Éxodo 22
22
Mandaliletic yu'un bitic ya sujt'esbot sjelol
1“Teme ay mach'a ya yelc'an jcojt' wacax, o jcojt' chij, teme ya smil, o ya xchon, jo'cojt' me ya sujt'esbeyix sjelol teme wacaxe. Yan teme chije, chancojt' me ya sujt'esbey sjelol stuquel.
2“Teme ch'ayal yo'tan tsacot te j'elec' ta bay nae, teme ejch'enaj soc teme laje, te mach'a milawane, ma xju' ya smulin te bit'il laje. 3Yan teme c'aaleltic, ya me smulin te bit'il milawane.
“Te mach'a ya x'elc'aje, ts'acal me ya yac'bey stojol te bila yelc'aneje. O teme ma'yuc staq'uine, ja' me ya yich' chonel, jich me ya stoj a te yeleq'ue.
4“Teme cuxul tabot te yeleq'ue, chican teme wacax, burro, o chij, cheb buelta me ya sujt'esbey sjelol.
5“Teme ay mach'a ya scoltay bael xchamsbalam te ya xba yac'bey sle swe'ele, teme bajt' ta yan awalts'unubil, ya me yac'bey sjelolin te bay mero lec sit te yu'une. Ja' nix me jich teme ja' te ts'usubiltique.
6“Teme ay mach'a ya spas c'ajc', teme la stsac bael c'ajc' te ch'ixtiquile, soc teme la xchic' te trigo te busule, o nopolix ya x'ochix ta set'el a, o spisil laj ta c'ajq'uel te bila ts'unbile, te mach'a la yac' te c'ajq'ue, ya me stoj te bitic laj ta c'ajq'uele.
7“Teme ay mach'a ya yac'bey xq'uejbot staq'uin te spat-xujq'ue, o ay yan sbiluc, teme och j'elec' ta sna te winique, soc teme taot te j'eleq'ue, ya me stoj ta swenta cheb buelta. 8Yan teme ma la staic te j'eleq'ue, jich yu'un te yajwal na ya x'ic'ot bael ta stojol Dios swenta yu'un ya me yal ta jamal te ma ja'uc la sloq'uesbey staq'uin te spat-xujq'ue.
9“Teme ay mach'a ay bila ya sc'an smuquen-yu'unin, teme wacax, burro, chij, o ja' te c'u'il-pac'ale, soc biluc a te ch'ayeme, teme ay mach'a ya yal: “Jo'on cu'un”, teme xie, ta xchebalic ya x'ic'otic bael ta stojol Dios. Te mach'a jamal ya x'albot sc'oplal yu'un te ja' yac ta lo'laywaneje, ja' me smul ya xc'ot. Jich yu'un cheb buelta ya sujt'esbey sjelol te spat-xujq'ue.
10“Teme ay mach'a ya yac'bey ta swenta spat-xujc' te xchamsbalam te ya xcanantaybot yu'une, teme burro, wacax, chij, teme ay laj te chambalame, ejch'enaj, o bajt' ta elc'anel te ma'yuc mach'a la yile, 11jich yu'un te spat-xujc' ya me yalbey ta jamal ta stojol Dios te ma ja'uc la yac' sc'ab stuquele. Jich me ya xc'ot ta yo'tan te yajwal chambalame, soc jich ma ba ya x'ac'bot stoj. 12Yan teme la yil bajt' ta elc'anel te chambalame, ya me stojbey te yajwale. 13Yan teme lajem ta ti'el ta jti'awal ja'mal chambalame, ma xju' ya stoj teme ay to xan jilem te ya yac' ta ilele.
14“Teme ay mach'a ya smajanbey xchamsbalam yan, teme laj ta swenta te chambalame, o teme ejch'enaje, teme ma ba tey ay a te yajwale, ya me stoj. 15Yan teme tey ay a te yajwale, ma me xju' ya stoj, ja' nax me ya stoj te bit'il smajaneje.#Lv 5.14—6.7; Nm 5.5-8.
Mandaliletic te bila lec ta pasel ta stojol yantic soc ta stojol Dios
16“Teme ay mach'a la slo'lay jtul ach'ix te ma macbiluc, teme la sjoin ta wayel, ya me stoj te jayeb ay ta c'anele, soc ya me yic' yinamin. 17Yan teme ma la yac' te stat te ya xnujbin soque, ya me stoj te jich yipal ya xc'anbot te bit'il ay stojol te ach'ix ma nujbinemuque.#Dt 22.28-29.
18“Ma me xawac' xcuxin jtuluc ants te ya sna' yaq'uel chamel.#Dt 18.10-11.
19“Te mach'a ya sta sba soc chambalam, jc'axel me ya yich' chajbanel sc'oplal ta milel.#Lv 18.23; 20.15-16; Dt 27.21.
20“Te mach'a ya yac'bey milbil smajt'an lotil dios, teme ma ja'uc ya yac'bey stuquel te Cajwaltique, jc'axel me ya yich' chajbanel sc'oplal ta milel.#Dt 17.2-7.
21“Te jyanlum te nainem ta awolilic, ma me xawuts'inic, soc ma me xawaq'uic ta woclajel, melel jich nix me jyanlum c'oex ta Egipto.
22“Ma me xawuts'inic te me'ba antsetic soc te me'ba alaletique.#Ex 23.9; Lv 19.33-34; Dt 24.17-18; 27.19. 23Teme la awuts'inic, ya me sc'anbonic coltayel, jich yu'un ya me xboon ta scoltayel. 24Ja' yu'un ta swenta yip te quilimba, ya me jmilex ta puñal. Jich nix me ya xjilic ta me'ba ants te awinamic soc ta me'ba alaletic te anich'nabique.
25“Teme ya awac'bey smajanbat ataq'uin jtul te ma'yuc bila ay yu'un te banti ay te lum cu'une, ma me jichucat te bit'il mach'a ya sc'anbey sjol, ma me xawac' te ya yac'bey sjol te ataq'uine.#Lv 25.35-38; Dt 15.7-11; 23.19-20. 26Teme la yac'bat jilel ta prendal sc'u' yu'un te smajane, sujt'esbeya bael ta mal c'aal, 27melel ja' nax me jlijc' te sc'u' te ya smuc sba yu'un a te sique. Teme ma jichuc ya apasbeye, ¿bila ya sc'u'in ta wayel? Jich yu'un teme ya sc'anbon coltayele, ya me jcoltay, melel jc'uxtaywanejon jtuquel.#Dt 24.10-13.
28“Xujt' ma me xabolc'optay te Diose, soc ma me xaboltesbey sc'oplal te mach'a ya xmandalaj ta alumale.#Hch 23.5.
29“Ma me wocoluc ya awich'bonic tel jmajt'anin sba sit te awawal soc te sba ya'lel te ats'usube.
“Ya me awac'bonic te sba anich'anique. 30Te sba yalatac te awacaxic soc te achijique, te c'alal ya x'ayinic, juqueb me c'aal ya sjoin te sme'ique. Teme la staix waxaqueb c'aale, ya me awac'bonic.
31“Te ja'exe ch'ultesbiluquex me ta jtojol. Ma me xati'beyic sbaq'uetal lajem chambalam te milbil yu'un jti'awal ja'mal chambalam ta yol q'uinal.#Lv 17.15. Ac'beyaic me sti' te ts'i'etique.
Currently Selected:
Éxodo 22: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
