Éxodo 14
14
Te israeletic c'axic ta Mar Rojo
1Te Cajwaltic la sc'opon te Moisés, jich la yalbey:
2—Albeya te israeletic, ac'a spasic buelta, ac'a ba spas scampamentoic ta Pi-hahirot te ay ta olil yu'un te Migdol soc te mar, te yelawix bael te Baal-zefón. Ac'a spas scampamentoic ta nopol sti'il mar. 3Te faraón ay bila yac ta snopel: “Te israeletic ma sna'ic banti ya xbajt'ic, ba xch'ay sbaic ta muc'ul jochol taquin q'uinal”, xi' me. 4Ja'uc me to, ya jtulantesbey yo'tan te faraón swenta yu'un ya me snutsex. Jich me ya cac'bey xan yil cu'el, soc spisil te soldadoetic yu'une. Tey me ya sna'ic a te egipcioetic te jo'on Ajwalilone —xi' te Cajwaltique.
Te israeletic jich la spasic te bit'il albotique. 5Te ajwalil ta Egipto tal ta albeyel te loq'uix bael te israeletique. Ora yanaj sit-yelaw yu'un soc uuc te sjo'tac ta ajwalile, jich la yalic:
—¿Bistuc la cac'tic loq'uel te israeletique, te la yijq'uitaybotic jilel te cat'eltique? —xiic.
6Jich yu'un te faraón la yal mandal ta chajbanel scarreta yu'un guerra, soc la yic' bael te soldadoetic yu'une. 7Ay jbajc' soc lajunwinic (600) carretaetic la yic' bael te c'ax buen lequique, soc xan spisil te carretaetic yu'un Egipto. Ta jujun carreta ay mach'a yich'oj yat'el ta mandal tey a. 8Te Cajwaltic la stulantesbey yo'tan te faraón swenta yu'un ya snuts te israeletique. Ma tic'uc la yaiyic a te smuc'ul yu'el Cajwaltic te la sloq'ues tel tey a.
9Te egipcioetic soc spisil te soldadoetic yu'unic, soc te carretaetic soc caballoetic tal snutsic te israeletique. Tey la staic a ta sti'il mar, ta bay sts'eel Pi-hahirot soc ta bay stojol Baal-zefón, tey spasoj scampamentoic a. 10C'alal la yaiyic stojol te israeletic te nopolix ay tel te faraón soc te egipcioetic, bayal a xiw yo'tanic yu'un, jajch' sc'anbeyic coltayel te Cajwaltique. 11Soc jich la yalbeyic te Moisés:
—¿Yu'un bal ma wejt'ix muquenaletic ta Egipto te la aloq'uesotic tel tey a, te tal awac' lajucotic ta muc'ul jochol taquin q'uinale? ¿Bistuc jich la apasbotic? ¿Bistuc la aloq'uesotic tel ta Egipto? 12Ja' swentail te jich la caltic ta atojol ta Egipto: “Ac'a at'ejucotic ta swentaic te egipcioetique”, xootic. Melel ja' lec xan a te mozoinele, te talotic ta lajel ta muc'ul jochol taquin q'uinale —xiic.
13Te Moisés la sjac':
—Ma me xiwex, junuc me awo'tanic. Ya me awilic yo'tic te bit'il ya scoltayotic te Cajwaltique. Ma me ayuc bi ora ya awilic xan te egipcioetic te ya awilic yo'tique. 14Ma me xamel awo'tanic, ja' me ya spas guerra ta awentaic stuquel te Cajwaltique —xi'.
15Te Cajwaltic, jich la yalbey te Moisés:
—¿Bi yu'un te ya ac'anbon te coltayele? Pasa ta mandal te israeletique, ac'a beenuquic bael. 16Te ja'ate toya te abastone, jich me ya sq'uep sba te mare. Tey me ya xc'axic bael a te israeletique. 17Te jo'one ya jtulantesbey yo'tanic te egipcioetique, jich me ya snutsex. Ja'uc me to, tey me ya cac'bey yil cu'el a te faraón soc spisil te soldadoetic yu'un te ayic ta carreta soc ta caballoetique. 18C'alal la cac'beyix yil cu'el a te faraón soc te soldadoetic yu'une te ay ta scarretaic soc scaballoic, jich me ya sna'ic te jo'on Ajwalilone —xi' te Cajwaltique.
19Te ch'ul abat yu'un Dios te neelajem yu'un te israeletic, bajt' ta spatic, soc nix te balal tocal la syantesbey yawil, bajt' ta spatic te israeletique. 20Te tocal la smac ta olilal te bay julemic ta onajel te egipcioetique soc te bay onajemiquix te israeletique. Te tocal ta stojolic te egipcioetique, mero ijc' a c'ot ta jyalel. Yan te bay te israeletique sacuben q'uinal tey stuquel a. Jich ma ju' yu'unic te egipcioetic te c'an snutsic ta sjunal ajc'ubal te israeletique.
21Te Moisés la stoy te sc'ab ta stojol mar, jich yu'un te Cajwaltic la yac' tel tulan ic' ta sloq'uib c'aal ta sjunal ajc'ubal.#Sal 77.16-20. La sq'uep sba te mare, cha'q'uejp la yac' sba te ja'e. Te slumile mero taquin a jil. 22Tey c'axic bael a te israeletic#1 Co 10.1-2; Heb 11.29. ta bay taquine. Te bit'il la sjam sba soc la stselan sba te ja'e, jejch' c'ot ta swa'el soc jejch' ta xq'uexen.
23Spisil te caballoetic te carretaetic yu'un te faraón, ochic bael uuc ta nopol spatic. La snutsic bael ja' to c'alal olil mar. 24Ijc' to a te q'uinal te Cajwaltic la yil loq'uel ta yolil te balal tocal soc te c'ajq'ue. Ja' tijbotic jajch'el xiwel yu'un ta stojolic te egipcioetic, jich nax ma tojobic jajch'el ta beel. 25Jajch' ta bolobel yacan te scarretaic, wocoltic xanix a ju' ochel bael yu'unic a. Te egipcioetic la yalbey sbaic:
—Anucotic sujt'el ta stojol te israeletique, melel te Yajwalique ja' ya yac'botic guerra ta swentaic —xiic.
26Ja'uc me to, te Cajwaltic, jich la yalbey te Moisés:
—Toya ac'ab ta stojol te mar swenta yu'un ya me snup' sba te ja'e. Tey me ya xmulic jilel a te egipcioetic soc scarretaic soc te scaballoique —xi' te Diose.
27Te Moisés la stoy jajch'el sc'ab ta stojol te mare. Yac ta sacubel q'uinal a, la sta sba te ja'e, jich a c'ot te bit'il ta neelale. Jich yu'un te egipcioetic te c'an anuquic ta sc'opique, taotic ta ora yu'un te ja'e, jich a mulic coel ta ja' yu'un te Cajwaltique. 28Te c'alal la snup' sba te ja'e, jich te bit'il ay ta neelale, mujc' ta ja' te carretaetic, te caballoetic soc spisil te soldadoetic te ochemiquix bael ta mar ta snutsel te israeletique. Ma'yuc cuxul jilel te soldadoetic yu'un te faraone. 29Yan stuquel te israeletic mero taquin la st'unic c'axel te slumil ja'e, yu'un la sjam sba, cha'tsel la yac' sba te ja'e, jun ta swa'el soc jun ta xq'uexen.
30Jich c'aalil la yich' coltayel te israeletic yu'un te Cajwaltic ta sc'abic te egipcioetique. Te israeletic la yilbeyic sbaq'uetal te egipcioetic te lajemic te xcajetic ta baba mar. 31C'alal la yil israeletic te smuc'ul yu'el Cajwaltic, te bila la spasbey te egipcioetic, la xi'ic te Cajwaltic, jajch' xch'uunic soc la yich'ic ta muc' te yabate, ja' te Moisese.
Currently Selected:
Éxodo 14: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
