Vitu Ngavuluai Palu Nona Mane Ta Nonofoi
1Leghuna iahi, ia Lod neke faete kaveri keha vitu ngavuluai palu mane ta nonofoi, neke kusu tuhu kenuri ghu, va ghahe palupalu laorira ka ira malau leghaha nia rekahadi malau e ghua, ka neke nganai laono taghonai. 2Va kahe ghidi tuna neke ghua Zisas, “Ira ghano ta mala hio varighara ghidi ka ira galahedi nunuma to puina tehi fuludu, ghe ira maneriva e deo gedi tehi ghu. Tarai fangai ghu ia Lod ta kutadi ghano irahi, e tuhu laori ghu manei keha manerivarani ka ira nona galahedi nunuma. 3!O ghahe ghu ghau! Ghe o ngana avohi va ghahe ghau ini ara mu, taghe sipisipi ta tuhu laori ka ira hoataidi ira wulufu, e ghua. 4Oka hio taremehamu rongo ghu, mogoha nanapisi ghu, nia oka hio sadolo ghu, e ghua. Oka nodo ghu go ungene vehai ghu hei noni ta dufuina ka hangana ari.
5“Noto la haghele la ka kaike suga, o kahe ghua iahi, ‘Bule ka suga iahi,’ o ghua. 6Dito auri bule la ira noni ta au ka suga ianimu, va beana iahi e au hinae ka maneri. Nga dito deori la bule namaha maneri, va beana iahi e ke leghu age ka taghomu. 7Ka ia la hagheli ghau kaike malau fafaana, oka la rizu lao meha ghu ka leghu suga nga. O au ma, o la mahai ketuhu ghu ka kaike suga mo. Oka ngana palupalu ghu hio tadira heve mahai ta vanamuna maneri, vununa ira noni ta riva mu, edi hiori tudu ma ira tabaradi.
8“Dito hio namaha ghau la ira noni ka kaike malau fafaana, o mahairi heve ta va tana vanamu mehana maneri, 9nia va vehari tuna ira ta fogarari ghedi, e ghua. Ka ia va vehari ghedi ka fogara, o kahe ghua iahi, ‘Ghatunaina ia Ravutu ka God to au gherememu mo,’ o ghua ghidi. 10Nga neto pake ghena la malau ianimu hio namaha ghauna, o kave lao hae ta tehira ira noni ka malau ianimu, ghe go kahe ghua nga iahi, 11‘Geta ghua ghu ira sotana malau iahi ka ghau ta kapata ka ghahemaidi ghe, ghai a vuvusu kai hinaeri taghe mala va ghilaghilana ta balau ghini ghauna taghomu. !Nia ghau o avohi iahi, ia Ravutu ka God, to puina vari namo meha!’ 12Toraina hohoghonana mu, Sodomu ia ta mukona ghe, ta age veha fuludina malau ianimu ka ia ravata mala varifate.
13“!Heve lelemeana lamo ta au afa ghini ghauna ghau palu Korazini ghe Betiseida! Hahaima nake riva ghidi irahi ara ka ghau, gake riva ghidi la ka ira malau ta muko aianihi Taea nia Saedoni e ghua, ira noni aianimu geala sepaoni to nohe vanemoho ghu ka ia holara hihingo, ka ia va vona poko muko hihingo, nia va kefuruai ghidi kofele ira paudi, taghe mala va podolina dike to taghuru kairi mamu ira sasakedi, ta ghuana. 14Uve, Taea ghe Saedoni mu edi age veha fuludu lao ka ghau palu, ka ia ravata mala varifate. 15?Nga ka ghau ira nonimu Kapaniumu mu heve, o vona mo ghatu ka malauo God fate, no ghua? Deo ge ghua ghu ianimu, nga God e age kai hinae lao ghau ghatu gehena.”
16Ianimu tuna ghe neke va kahe ghidi lao nga ira nona mane ta nonofoi, “Hei noni neto lao hihingona la ta hio nonomohona ka ghau, manei ne lao hihingona haroma ta hio nonomohona ka ara. Nia hei noni neto soke ghau la ghau, manei ne soke au haroma ara. Nia hei noni neto soke au la ara, manei ne sokei haroma God, neke tuhu mehauo ara.”
Ia Leghu Meha Ka Ira Vitu Ngavuluai Palu Mane
17Ira vitu ngavuluai palu mane dike turi va ghazaghaza ghua iahi ka Zisas, ka ia fafata ke leghu mehadi, “!Lod, ira nazahi ghe, dike nomoho ghai fata mala riva ghai babaolou nia agho!”
18“Uve,” neke ghua va kahe ghidina Zisas, “ara nake finini Satana riufu hinae taghe lepuna kapi ta ghuana ka kolangana fate. 19Nia ara nake vanamu ira leghu gigima nga mala paufina ia kana, o mala deke dalapari ghu ghau ira adogho nia ira nodi uke tetehi, e ghua. E deo ghu heve ta boka ngovala ghauna. 20Ghe oka va manemane ghu vununa tadi nomoho ghau nira ira tarunga ta muko, nga o va manemane vununa ira babaolomu ghau, to kangava hinaeri ka malauo God fate.”
21Ka fafata ianimu, Zisas neke toraina va ghazaghaza fuludu ka ia Tarunga Ta Maduana, neke kahe ghua ghu iahi, “Mama, Agho ia Lod ka nou malauo fate nia ka malau iahi peka, ara na kudo vehaigho ta poikaina agho ia hohoghona ka ira noni ta va varangari taghodi ka ia avoavoho, ta va podolo vanadina ghu ira noni ta au taghe rekaha ira ta ghua. Uve Mama, riva ghua ghinina iahi mo, ne veha vananighona agho.
22“Nogu Mama to vanagu ara ia gigima mala mana kaputurira vahina leghutau nga. E deo hei ta torai avohina mu ia Tuuna, nga ia Mama lama. Nia e deo hei ta torai avohina mu ia Mama, nga ia Tuuna nia heiri ira ta faeteri ia Tuuna mala va podolina God ka maneri, e ghua lama.”
23Ianimu tuna ghe neke fihiki lao nga Zisas ka ira mane ta nonofoi ka ia fata ke au kakaikedi, neke kahe ghua ghu iahi, “Ka beana ghemura ghau, no finiri ghu heve noto ke finiriro. 24A va kahe ghini ghau ghu ara, tehi porofetini nia tehi mane ginitaukelani e ghua, dike puina kabai finiri nia nomohori haroma heve ta finiri nomohori nira ghau, ghe dike deo bokadira.”
Ia Mane Samaria Ta Veha Nia Heve E ghua Hioina Ia Doli Soduai
25Kaike ravata, kaike mane ta avoho fikifokoi ia vetula beana, neke kabai va sisiva ghini Zisas, neke tetu vona ghu notoho ghua ghinina iahi: “?Mane Vari Va Kakahei Agho, heve mo ta torai riva ghinina ara ghe, ga boka hio kadoli nga ia doli soduai?”
26Zisas neke kahe ghua iahi, “?Heve ne ghua ne kaheina ka ia vetula Mosese? ?Heve no ghua izumu va fafahakina agho?” neke ghua ghini.
27Ia mane neke kahe ghua iahi, “ ‘Agho o toraina namaha ghini ia Lod nia ia nou God ka ia hihingou kamoto, ka ia tarungau kamoto, ka ia gigimau kamoto, nia ka ia nganganau kamoto.’#10:27 Ngengene 6:5 Nia, ‘namaha ghidi ira keha noni taremehau taghe ta ghua ghinigho niala taghou.’ ”#10:27 Hiama 19:18
28“!Puina veha!” neke ghua Zisas. “!Noto riva ghini la agho iahi, agho o age hioi mo ghatu ia doli soduai!”
29Ghe ia mane ta avoho fikifokoi ia vetula beana geta deo mo ge lotoro ghu taghonai ghe, neke kabai ghidi ira noni ta nganaina ne lotoro taghonai ta ghuana, neke notoho ghua ghu iahi ka Zisas, “?Hei ghu mu taremehaguna ara?” neke ghua ghini ghu.
30Zisas neke ungene tughui ka ungene talevara iahi: “Kaike mane Ziu neke sipana Zerusalemu neke ghaghahe hinae lao ghu Zeriko. La dufu fatari tuna keha mane ta sisiko, gedi la magari ghu, dike ghua. Hio kai tana tuna ira pokona nia ira nona rongo, gedi ruza va kudoki ghu nai kainina ka gheremena hanganao, dike ghua. 31Kaike hiama ka ira Ziu neke ghahe hinae lao molamo ka hangana haro ianimu; ghe ne fini fata laoi ghu manei mane ta libo ta au ani ghu, neke kadolo ghena lao ka keha pelonani mo, ghahe fuludu ta peholo ghinina ghu. 32Leghuna ianimu, kaike mane ka ia pukuna ira Livae ta riva ka ia Sugana God, neke meha fini fati molamo libo ta auna ghu manei aianimu, ghe manei neke ghahe fuludu ghena haroma ka keha pelonani mo. 33Ianimu tuna ghe neke la meha nga tuna kaike manena Samaria ia ta kikipana ghini ira Ziu. Ne la fini fati ghu, manei neke toraina dudumana ghini ghena fuludu. 34Mane Samaria ini neke torongaghituturu hinae gheremena mo, ghe neke mereseniri nga ka oelena olivi nia waeni ira bakorana neke pipiri lilohori ghu. Ianimu tuna ghe neke va haghei nga ka ia nona dongiki taghonai, neke hio laoi ghu ka kaike suga mala maghoso, neke la hio sutei ghu taghona. 35Ka ia keha ravata, mane iahi neke hiori keha palu kunegeledi rongo ta siliva, neke vanani ghu ia mane ta kopunai suga, ghe neke va kahe ghini nga tuna ta hio sutei ghenana mane ani. ‘Neto age fuludi la tabara iahi ia au ka manei aiahi, a ke meha tabara va hokoti nga ka keha fafata ta ke la leghu mehana ara aiahi,’ neke ghua ghini.
36“?Hei mo ka lito mane irahi mu ta taremehanana mane dike ruza dodolini iahi ira mane ta sisiko?” neke ghua notohona Zisas.
37“Ia mane neke dudumana ghinio manei mo,” neke ghua ia mane ta avoho fikifokoi ia vetula.
Ianimu tuna ghe neke kahe ghua nga iahi Zisas, “Uve, o lao haro ghu agho, o la riva ghini ghu taghe ianimu.”
Zisas Ne Sigho Ghidi Mere Ghe Mata
38Ka ia ghahe ta lao ghu Zisas nia ira mane ta nonofoi aianihi Zerusalemu, maneri dike meha ka kaike rekahana malau, ka ia ta au kaike fotati babaolonana Mata, neke hio haghelerio ka ia sugana. 39Mere ia tahina ghase manei, neke nohe kenuna mo ia Lod nonomoho nonana ka ira vari va kakahei manei. 40Ghe Mata mu, neke ngana hetari fuludu ira leghu ta mala va tanari nga, neke la kahe ghua ghu iahi ka Zisas, “?Lod, ne fifini vevehana mo ka agho mu ta suna nohe ghena ini ma tahigu ghase ini, ghe ta riva ghidira nga ara vahina riva nga? O va kahe ghini, e meha toka ghinagu ghu.”
41Ghe neke ghua iahi neke va kahe ghinina ia Lod “!Mata, Mata! Agho mu no puina hangapuaha ghidi ngama tehi leghutauni! 42Kaike leghutau mo mu ta toraina tongovona fuluduna, ta mala ngana hetaina agho. Mere mo mu ne faetina leghutau ta lotoro ianimu, ia ta deo ga age hio kai tana ghu ara manei.”
Currently Selected:
Luku 10: kji
Highlight
Share
Copy
Want to have your highlights saved across all your devices? Sign up or sign in
© 2022, Islands Bible Ministries. All rights reserved.
